Некогаш живеел во луксуз, возел BMW и играл за големи бразилски клубови, а денес спие под импровизирано засолниште од најлон, ќебиња и картон во една од населбите на Сао Паоло. Режис Фернандес Силва, познат како Режис Питбул, на 49 години се соочува со тешка зависност од крек и живот на улица.

Питбул играл за Коринтијанс, Васко да Гама, Понте Прета, Баија, Коритиба и уште неколку клубови во Бразил, а играл и во Португалија, Јапонија, Турција, Јужна Кореја и Кувајт. Според Globo Esporte, во професионалната кариера одиграл 170 натпревари и постигнал 49 гола. Фудбалот го напуштил во 2012 година, на 34 години.

Денес живее во Пиритуба, северниот дел на Сао Паоло, каде што е роден и израснат. Според репортажата на Globo Esporte, последните два месеца ги минува на улица. Се засолнува во импровизиран простор направен од најлони, ќебиња и картони, а во секојдневието се движи со стар велосипед. Во еден локален ресторан оди по кафе, храна, во тоалет и за да го наполни телефонот. Дел од оброците му ги плаќаат поранешни соиграчи.

 

View this post on Instagram

 

A post shared by aRede (@arede.info)

Неговата зависност од дрога не е нов проблем. Уште додека бил професионален фудбалер двапати бил позитивен на тестови за марихуана и поради тоа бил суспендиран. Подоцна, по завршувањето на кариерата, почнал да користи и потешки дроги, а зависноста од крек постепено му го уништила животот.

Во 2022 година Питбул бил сместен во клиника за рехабилитација. По неколку месеци поминати на лекување се обидел повторно да го организира животот, па дури и почнал да работи во фабрика на пријател од детството. Но, помалку од еден месец по излегувањето од рехабилитацијата повторно доживеал рецидив.

Ситуацијата дополнително се влошила во 2025 година, кога бил уапсен поради напад врз управителот на зградата во која живеел. Во исто време се натрупале долгови за одржување на зградата и даноци. Иако сè уште има стан на свое име, против него се води судска постапка поради неплатените обврски, па во моментов не може да се врати во него.

Семејството и пријателите, според Globo Esporte, повеќепати се обиделе да му помогнат. Луѓето околу него сметаат дека најголемата пречка е неговото одбивање да прифати помош и повторно да замине на лекување. Питбул, пак, вели дека не сака да биде третиран како жртва и дека наместо рехабилитација сака да најде работа и повторно да го изгради својот живот.

Неговите зборови за сегашниот живот се особено потресни.

– Не сакам никој да знае дека постојам. Ако мислат дека сум мртов, подобро. Не сум никаков кутар – изјавил Питбул за Globo Esporte. На 22 септември ќе наполни 50 години и вели дека би сакал роденденот да го помине со пријателите.

И покрај состојбата во која се наоѓа, Питбул сè уште зборува со посебна емоција за Коринтијанс. Кога новинарите разговарале со него, тој споменал дека навивачите на клубот неодамна дошле да го видат и понудиле помош. За време на најдобрите години во кариерата, неговата ситуација била сосема поинаква.

– Некогаш возев BMW, имав камион и јадев одлични стекови. Тогаш имав пари, а сите ме познаваа и не ми дозволуваа ни да ја платам сметката – се присетил тој.