Градоначалникот на Скопје, Орце Ѓорѓиевски, соопшти дека постапката за набавка на 100 автобуси е повторно отворена и изрази очекување дека овој пат ќе биде успешно завршена.

Тој истовремено најави и паралелен проект за воведување на брз автобуски систем – БРТ, кој треба значително да го модернизира јавниот превоз во главниот град.

– Денеска е реобјавена постапката за 100 автобуси, се надевам дека овојпат ќе биде успешна. Владата ќе обезбеди 100 автобуси, а јас многу скоро го започнувам БРТ проектот за кој градот ќе обезбеди 40 автобуси – изјави Ѓорѓиевски.

Според најавите, административните процедури за БРТ системот треба да бидат завршени до крајот на годината, а почетокот на реализацијата се очекува во следниот период.

Градоначалникот се осврна и на состојбата што ја затекнал во градот, посочувајќи дека веќе се водат повеќе контроли и проверки од надлежни институции.

– Во моментов има ревизија, а финансиската полиција и други институции работат на одредени предмети во Град Скопје. Верувам дека ќе има одговорност – рече тој.

Во делот на комуналната хигиена, Ѓорѓиевски информираше дека е завршена постапката за набавка на 40 нови камиони, дел од нив цистерни за миење улици.

Тој најави и нов систем за управување со отпад преку претоварни станици, со кој, како што рече, ќе се намали потребата камионите да патуваат директно до депонијата Дрисла.

– Отпадот од помалите камиони ќе се претоварува во поголеми, кои потоа ќе одат до Дрисла – појасни градоначалникот.

Според него, се работи и на набавка на околу 2.600 нови контејнери, што треба да придонесе за подобрување на хигиената во градот.

Градоначалникот повтори дека дивата депонија Вардариште ќе биде претворена во парк, а веќе започнало чистење на теренот.

– Стојам зад тоа дека Вардариште ќе стане парк. Почнавме со чистење на површинскиот отпад – рече тој.

Ѓорѓиевски се осврна и на жичарата на Водно, која моментално не работи, објаснувајќи дека е направена детална техничка проверка поради безбедносни причини.

Според него, утврдени се технички проблеми кај дел од сензорите, а системот е доведен во фаза на ремонт.

Во однос на луна паркот, градоначалникот информираше дека е избран изведувач и дека проектот треба да биде завршен во текот на следната година.

The post РЕОБЈАВЕН ТЕНДЕРОТ ЗА 100 АВТОБУСИ Градот влегува во нова фаза на јавен превоз appeared first on plusinfo.mk.

Започна површинското чистење на повеќедецениската депонија Вардариште, објави на социјалните мрежи градоначалникот на Скопје Орце Ѓорѓиевски.

Тој сподели снимка од расчистувањето.

„Следува процесот на одгасување а потоа – изградба на еден од најголемите паркови на површина од 300.000 квадратни метри, по сите стандарди. Новите бели дробови на градот“.

The post 📽️ ЗБОРОТ Е ЗБОР, ВАРДАРИШTЕ ЗАМИНУВА ВО ИСТОРИЈАТА Ѓорѓиевски најави парк од 300.000 квадратни метри appeared first on plusinfo.mk.

Бездомни лица не се евидентирани само на депонијата Вардариште, туку и на повеќе други локации во Скопје, меѓу кои Визбегово, Бутел и објектот „Ранка Милановиќ“. Надлежните веќе подготвиле акциски план за нивно сместување, а решението ќе се спроведе по моделот од Штип, каде неодамна беа изградени типски куќи за најранливите семејства.

Заменик-министерот за социјална политика, демографија и труд, Ѓоко Велковски, изјави дека документот веќе е доставен до Владата и дека чекорите се јасно утврдени.

– Не е доволно само да се дислоцираат луѓето од овие локации. Мора да им се обезбеди место каде што ќе живеат достоинствено. Акцискиот план е подготвен и веќе е во владина процедура – рече Велковски, нагласувајќи дека процесот е комплексен бидејќи се работи за трајно решавање на нивното станбено прашање.

Како позитивен пример го посочи Штип, каде во новоизградените типски куќи, финансирани од ЕУ и Општина Штип, пред неколку дена се вселени 36 семејства кои претходно живееле во субстандардни услови.

