Министерот за јавна администрација Горан Минчев денес се обрати на состанокот на Секторската работна група за реформи во јавната администрација, нагласувајќи ја клучната улога на реформите во унапредувањето на институционалната ефикасност и напредокот на европската интеграција на државата.

Тој посочи дека позитивниот фидбек од Европска комисија претставува значајно признание за досегашните напори и дополнителен поттик за засилување на реформскиот процес.

Во своето обраќање, министерот подвлече дека јавната администрација зазема централно место во реформската агенда и има суштинска улога во обезбедувањето функционални институции и квалитетни услуги.

– Ова е силна потврда дека се движиме во правилна насока, но и дополнителен мотив со уште поголема динамика да продолжиме со реформскиот процес – истакна Минчев.

Тој посочи дека имплементацијата на Стратегијата за реформа на јавната администрација 2023–2030 се одвива со висок степен на реализација, при што се спроведени 84% од предвидените активности. Паралелно, како што нагласи, воспоставена е нова системска рамка преку клучни законски решенија со кои се гради интегриран, мерит-базиран и професионализиран систем, насочен кон резултати и зголемен институционален интегритет.

Посебен акцент во обраќањето беше ставен на развојот на човечките ресурси, управувањето со квалитет и дигиталната трансформација, како и на потребата од доследна имплементација на реформите.

– И покрај силната нормативна и институционална основа која ја изградивме, најголемиот предизвик останува доследната и квалитетна имплементација на реформите – нагласи министерот, додавајќи дека фокусот во наредниот период ќе биде ставен на операционализација на законската рамка и постигнување конкретни резултати.

Минчев кажа дека Министерството за јавна администрација останува целосно посветено на реформската агенда и на испорака на мерливи резултати.

– Нашата порака до партнерите е јасна: потребна е координирана, таргетирана и имплементациски ориентирана поддршка која ќе произведе реални, мерливи и одржливи резултати – истакна Минчев, нагласувајќи дека крајната цел е реформите да се преточат во видливи придобивки за граѓаните и забрзување на европскиот пат на државата.

The post ОЦЕНКИТЕ ОД ЕВРОПСКАТА КОМИСИЈА СЕ СИЛНА ПОТВРДА Реализирани 84% од активностите за реформи во администрацијата appeared first on plusinfo.mk.

СДСМ ја манипулира јавноста ширејќи паника за инфлацијата, обвинува ВМРО-ДПМНЕ тврдејќи дека економските политиките на Владата даваат резултати во услови на глобална криза и дека инфлацијата се стабилизира.

Соопштението на ВМРО-ДПМНЕ е реакција на денешното соопштение за инфлацијата.

„Очигледно е дека СДСМ повторно се обидува да ја манипулира јавноста преку селективно користење статистики и ширење паника, свесно премолчувајќи го контекстот и причините за сезонските разлики во цените, притоа заборавајќи дека токму тие ја донесоа државата до економски колапс, рекордна инфлација и целосно урнат животен стандард.

Кога СДСМ зборува за инфлација, треба да се потсетат дека во нивно време инфлацијата достигна двоцифрени нивоа, а граѓанџите плаќаа најскапа храна и струја во историјата, односно живееја со 150 денари на ден. Денес инфлацијата постепено се стабилизира во услови на глобална економска криза, енергетски шокови и последици од војната во Европа“, велат од ВМРО-ДПМНЕ.

Од партијата додаваат дека инфлацијата во април, споредено со март, изнесува 1,3 проценти.

„Она што го премолчува СДСМ е дека годишната стапка од 5,7 проценти е резултат и на споредбената основа, бидејќи лани во овој период беа активни мерките за велигденската кошничка, кои привремено ги намалија цените на одредени производи“, наведуваат од ВМРО-ДПМНЕ.

Партијата тврди дека Владата презема мерки за заштита на стандардот на граѓаните и потсетува дека биле намалени акцизите на горивата.

„За разлика од СДСМ, кои оставаа кризи без решенија и ја туркаа државата во долгови без ефект, ВМРО-ДПМНЕ работи одговорно, домаќински и со конкретни политики за економска стабилност и поддршка на граѓаните“, се додава во реакцијата.

The post СДСМ МАНИПУЛИРА, ВО НИВНО ВРЕМЕ ИНФЛАЦИЈАТА БЕШЕ ДВОЦИФРЕНА Цените се стабилизираат со политиките на Владата appeared first on plusinfo.mk.

Вицепремиерот задолжен за добро владеење, Арбен Фетаи, преку социјалните мрежи сподели фотографија од Тајланд, со што самиот потврди дека не е во земјава и дека не ги извршува редовните работни обврски.

Фотографијата, објавена од Бангкок, го прикажува Фетаи во лежерно издание, што дополнително ги засили перцепциите дека станува збор за приватно патување, а не за службена посета.

Неговото отсуство од владините активности не е ново. Подолг период тој не присуствува на седници и не се појавува на работното место, што во јавноста отвори дилеми околу неговиот статус во извршната власт.

Дополнително, министерот за здравство Азир Алиу веќе потврди дека Фетаи извесно време не е присутен и дека не комуницира редовно со владините структури, што само ги засили шпекулациите за неговата улога и иднина во Владата.

Иако официјално не е разрешен од функцијата, ниту има поднесено оставка, во јавноста сè погласно се поставува прашањето дали неговото отсуство е привремено или најавува целосно повлекување од владините позиции.

Премиерот Христијан Мицкоски неодамна изјави:

„Разговаравме јас и Фетаи лично. И тој лично ми пренесе дека во иднина не се гледа повеќе во Владата која што јас ја предводам. Тоа беше пред неколку недели. Тој рече дека ќе се врати во Брисел, имајќи го предвид неговото образование, искуство во рамките на институциите во Брисел”.

