Партијата на Македонците во Албанија, Македонска алијанса за европска интеграција (МАЕИ), поднесе официјално барање до Специјалната парламентарна комисија за административно-територијална реформа при Собранието на Република Албанија општина Пустец да остане посебна единица на локалната самоуправа.

Со овој документ, потпишан од претседателот на партијата Васил Стерјовски, како што самиот вели, јасно се дефинираат црвените линии и клучните барања на македонското национално малцинство во пресрет на најавените територијални измени.

МАЕИ децидно бара општина Пустец да остане посебна единица на локалната самоуправа и во рамките на новата реформа да не претрпи никакви територијални измени, односно да не се спојува со други административни единици.

– Ова барање партијата го темели на Уставот на Албанија, меѓународните обврски (Рамковната конвенција за заштита на националните малцинства и Европската повелба за локална самоуправа), како и на членот 16 од албанскиот Закон за заштита на националните малцинства донесен 2017 година, се наведува во барањето.

Се посочува дека во споменатиот закон стои дека е „Забрането преземање мерки кои го менуваат составот на населението во единиците на локалната самоуправа каде што живеат лица кои припаѓаат на националните малцинства, со цел ограничување на правата и слободите предвидени со овој закон.“

Општина Пустец е единствената локална единица во Албанија каде што македонското малцинство го сочинува повеќето од населението, поради што нејзиното зачувување е од клучно значење за опстанокот и заштитата на идентитетот.

Второто клучно барање на МАЕИ е општина Пустец да се преименува во Општина Преспа. Овој предлог се заснова на фактот дека Пустец е само едно од деветте села во општината, додека името „Преспа“ поцелосно го претставува историскиот, географскиот, културниот и природниот идентитет на целата област.

Се додава дека терминот „Преспа“ традиционално се користи од локалното население, ужива меѓународно признание, а воедно целиот административен дел се поклопува со Националниот парк „Преспа“ и се нагласува дека преименувањето дополнително би помогнало во промоцијата на регионот како туристичка и еколошка зона со посебни вредности.

„Земајќи го предвид значењето на зачувувањето на идентитетот, претставувањето и правата на македонското национално малцинство во Албанија, бараме овие препораки сериозно да бидат земени предвид при изработката на предлозите за административно-територијалната реформа“, се наведува во официјалниот допис потпишан од Васил Стерјовски лидер на МАЕИ.

The post ПУСТЕЦ ДА СТАНЕ ПОСЕБНА ОПШТИНА Македонците во Албанија бараат таа да се преименува во Општина Преспа appeared first on plusinfo.mk.

Македонците во Албанија се автохтона заедница со вековни корени во Преспа, Голо Брдо, Гора, Поле и Врбник. Ние го зачувавме нашиот јазик, традиции и идентитет низ тешки историски периоди. Сепак, и покрај формалното признавање, многу од нашите права остануваат само делумно спроведени, рече лидерот на Македонска алијанса за европска интеграција (МАЕИ), Васил Стерјовски, во обраќањето на Генералното собрание на Европската слободна алијанса (ЕФА), што се одржува во Гандија, Шпанија.

-Чест ми е што се обраќам пред ова Генерално собрание во име на МАЕИ, политичкиот претставник на македонското малцинство во Албанија и да предложам Резолуција за заштита и унапредување на правата на Македонците во Албанија. Овој документ не се однесува само на правата на една малцинска заедница, таа се однесува на заштитата на основните вредности кои ја дефинираат Европа. Се работи за човековото достоинство, еднаквите права, демократските принципи, културната разновидност и фундаменталната слобода на секој човек да ја прогласи и зачува својата идентификација без страв или дискриминација, рече тој.

Додаде дека премногу македонски деца сè уште немаат пристап до образование на својот мајчин јазик „нашите заедници и понатаму се недоволно претставени во јавните институции а регионите каде што живеат Македонците продолжуваат да се соочуваат со економско занемарување, депопулација и миграција“.

-Истовремено, сведоци сме на сè поголеми притисоци насочени кон оспорување и редефинирање на идентитетот на Македонците во Албанија. За идентитетот не може да се преговара, тој не може да се наметнува, купува или менува преку политичко влијание. Тоа е вродено право кое му припаѓа единствено на поединецот и на самата заедница. Почитувањето на самоидентификацијата е еден од фундаменталните принципи врз кои е изградена модерна Европа. Меѓународните стандарди за човекови права се јасни: секој човек има право слободно да го определи и изрази својот идентитет, без притисок, дискриминација или надворешно мешање, нагласи Стерјовски.

