Претседателот на Србија, Александар Вучиќ, вечерва изјави дека парламентарните избори во земјата ќе се одржат или на 12 јули или во периодот од октомври до крајот на ноември.

– Најдоцна во следните шест и пол месеци, а можеби и за два и пол месеца. Во зависност од ситуацијата во земјата и во светот, ќе се водиме од државните интереси и причини. Верувам дека изборите ќе бидат демократски – рече Вучиќ.

Тој најави дека препораките на ОДИХР ќе бидат целосно усвоени од парламентот, како и дека ќе се почитуваат ставовите на Венецијанската комисија во делот на правосудството.

– Сè што сте побарале, ќе добиете, а потоа народот ќе има можност да каже што мисли за сè и каква иднина сака. Мислам дека граѓаните ќе имаат прилично јасен избор – додаде Вучиќ.

Претседателот на Србија најави и засилени меѓународни активности, посочувајќи дека наскоро ќе ги посети Азербејџан и Кина.

– Наскоро ќе го посетам Азербејџан. Потоа ќе следува најзначајната посета во мојата професионална кариера – посетата на Кина. Верувам дека таму ќе успееме да решиме многу важни прашања во интерес на граѓаните на Србија – изјави Вучиќ.

The post ВУЧИЌ ГО ОТКРИ ТЕРМИНОТ ЗА ИЗБОРИ Можни два датуми, 12 јули или есен appeared first on plusinfo.mk.

Никогаш нема да поддржам двојазичност или повеќејазичност во правосудството. Се знае, мора да имаме еден закон, тоа е македонскиот закон, за да обезбедиме владеење на правото. Да, ќе сториме сè да изнајдеме решение, кандидатите кои сакаат да полагаат правосуден испит на својот јазик, во случајов албански, а по можност и на другите јазици, тоа да го прават, но притоа да имаме еднаков критериум во оценувањето. И стојам на тој став од првиот ден до денеска, рече попладнево премиерот Христијан Мицкоски, одговорајќи на прашањето што го постави пратеничката Илире Даути.

Како што истакна Мицкоски, правосудството мора да биде на еден јазик, а тоа е македонскиот. Ако тој факт го прифатат сите, рече, мора да се најде начин полагањето на правосудниот испит еднакво да важи за сите.

Тој потсети на мислењето на Венецијанската комисија која, напомена, многу јасно и прецизно кажа – во правосудството да се напушти двојазичноста и земјава да се врати на законот од 2008 – 2009 година.

– Од 2020 година до денес биле пријавени 918 кандидати за полагање правосуден испит. Од нив 196 биле Албанци, не положиле 27, од кои девет повторно се пријавиле и сите положиле. Процентот на положени кандидати Албанци е 95,75 проценти согласно актуелната методологија, што значи дека не можеме да зборуваме за дискриминација. Јас немам против и стојам на ставот секој да може полага на својот мајчин јазик. Венецијанската комисија многу јасно и прецизно кажа во своето мислење за Законот за јазиците, вели – „во правосудството да се напушти двојазичноста и да се вратите на законот од 2008 – 2009 година. Не се добар пример Белгија, Швајцарија, тоа се конфедерации, федерации, ние зборуваме за унитарни држави и нема втор пример. Мора да сме свесни дека правосудството мора да биде на еден јазик, а тоа е македонскиот и тука мора да заврши таа дискусија. Ако тој факт го прифатиме сите, мора да најдеме начин полагањето правосуден испит еднакво да важи за сите и тука не гледам проблем. Има комисија, тим од уставно-правни експерти што работи на оваа проблематика. Се надевам дека ќе излезат со решение. Не би ги спомнувал имињата, бидејќи тоа е работна група за изнаоѓање решение. Се надевам дека ќе излезат со решение што ќе можеме сите заедно да го изгласаме – нагласи Мицкоски.

Во врска со Законот за јазици, напомена, просечен правник ќе каже дека е лошо напишан.