Премиерот додеде дека смета дека тоа би била добра можност тој да биде некаков специјален пратеник во рамките на Европскиот парламент, на бриселската администрација.

The post ИМА ВРЕМЕ ЗА БРИСЕЛ, ПРВО ПРОШЕТКА ВО ТАЈЛАНД По толку време добро владеење, министерот Арбен Фетаи заслужи малку добра забава appeared first on plusinfo.mk.

Претседателот на Владата, Христијан Мицкоски во интервју за „Заспиј ако можеш“ на Алфа телевизија истакна дека македонската влада е една од првите влади во Европа која оди со намалување на даноците за горивата. Тој потсети дека оваа влада враќа 2,5 милијарди евра стари долгови на претходните влади.

– Се обидувам врз основа на оние информации кои ги имам и добивам од страна на институциите да ги антиципирам предизвиците и со свои предлози да излезам пред колегите во Владата да дебатираме и да носиме решенија, и тие решенија треба да бидат во насока да го олеснат животот на граѓаните во услови на криза, а не со внесување на дополнителна паника или параноја да им го правиме и онака тешкиот живот, уште потежок – изјави премиерот Мицкоски.

Тој додаде дека нема потреба да се прави естрада во ваква ситуација, туку треба Владата да си ја врши работата да ги антиципира предизвиците и да носи решенија и тоа го прави во моментот.

– Ние како единствена влада во регионот и една од ретките две или три во Европа, повлековме чекор кој е директно од буџетот со намалување на ДДВ, робусен чекор иако пред тоа бевме свесни дека тоа ќе има генерално фискални импликации кои можеби ќе ни бидат товар. Но, тоа не е единствениот предизвик со кој ние се соочуваме оваа година. Ние како влада треба да вратиме 2,5 милијарди евра стари долгови кои ги направиле претходните влади. Имаме колективни договори кои треба да ги испорачаме за нашите колеги коишто своите примања ги добиваат од владата или од владините институции, што значи зголемување на платата. Излезе Државниот завод за статистика во јануари повторно имаме близу 9% пораст на платата споредено со истиот месец минатата година. Значи продолжуваат платите да растат иако од страна на опозицијата имаше хистерија дека не растеле платите. Ја имаме кризата во заливот, ги имаме овие фискални мерки кои директно значат намалување на цената на горивото – потенцираше премиерот Мицкоски.

Покрај овој предизвик, Мицкоски нагласи дека тоа што не го гледаат граѓаните, а кое Владата го работи е враќање на т.н. солидарен данок на минатата влада.

– Сето ова се сериозни предизвици со кои ние се соочуваме, од друга страна притисоците за промена на Устав, од друга страна безбедносни ризици коишто мораме да ги антиципираме и да внимаваме. Така што сето ова како тема мора да се владее, да се претпостави, да се антиципира и да се понудат решенија – изјави премиерот Мицкоски.

Тој вели дека најлесно е да се создава параноја и да се плашат граѓаните како што прават други, но владата тоа што го прави е да внесе доза на оптимизам, ведрина дека се владее состојбата и дека владата знае што прави, дека прави добро за граѓаните.

– Мислам дека тоа го правиме засега, ја одржавме ценовната стабилност, имаме најниски цени на горивата во регионот и едни од најниските во Европа, тука зборувам на бензините и дизел горивото. Голем дел од граѓаните на соседните земји доаѓаат да полнат гориво кај нас. Ако во времето симбол за македонските граѓани и за соседните држави беше ние да коленичиме и да бараме милост, сега е поинаква состојбата, ние сме тие кои рефлектираат стабилност, сигурност, ние сме тие коишто нудиме решенија за граѓаните од соседните држави – дециден е премиерот Мицкоски.

The post ГО НАМАЛИВМЕ ДДВ-ТО, НО ВРАЌАМЕ И СТАР ДОЛГ ОД 2,5 МИЛИЈАРДИ Владата е меѓу првите во Европа кои ги скратија давачките за бензините appeared first on plusinfo.mk.

Нема простор за загриженост и снабдувањето со горива во државата е стабилно, порача премиерот Христијан Мицкоски по средбата со претставници на нафтената индустрија, на која се разговарало за состојбата со нафтените деривати во услови на глобални енергетски предизвици.

Премиерот информираше дека на состанокот се анализирала актуелната состојба на пазарот, особено во контекст на кризата на Блискиот Исток и можните влијанија врз снабдувањето со енергенси.

– Разговаравме за актуелната состојба со нафтените деривати, имајќи ја предвид кризата на Блискиот Исток и глобалните предизвици во оваа индустрија. Заклучивме дека нема простор за загриженост и дека состојбата е целосно под контрола. Залихи на горива има и нафтените потреби целосно се задоволуваат – напиша Мицкоски на својот профил на Фејсбук.

Тој посочи дека институциите внимателно ќе ја следат состојбата и дека ќе реагираат доколку се појават потреби за дополнителни мерки.

– Ќе продолжиме будно да ја следиме состојбата и ќе реагираме во зависност од реалните потреби – додаде премиерот.

Изјавата на Мицкоски доаѓа во период на зголемена неизвесност на светските енергетски пазари, поради ескалацијата на конфликтите на Блискиот Исток и можните последици врз глобалното снабдување со нафта и нафтени деривати.

The post НЕМА ПРОСТОР ЗА ПАНИКА, ЗАЛИХИТЕ СЕ СТАБИЛНИ Мицкоски вели дека состојбата со горивата е под контрола appeared first on plusinfo.mk.