Четворица жители на Вевчани, вработени во Подрачното шумско стопанство „Јабланица“ – Струга, се соочуваат со кривични пријави поради сомневање дека со злоупотреба на службената положба и несовесно работење овозможиле незаконски да биде присвоено и пренесено огревно дрво, со што го оштетиле ЈП „Национални шуми“ за 570.569 денари.

Од ОВР Струга информираат дека кривични пријави се поднесени против В.Р. (56), З.П. (61), А.А. (61) и Т.Д. (49), сите од Вевчани. Тие се осомничени за кривичните дела „злоупотреба на службена положба и овластување“, а првопријавениот се товари и за „несовесно работење во службата“.

Според полицијата, В.Р., како раководител на Подрачното шумско стопанство „Јабланица“ – Струга, без овластување од директорот на ЈП „Национални шуми“ склучил договор за позајмица со правно лице од струшкото село Велешта. Воедно, не ја извршил својата службена должност и не обезбедил надзор со кој би го спречил и санкционирал незаконското постапување на останатите вработени.

Истрагата покажала дека З.П. и А.А., вработени во истото шумско стопанство, не доставувале примероци од испратниците до сметководството и не евидентирале сеча на вкупно 127,32 кубни метри буково огревно дрво, со што биле прикриени количините на исечената дрвна маса.

Четвртоосомничениот Т.Д., исто така вработен во претпријатието, според пријавата, во една испратница внесувал два различни договори и двајца купувачи, спротивно на своите службени обврски.

Со ваквите незаконски постапки, како што наведува полицијата, на правното лице од селото Велешта му било овозможено бесправно да го пренесе до својот склад незаконски исеченото огревно дрво и на тој начин да стекне противправна имотна корист, додека ЈП „Национални шуми“ претрпело штета од 570.569 денари.

The post ОВОЗМОЖИЛЕ ДИВА СЕЧА НА 127 КУБИЦИ БУКА Кривични пријави за четворица вевчанци, вработени во „Национални шуми“ appeared first on plusinfo.mk.

Зетот и невестата, ѓаволите, Глупавите Августи, па дури и „Шареното племе“ од Африка – сите оживеаја на улиците на Вевчани. Под зимското сонце, меѓу звуците на зурлите и тапаните, вевчанци ја испишаа новата страница од својата вековна традиција.

Оваа година, нивната сатира ја погледна стварноста право во очи. Меѓу маските се појавија мигрантската криза, судството, домашната политика, војната во Украина, па дури и односите меѓу Доналд Трамп и Куба. Голема смеа предизвика и групната маска со алузија на кампањата на кумановскиот градоначалник Максим Димитриевски, како и движењето ЗНАМ.

Карневалот започна околу 15 часот, кога дефилето со стотици маски одекна по тесните вевчански улички. Мешавината од дим, мирис на вино и народен хумор ја претвори селската улица во сцена на која сатирата стана народна уметност. Вевчанци не заборавија никого. Ниту Владимир Путин, ниту Доналд Трамп, ниту виртуелната министерка од Албанија, ниту инвеститорите во Дубаи.

Европско признание за македонската уникатност

Меѓу гостите од земјата и странство беше и премиерот Христијан Мицкоски, а свеченото отворање го направи министерот за култура и туризам Зоран Љутков.

– Нешто што има традиција илјадници години не може да нема посебно место во македонската култура. Карневалот ги третира слободната мисла, хуморот, сатирата и критиката кон општеството, не само кај нас, туку и во целиот свет – изјави Љутков.

Министерството, како што нагласи, продолжи да го финансира настанот со еден ипол милион денари годишно – симболичен облог дека традицијата ќе живее уште илјадници години.

Традицијата повторно ја следеше и претседателот на Федерацијата на европски карневалски градови, Ларс Алгел.

– Вевчанскиот карневал е нешто уникатно. Мислам дека е најстар во Европа. Со оваа традиција е единствен и неверојатен – рече Алгел.

Оро, василичари и кашаник со паричка

Градоначалникот Спасе Кочовски очекуваше уште едно успешно издание што ќе ја испрати старата и ќе ја дочека новата година со нова енергија.

