Хрватската писателка и колумнистка Ведрана Рудан почина на 76-годишна возраст по долгата борба со ракот. Неколку месеци пред смртта пишувала дека лекарите ѝ прогнозирале уште три месеци живот.

Токму тогаш отворила и една болна семејна тема. Во колумната „По долго и тешко…“ пишувала за конфликтот со својот син околу наследството. Му порачала дека нема да добие дел од куќата и дека не го сака на својот погреб.

Рудан пишувала за прогнозата со препознатливата мешавина од црн хумор, суровост и помирување со смртта.

„Три месеци се исто така утеха. Ви даваат време да анализирате што сте згрешиле, кого требало да го испратите дома, за среќа, сè уште имате време.“

„Мамо, како ќе одгледаме 3 деца?“

Во истиот текст раскажала и за разговорот со синот. Според нејзиното сведоштво, тој го отворил прашањето за наследството и за делот од куќата што би го добила неговата сестра.

„Мамо, како ќе одгледаме три деца? Светот полудел. Сестра ми нема деца, тие имаат стан, не ѝ треба да добие дел од куќата…“, ги пренела Рудан неговите зборови.

Нејзиниот одговор бил жесток. Му рекла дека трите деца биле негова одлука и дека неговата сестра е нејзино дете исто како него.

Потоа донела и одлука.

„Нема да добиеш дел од куќата, а ниту ти ниту нејзините три деца нема да дојдете на мојот погреб“.

Напис за смртта, без заобиколување

Рудан јавно зборуваше за болеста и во последните години често пишуваше за сопственото умирање. Не ја напушти ниту препознатливата иронија со која со децении ги провоцираше читателите.

Уште во декември 2025 година објави колумна со наслов „За умирањето“. Во март годинава напиша дека веќе две години умира, а лекарите претходно ѝ прогнозирале многу пократок живот.

Нејзината последна објава на личната страница е од 26 јули. Во неа пишуваше за условите на онкологијата во Риека и за медицинските сестри кои се грижат за пациентите.

The post ВЕДРАНА РУДАН МУ ПОРАЧАЛА НА СИНОТ ДЕКА НЕМА ДА ЈА НАСЛЕДИ КУЌАТА Не сакала тој да дојде ниту на нејзиниот погреб appeared first on plusinfo.mk.

Ведрана Рудан со децении беше една од најпрепознатливите и најдиректни авторки на хрватската и регионалната книжевна сцена. Нејзиниот остар јазик, иронијата и бескомпромисниот однос кон темите за кои пишуваше често предизвикуваа силни реакции – кај едни восхит, кај други критики. На 18 август 2026 година Рудан почина по борба со карциномот. Веста беше потврдена од извори блиски до неа, откако на нејзиниот профил на „Фејсбук“ беше објавено дека „се преселила во пoдрачје без сигнал“.

Оваа нејзина реченица остана запаметена од нејзиното интервју за ХРТ во кое на водителот му кажа дека го знае долго и го смета за малку патетичен и дека со оглед на тоа што во емисијата зборуваат за смрт, а со смртта одат солзи, претпоставува дека сака таа да плаче затоа што умира. А потоа рече:

– Сакам да кажам дека има многу луѓе кои ме сакаат и кои јас ги сакам, дека сум бесмртна и мојата смрт нека ја сфатат како заминување во подрачје без сигнал.

Рудан е родена на 29 октомври 1949 година во Опатија, а детството го поминала во Мошќеничка Драга. Студирала хрватски и германски јазик на Педагошката академија во Риека. Пред да стане позната како писателка, работела како учителка, туристички водич и преведувач, а најголемиот дел од професионалниот живот го посветила на новинарството и медиумите. Работела на радио и пишувала за повеќе хрватски весници и списанија.

На пошироката книжевна јавност ѝ се претстави во 2002 година со романот „Uho, grlo, nož“, кој привлече големо внимание, беше преведен на повеќе јазици и подоцна доживеа и театарски адаптации. Следуваа книгите „Ljubav na posljednji pogled“, „Ja nevjernica“, „Crnci u Firenci“, „Dabogda te majka rodila“, „Kosturi okruga Madison“, „U zemlji krvi i idiota“, „Amaruši“, „Zašto psujem“ и „Muškarac u grlu“.

Во своите дела Рудан отворено пишуваше за положбата на жената, бракот, семејните односи, насилството, љубовта, стареењето и бројните општествени проблеми. Нејзиниот стил беше едноставен, директен и често исполнет со црн хумор. Со години го водеше и блогот „Како да се умре без стрес“, во кој ги коментираше актуелните случувања, сопствениот живот и темите што ја преокупираа.

И приватниот живот на писателката остави силна трага врз нејзиното творештво. Од првиот брак ги имаше ќерката Асја и синот Славен. Подоцна се омажи за адвокатот Љубиша Драгелјевиќ. За дел од тешките искуства од приватниот живот зборуваше јавно, а искуствата од бракот и положбата на жената се преточија и во дел од нејзините книжевни теми.

Во април 2024 година ѝ беше дијагностициран редок карцином на жолчните канали на црниот дроб. Болеста била откриена во период кога сè уште можеше да биде оперирана, па во мај истата година беше на операција. Таа зборуваше многу отворено за својата болест. На нејзиниот блог „Djevojka u zagrljaju metastasa“, пишуваше за третманот, стравот од смртта, трошоците за медицинските процедури и проблемите со кои се соочуваат онколошките пациенти.

Последниот период од нејзиниот живот беше обележан и со спор со Хрватскиот фонд за здравствено осигурување (HZZO) околу трошоците за дијагностичка процедура поврзана со нејзиното лекување. На крајот на јули 2026 година, беше објавено дека го изгубила спорот без конечна одлука.

Дури и по дијагнозата, таа не престана целосно да пишува и јавно да зборува за она низ што поминува. Во едно од своите интервјуа, таа ја сумираше својата врска со пишувањето со зборовите: „Кога пишувам, јас сум жива“.

Нејзините книги беа преведувани на странски јазици, а според некои од нив беа создадени и театарски претстави.

Таа беше авторка која, во текот на нејзините децении јавна активност, честопати предизвикуваше поделени реакции. Додека некои ја ценеа нејзината отвореност и директност, други го критикуваа нејзиниот начин на изразување и одредени јавни позиции.

Ведрана Рудан зад себе остави бројни романи, колумни и текстови, како и долгогодишна новинарска и книжевна кариера по која ќе биде запаметена.

The post 🎥 КОЈА БЕШЕ ВЕДРАНА РУДАН? „Ве знам долго и ве сметам за малку патетичен, знам дека во оваа емисија сакате да плачам затоа што јас умирам“ appeared first on plusinfo.mk.