Станува збор за правно и уставно оправдана одлука со цел да се заштити статусот на судиите, а не да се зголемат платите во прв план, како што се толкува во јавноста, вели претседателот на Уставниот суд Дарко Костадиновски, во врска со укинувањето на законот со кој беа намалени коефициентите за пресметка на платите на уставните судии и барањето до Собранието да направи законски измени со кои би се усогласиле коефициентите за пресметка на тие плати.

– Нас како уставни судии ни е јасно дека голем дел од нашите одлуки што ги носиме се непопуларни одлуки, и ние сме свесни за тоа. Една таква одлука е и оваа одлука, но луѓето што го разбираат правото и што ги следеле нашите одлуки на оваа одлука можат да гледаат како природен след, како правно логична и уставно-правна оправдана одлука. На почетокот на годината Уставниот суд донесе одлука со чиј ефект на судиите од редовното судство им се зголемија платите од 10.000 до 12.000 денари. Ефектот на таа одлука не беше толку да се зголемат платите на судиите, туку Владата и Собранието во иднина да не можат веќе да ги намалуваат коефициентите на редовните судови. Кога ние тогаш ја донесовме таа одлука, а Уставниот суд е исто така суд по сите критериуми и ние ги уживаме истите гаранции за финансиската независност која е нераскинливо поврзана со статусната независност како судии. Ако е тоа така, природно беше да интервенираме во Законот, но повторно ќе кажам не на начин директно за коефициентите, туку статусно да се одвоиме од носителите на јавни функции од другите власти. Со последните законски решенија во Законот за избрани и именувани функционери, претседателот на Уставниот суд и уставните судии беа ставени во ист нормативен режим со Генерален секретар на Собрание, Генерален секретар на Влада, Народен правобранител. Не постои такво нешто никаде во светот, не може нормативно Законодавецот да го изедначува статусот на уставен судија со ниедна од овие власти – рече Костадиновски во гостување на Сител.

На прашањето дали Судот може на ваков начин да постапува кон пратениците, Костадиновски одговори:

– Не, не можеме апсолутно. Ние утврдивме неуставност во статусната положба на судиите затоа што, ако уставен судија го изедначувате со генерален секретар на Собрание и на Влада и ист коефициент на плати да му одредувате, зар тоа не преставува негирање уставна положба? Апсолутно претставува такво нешто и кој било уставен суд во светот ќе ви го потврди тоа. Ние донесовме одлука, исто така, на почетокот на годината и побаравме, му одредивме рок на Собранието да интервенира, Собранието не интервенираше. Оваа одлука што ја донесовме на последната седница е логична одлука. За да спречиме апсурд… Следната година, бидејќи платите на редовните судии не можат веќе да бидат намалувани, а просечната плата ќе расте, знаете каква е формулата за пресметување, за година до две, платата на основен судија ќе биде поголема од платата на уставен судија. Ако најдете сличен пример во светот јас сум спремен веднаш да заминам од Уставниот суд – рече Костадиновски.

Во врска со предметот за преименувањето на улиците и други инфраструктурни објекти во Тетово, Костадиновски рече дека иницијативата не е поднесена пред 19 години, туку минатата година и нагласи дека предметот отвора суштинско прашање за владеењето на правото.

– Со многу наши одлуки политичарите многу често манипулираат и лажат. И тоа безобзирно ги лажат граѓаните. Оваа одлука, како и многу други одлуки што Уставниот суд ги  донесе, а кои се од повисоко општествено значење, т.н „балансер“, Законот за солидарен данок, Кривичниот законик, Изборниот законик…, отвара едно круцијално прашање. Каква држава ние сакаме да изградиме, дали сакаме модерна, европска, функционална, правна држава да градиме или да останеме во она како што било со децении квази правна држава? Што е квази правна држава? Тоа е држава кога е политиката е над сè, политиката е над Уставот, политичарите се над институциите, политичарите одлучуваат за правата на граѓаните, моќта е во политичарите. Ние сме за отпор против тие тенденции. „Црн ден за Албанците“, сме ги рушеле постулатите на рамковниот договор… Дали имате согласност од Владата? Немате, готово! Замислете ние да прогледавме низ прсти тогаш ние ќе имавме 80 држави во државава, 80 општини што ќе речат чекајте вие сте воспоставиле уставно судска пракса тогаш и ние можеме, не треба согласност ни за ДУП, не треба согласност ни за преименување…. тоа е правна анархија – рече Костадиновски.