По василичарското оро во центарот, групите продолжија од куќа до куќа со благослови за здравје и бериќет. Домаќините ги даруваа со леб, луканци, пари и други ситни дарови.

Ноќта, василичарите, придружени од селаните, заминаа кон изворите каде што наполнија вода за „кашаникот“ – зелник во кој се стави паричка. На оној што ја најде, се верува дека ќе му оди од рака цела година.

Следниот ден, на празникот Свети Василиј Велики, селото оживеа со имендени, ора и – традиционално – палење на маските за да се избрка злото и да се отвори патот за нов почеток.

Нова година по стар календар

Дочекот на Новата година според Јулијанскиот календар се одржа во центарот на Вевчани. Свиреа Благоја Грујовски, Влатко Миладиновски со оркестарот на Златко Миладиновски, оркестарот со зурли и тапани „Вевчани“ и Перо Бели со групата „Вип“.

Манифестацијата, што започна со настапите на Влатко Лозаноски, „Пука козметика“ и „Брас брадрс“, уште еднаш покажа дека Вевчани не е само село — тоа е сцена каде што хуморот ја чува слободата, а традицијата ја оживува годината што замина.

The post 📷 📽️ ТРАМП, ПУТИН И „ИНВЕСТИТОРИТЕ ОД ДУБАИ“ ВО ВЕВЧАНИ Илјадалетната традиција на џоломарите не остава никого рамнодушен appeared first on plusinfo.mk.

Сè е подготвено за годинашното издание на Вевчанскиот карневал, кој утре и в среда ќе се одржува низ улиците на Вевчани, потврди за МИА градоначалникот на Општина Вевчани, Спасе Кочовски.

Забавниот дел од манифестацијата започнува вечерва со настапи на Влатко Лозаноски, рап-дуото „Пука козметика“ и „Брас брадерс“. Традиционално, забавата ќе продолжи и утревечер со фолк-музика, за која годинава се задолжени Благоја Грујовски, Влатко Миладиновски со оркестарот на Златко Миладиновски, како и Оркестарот со зурли и тапани „Вевчани“, а вечерта треба да заврши со настап на Перо Бели и групата „Вип“.

Временските услови, како што истакна градоначалникот, не треба да бидат пречка за сите што сакаат да го посетат Вевчани и да уживаат во карневалската магија.

– Снег има, но улиците се исчистени и проодни. Континуирано се одржуваат со сол и песок и нема најава за нови врнежи. Добредојдени се сите што сакаат да бидат дел од вековната традиција – изјави Кочовски.

Тој најави ново и неповторливо карневалско издание, исполнето со препознатливиот хумор, забава и дружење. Сместувачките капацитети, иако ограничени, според него се исполнети до последното место.

Василичарскиот дел од карневалот започнува утре попладне со дефиле под маски низ вевчанските улици. Преку маските, вевчанци на сатиричен начин ќе ја прикажат изминатата година. Василичарите велат дека секоја маска е одраз на настаните, појавите и проблемите што ја одбележале годината зад нас.

– Маските се централниот елемент на Вевчанскиот карневал и неговиот најпрепознатлив симбол. Тие не се изработуваат случајно, ниту се користат само за визуелен ефект. Секоја маска носи порака, став или критика кон општеството, политиката или секојдневниот живот. Инспирирани се од актуелните случувања, поради што карневалот има улога на жив хроничар на времето – посочуваат вевчанските василичари.

Според традицијата, Вевчанскиот карневал, стар околу 15 века, започнува на 13 јануари напладне со дефиле на маски на двете василичарски друштва – Горна и Долна маала. Неизоставен дел од карневалот се зетот, невестата, двата ѓавола, Глупавиот Август и бројни други маски инспирирани од актуелните политички и општествени случувања.

Секое карневалско издание за вевчанци е посебно доживување. Тие велат дека ќе кажат сè, но до самиот почеток на дефилето не откриваат во што ќе се маскираат. Изработката на маските, според нив, е сложен и креативен процес кој вклучува рачна работа и оригинални идеи, што ја прави секоја маска уникатна.

Манифестацијата ќе заврши на 14 јануари со традиционалното василичарско оро и палење на маските во центарот на Вевчани.