Велковски увери дека истиот модел ќе се примени и во Скопје, каде локациите со дивонаселени граѓани веќе се мапирани, а следниот чекор е обезбедување средства за изградба на нови објекти.

The post КРАЈ НА ЖИВЕЕЊЕТО ВО НЕХУМАНИ УСЛОВИ Скопје го решава проблемот со бездомните лица appeared first on plusinfo.mk.

Решен сум да воведам ред, а тоа подразбира и да се изрекуваат казни. Над 40 казни имаме досега и ќе продолжиме сè додека не ги изолираме целосно овие девијантни појави, изјави градоначалникот на Скопје, Орце Ѓорѓиевски, по спроведената 72-часовна акција за чистење на главниот град.

Ѓорѓиевски соопшти дека затекнал само 16 функционални камиони на ЈП „Комунална хигиена“, бидејќи Градот должел за нивно сервисирање. Како што изјави за ТВ Сител, сервисерите излегле во пресрет и сега има над 40 оперативни машини кои работат на терен, а во наредните денови се очекува бројот да се зголеми на 60, со што претпријатието би било целосно оперативно. Со премиерот, додаде тој, веќе е разговарано и за обезбедување нова механизација.

– Граѓаните цело време плаќале, но не ги добивале услугите. Без разлика од кого е предизвикан проблемот, моја должност е да најдам решение. Така ја доживувам довербата што ја добив од граѓаните – истакна Ѓорѓиевски.

Градоначалникот најави и дека во соработка со општествено одговорни компании ќе бидат поставени мрежи по течението на Вардар за заштита на речното корито. Такви решенија, рече, има и во други европски центри и не му пречат на живиот свет. Дополнително, укажа дека и централните институции, како Министерството за животна средина и просторно планирање, треба да се вклучат во санкционирањето, бидејќи не е доволно да постапува само Град Скопје.

Градежни активности ќе се изведуваат по зимата, а до тогаш приоритет ќе бидат уредувањето на парковите и чистењето на дивите депонии.

– Вардариште се расчистува, во фаза е процесот на одгасување. Девијантните појави од минатото конечно ќе бидат оставени зад нас и никој повеќе нема да биде сведок на тие слики. Народот во нашиот главен град нема да се труе како што тоа беше случај со децении – рече Ѓорѓиевски.

Ист третман ќе имаат и депониите во Визбегово, Шуто Оризари, покрај Лепенец и други локации.

Во однос на загадувањето на воздухот, Ѓорѓиевски изјави дека тоа е комплексен проблем кој зависи од сите граѓани. Најави проширување на мрежата на топлификација и консултации со експерти за третман и преработка на отпадот во Дрисла, која ја оцени како едно од главните жаришта на загадување.

Ѓорѓиевски потврди дека стои на ставот ЈП „Комунална хигиена“ да биде расформирана и поделенa под надлежност на скопските општини според бројот на жители, но за тоа, рече, сè уште нема услови.

– Не сме подготвени за тоа, затоа што претпријатието има премала механизација и би се создал дополнителен хаос. Но, идејата не ја отфрлам, ќе ја реализираме откако ќе се зајакнат капацитетите. Ќе изградиме јаки и самоодржливи јавни претпријатија во служба на граѓаните – нагласи тој.

Градоначалникот посочи дека одлука за вклучување на 200 автобуси од приватните превозници постоела и претходно, но никој не ја потпишал. Според него, на терен возеле само 40 до 50 автобуси, што довело до намален капацитет на јавниот превоз.

– Возниот парк на ЈСП е десеткуван, во моментов возат 160 автобуси, а потребни се најмалку 270 за нормално функционирање и без доцнења – објасни тој.

Долгот на ЈСП кон приватните превозници изнесува околу 3 милиони евра, а се работи на обезбедување на средствата и на договор за исплата.

Ѓорѓиевски најави и обнова на возниот парк во март во Скопје треба да пристигнат 80 еколошки автобуси преку Владата и Министерството за транспорт, а уште 70 ќе бидат распределени низ другите градови во Македонија.

Во петок, Град Скопје ќе одржи седница за буџетот. Ѓорѓиевски очекува реализација на сите планирани проекти, нагласувајќи дека има апсолутно мнозинство во Советот.

