Пет министерства – за образование и наука, за спорт, за внатрешни работи, за социјална политика, демографија и млади и за дигитална трансформација, заедно со партнерски установи, невладини организации, пратеници и други членови на Националната работна група за превенција на насилство кај младите, која работи со поддршка на ОБСЕ, денеска потпишаа декларација за намери за превенција на насилство кај младите.

Документот треба да поттикне уште посилна заедничка акција за справување со овој голем општествен предизвик. Потписниците потврдија дека ќе се заложат за градење безбедна училишна средина, едукација за ненасилна комуникација, превенција во спортот, дигитална безбедност, ментално здравје и психосоцијална поддршка, посилна координација и за одговорност меѓу институциите.

Министерката за образование и наука Весна Јаневска рече дека насилството меѓу младите постоело и веројатно е дека ќе постои, а задача на институциите е да се сведе на колку што е можно пониско ниво. Како што истакна, низ годините наназад е граден механизам за справување со врсничкото насилство, кој особено во изминатите две години е значително унапреден.

– Направивме законски измени согласно кои училиштата се должни во своите годишни програми за работа да планираат и програми за промоција на добросостојба на учениците, заштита од насилство, од злоупотреба и запуштање, спречување дискриминација, подобрување на комуникацијата и слични активности за подигнување на свеста за мирна и хармонична училишна средина во која ќе има меѓусебно разбирање и почитување. Ги зајакнавме стручните служби со ангажирање кадар онаму каде недостигаше и со обуки за вештини за превенирање насилство, а ги вративме дежурствата на наставниците за време на одморите во ходниците и во дворовите – рече министерката Јаневска.

Таа потсети дека со приватниот сектор е подготвен прирачник за наставници и стручни соработници за справување со врсничко насилство, базиран на ефективни одговори на примери од пракса, како и прирачник за справување со сајбер насилство.

– Младите не стануваат агресивни во училиште, туку агресијата ја носат однадвор или поточно – најчесто од семејството. Во собраниска процедура се законски измени кои предвидуваат парични казни за родителите и старателите на децата за кои ќе се утврди дека извршиле врсничко насилство во училиште – додаде Јаневска.

Таа најави дека многу скоро ќе почне мултиресорска кампања за справување со семејно и врсничко насилство.

Министерот за социјална политика, демографија и млади Фатмир Лимани порача дека превенцијата на насилството кај младите бара координиран, системски и заеднички одговор од сите институции и општествени чинители.

– Насилството кај младите не е проблем на една институција, туку предизвик за целото општество и затоа нашиот одговор мора да биде заеднички, координиран и одлучен. Потпишувањето на декларацијата претставува обврска за создавање безбедна средина за младите – рече Лимани.

Тој потенцира дека младите треба да имаат активна улога во креирањето на политиките, а институциите да обезбедат системска поддршка, вклучително и во образованието, менталното здравје и дигиталната безбедност.

Според министерот за внатрешни работи Панче Тошковски, врсничкото насилство бара сериозен институционален одговор. Тој нагласи дека полицијата веќе е поинтензивно присутна на терен.

– Врсничкото насилство бара сериозен одговор од повеќе институции. Станува збор за појава што зема замав и мораме да одговориме со заеднички сили. Полицијата е во постојана комуникација со училиштата и има засилено присуство меѓу учениците – потенцира Тошковски.

Тој посочи дека институциите мора да дадат заеднички одговор за да се постигнат подобри резултати во иднина.

Амбасадорот на ОБСЕ во Скопје, Килијан Вал, ја истакна важноста од партнерството меѓу институциите и меѓународната заедница во насока на превенција на насилството и создавање побезбедна средина за младите. Тој го поздрави силниот ангажман на надлежните министри и го оцени денешното потпишување на декларацијата како прв чекор, кој мора да биде проследен со решителна акција.

– Најважно е младите да бидат слушнати, да имаат глас и да живеат во средина без страв и насилство – нагласи Вал, додавајќи дека Мисијата на ОБСЕ ќе продолжи да го поддржува процесот.

Настанот се одржа во рамките на Националната работна група за превенција на насилство кај младите, која претставува прв национален механизам посветен исклучиво на ова прашање. Работната група е воспоставена од Министерството за социјална политика, демографија и млади во соработка со Мисијата на ОБСЕ во Скопје, со вклученост на институциите, органите за спроведување на законот, како и граѓанскиот и младинскиот сектор.