Посочи дека процесот на проширување на Европската Унија треба да биде алатка за промоција на демократијата и заштита на правата и оти  никогаш не смее да стане механизам преку кој се оспоруваат малцинските идентитети или преку кој човековите права се условуваат со политички интереси.

-Нашата резолуција ја повикува Албанија целосно да ги спроведе малцинските права, да го зајакне политичкото претставување, да инвестира во малцинските региони и да гарантира слободни и фер процеси на самоидентификација. Исто така, ги повикува европските институции будно да ги следат овие прашања и да осигураат дека вредностите на ЕУ се применуваат доследно и еднакво. Европа е најсилна кога ја штити својата разновидност. Денеска ја барам вашата поддршка не само за македонското малцинство во Албанија, туку и за принципот дека секоја заедница во Европа има право да постои, да биде признаена и да напредува без страв, притисок или дискриминација. За принципот дека Европската Унија мора да остане заедница на вредности, каде што човековите права се штитат еднакво и без двојни стандарди, нагласи тој.

Порача дека со поддршката на резолуцијата „вие застанувате зад македонското малцинство во Албанија, но и зад секоја малцинска заедница во Европа која бара признавање, достоинство и еднакви права“.

The post МАКЕДОНЦИТЕ ВО АЛБАНИЈА СЕ АВТОХТОНА ЗАЕДНИЦА СО ВЕКОВНИ КОРЕНИ Сепак, многу македонски деца сè уште немаат пристап до образование на мајчин јазик appeared first on plusinfo.mk.

Лидерот на единствената политичка партија на Македонците во Албанија ќе претстави резолуција за заштита и унапредување на правата на македонското малцинство во Албанија. Васил Стерјовски, претседатели на МАЕИ, ќе ја образложи предложената резолуција пред делегатите на Генералното собрание на Европската слободна алијанса (ЕФА), што ќе се одржи во Гандија, Шпанија.

Од МАЕИ велат дека учеството на партијата на Генералното собрание на ЕФА претставува значајна можност за афирмација на прашањата и предизвиците со кои се соочува македонското национално малцинство во Албанија пред европската јавност и институции.

Македонска алијанса за европска интеграција стана полноправна членка на ЕФА во 2024 година.

ЕФА е европска политичка партија која ги обединува и претставува регионалните, автономните и малцинските политички партии во Европа и е застапена во Европскиот парламент.

The post ГЛАСОТ НА МАКЕДОНЦИТЕ ОД АЛБАНИЈА ПРЕД ЕВРОПСКИ ДЕЛЕГАТИ Васил Стерјовски ќе предложи Резолуција за малцинските права appeared first on plusinfo.mk.

Албанските медиуми му даваат посебно внимание на учеството на Македонска алијанса за европска интеграција(МАЕИ) на парламентарните избори и на лидерот Васил Стерјовски, кој е кандидат за пратеник.

„На плоштадот „Скендербег“ во срцето на Тирана се одржа првиот изборен митинг на Социјалистичката партија, со која Македонска алијанса за европска интеграција (МАЕИ) е во коалиција. На митингот беа претставени кандидатите за пратеници од сите 12 изборни окрузи низ Албанија, меѓу нив и Васил Стерјовски, единствен Македонец, во трка за пратенички мандат“, наведуваат медиумите.

Се додава дека тоа е „силен тим, обединет од заедничка визија: напредна, европска и правична Албанија за сите нејзини граѓани”.

„МАЕИ, единствената партија на Македонците, останува доследна на својата мисија – достоинствено претставување и унапредување на правата на Македонците во Албанија, преку институционално учество и силни партнерства“.

Тие пренесуваат и порака на Стерјовски во која тој вели: „Продолжуваме заедно – за глас што се слуша, за иднина што ја градиме!“

Инаку, Македонци од повеќе делови на Албанија, како и од Тирана, членови и симпатизери на Македонска алијанса за европска интеграција (МАЕИ), присуствуваа на митингот во поддршка на коалицијата, посебно на Стерјовски.

Во 2019 година, тој стана првиот пратеник во албанскиот парламент кој јавно се декларира како Македонец.

The post ПРАТЕНИКОТ МАКЕДОНЕЦ ВО АЛБАНИЈА СЕ КАНДИДИРА ЗА НОВ МАНДАТ Стерјовски на митинг со Социјалистичката партија во Тирана appeared first on plusinfo.mk.

Фондацијата „Бугарска меморија“ од Бугарија бара од единствената партија на Македонците во Албанија оштета во висина од 10.000 евра и јавно извинување, тврдејќи дека е добротворна организација која преку донации помага, без никакви асимилаторски цели.

