Сте се нашле ли некогаш во друштво во кое некој почнува да зборува за танини, тело, завршница и идеална температура за служење на виното, а вие всушност само се прашувате едно – дали ми е вкусно?

Ако одговорот е да, можеби тоа е сосема доволно.

Винскиот свет долго време беше полн со правила – како треба да се пие виното, од каква чаша, со која храна и во каква пригода. Но, сè повеќе се наметнува поедноставен пристап: виното не мора да биде тест на знаење ниту начин да покажете колку добро го познавате винскиот бонтон.

Нема правила. Сериозно.

Мраз во виното? Може.

Кола? Ако ви одговара, зошто да не.

Розе кога надвор не е 30 степени? Секако.

Послатко црвено вино? И тоа.

Поентата не е дека старите правила треба целосно да се отфрлат. Тие постојат со причина и можат да помогнат од виното да се извлече максимумот. Но, постои голема разлика меѓу „ова се препорачува“ и „ова мора“.

Повеќе за ова прочитајте ТУКА.

The post ВИНСКИОТ СНОБИЗАМ ИЗЛЕГУВА ОД МОДА За да уживате во виното, повеќе не мора да ги знаете сите правила appeared first on plusinfo.mk.

Додека Горан Бреговиќ со децении е едно од најпознатите имиња на регионалната музичка сцена, неговиот помлад брат Предраг избрал сосема поинаков живот. Наместо рефлектори, концерти и медиуми, тој се определил за мир и приватност. За него јавноста најмногу дознала токму преку приказните на славниот музичар, кој во неколку наврати зборувал за семејството и детството.

Браќата во детството биле разделени по разводот на нивните родители. Горан останал со мајка му Бoрка во Сараево, додека Предраг заминал со татко му Фрањо во Ливно. Подоцна, кога станал полнолетен, Предраг се вратил во Сараево и се запишал на факултет.

Горан еднаш зборувал и за физичките сличности меѓу него, брат му и нивниот татко.

– На татко ми физички личам, низок сум, имам криви нозе, но и двајцата сме вредни – раскажал тој. За Предраг, пак, рекол дека повеќе ја наследил мајчината, црногорска страна: Висок е, убав, има големи раце – пренесуваат регионалните медиуми.

Иако не сака да биде во центарот на вниманието, Предраг води интересен и прилично необичен живот. Најмногу време поминува во Бешка, место во Срем на брегот на Дунав, каде што се занимава со лозарство и произведува вино и ракија.

Семејната приказна на Бреговиќ има и уште еден важен дел. Неговиот татко Фрањо подоцна во Сплит основал ново семејство и во 1959 година ја добил ќерката Дајана. Полусестрата на Горан и Предраг, Дајана Бреговиќ Мариќ, починала ненадејно на 61-годишна возраст. Таа била особено поврзана со семејното презиме, па на еден од своите синови му го дала презимето Бреговиќ, бидејќи нејзините браќа немале машки потомци.

The post ГОРАН БРЕГОВИЌ И БРАТ МУ БИЛЕ РАЗДВОЕНИ ПО РАЗВОДОТ НА РОДИТЕЛИТЕ Помладиот брат на музичката легенда живее мирен живот во природа appeared first on plusinfo.mk.

Со 21 нова награда освоени на три престижни меѓународни вински натпревари – Balkans International Wine Competition 2026, Vinarium International Wine Contest 2026 и Concours Mondial de Bruxelles 2026 – Винарската визба „Тиквеш“ уште еднаш ја потврди својата позиција како најнаградувана винарница во Југоисточна Европа и еден од најуспешните амбасадори на македонското вино на светската сцена.
На годинешното издание на Balkans International Wine Competition, најзначајниот вински натпревар посветен на вината од Балканот, „Тиквеш“ освои вкупно 11 награди, меѓу кои два двојни златни медали за вината „Bela Voda Red 2022“ и „Barovo Red 2022“, како и четири златни и пет сребрени медали. Овој резултат е уште една потврда за лидерската позиција на „Тиквеш“ во регионот.
Особено значаен успех „Тиквеш“ оствари и на Vinarium International Wine Contest 2026, еден од најреномираните вински натпревари во Централна и Источна Европа што се одржува во Романија, каде учествуваше што за првпат. На натпреварот, кој се организира под покровителство на Меѓународната организација за лозарство и винарство (OIV), „Тиквеш“ освои шест медали, меѓу кои и највисокото признание – Голем златен медал, за виното „Babuna Red 2023“, како и четири златни и еден сребрен медал. Впечатлив е и фактот што, покрај „Тиквеш“, само уште едно македонско вино беше наградено на овој натпревар.
Нови значајни признанија пристигнаа и од Concours Mondial de Bruxelles 2026, еден од највлијателните и најреспектирани светски вински натпревари, познат по исклучително строгите критериуми за оценување и интернационалното жири составено од врвни вински експерти. На ова натпреварување „Тиквеш“ освои четири медали, и тоа два златни и два сребрени, потврдувајќи ја конкурентноста на своите вина и на најпребирливите меѓународни пазари.
Меѓу најнаградуваните вина на „Тиквеш“ на овие три натпревари се „Bela Voda Red 2022“, „Barovo Red 2022“, „Domaine Lepovo Grand Cuvée 2023“, „Babuna Red“ од бербите во 2022 и 2023 година, „Babuna White 2025“ и „Luda Mara Vranec 2023“, кои уште еднаш ја потврдија својата препознатливост и конзистентен квалитет пред меѓународните вински експерти.