Со нејзиното формирање се овозможува платформа за координација и за дијалог, со цел системско справување со насилството кај младите преку мапирање ризици, идентификација на приоритети и следење на спроведувањето на мерките.

Работната група има цел да ги зајакне институционалните капацитети и да обезбеди сеопфатен пристап во превенцијата, со активно учество на младите во процесите на одлучување и креирање политики поврзани со нивната безбедност.

The post ПЕТ МИНИСТЕРСТВА ПОТПИШАА ДЕКЛАРАЦИЈА ЗА СПРЕЧУВАЊЕ НАСИЛСТВО МЕЃУ МЛАДИТЕ Врсничкото насилство е предизвик за целото општество appeared first on plusinfo.mk.

Државната матура оваа година е спроведена во најдобар ред, со значително намален број на случаи на препишување, изјави денеска министерката за образование и наука, Весна Јаневска.

Одговарајќи на новинарско прашање, Јаневска оцени дека организацијата на полагањето била на високо ниво, при што повеќето од учениците испитите ги полагале совесно и без злоупотреби.

– Можеме да се пофалиме дека оваа година државната матура помина во најдобар ред и мир, организирана така како што треба, во најголем дел во големи простори, каде што учениците немаа можност да прибегнат кон нелегални дејства – рече Јаневска.

Таа посочи дека бројот на ученици што биле отстранети од испитите поради препишување е значително намален во споредба со претходните години.

– Од двата испитни термина отстранети се шеесетина ученици, што покажува дека има одличен напредок во спроведувањето на матурата – нагласи министерката.

Според неа, станува збор за ученици што биле фатени при препишување и веднаш биле исклучени од полагањето.

Јаневска информира дека овие ученици ќе имаат можност повторно да полагаат во следниот испитен рок во август.

Министерката истакна и дека годинава е воведен нов пристап во полагањето, со два типа на матура во зависност од наставните планови и програми, со што, како што рече, е исправена досегашната нерамноправност меѓу учениците.

The post ЗНАЧИТЕЛНО Е НАМАЛЕНО ПРЕПИШУВАЊЕТО НА ДРЖАВНАТА МАТУРА Годинава имало само шеесетина отстранети ученици поради мамење appeared first on plusinfo.mk.

Министерката за образование и наука, Весна Јаневска, оцени дека учебната година заслужува четворка. Според неа, годинава била подобра од претходните, но за подлабоки промени во образованието ќе биде потребно повеќе време.

– Годинава беше подобра од претходните, би ѝ дала четворка што е многу солидна оценка. Недостаток ни е времето. За промени и реформи во образованието треба време – рече Јаневска.

Таа нагласи дека веќе се сменети наставните програми за седмо и осмо одделение, а следната година ќе бидат воведени нови програми и за деветто одделение.

Јаневска тврди дека е решен и долгогодишниот проблем со учебниците.

– Во Македонија учебниците веќе нема да бидат предизвик, тоа е завршена работа – истакна министерката.

Според неа, дел од учебниците веќе се дистрибуирани во училиштата, а до почетокот на новата учебна година треба да бидат испорачани и останатите.

Министерката посочи дека е воведен нов електронски дневник, намалена е администрацијата за наставниците и се дигитализираат повеќе процеси.

Годинава, како што најави, за првпат ќе има и дигитални свидетелства.

Јаневска информираше и дека во образовниот систем се воведуваат содржини поврзани со вештачката интелигенција, како и проекти за здравје, екологија и превенција од насилство во училиштата.

Според неа, за подобри резултати кај учениците неопходни се мотивирани наставници. Потсети дека во изминатите две години платите во образованието биле зголемени за околу 20 проценти.

The post УЧЕБНАТА ГОДИНА ИМА ОЦЕНКА ЧЕТВОРКА ОД ЈАНЕВСКА За вистински резултати е потребно време appeared first on plusinfo.mk.

Дигиталните свидетелства од оваа година се воведуваат за учениците од прво до трето одделение, а од следната година ќе бидат воведени и за учениците од четврто до шесто одделение, најави министерката за образование и наука, Весна Јаневска.