– За жал, тие што го носеа Законот за јазици тогаш, не водеа сметка за многу правни аспекти. Јас, меѓу другото, не сум правник, јас сум инженер. Но, читав, читам… и што можев да заклучам? Во самиот Закон стои дека ако во рок од една година не се хармонизираат законите, тогаш автоматски се хармонизираат. Како со генерален закон ќе хармонизирате специјален закон? Како со Lex Generalis ќе хармонизирате Lex Specialis? Не сум правник, ќе ми објасните. Освен ако тоа не го направат пратениците во Парламентот. Второ е прашањето зошто тие закони не биле хармонизирани тогаш – подвлече премиерот.

The post МИЦКОСКИ НЕ ПОПУШТА ЗА ЈАЗИЦИТЕ Нема двојазичност во правосудството, вели премиерот appeared first on plusinfo.mk.

Решението мора да биде уставно и мора да биде согласно меѓународните стандарди, рече премиерот Христијан Мицкоски одговарајќи на прашањето за полагањето на правосуден испит на албански јазик.

– Барањата се едно, но уставот и меѓународните стандарди се друго. И мораме така и да се однесуваме. Ако навистина мораме европски да се однесуваме тогаш мораме да ги почитуваме и уставот и меѓународните стандарди. Факт е дека законот кој е донесен, а тоа е законот за примена на јазиците е предизвикан пред Уставниот суд, токму во оној дел „владеење на право“ и „правосудство“, факт е дека имаме негативно мислење од Венецијанската комисија кое се однесува за двојазичноста во правосудството. Прво, немаме доволно ресурси за тоа да го имплементираме, а второ, не се гарантира владеење на правото односно нееднаквост во владеењето на правото. Затоа тие силно препорачуваат да се вратиме на законот за јазици од 2008-2009 година. Истовремено факт е и дека студентите кои изучуваат Правен факултет на својот мајчин, во случајов албански јазик, имаат право да го прават тоа и се дел од образовниот систем во Македонија – рече Мицкоски.

Премиерот посочи дека е формирана комисија од уставни експерти која работи да најде решение кое е по устав и по меѓународни стандарди.

– Исто така е факт дека вчера видовме голем број опозициски активисти и функционери кои што беа на протестот и на тоа му дадоа и политичка конотација. Ние за тоа ги информиравме нашите сојузници во НАТО и во рамките на ЕУ за обид на опозицијата на одреден начин да направи дестабилизација и мислам дека тоа не наиде на одобрување од страна на високи претставници на меѓународната заедница – рече Мицкоски.

The post СЕ БАРА УСТАВНО РЕШЕНИЕ ЗА ПОЛАГАЊЕТО ПРАВОСУДЕН ИСПИТ НА АЛБАНСКИ ЈАЗИК Владата ги информирала НАТО и ЕУ за обид на опозицијата за дестабилизација appeared first on plusinfo.mk.

Според македонскиот Устав, а и според препораките на Венецијанската комисија, билингвалноста во правосудниот систем не е предвидена ниту препорачлива, но проблемот е што претходната влада на ДУИ ги лажеше Албанците во Македонија, па затоа сега има отпори и протести – рече премиерот Христијан Мицкоски во настап на ТВ Ора 24.

– Согласно Уставот, комуникацијата во државната управа, мислам беше членот 5, амандман 7, јасно кажува дека официјален јазик е македонскиот и кирилското писмо, но втор официјален јазик, во случајов е албанскиот јазик. Да не го користам она 20%, бидејќи е јасно е дека е албанскиот јазик. Подолу во истиот член стои дека комуникацијата на Албанците со државната управа е регулирана со закон. Е сега доаѓаме до тој дел, до законот, не кажува со кој закон, но еве со Законот за употреба на јазици. Јас разговарав со студентите и тие велат дека во Законот за употреба на јазиците, треба во рок од една година да се хармонизираат сите закони. Ако тоа не се направи, тогаш автоматски се смета дека законите се хармонизирани. Сега доаѓаме до дилемата. Законот за јазици е генерален закон, или во правото lex generalis. Законот за полагање на правосуден испит е специјален закон или lex specialis. Не може по автоматизам со lex generalis, да натсинхронизирате lex specialis – рече претседателот на Владата Христијан Мицкоски во гостувањето на ТВ Ора 24 запрашан за барањата правосудниот испит да се полага на албански јазик.

