Одлуката беше донесена со акламација, односно ја поддржаа сите 189 присутни пратеници на седницата на Парламентот.

Од следниот месец основната бруто плата на унгарските народни избраници ќе изнесува 3.690 евра. Според владејачкото мнозинство, заштедите од оваа мерка ќе бидат доволни за покривање на годишните трошоци за функционирање на Парламентот.

Со одлуката се укинува и надоместокот за мобилни телефони, а се намалуваат и парламентарните додатоци за канцеларии, станови и персонал.

Новоизбраниот премиер Петер Маѓар ја поврза реформата со мерките за фискална дисциплина и борба против корупцијата во Унгарија.

Според Ференц Биро, раководител на независен антикорупциски орган, за време на 16-годишното владеење на Виктор Орбан, корупцијата ја чинела Унгарија најмалку 186 милијарди евра.

The post ЗА 40 ОТСТО СИ ГИ СКРАТИЈА ПЛАТИТЕ Унгарските пратеници доброволно се откажаа од дел од своите примања appeared first on plusinfo.mk.

Унгарија останува сигурно засолниште за поранешниот македонски премиер Никола Груевски. Повикувајќи се на извор во унгарската влада, истражувачкиот портал (ВиСквер) „VSquare“, пишува дека Груевски, кој живее во Будимпешта од 2018 година, добил целосно унгарско државјанство во 2022 година, врз основа на „државен интерес на Унгарија“. Според друг владин извор, се верува дека тој и натаму престојува во земјата. Тоа ја прави неговата екстрадиција назад во С. Македонија речиси невозможна, пишува Дојче Веле.

Премиерот Петер Маѓар уште при стапувањето на функцијата најави дека Унгарија повеќе нема да служи како засолниште за меѓународни криминалци. Двајца од најпознатите „станари“ на таквиот систем експресно реагираа и ја напуштија земјата. Поранешниот полски министер за правда Збигњев Зјобро, кој доби азил по бегството во Унгарија во 2025 година, беше забележан на аеродромот „Њуарк Либерти“, САД во мај годинава.

Неговиот поранешен заменик Марчин Романовски, кој кон крајот на 2024 година избега во Будимпешта по обвиненија за злоупотреба на јавни средства, наводно не успеал да влезе во САД и подоцна бил забележан во Србија и Хрватска, додека полските служби трагаат по него.

Државјанството – поцврста заштита од азил

Сепак, според порталот, Унгарија Груевски веројатно нема да мора да го повторува тоа сценарио.

Позицијата на Груевски е значително посигурна од онаа на полските бегалци, пишува „VSquare“. Додека политичкиот азил може да биде укинат, одземањето државјанство е далеку потешка правна постапка. Тоа му обезбедува ниво на заштита што го прави имун на ветувањата на Маѓар за екстрадиција.

Одземањето на државјанството би барало да се докаже дека е стекнато со измама или корупција. Во вториот случај – со оглед дека е доделено поради „државен интерес“ – обвинителството би требало да докаже вмешаност на највисоки претставници на владата на Виктор Орбан. Што, се разбира, не е невозможно.

Бегството на Груевски

Груевски избега од Северна Македонија во ноември 2018 година, непосредно пред да започне со издржување затворска казна од две години во случајот „Тенк“ – пресуда за корупција поврзана со набавка на оклопен луксузен „мерцедес“ во вредност од 600.000 евра.

Тој ја напушти земјата преку Албанија, а потоа продолжи низ Црна Гора и Србија, наводно со помош на унгарско дипломатско возило и, според тогашни извештаи, со вмешаност на унгарската странска разузнавачка служба.

Владата на Орбан потоа му одобри политички азил.

Во Македонија во изминатиот период, по падот на Виктор Орбан од власт во Унгарија, се актуелизираше приказната за враќањето на Груевски. Во април годинава, премиерот Христијан Мицкоски изјави дека не очекува Груевски да се врати во земјата, но доколку тоа се случи „ќе оди во затвор“.