– Советниците во мене не треба да гледаат непријател, ниту јас гледам во нив непријател. Соработката е клучна за да имаме што повеќе проекти за граѓаните – изјави градоначалникот.

The post ЃОРЃИЕВСКИ ЌЕ ВОВЕДЕ РЕД ВО СКОПЈЕ Казни ќе има сè додека не се искоренат девијантните појави appeared first on plusinfo.mk.

За акциите во Вардариште се огласи и градоначалникот на Аеродром.

The post 📷 БАГЕРИ ВЛЕГОА И НА ВАРДАРИШТЕ, ОВА Е САМО ПРВ ЧЕКОР Ѓорѓиевски најави и одгасување на метанот од депонијата appeared first on plusinfo.mk.

Кандидатката за градоначалничка на Град Скопје од СДСМ, Каја Шукова, реагираше на долгогодишниот проблем со Вардариште, посочувајќи дека локацијата претставува сериозна еколошка и безбедносна закана и дека е потребна итна акција за нејзино расчистување и обезбедување.

– Имало неколку обиди за расчистување на Вардариште, но без траен ефект. Просторот е необезбеден и неограден, без континуиран надзор, што овозможува граѓани и фирми да депонираат шут и комунален отпад. Прво мора да се расчисти теренот, да се огради и да се воведе 24/7 надзор. Само така ќе спречиме нови пожари и загадување – изјави Шукова.

Според неа, дел од Вардариште и натаму функционира како претоварна станица, но остатокот е запуштен и претставува извор на загадување, особено за општините Аеродром и Гази Баба.

– Палењето на отпадот предизвикува сериозно загадување, но воздухот не познава граници. Затоа овој проблем не е локален, туку заеднички – додаде Шукова.

Таа повика на координирана акција со механизација и тешка машинерија, со цел Вардариште конечно да добие третман каков што заслужува.

Во гостување на ТВ21, Шукова ја појасни институционалната поставеност на Вардариште и истакна дека оваа локација не е во државна надлежност, туку е целосно под одговорност на Градот Скопје.

– Вардариште до 1996 – 1997 година беше депонија за градот Скопје. Откако беше изградена Дрисла, Вардариште стана претоварна станица. Овој простор е во надлежност на Градот Скопје и не е под одговорност на државата. Локалната власт мора да покаже сериозна одговорност и капацитет во управувањето со овој објект – изјави таа.

Шукова нагласи дека Вардариште мора да стане модерна претоварна станица по европски стандарди, со системи за селекција и третман на отпадот.

– Тоа не значи само претовар од помал камион во поголем, туку поставување систем за селекција, третман и користење на отпадот. Само така овој простор ќе биде дел од современ, одржлив систем – порача Шукова.

Шукова истакна дека решението мора да биде регионално, со вклучување на сите општини од Скопскиот регион и користење на европски ИПА фондови.

– Скопскиот регион треба да се финансира преку европски пари. За тоа мора да се изработи нова физибилити студија која ќе покаже како ќе се собира и третира отпадот во целиот регион, а не само во градот Скопје – објасни таа.

Според неа, се работи на нова студија финансирана од Европската унија, која ќе биде основа за нови инвестиции и треба да биде готова во рок од една до година и пол.

Кандидатката на СДСМ посочи дека Скопје мора да изгради сопствен систем за управување со отпад, наместо да се потпира на неуспешни концесии.

– Имаше обиди за концесија на Дрисла, но тие не беа успешни. Приватните партнери работат по повисоки цени, што значи повисоки трошоци за граѓаните. Затоа мора сами да го изградиме системот, со селекција, со реупотреба, со одговорност – рече Шукова.

Таа додаде дека се залага за нов модел на наплата според количина на отпад, а не според квадратура на станот, бидејќи моменталниот систем не обезбедува доволно средства за одржливо функционирање на јавните претпријатија.

– Управувањето со отпад е еден од трите најважни приоритети за Скопје и мора да го третираме како таков – со системски, а не ад-хок решенија – порача Шукова.

Шукова најави дека доколку добие доверба од граѓаните, веднаш ќе започне реализација на БРТ-системот, модерен автобуски транспорт кој значително ќе го намали загадувањето и ќе го подобри јавниот превоз.