– Освоените признанија на три исклучително реномирани меѓународни натпревари претставуваат силна потврда за континуитетот на квалитетот што го создаваме и за успешноста на нашата стратегија за развој на врвни вина со јасен идентитет, како рефлексија на тероарот. Овие награди имаат особено значење за нашето позиционирање на странските пазари, бидејќи претставуваат независна и релевантна потврда за квалитетот на нашите вина. Воедно, секое вакво признание придонесува и за зајакнување на имиџот на Македонија како земја што создава вина со светски квалитет и има сѐ поголема препознатливост на меѓународната винска сцена – велат од „Тиквеш“.
Со преку 100 меѓународни награди годишно, освоени на најзначајните светски вински натпревари, и со присуство на бројни странски пазари, „Тиквеш“ продолжува да ја зацврстува својата позиција како најнаградувана винарница во Југоисточна Европа и еден од најзначајните промотори на македонското вино во светот.
Новите 21 меѓународна награда претставуваат уште една потврда дека преку континуирани инвестиции во лозарството, современите производствени практики и бескомпромисната посветеност на квалитетот, „Тиквеш“ успешно го позиционира македонското вино меѓу вината од најценетите вински региони во светот.

The post НОВИ МЕЃУНАРОДНИ ПРИЗНАНИЈА ЗА „ТИКВЕШ“ Освоени 21 награда на три престижни вински натпревари appeared first on plusinfo.mk.

Умереното консумирање вино може да го забави биолошкото стареење кај мажите, покажува ново истражување објавено во научното списание „International Journal of Public Health“.

Што значи „биолошка“ возраст? Луѓето не стареат со иста брзина. Некои се биолошки „помлади“ од своите години, додека други стареат побрзо. Освен календарската (хронолошка) возраст, постои и биолошка возраст – која се мери преку здравствената состојба на организмот (крвни анализи, воспаленија, работа на органите и сл.).

Токму оваа биолошка возраст е поважна, бидејќи подобро покажува какво ни е здравјето и колкав е ризикот од болести.

Како било направено истражувањето?

Во студијата биле анализирани податоци од повеќе од 22.000 возрасни лица од јужна Италија. Истражувачите ги поделиле испитаниците според тоа колку вино пијат – од оние што воопшто не пијат, до оние што пијат многу.

Потоа ја споредиле нивната биолошка и хронолошка возраст, за да видат дали постои разлика во стареењето.

Повеќе за ова прочитајте ТУКА.

The post УМЕРЕНОТО ПИЕЊЕ ВИНО МОЖЕ ДА ГО ЗАБАВИ СТАРЕЕЊЕТО КАЈ МАЖИТЕ Најдобар ефект – една до две чаши дневно appeared first on plusinfo.mk.

Американскиот медиум „Си-ен-ен“ пишува за Северна Македонија, како европска туристичка дестинација, што, според медиумот, е една од оние кои неправедно остануваат во сенка на најпопуларните туристички центри. Во најновото издание на туристичкиот билтен на „Си-ен-ен Травел“, Македонија е опишана како „драматично планинска дестинација“, со природни пејзажи што комбинираат зелени долини и врвови покриени со снег, со сончева клима и разновидна гастрономија, локално специфична и многу поврзана со традицијата.

Според Си-ен-ен, повеќето посетители на Европа ги фокусираат своите патувања во Франција, Шпанија и во Италија, но на континентот има импресивни 44 земји признати од ОН кои можат да се истражуваат.