Во врска со обвинувањата дека е антиалбански настроен, посои дека е веќе сум имун на таквите критики.

– Јас можам да бидам сè само не анти Албанец. Значи, на некои политичари им пречи владеењето на правото, а устите им се полни со владеење на правото, европски вредности, со европски стандарди и тоа до пладне, а попладне тераат на „балкански“ начин. Тоа е нивни проблем. Ние 35 години се вртиме во кругот на таа квази правна држава… Уставот, правото и институциите ќе бидат над сите – порача Костадиновски.

За предметот поврзан со проектот „Сејф сити“, претседателот на Судот рече дека уште не е доставен рефератот за тој предмет до него, а во моментот кога ќе биде доставен веднаш ќе се најде на седница.

За иницијативата поднесена од поранешната пратеничка Љиљана Поповска во врска со Вториот протокол од преговарачката рамка со Бугарија, Костадиновски нагласи дека Судот не калкулира.

– Нити калкулира, ниту ќе калкулира. Јавноста знае дека јас не правам компромиси со никого по ниеден предмет, па ни по овој. Што е суштината, наводите во таа иницијатива се исклучително сериозни, импликациите од решавањето на тој предмет, како и да биде решен, се многу сериозни. За ние да можеме да ја утврдиме фактичката состојба што навистина се случува, затоа што таму има наводи за повреда и на материјалната уставност, но и формален дека не е запазена процедурата, немало платформа од Владата, ние сè уште го чекаме одговорот од Владата. Бидејќи Владата ни е странка во оваа постапка, ние мораме да добиеме информација од Владата – рече Костадиновски.

Во врска со Законот за употреба на јазиците повтори дека предметот ќе биде решен кога Судот ќе биде комплетен.

– Јас имам кажано нема компромиси со никого во поглед на решавањето. Тој предмет ќе биде решен му се допаѓало тоа на некого или не и никој не треба да се плаши од решавањето на тој предмет. Многу често ги слушаме критиките кон Уставниот суд за етничко надгласување, за мајоризација, има застапници за Бадентер и во Уставниот суд и затоа имам став. Ние, без разлика на етничката припадност, не сме таму да ги штитиме етничките афилиации и имаме една едноставна задача… Најчесто албанскиот политички фактор ги обвинува мнозинството македонски судии дека сме правеле мајоризација… Јас често прашувам дајте луѓе да видиме да седнеме што ги прави правни и уставно-правни аргументи на нашите колеги, а што нашите ги прави етнички. Не е точно, обратно е – потенцираше Костадиновски.

The post НЕ БИЛА ЦЕЛТА ДА СЕ ЗГОЛЕМАТ ПЛАТИТЕ НА УСТАВНИТЕ СУДИИ, ТУКУ ДА ИМ СЕ ЗАШТИТИ СТАТУСОТ Според Костадиновски, не може уставен судија да се изедначува со генсек на Влада appeared first on plusinfo.mk.

Државна лотарија на Македонија реагираше во врска со јавните дебати околу Предлог-законот за игрите на среќа и забавните игри, посочувајќи дека постојната уставно-судска практика ја потврдува посебната улога на државата во организирањето и регулирањето на игрите на среќа.

Во реакцијата се наведува дека генералниот директор на Државна лотарија, проф. д-р Александар Климовски, на јавната дебата за Предлог-законот правно и аргументирано ја застапувал позицијата дека државата треба да биде единствен приредувач на интернет игрите на среќа.

Од Државна лотарија се повикуваат на Решението У. бр. 156/2019 од 6 мај 2020 година на Уставниот суд, со кое не е поведена постапка за оценка на уставноста на член 7 ставови 2 и 3 од Законот за игрите на среќа и за забавните игри.

„Недвосмислено се потврдува уставната оправданост на новото предлог-законско решение, со кое државата задржува посебни права и надлежности во сферата на приредувањето игри на среќа“, се наведува во реакцијата.

Според Државна лотарија, во своето образложение Уставниот суд оценил дека определбата на законодавецот за задржување на правото за приредување одредени игри на среќа кај државата претставува легитимна законодавна политика заснована на јавен интерес.