– Како Министерство обезбедивме електронски печати и електронски потписи, а оваа година, за да не се случи во некое училиште, можеби во рурална средина или во училиште со послаба техничка опременост, учениците да останат без свидетелства, за овие три одделенија воведовме систем што може да се нарече хибриден. Од следната година свидетелствата ќе бидат целосно дигитални – изјави денеска Јаневска одговарајќи на новинарско прашање пред почетокот на презентацијата на АРБУ – платформа за академско рангирање на универзитетите во Балканскиот Регион.

Министерката нагласи оти смета дека дигитализацијата е од исклучително значење за државата и затоа се спроведува во МОН и во сите институции што се во негова надлежност, во најголема можна мера и во согласност со капацитетите.

Овој комбиниран модел оваа година се применува бидејќи, како што појасни Јаневска, обука не поминале сите наставници.

– Зошто оваа година применуваме комбиниран модел? Причината е што обучувавме речиси 20 илјади наставници за начинот на користење на дигиталните алатки и за справување со процесот на дигитализација. Сосема сте свесни дека не сите наставници, иако поминаа низ многубројни обуки, еднакво се подготвени веднаш целосно да ги извршуваат обврските што ги воведуваме. Постојат возрасни разлики, како и други околности што влијаат врз нивната подготвеност за работа во целосно дигитална средина – додаде таа.

Министерката им го честита успешниот крај на учебната година на сите ученици, како и на наставниците. Според информациите со кои располагаме, додаде таа, оваа учебна година е подобра од претходната и постојат релевантни показатели што го потврдуваат тоа.

The post ЗБОГУМ НА ХАРТИЕНИТЕ СВИДЕТЕЛСТВА Јаневска најави целосна дигитализација од следната година appeared first on plusinfo.mk.

Денеска завршува учебната 2025/2026 година. Основците и средношколците до 31 август ќе бидат на летен распуст.

За повеќе од 14.500 матуранти наставата заврши на 15 мај, а утре (11 јуни) оние што се пријавени за државна матура ќе го полагаат задолжителниот екстерен испит – мајчин јазик (македонски, албански, турски или српски). Кандидатите за државна стручна и за државна уметничка матура ќе полагаат на 12 јуни.

Министерката за образование Весна Јаневска на учениците им посака добро здравје, среќа и пријатен летен распуст.

– На сите основци и средношколци им честитам за постигнатите успеси. Им посакувам убав летен распуст, исполнет со одмор, дружење и незаборавни спомени. Верувам дека ќе одвојат време и за литература, за стекнување нови знаења и за развој на личните вештини. Компјутерите и дигиталните алатки што им се достапни нека ги користат мудро за учење, истражување и откривање нови можности – рече Јаневска.

Таа ја оцени изминатата година како подобра од претходната. Вели дека биле воведени бројни новини во воспитно-образовниот процес, во интерес на учениците, наставниците, стручните соработници, како и на родителите и старателите.

– Благодарност до сите за поддршката и прифаќањето на промените. Уверена сум дека веќе ги гледаме првите позитивни резултати, што претставува дополнителен мотив да продолжиме со унапредувањето на образовниот систем. За дополнително да ја поттикнеме мотивацијата и креативноста на наставниците, донесовме одлука за ново зголемување на платите за 7,5 проценти, со што кумулативниот раст во последните две години надминува 20 проценти – рече Јаневска.

Таа додаде дека се вложувало во подобрување на условите за настава и работа, но и во создавање можности за професионален и кариерен развој. Реализирани се нови повици за напредување на наставниците и стручните соработници во звања ментор и советник во основното образование, а за првпат оваа можност се обезбеди и во средното образование.

– Посебна благодарност упатувам и до родителите и старателите. Нивната посветеност и грижа најдобро се препознаваат преку развојот и однесувањето на децата. Во следната учебна година очекувам уште поголема проактивност и соработка, особено во справувањето со предизвикот на врсничкото насилство. Секој од нас има подеднакво важна улога во создавањето безбедна, мирна и поттикнувачка училишна средина – додаде Јаневска и нагласи дека задоволни од досега сработеното, ќе продолжат мотивирано и посветено да создаваат уште подобри услови за успешна учебна 2026/2027 година.

The post ОД ДЕНЕСКА РАСПУСТ Министерката Јаневска им посака на учениците незаборавно лето appeared first on plusinfo.mk.