– Вториот проблем е тоа што господата што го носеа законот за јазици, ги излажаа Албанците и овие деца што сега протестираат. Зошто ги излажаа? Затоа што јасно стои во мислењето на Венецијанската комисија, вика да се напушти билингвалност во правосудниот систем – дополни Мицкоски.

Тој посочи дека Владата претходно покажала дека нема проблем со употребата на јазиците и во делот на социјалната нега на децата и се овозможи воспитувачки да полагаат на својот мајчин албански јазик.

– Тие што ќе полагаат, утре ќе бидат судии и обвинители. Ако Венецијанската комисија ти вели да го напуштиш концептот на билингвалност, поради тоа што може да се доведе до двојно толкување на одредени судски процеси, тогаш за какво владеење на право ние зборуваме? Затоа ние формиравме една работна група во рамките на Владата која работи и анализира дали може законски и уставно полагањето на правосудниот испит да го одвоиме од судењето во рамките на правосудниот систем на државата. Доколку успееме да најдеме методологија и начин, со кој ќе се обезбеди еднаквост на сите кои го полагаат правосудниот испит, а воедно да немаме различни толкувања на судски пресуди поради билингвалност, односно ако прифатиме дека македонскиот е јазик кој ќе преовлада во правосудниот систем, тогаш мислам дека многу скоро од денес ќе најдеме решение. Но повторно ќе кажам, ова е наследен проблем од истите оние кои беа 20 години влада и не успеаја да најдат начин како да го решат – заклучи премиерот Мицкоски.

The post ПРОБЛЕМОТ СО ЈАЗИЦИТЕ ЗА ПРАВОСУДНИОТ ИСПИТ ГО ПРОИЗВЕДЕ ДУИ Мицкоски вели дека Албанците биле изманипулирани appeared first on plusinfo.mk.

Помилувањето никогаш не треба да се води од казната што е одредена и од природата на делото, туку да го мери и да го оценува процесот на ресоцијализација на институцијата. Сите луѓе, па и кога ќе направат големи грешки во животот и ќе се најдат изолирани, имаат право на втора шанса. Впрочем, денес трендот во ресоцијализацијата оди рака под рака со осовременувањето и очовечувањето на условите во затворите, истакна денеска претседателката Гордана Сиљановска Давкова во воведното излагање на научно-стручната расправа по предлог-законот за помилување што се одржа на Правниот факултет „Јустинијан Први“ во Скопје.

– Нашите затвори сè уште не го исполнуваат овој услов – рече претседателката, која потсети на укажувањата дека можеме да се најдеме на удар на Советот на Европа, дури и за елементи на тортура за постапувањето кон луѓето во затворите.

Добро е што се седна да се изработи нов закон бидејќи, како што рече, актуелниот „не личи на закон, особено ако мора да го читаме низ призма на она што го стори Уставниот суд менувајќи многу одредби“ и оти членовите на комисијата не може да имаат истражни надлежности и да бараат информации од судовите или агенциите и оти во нејзиниот состав не траба да бидат судии, адвокати…

Претседателката отвори неколку прашања поврзани со законот пред експертите од оваа област. Законските решенија, според неа, треба да се креираат имајќи предвид разни профили на претседатели, а меѓу прашањата што ги отвори е сведувањето на минимум на дискрециското право на одлучување, одредбата за Комисијата за политички систем, досегашната и идната улога на Министерството за правда…

– Бидејќи во ова постапување има секогаш простор за дискреционо однесување, прашањето е како да се сведе на минимум или дури како да се анулира дискрецијата, оти во демократски систем не треба да има простор за вакво постапување. И јас затоа одговорно овде тврдам дека секогаш работата сум ѝ ја оставала на Комисијата. Како што ќе одлучи Комисијата така се однесувам и јас – рече Сиљановска Давкова додавајќи дека можеби тоа треба да се внесе во законот.