„На пример, Северна Македонија, драматично планинска дестинација веднаш северно од Грција, е достојна за поголемо туристичко внимание. Тука е нејзиниот пејзаж со бујни зелени падини и снежни карпи и нејзината вкусно разновидна кујна, со низа јадења на маса што се менуваат од една долина до друга. Таа е благословена и со сончева клима, што помага зеленчукот да биде богат и сочен, а вината од нејзините лозја да бидат робусни и изобилни“, пишува Си-ен-ен.

Според анализата на медиумот, земјава се издвојува како дестинација што нуди слично искуство, но без метеж, долги редици и високи цени.

Во текстот се нагласува дека сончевата клима придонесува за квалитетот на локалните производи – зеленчукот е сочен и богат, додека вината од домашните лозја се препознатливи по својот интензивен вкус. Токму оваа комбинација на природни услови и традиција ја прави земјата атрактивна за љубителите на автентични искуства.

Особено внимание во текстот е посветено на Охридското Езеро и на црквата „Свети Јован Канео“, кои се прикажани како еден од највпечатливите симболи на регионот.

Покрај Охрид, се издвојуваат и други атракции – од Старата скопска чаршија до кањонот Матка, црквите, манастирите, како и винските региони и националните паркови, кои нудат разновидни искуства на мала географска површина.

„Голем дел од она што може да се види во Северна Македонија лежи покрај малите, кривулести патишта што се протегаат низ селскиот предел по долинските подови. Овие патеки се исполнети со беспрекорно сочувани византиски манастири, некои стари повеќе од 1.000 години, исполнети со украсни дрвени изработки со инкрустација од седеф, позлатени лустери и антички фрески. Меѓу најпознатите е Бигорскиот манастир, каде што прифатлива куќа за гости ги пречекува изморените планинари од блискиот Национален парк Маврово. Таму, брилијантните врвови на рубините и топазните дрвја на кривулестото октомвриско возење можат да ја засрамат секоја разгледница од Нова Англија“, пишува Си-ен-ен.

Свети Наум, кој стои на работ на Охридското Езеро од 905 година, е уште еден добро познат манастир и вреди да се посети. Охридското Езеро, чии блескави води се наоѓаат јужно од Маврово на границата со Албанија, е бисер на круната на Северна Македонија.

„Охридското Езеро, кое е дел од светското наследство на УНЕСКО, опкружено со планини, привлекува посетители од целиот Балкан секое лето. Некои доаѓаат за екотуризам. Езерото кое се напојува од извори се гордее со околу 1.200 видови растенија и животни. Други доаѓаат за по традиционално туристичко искуство: купување слатководни бисери по чаршијата во историскиот град Охрид на североисточниот брег на езерото или пиење коктели со шприц во баровите на плажата сместени покрај брегот. Друг прекрасен национален парк, Галичица, го прегрнува источниот брег со спектакуларното Преспанско Езеро, југоисточно од тој парк“.

The post БАТАЛЕТЕ ФРАНЦИЈА, ШПАНИЈА, ИТАЛИЈА, ОДЕТЕ ВО МАКЕДОНИЈА! Си-ен-ен оцени дека земјава е неправедно во сенка appeared first on plusinfo.mk.

На 26 ноември, во уникатниот амбиент на SushiCo во Дебар Маало, љубителите на виното ќе уживаат во ексклузивна вечер посветена на француското винско совршенство Peyrassol.

Под внимателна организација на Alchemist MK, официјален увозник на вината Peyrassol во Македонија, гостите ќе имаат можност да вкусат четири одбрани вина од реномираната француска винарија, совршено споени со гурмански јадења подготвени од мајсторите на кујната на SushiCo.

Во текот на вечерта ќе се дегустираат четири вина од познатата винарија: Château Peyrassol Rosé, Lou White, Lou Rosé и La Croix Blanc, секое со своја елеганција, текстура и приказна, што ја пренесува топлината на сончевата Прованса.

Настанот ќе биде збогатен со присуство на специјалните гости Karim Chauvin и Alban Cacaret кои ќе ги поведат гостите низ времето и традицијата на Peyrassol. Винарија со историја која дише уште од XIII век, каде виното се создава со почит, страст и деликатна уметност.

Атмосферата ќе ја заокружи музичка програма со DJ, внесувајќи современ ритам во оваа сензуална фузија на француска елеганција и азиска креативност.

Вечер исполнета со стил, вкус и инспирација, за оние кои знаат дека секоја голтка може да биде уметност.

The post СЕКОЈА ГОЛТКА МОЖЕ ДА БИДЕ УМЕТНОСТ Peyrassol Wine Tasting & Food Pairing во SushiCo Дебар Маало appeared first on plusinfo.mk.

