Министерот за дигитална трансформација Стефан Андоновски вели дека со законските измени со кои отсега печатената верзија на документот изваден по електронски пат преку порталот uslugi.gov.mk станува валидна, граѓаните нема да плаќаат двапати како досега кога поради неважење на печатената верзија беа принудени повторно да го вадат истиот документ на шалтерите и за истиот да плаќаат.

– Ново во законот е тоа што не се врши дополнителна проверка што претходно мораше да се направи за документот да биде валиден. Претходно можеше документот да се користи електронски, но неговата печатена верзија не важеше. Сега со измените, печатената верзија на електронскиот документ е целосно валидна, има времен жиг, електронски печат и потпис – појасни Андоновски во вечерашното гостување на телевизија Телма.

Во однос на порталот uslugi.gov.mk, Андоновски рече дека се дигитализирале услуги кои било најлесно да се дигитализираат и токму затоа има услуги што никогаш досега не се искористени или се користени два до три пати.

Министерот за дигитална трансформација, ги потенцираше новите услуги на ребрендираниот портал, каде што нагласи дека има над 200 услуги кои што граѓаните можат да ги искористат во секој момент. Тој истакна дека во првите 100 дена имало над 100 нови услуги на порталот.

– Општина Аеродром има 70 илјади жители, една од најбрзо растечките. Секој граѓанин мораше да патува до центарот на градот, цел ден ви треба одмор треба да земете, за да завршите многу едноставна работа. Сега тие тоа го прават во нашиот Центар за услуги во Бисер. Аеродром за месец дена од отворање на центарот е втор по големина или втор по искористеност центар за услуги. А ние тоа го направивме со постоечките ресурси – заклучи Андоновски.

За дигитализацијата, рече дека наследил состојба во која овој процес бил оставен да пропаѓа, а наследил и три тужби од повеќе милиони евра од Македонската радио телевизија, Агенцијата за аудио и аудиовизуелни медиумски услуги и Радиодифузија.

The post ГРАЃАНИТЕ ВЕЌЕ НЕМА ДА ПЛАЌААТ ДВАПАТИ Електронски извадените документи ќе бидат важечки appeared first on plusinfo.mk.

Граѓаните кои веќе ги заменија важечките возачки и сообраќајни дозволи, нема да ги добијат парите назад, информира МВР по одлуката испратена во „Службен весник“, туку само на оние кои сега ќе ги заменуваат.

Како што може да се прочита во одлуката која е испратена на 14 февруари, не е предвидено да им се враќаат парите на оние граѓани кои веќе ги заменија важечките возачки и сообраќајни дозволи заради усогласувањето на документите со уставното име на државата, „Република Северна Македонија“.

– Одлуката за граѓаните да можат да извадат возачка и сообраќајна дозвола без паричен надомест е дадена во „Службен весник“ на 14.02.2024 година. Со одлуката нема да се наплатува кога ќе се врши замена на важечка возачка дозвола со натпис „Република Македонија“, со нова возачка дозвола со натпис „Република Северна Македонија“ до 31.12.2024 година. Исто така нема да се наплатува кога ќе се врши замена на важечка сообраќајна дозвола за возило со натпис „Република Македонија“, со нова сообраќајна дозвола за возило со натпис „Република Северна Македонија“, до 31.12.2024 година. Одлуката стапува во сила со денот на објавување во „Службен весник на Република Северна Македонија“ велат од МВР.

Од МВР засега не прецизираат дали во одлуката ќе бидат и граѓаните кои веќе ги замениле документите заради името, а им биле важечки.

„Министерството за внатрешни работи ги известува граѓаните дека согласно Решението за цените на обрасците што ги издава МВР, возачките дозволи и сообраќајните дозволи со името „Република Македонија“ кои сè уште се важечки, се заменуваат во редовна постапка со нови со името „Република Северна Македонија“ и притоа на граѓаните не им се наплаќа цената пропишана за тие обрасци, до 31 декември 2024 година. Но, за истите документи пропишана е административна такса која се наплатува, согласно Законот за административните такси кој сè уште нема претрпено измени во тој дел. МВР ќе предложи измена на законот, се со цел и административната такса да не се наплаќа“, соопштија од министерството.

The post МВР НЕМА ДА ВРАЌА ПАРИ Само дозволите што допрва ќе се сменат ќе бидат бесплатни, не важи за веќе заменетите appeared first on plusinfo.mk.