Таа го отвори и прашањето за тоа дали можеби не треба да се направи и закон за претседател.

– Еден ден треба да собереме сила и да донесеме закон за претседател, оти имаме закон за правата на претседателите кои не се претседатели, а немаме закон за претседател – рече Сиљановска Давкова.

Зборувајќи за делата доживотен затвор и дилемата дали некои од лицата осудени на ваква казна не треба можеби крајот на животот да го дочекаат поинаку, со исклучок на случаи за тероризам и против човештвото, таа, меѓу другото, рече дека треба да ги следиме мислењата на Венецијанската комисија која им препорачува на државите од поранешна Југославија „да го тргнат автентичното толкување и да го лоцираат таму каде што му е местото во Уставниот суд и да го тргнат од Парламентот“.

– Ние сме држава со најмногу автентични толкувања. Образложението од Венецијанската комисија е дека не може еден состав сегашен да толкува што мислел некој во деведесетите години и дека лесно преку автентично толкување ќе дадете сосема поинаква интерпретација на некоја законска одредба. Дури има забелешка и за општите мислења на Врховниот суд исто така врз поделбата на власта – рече Сиљановска Давкова.

The post ДА СЕ ИСКЛУЧИ ДИСКРЕЦИОНОТО ПРАВО НА ПРЕТСЕДАТЕЛОТ ЗА ПОМИЛУВАЊЕ Сиљановска Давкова го отвори прашањето и за донесување закон за претседател appeared first on plusinfo.mk.

Претседателот на Владата, Христијан Мицкоски одговарајќи на новинарско прашање на денешната седница истакна дека оваа влада ја гарантира правичната застапеност и новиот закон доби позитивна препорака од Венецијанска комисија што е обврзувачко во процесот кон ЕУ, а проектот „Безбеден град“ не етнизира, туку спасува човечки животи.

– Што се однесува за правичната застапеност можам да кажам дека апсолутно се води сметка за правичната застапеност, јас сум личен гарант и тоа сум го кажал во минатото. Ниту како човек, ниту како политичар, ниту како претседател на Влада, нема да дозволам никој никого да мајоризира или минимизира. Односно, апсолутно можам да ве убедам дека квалитетот на луѓето без разлика од која етничка припадност доаѓаат треба да биде клучен и приоритет и тоа е темелна уставна вредност и дел од меѓународните резолуции и конвенции – истакна премиерот Мицкоски одговарајќи на пратеничко прашање поставено од пратеникот Скендер Реџепи.

Премиерот Мицкоски му порача на пратеникот Реџепи дека треба пошироко и објективно да ги гледаат работите, наместо да ги етнизираат прашањата мислејќи дека така ќе добијат политички поени.

– Што се однесува до Законот за правична застапеност, тој е готов, ги доби последните позитивни мислења на Венецијанската комисија. Ќе ве потсетам, мислењето на Венецијанската комисија согласно последните измени во процесот на пристапување кон Европската Унија и согласно последните барања за промена на методологијата во процесот на пристапување се одлучувачки фактор. По истите се постапува и очекувам многу скоро овој закон да биде доставен пред вас пратениците и се надевам дека едногласно истиот ќе биде усвоен бидејќи има позитивна препорака на Венецијанската комисија и се надевам дека нема на тој начин пратениците да ги загрозат европските процеси на државата – потенцираше премиерот Мицкоски.

Во врска со одлуката на Уставниот суд, премиерот Мицкоски нагласи дека одлуки на Уставен суд нема да коментира, но факт е дека ова мнозинство во Уставниот суд е избрано во време на претходната влада, а не во оваа.

Во однос на проектот „Безбеден град“, премиерот Мицкоски потенцираше дека погрешно е што и ова некои политичари се обидуваат да го етнизираат, затоа што истиот има за цел да спасува човечки животи.