Опозицискиот СДСМ на почетокот на неделава ги праша премиерот и министерот за правда Филков дали ги испратиле во Будимпешта документите за екстрадиција на Груевски. Оттаму уште оценија дека Мицкоски се плаши дека враќањето на Груевски во земјата ќе ја загрози неговата позиција во партијата.

The post ГРУЕВСКИ СИ ГО ЗАЦЕМЕНТИРА ПРЕСТОЈОТ ВО УНГАРИЈА Добил државјанство, екстрадиција речиси невозможна appeared first on plusinfo.mk.

Новиот унгарски премиер Петер Маѓар одби да ја потпише документацијата за исплата на со закон предвидените отпремнини за министрите од поранешната влада на Виктор Орбан, предизвикувајќи политички спор кој кулминираше со неочекувани хуманитарни гестови од двете страни, јави Хина.

Маѓар објави дека вкупниот фонд за отпремнини од речиси милијарда форинти (околу 2,6 милиони евра) наместо на поранешните функционери, ќе биде пренасочен во хуманитарни цели. Во објава на Фејсбук, новата власт директно го прозва Орбан дека според имотниот лист нема речиси ништо на свое име, но имал право на 38 милиони форинти отпремнина според закон што сам го донел, порачувајќи му дека „нема да ги добие“.

Критичарите со години го прозиваат Орбан за неговите скромни имотни анкети, додека во исто време неговиот пријател од детството, Лоринц Месарош, стана најбогатиот човек во Унгарија со имот проценет на 3,1 милијарда евра, главно благодарение на државни договори. Овој систем на трансфер на јавните пари во приватни џебови на елитата поврзана со европските субвенции, аналитичарите го опишуваат како „неофеудален клиентелизам“.

Како одговор на притисокот од Маѓар, шефот на пратеничката група на Фидес, Гергељ Гуљаш, објави дека поранешните членови на владата решиле да ги донираат своите отпремнини за Детскиот дом „Добриот Самарјанјан“ во селото Велики Доброн во Закарпатската област во Украина, каде живее бројно унгарско малцинство. Набрзо и самиот поранешен премиер Орбан потврди дека својата отпремнина од 38,8 милиони форинти ја префрла на истото сиропиталиште, со што ја неутрализираше заканата од Маѓар за блокирање на средствата.

Овој спор се одвива во услови кога новата влада на Маѓар забрзано го менува надворешно-политичкиот курс. Новиот премиер веќе го повика рускиот амбасадор на разговор поради нападите со дронови во близина на унгарската граница, што е остар пресврт од пријателските врски на Орбан со Москва. Истовремено, новата министерка за надворешни работи најави дека Унгарија нема да испорачува оружје за Украина, но Маѓар веќе планира средба со украинскиот претседател Володимир Зеленски во јуни за да се решат прашањата за правата на унгарското малцинство во Закарпатје.

The post МАЃАР ЈА СОПРЕ ОТПРЕМНИНАТА ЗА МИНИСТРИТЕ ОД ВЛАДАТА НА ОРБАН Околу 2,6 милиони евра ќе се пренасочат во хуманитарни цели appeared first on plusinfo.mk.

Петер Маѓар денеска положи заклетва за премиер на Унгарија, со што се означи крајот на 16-годишното владеење на Виктор Орбан.

Маѓар положи заклетва во Парламентот откако неговата централно-десничарска партија Тиса избори убедлива победа на изборите минатиот месец, победувајќи го Фидес на Орбан.

Партијата Тиса освои двотретинско мнозинство во Парламентот со 199 места, што ѝ дава можност да ги смени клучните политики воведени за време на годините на власт на Орбан.

Маѓар влезе во зградата на Парламентот заедно со пратениците на неговата партија, кои сега контролираат 141 место. Алијансата Фидес-КДНП на Орбан доживеа нагло намалување на парламентарната застапеност со 52 места, додека крајно десничарското движење Нашата татковина има 6места.