На рочиштето на 9 мај во Основниот суд во Корча беше напнато. Адвокатите на бугарската фонација, кои тужат, тврдат дека Македонската алијанса за европска интеграција (МАЕИ) со официјален допис до албанскиот државен врв и меѓународните институции побарала забрана на активностите на оваа фондација, пишува МКД.

Бугарската фондација вели и дека МАЕИ ја наклеветила дека „корумпира албански функционери со цел асимилација на Македонците” како и дека учествува во создавање „криминална група поврзана со бизнисот со бугарски пасоши, издавање лажни потврди и влијание врз пописот на населението во Албанија”.

На прашање од судијката, адвокатите на бугарската фондација рекле дека е можна спогодба под услов МАЕИ јавно да се извини и да прекине со јавните обвинувања.

Претседателот на МАЕИ, Васил Стерјовски на ова остро одговори дека „ние сме Македонци и никогаш нема да прифатиме дека сме Бугари“, додавајќи дека преку оваа тужба се врши притисок да се замолчи единствениот политички субјект што се бори за правата и идентитетот на Македонците во Албанија.

Тој нагласи дека сите активности на фондацијата во земјата се реализираат во „тесна координација со бугарската влада, Министерството за надворешни работи на Бугарија и бугарската амбасада во Тирана”.

The post БУГАРСКА ФОНДАЦИЈА БАРА 10.000 ЕВРА ОД ПАРТИЈА НА МАКЕДОНЦИТЕ Напнато беше на рочиштето во Корча appeared first on plusinfo.mk.

Единствената македонска партија во Албанија, Македонска алијанса за европска интеграција, МАЕИ, доби донација на книги од автори Македонци од Пиринска Македонија и од македонската емиграција во Бугарија, информираше Васил Стерјовски, претседател на партијата.

– На наше големо задоволство добивме значајна донација на книги од автори Македонци од Пиринска Македонија и од македонската емиграција во Бугарија. Оваа мала „Пиринска библиотека“ ќе биде сместена во нашата канцеларија во Пустец и секој Македонец ќе може да се запознае со маките на македонскиот народ под Пирин, бескрајната борба за правда и слобода, како и со народната култура, традициите и животот на Македонците во Бугарија – рече Стерјовски.

Според него во оваа колекција се вклучени дела од познати имиња како поетот Никола Вапцаров, револуционерот Петар Манџуков, државникот Димитар Влахов, и писателот Борис Сандански, внук на Јане Сандански.

Исто така, додава, тука се и дела од основачот на обединетата македонска организација „Илинден“ и долгогодишен затвореник по бугарските затвори Стојан Георгиев, копретседателот на партијата ОМО Илинден-ПИРИН историчарот професор Стојко Стојков, како и делата на академиците Иван Катарџиев и Ѓорги Поп Атанасов, филозофот Стефан Влахов-Мицов и многу други.

– Благодарност за донацијата на ОМО Илинден-ПИРИН поддржани од „Комити“-Скопје и BIBLIOTHECA MACEDONICA. Се надеваме дека во иднина ќе развиваме поголема културна соработка меѓу Македонците во Албанија и Македонците во Бугарија – нагласи Стерјовски.

The post ПИРИНСКА БИБЛИОТЕКА ВО ПУСТЕЦ Македонците од Бугарија им донираа книги на Македонците во Албанија appeared first on plusinfo.mk.

Македонците од Албанија, вели тој, низ историјата поминале низ многу премрежија, но опстанале.

– Пред 20 години во Преспа имавме наезда на сектата Јеховини сведоци, кои сакајќи да ја искористат економската ситуација, не избираа средства да ја сменат верата на Македонците. Ни доаѓаа по домовите, не застануваа на улица, нудејќи пари, храна, книги, организираа летни кампови за младите, но не успеаја во својата намера затоа што Македонците не ги прифатија – тврди Стерјовски.

Тој додава дека повторно во Преспа се „појавиле Јеховините сведоци, но овој пат во лицето на бугарските пропагатори”.

-Тие на сличен начин како Јеховините сведоци сакајќи да ја искористат економската ситуација, бараат да ни ја сменат македонската националност. Македонците во Мала Преспа но и во цела Албанија каде што живеат ќе ја издржат и оваа бугарска пропаганда која врз Македонците трае повеќе од век и половина – категоричен е тој.

Тој потсетува дека македонскиот револуционер Петар Поп Арсов уште во 1894 година за бугарската пропаганда во Македонија, која се одвивала преку бугарската црква напишал: „Егзархијата дава пари и купува ветер зашто народноста со пари не се купува – тоа е такво деликатно нешто, кое штом сети дека го пазариш изветрува“.