– Политичарите кои се во романтичен занес, мислат дека ако ги етнизираат и упокоените кои за жал го изгубиле својот живот поради сообраќајни незгоди, треба да се гледаат низ оптика на етничка припадност. Она што можам да кажам е дека повеќе нема да има голем број на жртви на сообраќајни незгоди по имплементирање на проектот „Безбеден град“. Оваа влада одлучи проектот да се стави во функција со цел да спаси човечки животи без да се води математичка статистика кој од која етничка припадност и да ја толкува методологијата со која за упокоените се определува етничка припадност. Овој проект има за задача да спаси што е можно повеќе луѓе – истакна премиерот Мицкоски.

The post „БЕЗБЕДЕН ГРАД“ НЕ ЕТНИЗИРА, ТУКУ СПАСУВА ЖИВОТИ Законот за правична застапеност доби препорака од Венецијанската комисија appeared first on plusinfo.mk.

Рената Дескоска е избрана за потпретседателка на Венецијанската комисија, јави таа преку својот Фејсбук профил.

Во рамки на 145-тата сесија на Комисијата, која се одржа на 12 и 13 декември во Венеција, за нов претседател беше избрана Марта Картабија, професорка по уставно право и поранешна италијанска министерка за правда. За потпретседатели, покрај Дескоска, беа избрани и Ерик Холмовик од Норвешка и Тимоти Оти од Обединетото Кралство.

„Среќна сум што сум првата потпретседателка на Венецијанската Комисија која потекнува од Македонија, земја која не е членка на ЕУ и која е од поранешна Југославија. Овој избор го сфаќам како признание за мојата активност и досегашен придонес во работата на Комисијата“, напиша Дескоска.

Таа истакна дека досега учествувала во изработката на 14 мислења за различни земји, кои беа едногласно усвоени на пленарните седници, како и во повеќе мисии и конференции на Комисијата. Дескоска најави дека продолжува со својот ангажман за промоција на европските стандарди во областа на демократијата, човековите права и владеењето на правото.

The post ГОЛЕМО ПРИЗНАНИЕ ЗА МАКЕДОНИЈА Рената Дескоска избрана за потпретседателка на Венецијанската комисија appeared first on plusinfo.mk.

Предлог законот за Судски совет е доставен на мислење до Европската комисија, соопшти денеска Министерството за правда.

По добиеното мислење, предлог-законот ќе биде поднесен во Собранието, за да се усвои.

Од Министерството соопштија дека станува збор за конструктивен и содржаен закон кој веќе доби позитивно мислење од Венецијанската комисија.

„За првпат ќе има објективно оценување на нивната работа, транспарентност во носењето одлуки и механизми за одговорност и на самите членови на Судскиот совет. Ова е клучна точка што ја нотираше и Оценската мисија на ЕУ и сега Македонија директно одговара на таа препорака“, соопшти Министерството за правда.

Клучни новини кои се предвидени со законот се:

– Јавност во постапкатата за разрешување на претседател и заменик-претседател на Советот, постапката мора секогаш да биде транспарентна;

– Прецизирање на критериумите за „истакнат правник“ за избор на нови членови;

– Воведување јавна расправа за кандидатите за несудски членови, со цел поголема транспарентност и одговорност;

– Зајакнување на критериумите за избор, одговорност и за разрешување на членови на Советот од редот на судиите;

– Унапредување на целокупната правна рамка, согласно препораките на ЕУ.

The post НОВИОТ ЗАКОН ЗА СУДСКИ СОВЕТ ИСПРАТЕН НА МИСЛЕЊЕ ДО ЕВРОПСКАТА КОМИСИЈА Ќе има механизми за одговорност на членовите на Советот appeared first on plusinfo.mk.