„Судот особено ги истакнува видот и карактерот на игрите на среќа, нивната масовна достапност, обемот и сложеноста на нивното организирање, како и потребата од засилена контрола, надзор и заштита на јавниот интерес“, велат од Државна лотарија.

Во реакцијата се посочува дека Уставниот суд утврдил оти ваквото законско решение не е спротивно на член 55 од Уставот и не ги повредува принципите на слободен пазар и претприемништво.

Од Државна лотарија нагласуваат дека постапувањето на генералниот директор било во целосна согласност со важечката законска рамка и со веќе утврдените правни ставови на Уставниот суд.

„Постапувањето на генералниот директор на Државна лотарија не било ниту произволно, ниту надвор од законската рамка, туку претставувало доследно следење на важечките законски решенија и на правните ставови веќе потврдени од највисоката уставно-судска инстанца“, се наведува во реакцијата.

Оттаму додаваат дека уредувањето на пазарот на игрите на среќа е прашање на законодавна политика на државата, при што законодавецот има право да одлучува за обемот, начинот и условите под кои ќе се организираат поединечни видови игри на среќа.

„Од уставно-правен аспект, произлегува дека државата има легитимно право да утврдува дали, под кои услови и во кој обем ќе биде дозволено организирањето на интернет игрите на среќа, имајќи ја предвид својата одговорност за заштита на јавниот интерес, спречување на злоупотреби и обезбедување ефективен надзор над оваа дејност“, стои во реакцијата.

Во завршниот дел од соопштението, Државна лотарија оценува дека секој обид постапувањето на генералниот директор да се прикаже како незаконско или спротивно на уставните принципи е во спротивност со веќе утврдените правни ставови на Уставниот суд.

„Основано може да се заклучи дека генералниот директор на Државна лотарија постапувал совесно, законито и во согласност со уставно-судската практика, имајќи ја предвид својата обврска да го штити јавниот интерес и да обезбеди доследна примена на законската рамка во областа на игрите на среќа“, наведуваат од институцијата.

Во реакцијата се поставува и прашањето дали непознавањето на законската и уставно-судската практика од страна на АПИС и АСОМ, кои според Државна лотарија дејствуваат во име и за сметка на приватните приредувачи на игри на среќа, е намерна или ненамерна грешка.

The post РЕАКЦИЈА НА ДРЖАВНА ЛОТАРИЈА Уставниот суд ја потврдува улогата на државата во игрите на среќа appeared first on plusinfo.mk.

Поранешната пратеничка и претседателка на партијата ДОМ Лилјана Поповска испрати ургенција до Уставниот суд, барајќи забрзување на постапката по нејзината иницијатива за оценување на уставноста и законитоста на Протоколот од вториот состанок на Заедничката меѓувладина комисија меѓу Македонија и Бугарија, потпишан на 17 јули 2022 година во Софија.

Во дописот, Поповска потсетува дека уште на 13 август 2025 година Уставниот суд донел решение за поведување постапка по нејзината иницијатива, но речиси една година подоцна сè уште не е закажана јавна расправа ниту е донесена конечна одлука.

Таа наведува дека со тоа се надминати роковите предвидени во Деловникот на Уставниот суд, вклучително и рокот од 30 дена за доставување одговор од органот што го донел оспорениот акт, како и рокот од три месеци за подготовка на реферат за седница.

Поповска бара Судот во догледно време да организира јавна расправа и потоа да донесе одлука со која ќе утврди дека Протоколот не е во согласност со Уставот, Законот за склучување, ратификација и извршување на меѓународни договори и Законот за надворешни работи, поради што треба да биде поништен или прогласен за правно ништовен.

Во ургенцијата таа повторува дел од аргументите наведени во иницијативата. Според неа, Протоколот не бил ратификуван во Собранието, не бил објавен во законски предвидената постапка и не била испочитувана процедурата за негово договарање и усвојување. Таа оценува дека документот излегува надвор од рамките на акт што треба да обработува одредби од Договорот за добрососедство и дека има последици врз идентитетските прашања, јазикот и историјата на македонскиот народ.