Маѓар најави дека главните приоритети на новата влада ќе бидат борбата против корупцијата и враќање на средствата од ЕУ кои се замрзнати поради загриженоста за владеење на правото и поради корупцијата.

Пратениците денеска ја избраа Агнес Форстхофер од Тиса, за нов претседател на Парламентот.

The post ПЕТЕР МАЃАР ПОЛОЖИ ЗАКЛЕТВА ЗА ПРЕМИЕР НА УНГАРИЈА Главна задача ќе му е борбата против корупцијата и враќање на замрзнатите пари од ЕУ appeared first on plusinfo.mk.

Унгарскиот премиер во заминување Виктор Орбан најави дека ќе се повлече од раководството на својата долгогодишна партија ФИДЕС, по изборниот пораз кој го означи крајот на неговото 16-годишно владеење.

Одлуката за неговото заминување сè уште не е конечна и ќе биде донесена на партиска конференција закажана за 13 јуни. Информацијата ја потврди пратеникот Ерик Банки, повикувајќи се на партиските структури.

Политичкиот пресврт доаѓа по парламентарните избори одржани на 12 април, на кои десноцентристичката партија ТИСА, предводена од Петер Маѓар, успеа да го победи ФИДЕС и да стави крај на долгогодишната доминација на Орбан на унгарската политичка сцена.

Овој развој отвора ново поглавје за ФИДЕС, кој ќе треба да избере ново раководство и да ја редефинира својата политичка стратегија во услови на смена на власта.

The post КРАЈ НА ЕДНА ЕРА ВО УНГАРИЈА Орбан најави заминување од партијата што ја водеше 16 години appeared first on plusinfo.mk.

Германскиот канцелар Фридрих Мерц порача дека Украина можеби ќе се соочи со тешка одлука – дел од нејзината територија да остане надвор од контрола на Киев, доколку тоа значи отворање на патот кон членство во Европска Унија.

Говорејќи пред ученици во Марсберг, Мерц оцени дека во одреден момент ќе мора да се постигне договор со Русија.

– Во одреден момент Украина ќе потпише прекин на огнот, а потоа и мировен договор. Тогаш можеби дел од територијата повеќе нема да биде украинска – изјави тој.

Референдум и европска перспектива

Мерц посочи дека украинскиот претседател Володимир Зеленски би можел да побара поддршка од граѓаните преку референдум за ваков договор.

– Ако Зеленски сака да добие мнозинство, мора истовремено да им каже дека им го отвора патот кон Европа – додаде германскиот канцелар.

Членството не е блиску

И покрај поддршката за европската перспектива на Украина, Мерц предупреди дека членството не може да се случи брзо.

– Плановите за влез во ЕУ во 2027 или дури 2028 година не се реални – нагласи тој, додавајќи дека земјата прво мора да исполни строги критериуми, особено во делот на владеење на правото и борбата против корупцијата.

Предлог за постепено приближување

Како можно решение, Мерц предложи т.н. претпристапен модел – Украина да учествува во институциите на ЕУ како набљудувач, но без право на глас.

Овој пристап, според него, веќе добил поддршка од дел од европските лидери на неодамнешниот самит во Кипар, на кој присуствувал и Зеленски.

Политички пречки и финансиска поддршка

Напредокот на Украина кон ЕУ досега беше блокиран од унгарскиот премиер Виктор Орбан, но последните политички промени во Унгарија отворија нови надежи за напредок.

Во меѓувреме, Европската Унија одобри финансиска поддршка од 90 милијарди евра за Украина, со цел да се покријат нејзините потреби до 2027 година, иако меѓу земјите членки сè уште постојат поделби околу темпото на проширување.

The post УКРАИНА ПРЕД ТЕШКА ОДЛУКА Дел од територијата можеби ќе се изгуби за ЕУ, вели Мерц appeared first on plusinfo.mk.

