Заменик претседателот на Владата и министер за транспорт, Александар Николоски, денеска од Неготино го честиташе празникот Св. Трифун, традиционално посветен на лозарите и винопроизводителите, и посака многу добар род и поволни откупни цени.

На одбележувањето на, како што нагласи, најзначајниот празник за Тиквешкиот Регион, Николоски истакна дека „убавите вести веќе стигнаа“ и дека „Владата ја заврши својата обврска и целосно се исплатени субвенциите за сите оние кои макотрпно работат и произведуваат“.

-„Тоа, се надевам, ќе биде стимул за оваа сезона да има добар род, а земјоделците да бидат мотивирани да дадат максимум. Ние ќе продолжиме да ги поддржуваме и да го стимулираме земјоделието. Цените оваа година се навистина добри, а се надевам дека следната сезона ќе бидат уште повисоки. Трудот мора да се цени, а домашното производство да се стимулира“, изјави Николоски.

Тој додаде дека македонските компании, особено винарии, веќе се конкурентни на меѓународниот пазар.

-„Пред неколку дена бев во Париз, каде македонските винарии се натпреваруваа рамо до рамо со најдобрите европски. Беше гордост да се види како нашите компании имаат врвен квалитет, а во некои производи се дури и пред европските винарии“, рече Николоски.

Министерот за транспорт и потпретседател на Владата најави продолжување на поддршката за инфраструктурата, која е клучна за полесна комуникација и развој на регионот.

-„Градоначалничката има амбициозна агенда, а Владата ја поддржува. Со почетокот на градежната сезона очекувам започнати проекти да се завршуваат и нови проекти да се иницираат“, додаде Николоски.

На одбележувањето на празникот во Неготино, Демир Капија и Кавадарци, Николоски присуствуваше заедно со министерот за земјоделство, Цветан Трипуновски.

Нема кратење на субвенции, но приоритет ќе добијат вистинските земјоделци што егзистираат од земјоделство. Вака одговори денеска министерот за земјоделство, Цветан Трипуновски, на новинарско прашање, по закројувањето винова лоза во Кавадарци, во чест на празникот Свети Трифун, што се смета за заштитник на лозарите и винарите.

– Имаме сериозна и навремена поддршка и реформи во земјоделскиот сектор, што ќе значат сериозно зголемување на продукцијата. Она што е новина можеби во програмата за 2026 година, е, јасната распределба. Приоритет ќе добијат вистинските земјоделци, што егзистираат од тоа. Во изминатите години се воочени таканаречени ловци на субвенции, кои не обработуваат земјоделски површини, а сакаат да бидат корисници на субвенции. Ова сметам дека не е ниту фер кон вистинските земјоделци, ниту пак е законски. Затоа оваа година најавуваме дека ќе имаме сериозна контрола на терен, за парите да завршат кај вистинските лозари, земјоделци, што се многу важни за економијата и руралната средина – појасни министерот за земјоделство, шумарство и водостопанство.

Во новата програма се предвидувало, минималната површина да биде 0.5 хектари, за да се биде корисник на земјоделски субвенции. Трипуновски подвлече дека земјоделството е еден од приоритетите.

Запрашан кога ќе бидат одблокирани средствата од ИПАРД програмата, тој рече дека платежната агенција со новиот менаџерски тим, работела на отстранување на сите забелешки што биле нотирани и оти се очекува многу бргу агенцијата да почне нормално да функционира. Агенцијата, посочува тој, и сега работи нормално, со тековните плаќања во делот на субвенции и во врска со ИПАРД апликации.

На новинарско прашање, тој информираше дека за оваа година, веднаш по носењето на програмата, традиционално пред овој празник, вчера биле исплатени субвенциите кон лозарите. На над 12 500 лозари, исплатени биле речиси осум милиони евра. На почеток на наредна недела, најавува исплата на субвенците и за овоштарите.

Трипуновски уверува дека навремено се исплаќаат и ќе се исплаќаат сите субвенции.

The post СУБВЕНЦИИ, ДОБАР РОД И ВИНО Николоски најави поддршка за лозарите и нови инфраструктурни проекти appeared first on plusinfo.mk.

Винарската визба „Тиквеш“ оваа година слави голем јубилеј – 140 години организирано производство на вино и жестоки пијалаци. Јубилејот, велат од компанијата, е потврда за континуитетот на македонската винска традиција, но и симбол на модерната визија и лидерството што ја позиционира „Тиквеш“ како регионален лидер и глобално афирмиран бренд.

Во изминатите две децении, компанијата реализираше инвестиции од над 45 милиони евра, насочени кон модернизација, дигитализација и производство на вина со врвен квалитет. Само во 2024 година, извозот достигна 32,7 милиони евра, а повеќе од половина од приходите доаѓаат токму од странските пазари.

„Она што го прави ‘Тиквеш’ уникатен е спојот на 140-годишната традиција со најсовремените светски трендови во енологијата и лозарството. Повеќе од еден век растеме заедно со нашите лозја, нашите луѓе, нашите партнери и потрошувачите, градејќи наследство втемелено во страст, посветеност и доверба“, велат од ВВ „Тиквеш“.