Поповска тврди дека Протоколот претставува „невалиден акт“ кој содржи сериозни правни недостатоци и политички импликации, додавајќи дека со него се отвора простор за условувања што, според неа, директно влијаат врз македонските евроинтеграции.

Во дописот таа се осврнува и на неодамнешните случувања во Европскиот парламент, оценувајќи дека не биле прифатени предлози кои би довеле до преиспитување на спорните елементи од Протоколот. Поради тоа, смета дека домашните институции, а особено Уставниот суд, треба да ја преземат иницијативата и да ја разрешат оваа правна дилема.

Лилјана Поповска ја поднесе иницијативата до Уставниот суд на 24 јули 2025 година, барајќи оценување на уставноста и законитоста на Протоколот од вториот состанок на Заедничката меѓувладина комисија меѓу Македонија и Бугарија од 17 јули 2022 година. Уставниот суд на 13 август 2025 година поведе постапка по предметот УЗ.44/2025. Во иницијативата се наведува дека Протоколот е спротивен на повеќе уставни одредби и закони, бидејќи не бил ратификуван во Собранието и не била испочитувана постапката за негово усвојување. Поповска бара негово поништување, додека поддржувачите на документот сметаат дека тој е составен дел од рамката што овозможи деблокирање на европскиот пат на земјата и почеток на пристапните преговори со Европската Унија.

The post ПОПОВСКА БАРА ЈАВНА РАСПРАВА ЗА ПОНИШТУВАЊЕ НА ПРОТОКОЛОТ СО БУГАРИЈА Испати ургенција до Уставниот суд appeared first on plusinfo.mk.

Уставниот суд на вчерашната седница ја укина Одлуката на Совет на Општина Тетово, донесена на 24 април 2007 година, за преименување на имињата на улиците, плоштадите, мостовите и други објекти во градот. Причината за укинувањето на Одлуката е поради тоа што пред речиси 2 децении таа не добила согласност од Владата. Уставниот суд оценил дека Одлуката на Советот на Општина Тетово не е во согласност со законските и уставните норми.

Иницијативата пред Уставниот суд беше поднесена на 11 февруари 2025 од Даријан Сотировски и Сојузот на борците од НОБ-Тетово.

Со Одлуката на Советот на Општина Тетово од 2007 беа сменети имињата на повеќе улици и на градскиот плоштад во Тетово. Така главниот булевар и плоштадот, кои го носеа името „Маршал Тито“ беа преименувани во булевар и плоштад „Илирија“, улицата „ЈНА“ стана „Дервиш Цара“, улицата „29 Ноември“ во „Мехмет Паша Дерала“ и уште неколку други улици добија нови имиња.

Оваа Одлука на Општина Тетово не беше прифатена од централната власт па во изминативе 19 години во Тетово постоеше двојно именување на дел од улиците. Во општинските документи фигурираа новите имиња на улиците, но во официјалните документи издадени од државата (лични карти, пасоши и друго) беа внесувани старите имиња на улиците.

Пред крајот на првиот мандат, сегашниот градоначалник на Општина Тетово Билал Касами покрена иницијатива за промена на имињата на уште улици во градот кои „не одговарале на сегашниот момент и се остаток од едно мрачно минато“, како што беше образложено. Се формираше комисија која имаше за цел да утврди список на предлози за нови имиња која одржа и 4 јавни дебати на кои граѓаните покрај по електронски пат можеа и усно да даваат предлози за новите имиња на улиците. Па така, меѓу над 1.000 предлози имаше и такви со имиња на Албанци кои соработувале со фашистичкиот окупатор, имиња на припадници на УЧК, на лица кои се сосем непознати и нерелавантни за историјата на Тетово, потсетува СДК.мк.

Пред одржувањето на Локалните избори во 2025, оваа комисија беше распуштена, а по добивањето на вториот мандат за градоначалник, Касами формира нова комисија која, како што беше речено, наскоро требало да излезе со предлозите за нови имиња на дел од улиците во Тетово.

На одлуката на Уставен, вчера остро реагираа од Демократската унија за интеграција (ДУИ), оценувајќи дека таа покажува дека кампањата за демонтирање на политичките достигнувања на Албанците влегува во нова фаза.

Според ДУИ, враќањето на името „Маршал Тито“ на централниот плоштад во Тетово е само најнов знак на една реалност што секој ден станува сè поочигледна, а тоа е дека „државните институции се користат за бришење на трагите од еднаквоста која е стекнувана со децении политички напори“.