The post СÈ Е ПОДГОТВЕНО ВО ВЕВЧАНИ Карневалот почнува со музика, утре ќе ги видиме маските appeared first on plusinfo.mk.

По повод одржувањето на годинешното издание на „Вевчанскиот карневал 2026“, една од најстарите, највпечатливи и најавтентични културни манифестации во Македонија и поширокиот регион, денеска во ресторанот „Пелистер“ во Скопје се одржа официјална прес-конференција на организаторите.

На пресот учествуваа градоначалникот на Општина Вевчани, Спасе Кочоски, официјалниот ПР на „Вевчанскиот карневал“, новинарот и водител Антонио Димитриевски, како и Дарко Масларковски, член на бендот „Пука козметика“ и дел од организацискиот тим на манифестацијата.

Пред присутните новинари беа презентирани деталната програма за деновите на карневалот – од 12 до 14 јануари 2026 година, музичките изведувачи кои ќе настапуваат во двете карневалски вечери, како и сите информации поврзани со организацијата, безбедносните мерки и очекуваниот број посетители.

Вовед во карневалската атмосфера даде ПР-от Антонио Димитриевски, кој се осврна на долговечноста и значењето на Вевчанскиот карневал, нагласувајќи дека оваа манифестација одамна ја надминала формата на обичен настан и претставува спој на пагански обичаи, христијанска традиција, современа сатира и автентичен македонски непокор.

– Вевчанскиот карневал е повеќе од забава. Тој е жив културен код, огледало на општеството и простор за слободно изразување преку маските, сатирата и духовитоста. Затоа медиумското присуство и навременото информирање на јавноста се од исклучително значење за промоција и зачувување на ова заштитено нематеријално културно наследство – истакна Димитриевски, заблагодарувајќи им се на бројните медиуми за континуираната поддршка.

Градоначалникот на Вевчани, Спасе Кочоски, ги поздрави присутните и упати отворена покана до јавноста и медиумите да присуствуваат на „Вевчанскиот карневал 2026“, нагласувајќи дека тие денови Вевчани се претвора во една голема сцена, а традицијата во слобода на духот.

– Суштината на василичарските маски не е само во исмевање на негативните појави во општеството, иако тоа е неизоставен дел од карневалот. Вистинската поента е преку духовитост и заедничка забава да се ослободиме од насобраната негативна енергија од изминатата година и новата да ја започнеме со чист дух, широко срце и отворен ум – порача Кочоски.

Деталната музичка програма за двете карневалски вечери ја презентираше Дарко Масларковски, кој најави настапи на рап, поп и фолк изведувачи што ќе ги забавуваат вевчанци и бројните гости од земјата и странство.

Тој се осврна и на длабоките историски корени на карневалот, нагласувајќи дека преку одредени маски, како што е „Глупи Август“, може да се заклучи дека карневалот е многу постар од пишаните записи.

– Не зборуваме за традиција стара 1.400 години, туку за обичаи стари повеќе од 2.000 години. Преку оваа маска, уште во римско време бил исмеван тогашниот император, што јасно укажува дека потребата да се критикува и исмева власта и негативните појави во општеството постои од дамнина па сè до денес – истакна Масларковски.

Вевчанскиот карневал 2026 ќе се одржи на големиот празник Свети Василиј Велики, или како што вевчанци го нарекуваат Свети Васиља, во периодот од 12 до 14 јануари, кога Вевчани традиционално станува центар на сатирата, маските и слободниот дух.

The post ВЕВЧАНИ ПОВТОРНО СТАНУВА СЦЕНА Карневалот 2026 со силна сатира, маски и музичка програма appeared first on plusinfo.mk.

До 17:20 часот на локалните избори излезноста на гласачите изнесува 39,61 проценти, информира Државната изборна комисија (ДИК). Податоците се базираат на обработени 3.221 избирачки места, каде право на глас имаат вкупно 1.699.296 гласачи.

Највисока излезност е забележана во Вевчани (61,84 отсто), Лозово (61,09 отсто), Крушево (60,94 отсто) и Дојран (60,91 отсто). Најмал одѕив до 17 часот е регистриран во Врапчиште (20,94 отсто).