Во рамки на стратешката трансформација, винарницата воведе современи практики во лозјата, партнерираше со лозарите, а со отворањето на бутик-винарницата „Domaine Lepovo“ и аквизицијата на француската „Château de Gourdon“, дополнително го зацврсти интернационалниот карактер на брендот. Вината на „Тиквеш“ денес редовно освојуваат највисоки оценки и награди од реномирани светски вински експерти, меѓу кои и Роберт Паркер.

„Нашата визија за иднината е преку вложувања во обновливи извори на енергија и технологии за намалување на јаглеродниот отпечаток, воведување практики и дигитални решенија за прецизно лозарство, органско производство и заштитени географски ознаки, да бидеме двигател на промените и зелената трансформација на винската индустрија во регионот“, истакнуваат од „Тиквеш“.

Во чест на 140-годишнината, компанијата организираше специјален гроздобер за претставници на медиумите во органски сертифицираните лозови насади на поседот Лепово. Гостите лично учествуваа во бербата на каберне совињон, се запознаа со современите агро-технички практики и дегустираа вина од ексклузивната серија „Domaine Lepovo“.

Со овој настан, „Тиквеш“ уште еднаш ја потврди својата врска со лозјето, изворот на секое добро вино, и ја спои македонската винска историја со глобалните трендови, градeјќи бренд кој е „Бескрајно твој“.

The post „ТИКВЕШ“ СЛАВИ 140 ГОДИНИ ТРАДИЦИЈА Од Лепово до Франција, винаријата станува глобален вински бренд appeared first on plusinfo.mk.

Според податоците, „Тиквеш“ постигнал и највисоки просечни цени за сортите „вранец“ и „смедеревка“, кои традиционално имаат најголемо учество во откупот. Конкретно, „Тиквеш“ за откупениот „вранец“ постигнал просечна цена од 13,6 денари, при што просечната цена на „вранецот“ наменет за производство на квалитетни црвени вина достигнал 14 денари за килограм, а за производство на розе вина – 12,7 денари за килограм, што е повисоко од просечната цена за оваа сорта што ја постигнале сите винарници заедно, а која изнесува 11,8 денари. Слична е и ситуацијата кај откупот на „смедеревката“, каде „Тиквеш“ постигнал просечна цена од 11 денари за килограм, што е за еден денар повисоко од вкупната постигната просечна цена за откупената „смедеревка“.

За откупеното грозје од другите сорти, „Тиквеш“ постигнал дури и повисоки цени, кои во просек достигнуваат и 16,5 денари за килограм откупено грозје од сортата „ризлинг“, 16,4 денари за „шардоне“, 16,1 денари за „рајнски ризлинг“, по 17 денари за сортите „мерло“ и „каберне совињон“ и 19,7 денари во просек за откупеното грозје од сортата „темјаника“. Сите овие постигнати цени во просек се повисоки, некаде и неколкукратно, во однос на вкупните просечни цени за годинешниот откуп.

– Ваквите податоци се најдобриот показател и доказ дека „Тиквеш“ ги исполнува ветувањата кон своите партнери – лозарите. Оние што ги почитуваа и се раководеа според утврдените параметри за квалитет на грозјето беа наградени со многу повисоки цени за предаденото грозје од просечните, што секако е посакуван резултат кон кој треба да се стремат сите – изјави претседателот на Управниот одбор на „Тиквеш“, Светозар Јаневски.

Тој напоменува дека „Тиквеш“ и понатаму ќе остане доследен на својата стратешка определба соодветно да го стимулира и наградува квалитетот, затоа што најважен предуслов за производство на врвно вино е токму квалитетното грозје.

– Како општествено одговорна компанија „Тиквеш“ од своја страна и понатаму ќе продолжи доследно да ги почитува сите преземени договорни обврски кон лозарите, но со право го очекува истото и од нив. Истовремено, ние и понатаму ќе продолжиме да инсистираме во Министерството за земјоделство, во Владата и кај останатите релевантни чинители, да се воведат светски стандарди во лозарството и винарството во Македонија, што значи и воспоставување систем за поддршка на развојот на овие гранки кој нема да зависи од политиката и интересите на поединци, туку исклучиво од пазарните механизми. Само така ќе можеме да бидеме конкурентни на светските пазари и на вистински начин да ја промовираме земјата како производител на висококвалитетно вино – дециден е Јаневски.

Тој објасни дека од годинава винарниците ќе бараат од своите кооперанти да почитуваат одредени стандарди кои всушност ги налага самото производство на одредените брендови. Тоа е политика на енолозите а ќе биде нужно за развојот на винската индустрија во земјава.

– Лозарството секогаш било политика и во него владеел хаос. Во оваа гранка треба многу да се промени ако сакаме Македонија да биде винска земја. Ни претстои долг пат. Лозјата не се одржуваат како што треба. Има многу мртви дрва, многу напуштени лозја. И тоа годинава го расчистува Министерството за земјоделство – рече Јаневски, и додаде дека целта е сите винарници во земјава да работат со исти стандарди.

The post „ТИКВЕШ“ И ГОДИНАВА ОТКУПИ НАЈМНОГУ ГРОЗЈЕ ПО ПОВИСОКИ ЦЕНИ Винската индустрија бара ред и стандарди appeared first on plusinfo.mk.