The post ВО ТЕТОВО ПОВТОРНО ЌЕ СЕ ШЕТА ПО „МАРШАЛ ТИТО“ Уставниот суд ја укина одлуката на Општината за преименување на улиците донесена пред 19 години appeared first on plusinfo.mk.

Претседателот на Уставниот суд на Република Северна Македонија, Дарко Костадиновски, реагираше на соопштението на политичката партија Левица, истакнувајќи дека нема да коментира политички ставови, но чувствува обврска да одговори на, како што наведе, личните дисквалификации и навреди упатени кон него.

„Како претседател на Уставниот суд, останувам доследен на својот принципиелен став да не коментирам ничии политички ставови изнесени во јавноста. Сепак, овој пат, бидејќи се работи за лични дисквалификации, навреди, чувствувам должност да констатирам дека за жал, на македонската политичка сцена сѐ уште опстојува примитивен политички менталитет. Истовремено сакам и да изразам жалење што на мојот професионален живот и лична кариера, некој упорно им дава политичка димензија. Прашањето каде по завршувањето на мандатот ќе продолжи мојата кариера и дали тоа ќе биде универзитетската заедница претставува мој личен избор, како и легитимно право на секој граѓанин кој ги исполнува законските услови за вршење одредена професија“, наведува Костадиновски во дописот до медиумите.

Осврнувајќи се на критиките поврзани со неговиот можен ангажман во академската сфера, тој посочи:

„За конкретното прашање со кое се преокупирани некои политички структури, релевантни се следниве критериуми: моето научно творештво и искуство, како и потребата на академската заедница од таков кадар. А, овие критериуми кои е лесно да се објективизираат секако не зависат од било кој политичар и неговите преференци!“

The post КОСТАДИНОВСКИ Ѝ ПОРАЧА НА ЛЕВИЦА ДЕКА НЕГОВ ЛИЧЕН ИЗБОР Е КАДЕ ЌЕ ЈА ПРОДОЛЖИ КАРИЕРАТА „Некој упорно му дава политичка димензија на мојот живот“ appeared first on plusinfo.mk.

Претседателот на Уставниот суд во врска со реакции за предметот за Законот за употреба на јазиците, Костадиновски остро ги отфрли тврдењата дека Уставниот суд „го масакрира албанскиот јазик“, оценувајќи дека станува збор за политичка манипулација и злоупотреба на чувствителни прашања.

– Тоа е тешка лага и тешка манипулација. Многу ми пречи кога се прејудицира. Кај нас со голема леснотија политичарите бркајќи политички гласови и мобилизација на гласови, злоупотребуваат теми што не се баш подобни за политичка манипулација, како што се меѓуетничките односи. Не знам од каде му е рефератот, но апсолутно не станува збор за никакво масакрирање на албанскиот јазик. Јас повеќе пати до сега имам истакнато никој нема да го чепне албанскиот јазик, тоа е уставна категорија и така како што е уреден со Уставот – изјави Костадиновски во гостување на ТВ21.

Тој посочи дека Уставниот суд не ја оспорува суштината на правото на употреба на албанскиот јазик, туку анализира конкретни законски одредби низ призма на правната сигурност и уставноста.

– Правната сигурност како фундаментален принцип на владеењето на правото налага во правниот промет да бидат јасни и прецизни норми. Не значи дека суштината на Законот за употребата на јазиците е неуставна, туку би се отсраниле неуставните одредби, на пример „и други институции“, „како сите други органи тела“ и „други институции“, „како и во други области“, „како и сите други институции“. Во правото не постои вакво нешто, не постои закон во кој ќе најдете „како и во сите други области“, зашто тогаш ќе имаме некој што е арбитер, тој да одлучува кој се тие области. На пример употребата на албанскиот јазик во градинка – ако тоа значи масакрирање, значи тоа е лага, невистина – нагласи претседателот на Судот.

Костадиновски посебно се повика на мислењето на Венецијанска комисија, оценувајќи дека во јавноста селективно се користат делови од препораките.