ДИК информира дека процесот на гласање се одвива мирно и без значителни нарушувања на повеќето избирачки места. Избирачките одбори се задолжени да им овозможат на новинарите непречено известување, како и фотографирање на изборните места. За разлика од странските новинари и набљудувачи, домашните медиуми не мораат да бидат акредитирани од ДИК.

ДО 15 ЧАСОТ 31,34% ИЗЛЕЗЕНОСТ Највисока во Чашка, најниска во Врапчиште

The post ДО 17:20 ЧАСОТ ИЗЛЕЗНОСТА ПОД 40% Гласале 39,61% од избирачите appeared first on plusinfo.mk.

Претседателот на ВМРО-ДПМНЕ и премиер, Христијан Мицкоски, барајќи ја довербата од вевчанци својот глас на локалните избори да го дадат за кандидатот Спасе Кочовски и за советничката листа предводена од Леон Даскалоски, забележа дека во Вевчани живее честит и гостопримлив народ, кој знае како се сака и чува Македонија.

– Ова се избори за тоа како како сакате да продолжи да се развива општината, затоа што во Вевчани не е само културата, важен е и духот кој го носите во себе, тука се и маалата, улиците, природата, зелените површини. На овие избори одлучуваме за микро светот во кој пораснавме, во кој се гради карактерот на секој еден од нас – рече Мицкоски.

На Вевчани, нагласи тој, му треба домаќинско работење, а Кочовски покажал како се работи чесно, одговорно и посветено.

Генералниот секретар на партијата Ѓорѓија Сајковски повикувајќи ги вевчанци довербата да му ја дадат повторно на Кочовски и советничката листа на ВМРО – ДПМНЕ, посочи дека централната власт ќе ѝ стои на располагање на локалната власт и оти заеднички ќе направат многу.

– Заеднички ќе направиме и тоа што не е ветено, заеднички ќе ги задоволиме вашите потреби, заеднички ќе изградиме и доградиме она што не успеа во претходните три години кога немаше поддршка од централната власт – рече Сајковски.

Кандидатот и актуелен градоначалник Кочовски посочи дека пред 4 години застанал пред сограѓаните со јасна и чиста заложба дека ќе работи за доброто на секој.

– Ветив дека Вевчани ќе биде општина за сите, без поделби, без предрасуди, без разлика на партиска припадност, убедливост или различност. Денес по 4 години можам гордо да застанам пред вас и да кажам дека ветеното го исполнив. Нашата визија за Вевчани е поголема од 4 години. Нашата визијае  за иднината во која младите остануваат тука, а секој жител се чуствува сигурен, перспективен и достоинствен. Затоа денес повторно ја барам вашата доверба, не како градоначалник, туку како човек кој ќе ја оправда вашата доверба. За да ги завршиме започнатите проекти, но и за да отвориме нови перспективи со цел да го направиме Вевчани пример на локална самоуправа, која навистина работи во интерес на народот – истакна Кочовски.

Потсетувајќи на реализираните проекти во изминатите четири години, тој вети дека приоритет ќе остане инфраструктурата, но ќе се инвестира и во повеќефункционално игралиште, реконструкција на старата кино сала, доградба на градинката, како и нови и водоводни и канализациски линии. Вети инвестиции и во културата со акцент на вевчанскиот карневал, како и во здравството со реконструкцијата на ЈЗУ „Здравствен дом“.

Потоа, на денешниот митинг во Струга генералниот секретар на ВМРО-ДПМНЕ Сајкоски истакна дека со преземањето на одговорноста да ја води Владата, ВМРО-ДПМНЕ покажа како за кратко време, односно за година и половина може да се направат многу проекти кои го подобруваат животот на граѓаните.

Сајкоски порача дека од новите советници на Општина Струга, како и од стружани кои се директните учесници во извршната власт се очекува да испорачаат проекти кои во градот ќе направат услови за подостоинствено живеење.

Додаде дека е време Струга да добие надеж за подобра иднина, надеж за развој, надеж за пораз на криминалот и корупцијата.