Предложените закони за Јавното обвинителство и за Советот на јавни обвинители и покрај неколку недостатоци, содржат многу позитивни карактеристики – нови или преземени од законите што се во сила, се наведува во заедничкото мислење на Венецијанската комисија и Генералниот директорат за човекови права и владеење на правото (ДГИ) на Советот на Европа по двата предлог законски текста на македонската Влада.

Во мислењето се препорачува измена на Уставот со што би се ограничило правото на реизбор на јавниот обвинител, како и тој да се бира и разрешува со квалификувано мнозинство во Собранието.

„Со оглед на важноста на овие прашања за автономијата и релативната независност на Јавното обвинителство, Венецијанската комисија препорачува во контекст на идната уставна реформа, Уставот да се измени и по овие точки“, се наведува во документот.

Во однос на Предлог-законот за Советот на јавни обвинители, во мислењето се препорачува да се преиспита времетраењето на професионалното искуство на сите членови-поротници на Советот, како и да се обезбеди алтернатива на начинот на кој се избираат четирите членови поротници, со што ќе се обезбеди избор базиран на заслугите и интегритетот на кандидатите, како и разновидна застапеност.

Венецијанската комисија предлага и функцијата на обвинителите избрани за членови на Советот на јавни обвинители да биде суспендирана за времетраењето на нивниот мандат во Советот.

„Да се разјаснат концептите ‘влијае врз автономијата на јавните обвинители’ или ‘ги занемарува или не ги извршува своите функции и должности во работата на Советот’ како основа за разрешување на членовите на Советот на јавни обвинители“, се наведува во препораките.

Се предлага вклучување дополнителни заштитни мерки со цел важни одлуки, како оние за предвремен прекин на мандатот на член на Советот, да се носат со мнозинство гласови на обвинителите во Советот.

„Во Предлог-законот експлицитно да се предвиди дека и обвинителите и лаиците членови на Советот, се избрани врз основа на индивидуален капацитет, дека членовите обвинители не се подредени на Јавниот обвинител на Републиката во однос на нивната работа во Советот, како и да се предвиди дека Јавниот обвинител нема право на глас во Советот за одредени области, како што е дисциплината“, се наведува во документот.

Венецијанската комисија предлага и како преодна мерка во Законот да се предвиди дека актуелните членови на Советот ќе продолжат да ја вршат функцијата до истекот на нивните сегашни мандати.

Во однос на Предлог-законот за Јавното обвинителство, Венецијанската комисија препорачува при одредување на подобноста за извршување на функцијата јавен обвинител меѓу критериумите да се вклучат и менаџерските и организациските вештини, како и да се прецизира дека е можен само еден реизбор на јавниот обвинител.

„Да се предвиди дека секоја кривична пресуда што подразбира затворска казна го прекинува мандатот на Јавниот обвинител и обвинителите; да се изменат основите за разрешување на Јавниот обвинител за да се обезбеди поголема јасност и предвидливост; да се бара од Владата да достави јасно образложение до Собранието кога отстапува од мислењето на Советот на јавни обвинители за разрешувањето на Јавниот обвинител и да се обезбедат соодветни процедурални заштитни мерки за обвинителите што се оценуваат“, се додава во препораките.

Венецијанската комисија препорачува да се отстрани можноста две последователни негативни оценки за работењето од листата на „најтешки дисциплински прекршоци“ да доведат до разрешување на обвинител, како и да се разјасни дека одговорноста на јавниот обвинител пред Собранието не се однесува на поединечни обвинителски одлуки и гонења на Јавното обвинителство.

Во мислењето се препорачува и да се овозможи член-поротник на Советот на јавни обвинители да биде и негов претседател, како и да се прошири можноста за барање за изземање на член на Советот на јавни обвинители, поради судир на интереси ако учествувал или учествува во други постапки против тој јавен обвинител или кандидат за јавен обвинител.