– БРТ е најбрзото и најреално решение за јавниот транспорт во Скопје. За првата линија од Ѓорче Петров до Аеродром веќе имаме целосна проектна документација, објавен тендер и обезбедени 40 милиони евра од ЕБОР. Ако веднаш се започне со имплементација, на почетокот на 2028 година граѓаните ќе ја користат првата линија – изјави Шукова.

Таа посочи дека паралелно со изградбата на оваа линија, која треба да биде во должина од 13 километри, се предвидува, 21 нова постојка, околу 30 нови автобуси со фреквенција на движење на секои 5–6 минути, и можност за превоз на околу 65.000 патници дневно во нови, чисти и еколошки автобуси кои нема да загадуваат.

Покрај тоа, ќе се работи и на втората линија Север–Југ, за која ЕБОР условно има обезбедено дополнителни 30 милиони евра, но за реализација е потребна нова студија со оцена на влијание врз животната средина, економски и социјален бенефит, и одржливост.

Шукова потенцира дека во рок од 4–5 години, Скопје може да добие две главни БРТ линии, со што ќе се интегрира целиот јавен транспорт и ќе се овозможи брз, чист и достапен превоз за сите граѓани.

The post ВАРДАРИШТЕ МОРА ИТНО ДА СЕ РАСЧИСТИ И ОБЕЗБЕДИ Шукова најави модерна претоварна станица по европски стандарди appeared first on plusinfo.mk.

По 3 години затвор добија тројцата обвинети за предизвикување на големиот пожар на дивата депонија Вардариште – Мејсут Мемиши, Алмир Асани и Флорин Арифи.

„Сите тројца се виновни затоа што создале депонија спротивно од прописите со што предизвикале опасност по здравјето на луѓето, како и загадување на земјата и на воздухот, со тоа што откупувале старо железо и други материјали на импровизирани пунктови, иако знаеле дека немаат дозвола согласно Законот за управување со отпад и немале основано правно лице за таква дејност. Без дозвола и документација за собирање, третман и складирање отпад создавале диви депонии спротивно на прописите на закон за зивотна средина, а со тоа предизвикале опасност по здравјето на луѓето и загадување на околината и поради тоа се осудуваат на казна затвор по 3 години“, им ја соопшти судијата пресудата на обвинетите.

Како олеснителна околност за сите тројца се смета тоа што се со семејства, тие се неосудувани и невработени. Тежината на кривичното дело и влијанието врз животната средина од кривичното Судот ги засмета како отежителна околност.

Сите тројца на минатото рочиште ја признаа вината за кривичното дело Загрозување на животната средина и природата со отпад. Тие тогаш изразија каење и истакнаа дека нема да го повторат делото.

Обвинетите рекоа и дека се подготвени да соработуваат со надлежните за целосно отстранување на отпадот од депонијата.

Големиот пожар избувна на Вардариште на 31 август и беше вистински предизвик да се изгаси. Депонијата чадеше со денови, што предизвика големо загадување на воздухот во Ново Лисиче, Аердром, Гази Баба итн.

Поради пожарот и неактивноста на надлежните инстируции да го уредат овој простор кој со децени ја загадува околината, жителите на околните населби секојдневно протестираа.

5 ГОДИНИ ТЕРАЛЕ БИЗНИС НА ЦРНО, СОЗДАЛЕ ДИВИ ДЕПОНИИ КАДЕ ШТО ИЗБИЈА ПОЖАРИ Обвинителството истражува 3 лица поврзани со пожарот во Вардариште

The post ПО 3 ГОДИНИ ЗАТВОР ЗА ТРОЈЦАТА ШТО ГО ЗАПАЛИЈА ВАРДАРИШТЕ Предизвикале опасност по здравјето на луѓето и загадување на околината appeared first on plusinfo.mk.

Прв предуслов за средување на локалитетот Вардариште да почне да се третира депонијата со конкретен проект, вели Бобан Стефковски, кандидат од ВМРО-ДПМНЕ и актуелен градоначалник на општина Гази Баба.

– Ние како одговорна локална самоуправа, иако надлежноста на оваа депонија е на Град Скопје, веќе преземавме низа конкретни чекори. Еден детален урбанистички план е веќе донесен, два се во постапка на носење. Вкупната површина на депонијата Вардариште опфаќа три блока, односно три детални урбанистички планови. Првиот што е донесен е со намена Д3 – спорт и рекреација и останатите два ќе бидат во таа насока – рече Стефковски во гостување на Телма.