– И на неканетите бугарски новинари во село Глобочани, општина Пустец им порачавме дека ние сме Македонци – рече Стерјовски.

Тој е еден од најголемите поборници за правата на Македонците, беше прв пратеник во албанскиот парламент кој јавно кажа дека е Македонец и кој за првпат во парламентот имаше кусо но историско обраќање на македонски јазик.

The post „БУГАРИТЕ ВО МАЛА ПРЕСПА СЕ НАПАДНИ КАКО ЈЕХОВИНИ СВЕДОЦИ“ Стерјовски вели дека ќе ја преживеат и оваа бугарска пропаганда appeared first on plusinfo.mk.

– Сета оваа е поврзано со политиката и односот на бугарската држава, што таа го има воопшто со македонската нација и со Македонија, но и секаде каде што има македонско малцинство во другите балкански земји, Бугарија тврди дека тие се Бугари. Бугарија ја прошири својата пропаганда и во областите каде што живее македонското малцинство во Албанија, во областа Гора, Преспа и Голо Брдо – вели Стерјовски.

Тој рече дека, искористувајќи го членството во Европската Унија, Бугарија ѝ се заканувала со вето на Албанија да признае непостоечко малцинство.

– Искористувајќи го членството во Европската Унија, Бугарија изврши притисок врз Албанија и така беше признато во 2017 година непостоечко бугарско малцинство, кога не се исполнуваше ниту еден критериум за признаено на вакво малцинство затоа што од сите пописи направени во Албанија од создавањето на албанската држава до денес нема ниту едно лице кое се изјаснило за Бугарин. Исто така, во сите извештаи што Албанија ги прави за меѓународните организации кои ги следат правата на малцинствата, во ниту еден од овие извештаи не стои дека албанската држава изјавила дека има бугарско малцинство. Токму под притисокот на Бугарија во 2017 година и заканата со вето на членството на Албанија во ЕУ беше признаено непостоечко бугарско малцинство – посочува тој.

Стерјовски вели македонското малцинство во Албанија се чувствува загрозено, а однесувањето на Бугарија е „мешање во внатрешните работи на Албанија, од каде пак нема никаква реакција”.

– Македонското малцинство се чувствува загрозено. За жал, немаме одговор од албанската држава за сета оваа бугарска пропаганда што се одвива во областите каде што живее македонското малцинство. За нас, активноста на Бугарија, која со методите на 19 век се обидува да го асимилира македонското малцинство во Албанија, е мешање во внатрешните работи на Албанија. Како пратеник во Парламентот на Албанија, многупати сум ја искажал оваа загриженост, особено работата на бугарската амбасада и сите активности што ги спроведува за асимилација на македонското малцинство во Албанија. Побарав реакција од албанските институции, но, за жал, за Албанија приоритет беше отворањето на преговорите за членство во ЕУ и не сакаше да има проблеми со Бугарија, па ја остави слободно да се шири оваа бугарска пропаганда и за жал, имаме грубо мешање во внатрешните работи на Албанија за асимилација на македонското малцинство – посочува Стерјовски во интервјуто за „Еуроњуз Албанија”.

The post МАКЕДОНЦИТЕ ВО АЛБАНИЈА НА УДАР НА БУГАРИЈА Со методи од 19 век Бугарија се обидува да создаде бугарско малцинство appeared first on plusinfo.mk.

Стерјовски, беше на 12-то место на кандидатската листа на Социјалистичката партија во изборната единица Корча.

-На крајот од процесот на пребројување на гласовите на кандидатите за пратеници, сакам да им се заблагодарам на сите граѓани од округот Корча кои ме поддржаа и гласаа за мене на овие парламентарни избори. Благодарност и до сите Македонци од Албанија кои живеат и работат во Македонија и Грција, кои изразија желба на 25 април да дојдат и да гласаат за мене. За жал, Техничкиот комитет на експерти, во врска со мерките за заштита на населението за време на пандемијата со корона вирусот, четири дена пред изборите, воведе двенеделен карантин за секој што доаѓа од Македонија и Грција. Поради тоа, Македонците од овие држави немаа можност да дојдат во Република Албанија и да гласат за мене – изјави Стерјовски.

Според освоените гласови, тој е деветти по ред на листата, што значи дека не успеа да влезе во добитната листа, но е на листата на чекање. Доколку се ослободи место во текот на четиригодишниот мандат на новиот парламентарен состав, додава тој, повторно ќе влезам во парламентот, како и во актуелниот мандат кој трае до осми септември годинава.