Весникот „Франкфуртер рундшау“, во подолг текст посветен на изборите во Бугарија и на Румен Радев како фаворит на тие избори, пишува дека Радев доминира на социјалните медиуми во Бугарија со милиони прегледи, но дека експертите се сомневаат во неговата вистинска поддршка. Во текстот, меѓу другото, се вели:

„Соборена влада, нова валута и информативен простор во кој границите меѓу вистинска поддршка и инсценирано масовно движење одамна се разлеваат – Бугарија повторно оди на избори во недела (19 април). И овојпат може да победи човек за кого Европа дури сега почнува сериозно да размислува.

Под услови што особено ја фаворизираат манипулативната политичка комуникација, Бугарија оди на своите осми избори во рок од пет години. Антикорупциските протести од 2025 година соборија една влада, без да ги отстранат неправилностите што се наоѓаа зад нив. Дополнително доаѓа воведувањето на еврото на почетокот на 2026 година, кое поттикна нови економски стравови. Промените на влади во изминатите години дополнително ја нагризаа довербата во институциите. Во овој вакуум, содржините засновани на страв особено добро виреат – поттикнати од војната во Украина и нови конфликти на Блискиот Исток.

На социјалните медиуми, победникот е јасен уште пред изборите: поранешниот претседател Румен Радев. Според извештајот на Балканската иницијатива за слободни медиуми (БФМИ), зголемувањето на содржините наклонети кон Радев на Фејсбук и ТикТок далеку го надминува она на која било друга политичка сила во земјата.“

Дали ваквите активности значат вистинска поддршка или се инсценирани, е прашање кое треба да се разјасни, пишува „Франкфуртер рундшау“:

„Бугарија, оценува БФМИ, веројатно е членка на ЕУ која институционално е најмалку подготвена за заканите што дигиталната манипулација во меѓувреме ги претставува за демократската легитимност. Зашто, за разлика од Унгарија и Словенија, Бугарија досега не поднела барање за поддршка преку ЕУ-системот за брза реакција. На 16 март, министерката за надворешни работи навистина изјави дека ќе го покрене прашањето во владата, меѓутоа формално барање не уследи. Ова двоумење паѓа в очи, особено ако се има предвид дека Радев политички покажува јасни паралели со Виктор Орбан, почнувајќи од проруските позиции и евроскептичната реторика, па сè до политички стил што се темели на конфронтација со Брисел. Загриженоста дека Бугарија би можела да стане следниот проблематичен случај во ЕУ, во тој контекст, не изгледа неоснована.“

Весникот пренесува делови од извештајот на тинк тенкот „Osservatorio Balcani e Caucaso Transeuropa“ (ОБЦТ), според кој „Радев во едно од ретките опширни интервјуа во изборната кампања јасно ги оцртал своите надворешнополитички позиции. Тој, според наводите, се изјаснил за обновување на дијалогот со Русија и се залагал за тоа ‘економијата да се стави пред идеологијата’ – укажувајќи на испораките на јаглеводороди од Москва и на можноста за соработка со Русија во проширувањето на нуклеарната енергија. Истовремено, тој ја исклучил секоја коалиција по изборите со проевропското движење ‘Продолжуваме со промената’ и го критикувал европскиот Зелен договор.

На внатрешнополитички план, Радев изразил сомнежи кон ‘либералната идеологија’. Запрашан за можни мерки во корист на ЛГБТ-заедницата, тој зборувал за ‘трезвено враќање кон реалноста на два пола’. Како најверојатни коалициски опции, според извештајот, се сметаат сојуз со Социјалистите и националистичката партија Преродба или тивка соработка со досегашниот премиер Борисов, со цел да се остане на власт.“

„Франкфуртер рундшау“ ги пренесува и оценките на двајца експерти за ставовите на Радев во кампањата:

„За политикологот Димитар Ганев, позициите на Радев, сепак, пред сè имаат изборно-тактичка природа. ‘Многу од овие изјави се насочени кон оној повеќе традиционалистички и проруско ориентиран дел од јавното мислење, кој на политичката сцена во голема мера останува незаштитен од Социјалистичката партија’, изјавил тој за тинк-тенкот. Практичните одлуки, вели тој, би покажале дека Радев навистина нема да ја доведе во прашање геостратешката позиција на Бугарија, бидејќи владите што тој ги именувал, и покрај неговата реторика, никогаш не го промениле курсот на поддршка за Украина.