Во населбата Хром, во Ѓорче Петров денеска беше поставен камен-темелник за доградба на зградата на основното училиште „Димитар Поп-Георгиев Беровски“, со која училиштето ќе добие 8 нови училници и 770 квадратни метри простор, а со тоа и можности да организира настава во една смена.

На церемонијата присуствуваа премиерот Христијан Мицкоски, министерката за образование и наука Весна Јаневска, претставници на локалната самоуправа, како и наставниот кадар, ученици и родители.

Ова е трето училиште во Ѓорче Петров кое добива доградба во период од само еден месец.

Градоначалникот на Општина Ѓорче Петров истакна дека инвестициите во образованието се инвестиции во иднината на децата и во развојот на целата општина.

– Продолжуваме со силно темпо да вложуваме таму каде што најмногу вреди – во децата, во училиштата и во иднината на Ѓорче Петров. Доградбата на ООУ „Димитар Беровски“ е уште еден конкретен резултат од нашата посветеност да обезбедиме подобри, посовремени и поквалитетни услови за образование – изјави градоначалникот Александар Стојкоски.

Градоначалникот додаде дека Општина Ѓорче Петров останува фокусирана на реализација на капитални проекти во сите населени места, со посебен акцент на образованието, инфраструктурата и подобрувањето на квалитетот на живот на граѓаните.

The post ЌЕ СЕ ПРОШИРИ УЧИЛИШТЕТО „ДИМИТАР БЕРОВСКИ“ ВО ХРОМ Поставен камен темелник за доградба appeared first on plusinfo.mk.

Министерството за образование и наука ќе го финансира спроведувањето 14 заеднички македонско-австриски научноистражувачки проекти во области со висок развоен потенцијал, дефинирани во Стратегијата за паметна специјализација на државата – соопшти денеска министерката за образование и наука Весна Јаневска на прес-конференција по повод потпишувањето на договорите со носителите на проектите.

Јаневска информира дека проектите ќе се реализираат во областите паметно земјоделство и храна со повисока додадена вредност, информациски и комуникациски технологии, електромашинска индустрија, индустрија 4.0, одржливи материјали и паметни згради, енергија и туризам.

Министерката посочи дека проектите се избрани на јавен конкурс објавен во септември минатата година во согласност со договорот меѓу владите на Македонија и Австрија за научна и технолошка соработка од 2008 година.

– На конкурсот беа доставени вкупно 18 проекти изработени преку партнерства на државни и приватни универзитети, јавни и приватни научни институции и факултети од двете земји. По рецензирањето од македонска и австриска страна, беше утврдено дека 14 проекти ги исполнуваат условите и критериумите за финансирање – рече Јаневска.

Од прифатените проекти, девет се реализираат под водство на Универзитетот „Св. Кирил и Методиј“, три на Универзитетот „Гоце Делчев“, а по еден проект имаат Меѓународниот балкански универзитет и Приватен институт за сеизмички отпорни градби и климатски промени.

Според класификацијата на научно-истражувачките подрачја, шест од избраните проекти се од областа на инженерството и технологијата, пет од природно-математичките науки, два од земјоделските и ветеринарните науки и еден од општествените науки.

Јаневска нагласи дека ова не е прв циклус на ваква соработка, но дека за првпат приоритет им е даден на проектите од техничките и природно-математичките науки, односно на областите што се препознаени како клучни за економски развој преку Стратегијата за паметна специјализација.

За секој од проектите Министерството ќе обезбеди по 600.000 денари, а рокот за нивна реализација е две години, од 1 јули 2026 до 1 јули 2028 година.

– Договорите за финансирање ги потпишавме денес со носителите на проектите. Им честитам за вмрежувањето со австриската академска и научна заедница, за заедничкиот вложен труд и за изборот да бидат финансирани. Им посакувам успех и траен печат во областите во кои ќе делуваат – рече Јаневска.

Во име на носителите на проектите се обрати деканот на Градежниот факултет при УКИМ, Јосиф Јосифовски, кој оцени дека соработката со австриските институции претставува значајна можност за подигнување на квалитетот на високото образование и научно-истражувачката работа.

– Се вмрежуваме со држава која предничи во образовните и техничките области. Ова е начинот преку кој сметаме дека ќе се подигне квалитетот на високото образование и се надеваме дека во иднина ќе има уште многу вакви билатерални договори со други европски држави – рече Јосифовски.

