Во периодот од 16 до 22 февруари во земјава се регистрирани 1.113 случаи на грип и заболувања слични на грип, што е намалување од 3,2 проценти во однос на претходната недела, покажува најновиот извештај на Институт за јавно здравје.

Според податоците, најголем дел од заболените се на возраст од 15 до 64 години – вкупно 621 лице. Пријавени се и 185 деца на возраст од пет до 14 години, 164 деца до четири години и 143 лица постари од 65 години. Највисока инциденца е регистрирана кај најмалите, односно кај децата до четиригодишна возраст.

Најмногу случаи се евидентирани во Скопје – 669. Потоа следуваат Струмица со 81 и Прилеп со 61 случај. Во Тетово се регистрирани 50 заболени, додека во Гевгелија и Охрид по 37. Во повеќе градови – меѓу кои Битола, Куманово, Дебар, Струга, Кичево, Штип, Кавадарци и други – бројот на заболени е под 30.

Од друга страна, во Крушево, Валандово, Крива Паланка, Демир Хисар, Берово, Кочани, Ресен, Виница, Делчево и Пехчево во овој период нема пријавени случаи на грип и заболувања слични на грип.

Од почетокот на сезоната 2025/2026 досега се регистрирани вкупно 14.984 случаи. Заклучно со осмата недела, во земјава се вакцинирани 79.118 лица со бесплатна или комерцијална вакцина.

The post ГРИПОТ ПОЛЕКА СЕ СМИРУВА, НО АЛАРМОТ СÈ УШТЕ Е ВКЛУЧЕН Над 1.100 нови случаи, најранливи се децата до 4 години appeared first on plusinfo.mk.

Досега на сајтот вакцинација.мк се пријавиле 33.000 граѓани за вакцинација против сезонскиот грип. На овој сајт, можат да се пријават граѓани од специфични категории кои се сметаат за најранливи на компликации од грипот. Овие категории ги вклучуваат лицата над 65 години, хронично болните пациенти, трудниците и децата до петгодишна возраст. Вакцината им помага на овие групи да се заштитат од сериозни компликации што можат да се јават по инфекција со грип, како што се пневмонија, бронхитис или други тешки респираторни состојби.

Сите граѓани кои се пријавиле на сајтот и добиле порака на својот мобилен телефон треба да се упатат во пунктот за вакцинација.

Предностите од вакцинацијата против сезонскиот грип се бројни. Вакцината не само што го намалува ризикот од заболување, туку и го скратува траењето на болеста и ги намалува симптомите доколку се заразите. Исто така, таа значително го намалува ризикот од хоспитализација, особено кај најранливите категории, и помага во спречување на ширењето на грипот во заедницата.

The post ПРИЈАВЕТЕ СЕ ЗА ВАКЦИНА ПРОТИВ ГРИП Има уште околу 40.000 бесплатни дози appeared first on plusinfo.mk.