Во Highgrove House, приватната резиденција на Неговото Височество Кралот Чарлс III во Глостершир, се одржа вечер исполнета со елеганција и италијански дух. Настанот, организиран под мотото „To the eternal Italian culture of good food“, беше посветен на уметноста на италијанската гастрономија и концептот на Slow Fashion, со цел да се потврди длабоката културна и креативна врска меѓу двете земји.

Во оваа вечер посветена на стилот, културата и вкусот, вината на La Scolca беа меѓу главните ѕвезди. Познатото Gavi dei Gavi Black Label беше внимателно избрано за да ги придружува специјалитетите подготвени на гала вечерата, создавајќи совршена хармонија на вкус и елеганција.

Меѓу присутните беа и светски познати имиња како Хелен Мирен, Дејвид и Викторија Бекам, Род Стјуард, Сиена Милер, како и актерот Стенли Тучи, кој заедно со реномираниот шеф Франческо Мацеи го подготви специјалното мени за настанот. Во знак на културна поврзаност, речиси сите производи беа од Велика Британија, со исклучок на италијанското маслиново масло и вината La Scolca, кои беа увезени специјално за оваа пригода.

– Голема чест е да се претставува Италија, мојата земја и мојот регион на настан од ваков ранг. Настани како овој го истакнуваат вистинското значење на италијанската култура – совршен спој на традиција, креативност и занаетчиство. Токму тоа е суштината на концептот Made in Italy, кој сè повеќе се препознава и цени низ целиот свет – изјави Chiara Soldati, извршен директор на La Scolca и добитник на титулата Cavaliere del Lavoro.

Преку Alchemist, љубителите на виното во Македонија можат да го доживеат истиот вкус на италијанска елеганција што го воодушеви и Кралот Чарлс III.

La Scolca Gavi dei Gavi, вистински симбол на префинетост и култура на живеење.

The post ВИНОТО „LA SCOLCA“ НА КРАЛСКАТА ТРПЕЗА ВО РЕЗИДЕНЦИЈАТА НА КРАЛОТ ЧАРЛС Вечер посветена на италијанската гастрономија appeared first on plusinfo.mk.

Легендарниот стадион „San Siro“ во Милано беше домаќин на незаборавна средба помеѓу две икони – електричната енергија на „Duran Duran“ и безвременската елеганција на „La Scolca“.

Во ритамот на светските хитови, музиката и виното се преплетоа во момент исполнет со страст, стил и италијански дух. Совршена симфонија што ќе се памети долго.

За време на спектакуларниот концерт, бендот „Duran Duran“ не само што ја освои публиката со својата препознатлива музика, туку и ја истакна винаријата „La Scolca“ на сцената, споделувајќи го името на престижната винарија со илјадници обожаватели.

Погледнете го моментот од концертот на „Duran Duran“, каде што бендот ја спомнува „La Scolca“ винаријата пред илјадници обожаватели:

Зад сцената, каде што светлата стивнуваат, а моментите стануваат лични, Сајмон, Џон, Роџер и целиот тим на „Duran Duran“ наздравија со виното „Gavi dei Gavi“, уживајќи во неговиот препознатлив карактер и исклучителен италијански квалитет. Момент во кој, во една здравица, се обединија две легенди, рок историјата и уметноста на виното.

Преку „Alchemist“, сите љубители на виното во Македонија можат да го доживеат истиот вкус на италијанска елеганција. Уживајте во „La Scolca Gavi dei Gavi“, достапно во најпознатите вински точки низ земјата.

The post 📷 📽️ „LA SCOLCA“ И „DURAN DURAN“, СПОЈ НА ДВЕ ЛЕГЕНДИ НА СЦЕНАТА Незаборавна средба на стадионот „San Siro“ во Милано appeared first on plusinfo.mk.

– Македонските вина се веќе на меѓународно ниво во однос на квалитетот. Особено е познат вашиот „вранец“, а имате и многу интерeсен тероар (поднебје) што дава посебни специфики на производите. Треба да го заштитите тоа, зашто е ваше. Ако не сакате некој да ве копира или имитира, мора да го заштитите, а првиот чекор е воведување географски ознаки, тоа е круцијално – порача денеска Ален Делоар, вински експерт и професор на Институтот „Агро“ во Монпеље, Франција.

Делоар пред работилницата што ја организираат Здружението на производители и извозници на вино „Вина од Македонија“ и новоформираното Здружение за заштита на географската ознака за вино „ПОВАРДАРСКИ – ВРВ“, потенцира дека македонските вина се веќе во редот на светските од аспект на квалитет.