Ана Крастева, бугарска професорка по политички науки, во својата оценка за ОБЦТ настапува понијансирано. ‘Судејќи според неговата политичка кариера, би рекла дека Радев не е Орбан’, ја ублажува таа загриженоста. Бидејќи, тој не покажал ниту екстремизам ниту подготвеност за остра конфронтација со Брисел, што го одликуваат унгарскиот премиер. Сепак, со оглед на тонот на најновата изборна кампања, таа вели дека не може да исклучи ‘дека влада под водство на Радев можеби би можела да падне во искушение да ја заземе антилибералната и проруска политичка ниша на која што Унгарија на Орбан ѝ даде печат во последните години“, пишува весникот „Франкфуртер рундшау“.

Прашувајќи уште во насловот дали „Бугарија е следната Унгарија?“, весникот „Стандард“ оценува дека „прорускиот поранешен претседател Радев веројатно ќе биде нов премиер“ и дека „на социјалните медиуми има индиции за мешање на Москва“ во кампањата. Весникот објаснува дека хаштагот #rumenradev со недели расте екстремно брзо – над 60 пати побрзо од рекламите за конкурентската партија ГЕРБ. Во текстот натаму се вели:

„Во Софија, политичките набљудувачи се уверени дека проруски ориентираниот Радев ќе стане нов премиер. Некои стравуваат дека со тоа Бугарија би можела да стане проблем за Европската Унија. Други, пак, сметаат дека Радев ќе се однесува прагматично и нема да ја отуѓи ЕУ.

Сигурно е следното: Радев се спротивстави на безбедносниот договор меѓу Украина и Бугарија со важност од десет години, кој кон крајот на март беше потпишан од бугарската преодна влада и украинскиот претседател Володимир Зеленски. Преодната влада, критикуваше Радев, се обидува ‘преку долгорочни обврски во име на Бугарија, кои ја загрозуваат националната безбедност, да обезбеди согласност од јавноста’.

Проруските партии – Социјалистичката партија и партијата Преродба – исто така беа против договорот. Гласањето за него на крајот беше откажано поради недостиг на кворум во парламентот. Доколку Радев победи на изборите, договорот е доведен во прашање.

Поранешниот генерал на воздухопловните сили, исто така, се спротивстави на одлуката Бугарија повеќе да не набавува руска нафта. Во ноември 2025 година, како претседател, тој стави вето со цел да спречи конфискација или присилна продажба на руската рафинерија ‘Лукоил Нефтохим’ во близина на Бургас, на Црното Море. ‘Можеби не е толку радикален како унгарскиот премиер Виктор Орбан’, смета Александар Стојанов од Центарот за демократски студии во Софија. ‘Но тој дефинитивно е проруско ориентиран, и тоа отсекогаш бил.’“

Стојанов за „Стандард“ додава дека „нема директни докази оти Кремљ го поддржува Радев, но укажува на необичните случувања на социјалните мрежи. ‘Ако Русија не стои зад тоа, тогаш не знам кој стои’, вели тој. ‘Романија минатата година беше на работ, сега Унгарија и Бугарија. Русите никогаш нема да престанат да се обидуваат.’“

На крајот од текстот, „Стандард“ објаснува:

„Русофилијата во Бугарија главно се поврзува со Руско-турската војна од 1877 година, која во Бугарија се гледа како ослободителна војна од Османлиите. Но со тоа тогаш биле поврзани и руски великодржавни интереси. ‘Во 1944 година Русија потоа ја окупираше Бугарија, беа убиени 30.000 луѓе и беа инсталирани комунистички партиски кадри. 300.000 руски војници дојдоа во земјата. И тоа до ден-денес кај нас се нарекува ‘второ ослободување’’, негодува Стојанов. ‘Бугарите имаат Стокхолмски синдром’, вели тој. „Го сакаат оној од кого се тепани.’“

Извор: Дојче веле

The post ДАЛИ БУГАРИЈА Е НОВАТА УНГАРИЈА, А РАДЕВ НОВИОТ ОРБАН? Проруски ориентираниот Радев може да стане нов премиер appeared first on plusinfo.mk.

Маѓар дојде кај претседателот, излегоа на терасата со поглед на Дунав, а на балконот до нив – Виктор Орбан
Унгарскиот претседател Тамаш Шуљок го прими новоизбраниот премиер и лидер на Тиса, Петер Маѓар, во замокот Шандор утрово за да разговараат за деталите за промената на владата.

За време на средбата, Маѓар објавија видео од терасата на кое се гледа никој друг туку премиерот во заминување, Виктор Орбан.

Маѓар ја гледал панорамата на Дунав со Шуљок кога го забележал премиерот во заминување на соседната тераса.

“Az élet a legnagyobb rendező. Miközben a köztársasági elnök épp megmutatta a hivatalát, ahonnan hamarosan távozni fog, a leköszönő miniszterelnökre lettem figyelmes a szomszéd terszon.
Szerinted mit olvas Orbán Viktor?” M.P. pic.twitter.com/oIcTBNG3je

— László Kovács (@LszlKovcs159757) April 15, 2026

„Животот е најголемиот режисер. Додека претседателот на републиката само ја покажуваше својата канцеларија, од која наскоро ќе замине, го забележав премиерот во заминување на соседната тераса“, напиша Маѓар на Фејсбук, во придружба на сопствената видео екипа.

Унгарецот ги покани и своите следбеници да учествуваат во игра на погодување: „Што мислите дека чита Виктор Орбан?“

Меѓу понудените одговори биле „Говорот за збогум“, „Национален спорт“ и „Денешната изјава на американскиот претседател Доналд Трамп“.

The post 📽️ НЕОБИЧНА СРЕДБА ВО БУДИМПЕШТА Маѓар го „улови“ Орбан на соседниот балкон appeared first on plusinfo.mk.

The post КАДЕ ИЗЧЕЗНА СИЈАРТО? Едни го виделе во авион што летал кон Африка, други затворен во својата канцеларија appeared first on plusinfo.mk.

ВМРО-ДПМНЕ му одговори на лидерот на СДСМ Венко Филипче дека никакви тајни бизнис врски со Виктор Орбан и дека Македонија и Унгарија имаат соработка на повеќе полиња заснована на договори.

„Венко Филипче, верен чувар на фотелјата на Зоран Заев во СДС заедно со неговото ново раководство, време е да почнат да живеат тука и сега. Да му објасниме што значи тоа. Прво, нема никакви тајни бизнис врски со Виктор Орбан и неговата партија. Второ, има официјални државни договори и соработка. Тоа значи договори меѓу Македонија и Унгарија, има соработка како две држави од ист континент Европа кои соработуваат на повеќе полиња. Можеби Филипче со неговиот ментор Заев работел така па мисли сите работат тајно и криминално. Оттука, Филипче нека се свести и нека се фати за неговата примарна задача, а тоа е да го оттргне СДС од Заев, поточно да се огради јасно од неговите криминални бизнис врски, криминални зделки и слично“, се наведува во реакцијата на ВМРО-ДПМНЕ.

Оттаму ги повикуваат надлежните институции во правосудството да постапат по сѐ што е изведено во јавноста како информација.

The post МАКЕДОНИЈА И УНГАРИЈА ИМААТ ОФИЦИЈАЛНА СОРАБОТКА Во главата на Филипче тоа се „тајни бизнис врски“ appeared first on plusinfo.mk.