Во конкретниот случај, вели, се воспоставува соработка со технички факултет во Виена, кој е меѓу најпрестижните европски високообразовни институции, а проектните активности ќе бидат насочени кон енергетската ефикасност на објектите и прашањата поврзани со климатските промени.

Одговарајќи на новинарско прашање, Јаневска истакна дека ваквите проекти придонесуваат за поголема меѓународна видливост на македонските универзитети.

– Постојано зборуваме дека имаме квалитетни луѓе на универзитетите и дека треба да вложуваме во науката, но и дека тоа што се работи на универзитетите треба да стане видливо. Ова е дел од процесот на подигнување на квалитетот и видливоста на нашите универзитети. Во сите проекти се вклучени тимови истражувачи, а вообичаено во работата учествуваат и студенти, кои на тој начин стекнуваат практично искуство за нивната понатамошна професионална кариера – рече Јаневска.

The post МАКЕДОНСКИТЕ НАУЧНИЦИ ЌЕ СОРАБОТУВААТ СО АВСТРИСКИ ПАРТНЕРИ Одобрени 14 проекти со висок развоен потенцијал appeared first on plusinfo.mk.

Во период од околу 20 години бројот на ученици во Македонија се намалил за 28% додека во истиот период бројот на наставници се зголемил за 46%. Како резултат на тоа националниот просек се намалил од 18 ученици на 11,4 ученици по наставник. Во споредба со препорачаниот просек од 15 ученици по наставник, ова довело до вишок на наставен кадар од околу 13 проценти.

Оваа информација ја изнесе министерката за образование Весна Јаневска, одговорајќи во Собранието на пратеничко прашање од пратеничката од ДУИ, односно од коалицијата Европскиот фронт, Арбана Пашоли, која се интересираше за процесот на оптимизација во образованието, конкретно за училиштата во Дебар.

– Финансиските последици се значајни затоа што во огромен број на општини, 90, а некаде и 100 проценти од блок дотациите се трошат само за плати на наставниците – рече Јаневска.

Таа потсети дека во минатото само за да се вработат наставници се делеле часови, што резултирало со намалени инвестиции во инфраструктура. Јаневска кажа дека во 147 подрачни училишта годинава нема запишано ученици и дека две третини од сите училишни објекти се подрачни училишта во кои учат само 12 проценти од учениците, а во централните 88 отсто.

Јаневска рече дека во развиените западни земји има повеќе ученици во една паралелка. Во некои училишта во Македонија, за да не остане некој без работа, за 20 деца се прават повеќе паралелки. Во Дебар, на пример, има 60 наставници повеќе од потребното со утврдените стандарди, и затоа нема да се даде трансформација на работен однос.

Пратеничката Пашоли ја праша министерката дали Министерството за своите одлуки ја информирало општината, училиштата и синдикатите.

Министерката Јаневска рече дека образовните институции во Дебар треба да се информирани за процесот на оптимизација на образовните институции, која, како што нагласи, ќе придонесе да се придвижат работите во образованието. Таа рече дека оптимизацијата се спроведува заеднички со Светска Банка и со УНИЦЕФ и дека за вработувањата во самите училишта одлучуваат општините.

Според Јаневска, претходната Влада не работела ништо за намалување на иселувањето, заради што сега државата се соочува со иселување, но дека и покрај „тоа што некои се потсмеваат“ последниве две години во одредени училишта се зголемува бројот на ученици, бидејќи луѓето се враќаат во татковината.

Пратеничката од Европски фронт не беше задоволна од одговорот и изрази загриженост дека дел од наставниот кадар ќе остане без работа.

The post ВО МАКЕДОНИЈА ИМА ЕДЕН НАСТАВНИК НА 11,4 УЧЕНИЦИ!? Вишокот наставници ги јаде парите во образованието appeared first on plusinfo.mk.

Државните студентски домови „Стив Наумов“ и „Кузман Јосифовски – Питу“ во Скопје се првите два кои сегашната Влада целосно ќе ги реновира и пушти во употреба на стартот на новата академска година. Работите се одвиваат паралелно и ќе завршат во јули, но потоа ќе следи опремување на собите и сите други простории – информираше министерката за образование и наука Весна Јаневска при денешната посета на студентскиот дом во Автокоманда.

