Францускиот претседател Емануел Макрон денеска ми соопшти, а јас тоа му го пренесов и на нашиот премиер Димитар Ковачевски, дека Франција како претседавач со ЕУ ќе направи модификации во предложениот текст на преговарачката рамка, информира шефот на државата Стево Пендаровски од Мадрид, додавајќи дека овој предлог е далеку подобар за нас од претходниот.

– Не станува збор за нов предлог. На две-три места во предлогот има модификации кои тие ги направија во консултација со двете страни. Меѓутоа, ние рековме да не ја повториме грешката од минатиот пат, не може никој – не претседател, не премиер – никој не може да зборува во име на цела нација, на цела држава, постојат надлежни институции кај нас. Ние не сме не знам која држава од трети, четврти свет. Мораме тоа што е сега модификуван француски предлог да го искомуницираме, се разбира прво во Владата, коалициските партнери да си го искомуницираат, мора да се искомуницира со македонската јавност и мора да се искомуницира со македонскиот Парламент – вели Пендаровски во изјава за Сител.

Шефот на државата изјави дека е запознат со содржината на предлогот, но како што вели „џентлменски“ е да не го коментира додека не добиеме официјален одговор од Софија и од Скопје.

– Ќе се очекува од двете страни да го соопштат својот став и тука имам мала резерва за Софија, затоа што таму е поприлично хаотична политичката ситуација во која нема Влада, Владата е падната, а министерката за надворешни работи која е практично најистурениот играч од нивна страна во овие разговори, поднесе оставка неколку дена пред Владата да падне – изјави Пендаровски, кој учествува на Самитот на НАТО во Мадрид.

Тој нагласува дека овој модификуван француски предлог е далеку подобар за нас од претходниот.

– Дали е тоа доволно добро засега ќе се воздржам, бидејќи сакам тоа да помине еден поширок круг на консултации кои за жал на препорака на нашите сојузници не ги правевме минатиот пат за да не ја загрозиме, како не замолија тие, сензитивноста на процесот. Мораме да ги искомуницираме граѓаните, луѓето, политичките субјекти затоа што знаете ние се обидуваме да направиме договор кој ќе трае. Не можеме да стоиме за договор кој не ни дава ништо во рака, а во рака мораме да имаме гаранција за македонскиот идентитет и гаранција дека никогаш јазик, националност нема да биде споменато никаде од сега па во иднина било колку и да траат преговорите. Значи, ако тоа не го добиеме со гаранции на ЕУ, не на Софија, туку на ЕУ и на Брисел ние не можеме да влеземе понатаму во процесот – додаде Пендаровски.

Шефот на државата информира и дека во разговори со „наши пријатели“ на Самитот на НАТО му било посочено дека ако ова не го искористиме, тоа може да биде последна ваква шанса, бидејќи следната би можела да укаже кој знае по колку години,

– Пријателски ни сугерираа да не ја повториме грешката, како да била наша, во 2008 година кога бевме одбиени од членство во НАТО, бидејќи немавме договор со Грција. Знаете што, и договорот со Грција беше направен од една единствена причина. Преспа го штити македонскиот национален идентитет и Преспа го цементира македонскиот јазик за цел свет. Во ОН македонскиот јазик е преведен на сите шест официјални јазици, а таа е најголема светска организација. Ако тоа не ги следи, ако идниот евентуален договор со Бугарија не ги следи овие стандарди, не јас, кој и да е претседател, министер, која и да е власт или опозиција просто не може да си дозволи луксуз да разговара за такви работи кои се утврдени децении, јас би рекол и векови наназад од нашите предци – додаде Пендаровски.

Според него, сега нашата Влада треба веднаш да излезе и да ги поздрави напорите на француското претседателство и да каже кои се следните фази кај нас.

– Тоа е што е најважно. Повторувам, не битно што француското претседателство завршува денес, битно е тоа што францускиот предлог и вака модификуван продолжува да живее и ќе го преземе чешкото претседателство. Тоа е што се однесува до некаков континуитет на европските политики кон нас. Значи, нема да почнуваат Чесите од утре натаму од нула како да ништо не се случило. Немој да заборавите дека одредени важни компоненти, пример билатерални или унилатерални изјави за нашиот јазик кој ги предвидуваше португалскиот предлог се во одредена форма исто содржани и во овој т.н. француски предлог – потенцира претседателот на Републиката.

The post ПРЕТСЕДАТЕЛОТ Е ЗАДОВОЛЕН ОД ПРЕДЛОГОТ Според него модифицираниот е далеку подобар за нас од претходниот appeared first on plusinfo.mk.

Бугарскиот премиер Кирил Петков има намера целосно да го изолира Министерството за надворешни работи (МНР) на Бугарија во обидите да го укине ветото за почеток на преговорите за членство на РС Македонија во ЕУ, објави бугарската агенција БГНЕС. Според медиумот, ова се гледа од нацрт-предлогот, кој самиот Петков ќе го поднесе на првата можна седница на Советот на министри.

– Проектот насловен „Да се подобри одговорноста и координацијата со Националното собрание во врска со проширувањето на ЕУ и процесот на стабилизација и асоцијација на РСМ и Република Албанија и позициите на Република Бугарија, врз основа на член 105 став 4 од Уставот, Министерскиот совет одлучи:

„Секоја одлука на француското претседателство со ЕУ, земја членка или Европската комисија во врска со одобрувањето на почетокот на преговорите за членство во ЕУ на PCM и Албанија, донесена во подготовка или одржување на состаноци на Комитетот на постојани претставници (КОРЕПЕР) или до Советот за општи работи, кој отстапува од Рамковниот став на Советот на министри од 2019 година веднаш да биде испратен до Комисијата за надворешна политика на Националното собрание“, пишува БГНЕС за текстот, којшто треба да биде одобрен од бугарската влада.

Во проектот, поднесен од самиот Кирил Петков, вицепремиерот Асен Василев и генералниот секретар на Советот на министри Красимир Бојанов, експлицитно се нагласува дека позициите на Република Бугарија, како и одлуките за следење, треба да бидат испратени само до Комитетот за надворешна политика.

– Со овој предлог, во пракса, уште еднаш станува јасно дека постои француски предлог, кој се крие од бугарското општество. Последните разговори меѓу францускиот претседател и Румен Радев беа на крајот на минатата недела и бугарските граѓани првпат дознаа за него од кабинетот на Макрон. Срамен податок е одлуката на Кирил Петков да го изолира Советодавниот совет за национална безбедност, но и сите политички сили во земјава, кои имаат апсолутно единствен став за условите за почеток на преговорите за РСМ за ЕУ. Претседател на Комисијата за надворешна политика е Венцислава Љубенова, која важи за блиска до премиерот – додава БГНЕС.

The post ПЕТКОВ ЌЕ ГО ИЗОЛИРА МНР На овој начин бугарскиот премиер ќе го тргне ветото за Македонија appeared first on plusinfo.mk.