– Долго време Струга е во рацете на луѓе коишто немаат чувство ни за своите, ни за туѓите. Во рацете на оние коишто се борат само за себе, но, за да ги поништат сите други, во рацете на оние коишто тонат во криминал и коишто направија огромна штета и за Струга и за сите општини со кои раководат. ДУИ направи штета и за своите, и за Албанците, и за Македонците, Турците, Ромите и другите граѓани и во Струга и во другите региони – истакна Сајкоски.

Сајкоски ги повика сите стружани на овие локални избори да направат референдумско гласање во Струга и со тоа да се поразат сите политички чинители и да се даде нова надеж на градот, да се гради со поддршка од централната власт и да стане посакувана туристичка дестинација.

Коста Хиохи, носител на советничка листа на ВМРО-ДПМНЕ за Струга истакна дека нудат конкретна програма со проекти и визија за Струга која нуди подобар и поквалитетен живот за сите граѓани.

– За Струга која некогаш беше град на поезијата и бисер на двете води, а стана град на диви депонии, криминал, дивоградби, локални шерифи и корупција. Дивата депонија за која општината троши баснословни суми ја контаминира целата општинска територија, подземните води, реката Црн Дрим, ни го контаминира воздухот кој директно влијае за загрозување на животите на сите нас. Со изборот на новиот градоначалник и Советот на општината, ќе иницираме конзервирање на дивата депонија до нејзина конечна дислокација. Набавка на нови соодветни возила за транспорт на селектираниот отпад. Паралелно на тоа, ќе извршиме ревизија на функционалноста на водоводната мрежа и детекција и санација на дефектите, но и на дивите приклучоци, при што ќе се изврши ослободување на мрежата и зголемување на нејзината функционалност и капацитет. Ќе обезбедиме средства за заживување на старата струшка архитектура. Исто така се обврзуваме да се избориме за градба на катни гаражи со преку 300 возила во најфреквентните делови на градот, со цел да го решиме проблемот со сообраќајниот хаос – изјави Хиохи.

Хиохи укажа дека со масовна излезност на граѓаните и со заокружување на бројот 9, граѓаните гласаат за промени, за проекти и за развој на општина Струга.

The post ДОЛГО БЕШЕ СТРУГА ВО РАЦЕТЕ НА ЛУЃЕ БЕЗ ЧУВСТВО НИ ЗА СВОИТЕ, НИ ЗА ТУЃИТЕ Локалната власт со помош на централната ќе направи многу, порача Сајкоски appeared first on plusinfo.mk.

Надворешната канцеларија за криминалистички работи Струга поднесе кривична пријава против 58-годишниот С.П. од Охрид, со престој во општина Вевчани, поради сомнение за сторено кривично дело „злоупотреба на службена положба и овластување“.

Пријавениот, кој работел како референт за превоз во Јавното претпријатие „Национални шуми“ – Подрачно шумско стопанство „Јабланица“ во Струга, издавал испратници спротивно на законските прописи.

„Лицето издавало испратници без претходно одобрение за сеча и спротивно на Правилникот за жигосување и издавање испратници, овозможувајќи им на физички лица да се стекнат со противправна имотна корист“, информираат од Министерството за внатрешни работи.

Со овие незаконски дејствија, на Јавното претпријатие „Национални шуми“ му била нанесена штета во висина од 506.850 денари, а оштетен бил и Буџетот на Република Северна Македонија во делот на данокот на додадена вредност и проширената репродукција на шумите.

„МВР и натаму ќе презема мерки против сите кои ја злоупотребуваат службената должност и со тоа нанесуваат материјална штета врз државата“, додаваат од полицијата.

The post ЈА ОШТЕТИЛ ДРЖАВАТА ЗА НАД 500.000 ДЕНАРИ Вработен во „Национални шуми“ ја злоупотребил функцијата appeared first on plusinfo.mk.

СВР Охрид денеска соопшти дека е поднесена кривична пријава против М.Р.(44) од Вевчани поради постоење основи на сомнение за сторено кривично дело „несовесно работење во службата“.