– Условите ќе бидат модерни, по високи европски стандарди за сместување, но и за енергетска ефикасност. Сигурна сум дека студентите ќе уживаат во престојот. Нема да има бркање глодари и инсекти, нема да има промаја, лепени прозорци и неисправни тоалети и бојлери. Дополнително за сето тоа да се одржува и трае, го менуваме и моделот на финансирање. Се разбира, чувањето на објектите и одржувањето на опремата зависи и од самите студенти – рече Јаневска.

Таа додаде дека се обезбедени пари за реконструктивни активности во другите 7 државни студентски домови, за што се заблагодари на Европската Унија, Германската развојна банка и Фондот за инвестиции на Западен Балкан. Станува збор за вкупен буџет од околу 50 милиони евра, од кои, над 10 милиони се неповратни грантови.

Јаневска посочи дека во период од две години проширен е опфатот на субвенционираниот студентски оброк, доделени се ваучери за ИТ уреди, обезбеден е континуитет на бесплатниот градски превоз во Скопје, дигитализирани се сите постапки за аплицирање за студентските права.

– Повторно ќе имаме 3.000 стипендии во новата академска година, а дури ќе понудиме и нова категорија – за прв пат за студенти со попреченост и ретки болести, со што ќе одговориме на барањата на нивните здруженија и политиките на стипендирање ќе стануат поинклузивни и во согласност со барањата на ЕУ – истакна Јаневска.

Фото: МОН

The post 📷 НЕМА ВЕЌЕ ДА ИМА ГЛОДАРИ, ИНСЕКТИ, НЕИСПРАВНИ ТОАЛЕТИ, БОЈЛЕРИ, ПРОЗОРИ… Домовите „Стив“ и „Кузман“ ќе светнат за следната академска година appeared first on plusinfo.mk.

Министерката за образование Весна Јаневска денеска потврди дека годинава свидетелствата за прво, второ и трето одделение ќе бидат електронски, но, со оглед дека прв пат се издаваат во ваква форма, паралелно ќе се доделат, како што изјави, и печатени.

Според Јаневска, идната година ќе има електронски свидетелства и за четврто, петто и шесто одделение, а во 2028-ма процесот ќе биде заокриужен вклучително и со деветто одделение.

– Од оваа година воведуваме електронски свидетелства од прво до трето одделение. Со оглед дека е прва година ќе има и печатени свидетелства, зашто очекуваме наставниците да се прилагодат на новите електронски свидетелства, што ќе биде огромно олеснување за нив. Наместо да пишуваат на рака свидетелства, тие ќе можат на компјутер да ги пополнат свидетелствата — ем побрзо, ем поефикасно, ем без грешки, зашто податоците се влечат од е-дневник. И оваа година одиме паралелно, од догодина ги додаваме новите три одделенија — четврто, петто и шесто и од догодина ќе одиме само со електронски свидетелства, за третата година да го завршиме и деветто. Со нив заштедуваме на хартија, намалуваме загадување, ја олеснуваме работата на наставниците и, дополнително, системот за упис во средно ќе ги влече податоците од самите училишта. Тоа е релативно голем напредок за работата, односно за дигитализација на процедурите во училиштата и погодност и за наставниците, и за родителите, и за учениците – рече Јаневска.

На прашањето до каде е законот за високо образование, министерката повтори дека трите закони, за високо образование, за обезбедување квалитет во високото образование и за научно-истражувачка дејност, мора да одат во пакет.

– Законодавство заврши два закона. Има забелешки кои не се суштински, но се повеќе од правен и номотехнички аспект. И ние сега, тоа се вика усогласување, ги прифаќаме или не ги прифаќаме. Сметам дека она што го видов не е проблем да ги прифатиме сите. Законот за наука сѐ уште се обработува, но јас очекувам во текот на идната недела комплетно да бидеме усогласени. Тоа е веќе владина процедура. И штом се усогласиме со законодавство, значи ја имаме последната верзија, таа ќе оди на владина седница – истакна Јаневска пред потпишувањето Меморандум за соработка на Градежниот и Економскиот факултет со два германски универзитета во областа на циркуларната економија.

The post ЕЛЕКТРОНСКИ СВИДЕТЕЛСТВА ЗА ПРВО, ВТОРО И ТРЕТО ОДДЕЛЕНИЕ Јаневска најави целосна дигитализација до 2028 година appeared first on plusinfo.mk.