Според Елена Младеновска Јеленковиќ, извршен директор на здружението „Вина од Македонија“, денешниот настан е пресвртница за македонската винска индустрија зашто по 15 – 20 години, конечно се промовира здружението кое ќе работи на воведување географски ознаки.
– Со воспоставувањето на географските ознаки ќе се воведат стандарди за производство на вино и грозје, а со тоа, ако се вклучат поголем број лозари и винарии, големи и мали, ќе се избегне борбата за цената што ни се случува секоја година. Географските ознаки се неопходни за развој на македонската винска индустрија. Тие се клучен чекор за да го промовираме и позиционираме македонското вино на светската винска мапа. Македонија, за жал, досега го немаше направено овој чекор. Системот за географски ознаки значи производителите на грозје и вино да седнат и да се договорат по кои критериуми ќе работат – по кои стандарди ќе ги поризведат грозјето и виното. Тоа се однесува на сорти, количини, приноси, начин на производство, профил на вино. Сѐ додека државата ова не го дефинира, нема да можеме соодветно да го позиционираме нашето вино на светските пазари, да постигнеме цена која ќе даде дополнителна вредност на домашната економија – подвлече Младеновска Јеленковиќ.
Моментно, дополни, македонските производители имаат географски ознаки дефинирани според македонското законодавство.

– Сега, секој винар може да си произведе вино на свој начин, без некакви заеднички карактеристики и профил од некое виногорје. На етикетите може да стави дека е резерва, што ништо не значи, во производниот процес може да користи препарати или елементи што исто така не значат ништо, приносот по хектар може да е поголем што не значи квалитет…, објасни директорката.

Милица Плетварска Атанасов, извршен директор на здружението „Повардарски – ВРВ“, рече дека стандардите и елаборатите изготвени за воведување на географските ознаки, не се со повисоки барања од оние што македонските винари и лозари можат да ги воспостават.

– Опфативме поголем број винари и лозари. Покрај стандардите за производство, се зема предвид и традицијата како еден од важните фактори во делот на географските индикации.

Имаме одлични климатски и почвени усови, знаење и традиција, веќе е време сето тоа да го собереме и заштитиме. Моментно го имаме минимумот потребен од аспект на лозарски површини, но отворени сме за нови членови и соработка. Целта е да продолжиме со унапредување на лозарството и винарството, а ова е нареден чекор и ова е иднината – подвлече Плетварска Атанасов.
Светските вински индустрии како Франција и Италија, го почнале процесот на воведување географски ознаки уште пред 200 години.

The post АКО НЕ САКАТЕ НЕКОЈ ДА ВЕ ИМИТИРА, ЗАШТИТЕТЕ ГИ СВОИТЕ ВИНА! Француски експерт апелира да се заштитат македонските вина со географски ознаки appeared first on plusinfo.mk.

Со освоени седум медали за седум вина на најпрестижниот вински натпревар во светот, „Decanter World Wine Awards 2025“, винаријата Монтеко го оствари најголемиот успех во своето едногодишно присуство на пазарот. Освоените признанија на „Decanter“ се круна на успехот на винаријата Монтеко за оваа година и уште една потврда за врвниот квалитет на нејзините вина, добиена од врвни интернационални вински експерти.

Во конкуренција од илјадници вина од 57 земји од целиот свет, сите седум вина од портфолиото на Монтеко се закитија со медали на првото учество на „Decanter“. Сребрен медал освоија црвените вина „Вранец“, „Мерло“ и „Неро“, додека бронзен медал добија црвените вина „Филип“ и „Каберне совињон“ и белите вина „Темјаника“ и „Шардоне“. Успешниот резултат доаѓа само неколку месеци по успехот на „International Wine Challenge“ (IWC), каде вината на Монтеко освоија шест медали.

– Со постигнатите резултати на „Decanter“, Монтеко стана единствената македонска винарија, а и една од ретките во светот, кај која сите вина што ги произведува се закитија со медал на ова големо натпреварување. Конкуренцијата таму е екстремно силна, се натпреваруваат илјадници вина од целиот свет и водечките светски винарии, а нашите вина добија многу високи оценки од најреномираните вински експерти. Со тоа уште еднаш покажавме дека Кратово е новата точка на винската мапа на светот. Од срце им благодариме на сите што веруваат во квалитетот на нашето вино. Ова е само почеток, продолжуваме понатаму со новитети и унапредување на винската индустрија во земјава и регионот – истакнуваат од винаријата Монтеко.

The post 7 ВИНА – 7 МЕДАЛИ, МОНТЕКО ГО ОСВОИ „DECANTER“ Светските експерти воодушевени од македонското вино appeared first on plusinfo.mk.