„Пријавениот, вработен лекар во ЈЗУ „Општа болница“ во Охрид, не ја исполнил својата законска обврска за продолжување на лиценцата за работа со важност од 28.02.2015 до 28.02.2022 и продолжил со работа без да поседува лиценца за работа. Истовремено, тој примал редовен месечен надоместок за плата и други додатоци, со што ја оштетил Јавната здравствена установа“, стои во соопштението на СВР Охрид.

The post 2 ГОДИНИ ЛЕКУВАЛ ПАЦИЕНТИ БЕЗ ВАЖЕЧКА ЛИЦЕНЦА Лекар од Вевчани ја оштетил болницата во Охрид appeared first on plusinfo.mk.

Вевчанци остро ги осудија обвинувањата од ДУИ за маската која привлече внимание на Вевчанскиот карневал, нарекувајќи ги целосно неосновани и политички мотивирани. Според Вевчанци, маската која предизвика контроверза е инспирирана од популарните зомби филмови и нема никаква врска со Зијадин Села или каква било политичка алузија.

„Оваа маска е дел од креативноста на учесниците, кои избраа тема од поп-културата. Нема апсолутно никаква политичка конотација“, се наведува на страницата на Фејсбук Мое Вевчани.

Нивната реакција доаѓа по изјавата на потпретседателот на Алијансата за Албанците, Исен Шабани дека „исмејувањето на трагедијата од 27 април на Вевчанскиот карневал е сериозна провокација која мора да биде казнета“.

Од Мое Вевчани ја обвинуваат ДУИ за селективност и лицемерие, истакнувајќи дека партијата останала нема кога на карневалот се појавија маски кои директно ги исмеваат корупциските скандали и криминалните активности на нивните функционери.

„Каде беа ДУИ кога се исмеваше нивниот ‘фудбалски тим’ кој играше по канцеларии, алудирајќи на нивната непрофесионалност и злоупотребите? Тогаш молчеа, а сега најдоа простор да се навредат од една зомби маска“, потенцираат од Мое Вевчани.

Оттаму порачуваат дека нема да дозволат Вевчанскиот карневал да се користи за ниски цели и тој ќе продолжи да биде простор за сатира и креативност, а не за политичко профитирање.

The post ЗОШТО ЈА ВОЗНЕМИРИ ЗОМБИ МАСКА?! Вевчанци ѝ порачаа на ДУИ дека има „мува на капата“ appeared first on plusinfo.mk.

Со традиционалното дефиле под маски, денеска во Вевчани почна официјалниот дел од Вевчанскиот карневал, кој претставува едно од главните обележја на Вевчани за празникот Св. Василиј, односно Василица.

Во своето обраќање пред присутните, министерот за култура и туризам, Зоран Љутков, истакна дека  Вевчанскиот карневал е од особено значење за културниот и туристичкиот развој на нашата земја и дека негувањето на оваа традиција е она што нè прави посебни, она што ни дава идентитет и гордост.

– Секоја година, на Василица, овој карневал со својата над илјадагодишна традиција нè обединува сите нас, сите  добронамерници со карневалски дух од целиот свет. Ние сме горди на Вевчанскиот карневал бидејќи тој му порачува на светот дека македонскиот народ има обичаи и култура кои не изумираат, туку се пренесуваат од генерација на генерација. Министерството за култура и туризам и годинава, како и во годините што доаѓаат ќе продолжи со континуираната поддршка на овој наш национален бренд кој придонесува не само за културниот, туку и за туристичкиот развој на нашата земја – рече Љутков.

Дефилето почна од почетокот на селото, движејќи се низ главната улица до центарот, каде што маскираните го вртат василичарското оро. Новата година, според Јулијанскиот календар, ќе биде дочекана вечер со огномет во центарот на Вевчани, а присутните ќе ги забавуваат „Љубојна”, Наум Петрески, оркестарот „Вевчани”, како и Перо Бели и Коки Биоритам.

Манифестацијата ќе заврши со традиционалното василичарско оро и палење на маските во центарот на Вевчани,  на 14 јануари.

фото: Министерство за култура

The post 📷 ВЕВЧАНСКИОТ КАРНЕВАЛ Е НАЦИОНАЛЕН БРЕНД Традицијата нè прави посебни и ни дава идентитет, вели Љутков appeared first on plusinfo.mk.