-За исправна ја сметаме одлуката на Македонска алијанса за европска интеграција за коалиција со Социјалистичката партија, бидејќи таа е апсолутен победник на овие парламентарни избори. Од новата влада на премиерот Еди Рама очекуваме поголема грижа и инвестиции за регионите каде живеат Македонците во Албанија, и вклучување на Македонците во институциите на системот. Ќе бараме решавање на многубројните проблеми со кои се соочуваат Македонците во Албанија – нагласува тој.

МАЕИ е единствената политичка партија која предизборно беше во коалиција со Социјалистичката партија и верува дека ќе продолжи понатамошната поддршка од Владата за решавање на проблемите на Македонците.

-Минатата недела на терен започна да се спроведува проектот за изградба на водовод за селата во општина Пустец, во вредност од 4 милиони евра, со што ќе се реши еден од најголемите проблеми со кои се соочуваат Македонците во Општина Пустец, во областа Преспа. Имам целосна верба, дека во третиот мандат на Социјалистичката партија ќе сториме многу повеќе за областа Преспа и регионот Корча – додава Стерјовски.

Благодарение на вложувањата на Владата, нагласува тој, ќе ја претвориме Преспа во вистинска туристичка дестинација.

Тој ветува дека ќе вложи се од себе, заедно со сите, до крајот на мандатот на 8-ми септември 2021 година да ги оствари обврските на пратеник и достојно да ги претставува во Собранието на Република Албанија.

-Нашиот слоган е: Одиме напред! Нема откажување. Борбата продолжува за права, просперитет, интеграција и економски развој. За трансформација на Преспа, округот Корча, Врбник, областите Голо Брдо и Гора, за трансформација на цела Албанија! Ќе сторам се што е во рамките на можностите и надлежностите, за интеграција на македонската заедница во институциите на власта, и во економскиот и социјалниот живот во Република Албанија – порачува Стерјовски.

Социјалистичката партија на национално ниво е апсолутен победник со освоени 74 од 140 пратенички места.

The post Стерјовски не доби нов пратенички мандат во Паламентот на Албанија appeared first on plusinfo.mk.

-Во име на партијата, Македонска алијанса за европска интеграција ја пренесувам загриженоста што ја покренаа жителите на македонската заедница од областа Голо Брдо на средбите што ги имав со нив, во врска со функционирањето на граничниот премин Требиште – Џепиште и потребата за негово 24 часовно функционирање. Функционира како заеднички граничен премин помеѓу Република Албанија и Република Македонија, кај Дебар и е дозволено движење само за лица од локалното население, и не е дозволен премин за лица кои се жители на други области, рече Стерјовски.

Додаде дека преминот функционира 12 часа, но честопати жителите на Голо Брдо (поранешните општини Требиште, Острени и Стеблево) имаат неопходна потреба да се движат и после утврденото време, особено за итни медицински случаи кои се принудени да ги транспортираат во болницата во Дебар,што е многу поблиску.

Според Стерјовски, друг проблем за Македонците од областа Голо Брдо е што овој премин е од локален карактер и само за жителите од пограничниот регион на двете држави.

– Македонците кои живеат во Голо Брдо и на кои во личната карта им пишува дека се родени надвор од регионот на Голо Брдо, како на прмер во градовите Елбасан, Либражд или Тирана не може да поминат на овој граничен премин. Овој проблем ќе се реши кога од локален премин од трета категорија, ќе премине во регионален премин од втора категорија – нагласи Стерјовски.

Посочи дека поради овие причини жителите на областа бараат 24 часовна работа на овој граничен премин.

– Ги повикувам албанската и македонската влада да им помогнат на жителите од областа Голо Брдо, да создадат услови и да овозможат овој заеднички граничен премин што побрзо да проработи 24 часа – побара тој.

Потсети дека владите на двете земји на заедничката седница одржана во Поградец на 15 декември 2017 година донесоа одлука за тоа, но оти „за жал оваа одлука сеуште не е реализирана“.

Дека преминот е повеќе од потребно да работи 24 часа во повеќе наврати побара и Македонското друштво „Илинден“- Тирана и огранокот за Голо Брдо.

По долгогодишното барање на жителите од двете страни на границата, кои се и роднински поврзани, преминот беше отворен во 2013 година.Тој е од локален карактер, со заедничка полициска контрола и работи од 8:00 до 20:00 часот во летниот период и од 8:00 до 18:00 часот во зимскиот период

The post Македонците од Голо Брдо бараат 24-часовна работа на преминот Џепиште-Требиште appeared first on plusinfo.mk.