Тој укажа дека како прв чекор потребно е да се исчисти дел од таа депонија, а потоа да се оплемени и да прерасне во зелена оаза.

The post ВАРДАРИШТЕ ЌЕ СТАНЕ ЗЕЛЕНА ОАЗА Деталниот план предвидува простор за спорт и за рекреација appeared first on plusinfo.mk.

Жителите на Аеродром, Ново Лисиче и Маџари денеска повторно ќе излезат на протест против загадувањето од Вардариште, но овојпат со променета саатница.

Според иницијативата „Стоп за Вардариште“, блокадата на крстосницата кај мостот „Киро Глигоров“ ќе започне од 15 часот и ќе трае до 18 часот – токму во време кога најголем дел од скопјани се враќаат од работа.

Од иницијативата велат дека ова е реакција на, како што го нарекуваат, игнорантскиот однос на институциите кон проблемот што со години ги мачи жителите на овие општини.

„Бидејќи никој не нè слуша, протестите ќе бидат поинтензивни и поочигледни. Нема да застанеме додека не се преземат вистински мерки за Вардариште“, истакнуваат од иницијативата.

Речиси еден месец, жителите го блокираат сообраќајот на истата локација, предупредувајќи дека токму Аеродром и Гази Баба најмногу страдаат од чадот и загадувањето што доаѓа од депонијата.

Протестите се очекува да продолжат и во наредниот период, сè додека надлежните не понудат конкретни решенија за овој долгогодишен проблем.

The post ПРОТЕСТИТЕ НЕ СТИВНУВААТ, ТУКУ СЕ ЗАСИЛУВААТ Жителите на Аеродром ќе протестираат од 15 до 18 часот appeared first on plusinfo.mk.

Дејан Митески, кандидат за градоначалник на општина Аеродром од ВМРО-ДПМНЕ, беше гостин во емисијата Студио 10 на телевизија 24. Митески зборуваше за загадувањето при што истакна дека тоа е еден комплексен проблем. Како што вели тој, ВМРО-ДПМНЕ има изработено програма со цел да се реши проблемот со загадувањето, меѓутоа, кога станува збор за депонијата Вардариште, потребна ќе биде и поддршката од Град Скопје, за да се реши проблемот со неа.

– Претпоставувам дека сме единствената политичка партија која што има изработено програма. Предвидуваме решавање на еден аспект од загадувањето со изградба на топлификациона мрежа, проект со Владата на Македонија за изградба на гасна когенеративна централа и развој на 110 км топловодна мрежа во населба Лисиче, Горно Лисиче, Долно Лисиче. Ќе отстраниме во наредниот период еден дел од причините за загадувањето – рече Митески.

Митески се осврна и на сообраќајот и истакна дека предвидена е изградба на нова сообраќајна инфраструктура.

– Предвидуваме изградба на нова сообраќајна инфраструктура, нови поврзувања кои што ќе го олеснат сообраќајот и ќе го намалиме загадувањето од возилата. Предвидуваме решавање на депонијата Вардариште, заедно со градоначалникот на Град Скопје, имајќи предвид дека ни е неопходна поддршката од Град Скопје, за да можеме конечно да ја исчистиме таа депонија. Да изградиме нов парк и таа депонија да стане минато, а новиот парк да биде симбол на тоа дека ги слушаме граѓаните, се бориме заедно со нив и предвидуваме односно имплементираме решение – рече тој.

Митески додаде дека постојано се чисти и дневно повеќе од 10 тони отпад се депонираат во депонијата Дрисла.

Тој најави дека ќе се зајакнат инспекциските служби за да не создаваат диви депонии. Ќе се отвори дежурна линија за пријавување на диви депонии и ќе се формираат тимови за интервентно чистење на диви депонии кои што се создаваат секојдневно.

The post МИТЕСКИ НАЈАВИ ГАСНА ЦЕНТРАЛА ВО ОПШТИНА АЕРОДРОМ Ќе се зајакнат инспекциите за да не се создаваат нови депонии appeared first on plusinfo.mk.