„Да се избрише фразата ‘освен ако не е поинаку определено’ од одредбата за еднаквоста на правата и обврските на членовите на Советот на јавни обвинители во Предлог-законот за Советот на јавни обвинители или да се обезбеди затворен список на исклучоци од еднаквоста на правата и обврските на членовите на Советот. Да се разјаснат некои од дисциплинските основи во членовите 93 и 94 од Предлог-законот за Јавното обвинителство, како и концептот на ‘тешки последици’ што се користи во член 90 од истиот Предлог-закон“, додава Венецијанската комисија, посочувајќи дека останува на располагање на македонските власти за понатамошна помош по овие прашања.

Заедничкиот документ на Венецијанската комисија и на ДГИ е изработен по барање на министерот за правда Игор Филков од 24 јули годинава за мислење за Предлог-законот за Јавното обвинителство и Предлог-законот за Советот на јавни обвинители.

Мислењето е побарано во врска со намерата на македонската Влада да го подобри судскиот интегритет преку ревидирање на процесите за регрутирање, избор, назначување, оценување, унапредување, преместување и разрешување на судии и обвинители.

– За таа цел, во декември 2023 година беше усвоена Стратегијата за реформа на правосудниот сектор (2024-2028), која утврдува различни мерки со цел, меѓу другото, зајакнување на автономијата на Јавното обвинителство, подобрување на улогата на Советот на јавни обвинители (особено во однос на евалуацијата на обвинителите), реформа на процедурите за избор на членови на Советот и подобрување на дисциплинските постапки – посочува Венецијанската комисија.

Во рамки на подготовките на мислењето, делегација на Комисијата на 1 и 2 септември престојуваше во Скопје на средби со претставници на Министерството за правда, Врховниот суд, Советот на јавни обвинители, Здружението на обвинители, Адвокатската комора, на Делегацијата на ЕУ во земјава, како и на неколку невладини организации.

The post ДА СЕ ОГРАНИЧИ ПРАВОТО НА РЕИЗБОР НА ЈАВНИОТ ОБВИНИТЕЛ Венецијанската комисија предлага тој да се бира и разрешува со квалификувано мнозинство во Собранието appeared first on plusinfo.mk.

Венецијанската комисија на Советот на Европа даде позитивно мислење за Предлог законот за јавно обвинителство и за Предлог законот за Советот на јавните обвинители.

Денеска, во Венеција, се одржа 114. пленарна сесија на Европската комисија за демократија преку право – Венецијанска комисија при Советот на Европа, на која беше усвоено Заедничкото мислење за Предлог законот за јавно обвинителство и за Предлог законот за Советот на јавните обвинители на Република Северна Македонија.

Во усвоеното мислење, Комисијата даде позитивна оцена за процесот и содржината на изработените закони, поздравени се реформските напори на Министерството за правда. Укажано е дека во двата предлог-закона се запазени меѓународните стандарди и се имплементирани сите препораки. Дадени се и неколку дополнителни сугестии во насока на подобрување на законските текстови. Со ова, се потврдува дека законите се целосно усогласени со европските принципи за професионалност и ефикасност на јавното обвинителство, како и со стандардите за транспарентно и одговорно функционирање на Советот на јавните обвинители.

На пленарната сесија, во име на Министерството за правда, се обрати проф. д-р Александра Деаноска Трендафилова, како претседател на Работната група која ги подготви двата закона.

Од Министерството за правда велат дека ќе продолжат посветено да работат на спроведување на препораките, на унапредување на правосудните институции и на јакнење на владеењето на правото во Република Северна Македонија.

„Ова позитивно мислење претставува важна потврда на нашата европска определба, на транспарентниот и инклузивен пристап што го применуваме во процесот на реформирање на правосудството и на заложбата за градење правен систем кој ги одразува највисоките стандарди на демократија, правда и интегритет“, се наведува во соопштението од Министерството за правда.

Двата закона се дел од Реформската агенда на Европската унија со рок до декември 2025 година.

The post ВЕНЕЦИЈАНСКАТА КОМИСИЈА ДАДЕ ПОЗИТИВНО МИСЛЕЊЕ ЗА 2 ЗАКОНА Дадени се и неколку сугестии за подобрување на текстовите appeared first on plusinfo.mk.