– Мислењето на Венецијанската комисија е многу важно за нас. Уставниот суд секојдневно носи одлуки базирајќи се на меѓународни стандарди и општо прифатени норми на меѓународното право. Лицемерие е од мислењето на Венецијанската комисија да се селектира тоа што ни одговара, а тоа што не ни одговара да не се истакнува. Комисијата е многу јасна, во споредба со законот од 2008 година, овој закон значително го зголемува опсегот на употребата на албанскиот јазик и тоа е за пофалба. Но, истовремено вели и дека во сегашни околности, доколку законот се спроведе во целост, значително ќе го забави функционирањето на целиот судски систем, а со тоа би се појавил и ризик од сериозно нарушување на правото на правично судење – рече Костадиновски.

Тој додаде дека Венецијанската комисија нотирала и дека законот содржи „многу нејаснотии во однос на неговото значење и опсег“, а Уставниот суд има обврска да интервенира секогаш кога постојат нејасни и непрецизни норми што можат арбитрарно да се применуваат.

Во врска со укинувањето на т.н. „балансер“, Костадиновски оцени дека новото законско решение претставува значително подобар концепт, бидејќи покрај соодветната и правичната застапеност ги афирмира и принципите на стручност и на компетентност.

– Суштината на законот е што операционализацијата на соодветната и правична застапеност сега е со закон, а не со подзаконски прописи. Уште поважно е што покрај соодветната и правична застапеност се операционализира уште една уставна вредност, стручноста и компетентноста, односно мерит-системот. Кога тие две уставни вредности ќе се спојат, тогаш имаме добар закон. Граѓаните ќе имаат многу постручна и покомепетентна и плус правично застапена јавна администрација – изјави Костадиновски.

Осврнувајќи се на имплементацијата на одлуките на Уставниот суд, Костадиновски истакна дека со новиот акт на Судот се воведени значително посилни механизми за следење на нивното извршување.

– Ако утврдиме дека некој орган не ја почитува одлуката, ќе направиме посебен извештај и ќе го известиме Јавниот обвинител, затоа што непочитување на одлука на Уставен суд е кривично дело и тоа квалификувано со 10 години затвор – потенцираше претседателот на Судот.

Во врска соизмените на Кривичниот законик, тој оцени дека државата во краток период создала дури „5 правни режими“ за едно чувствително кривично дело, што според него претставува сериозна повреда на правната сигурност и на владеењето на правото.

– Ние во Уставниот суд често велиме дека честите промени на законите се тешка повреда на правната сигурност и на владеењето на правото. Имавме еден правен режим, потоа катастрофални измени и дополнувања, па нашата постапка, па нови измени, па можност за уште едно решение. Пет правни режими од 2023 година до денес за една чувствителна област. Ако интервениравме и не ја запревме постапката ќе создадевме правна празнина и ќе немаше кривично дело. Тоа ќе беше повик за општ грабеж – рече Костадиновски.

Тој говореше и за потребата од уставни измени, улогата на Уставниот суд во правниот поредок, политичките притисоци врз институцијата, како и за предметот поврзан со членот 218 и долговите на јавните претпријатија. Оцени дека иако Уставот дава доволна рамка за функционирање на државата, постојат повеќе слабости и недоречености што во иднина треба да бидат надминати.

Тој посочи дека Уставниот суд преку својата пракса ја дава содржината на темелните вредности на уставниот поредок.

– Ако Уставниот суд во кој било случај на кој било начин го толкува плурализмот или социјалната правда или не знам правото на животна средина, владеење на правото, поделбата на власта, која било од овие, тоа е веќе задолжително за сите органи и за Собранието и за судовите – изјави Костадиновски.

Тој наведе дека во Уставот постојат и конкретни „уставни празнини“, посочувајќи го примерот со т.н. „џебно вето“ на претседателот на државата, како и можноста за автентични толкувања, кои според него претставуваат „рецидив од претходниот систем“.

– Автентичните толкувања се многу опасна работа. Правниот ефект на автентичното толкување е ретроактивен, кога ќе се даде автентичното толкување како треба да се толкува тој и тој член во тој и тој закон, тоа важи дека тој треба да се толкува така од денот кога е донесен. Тоа е рецидив од социјализмот – изјави претседателот.

Осврнувајќи се на фактот дека државата сè уште нема Закон за Уставен суд, Костадиновски истакна дека институцијата функционира врз основа на само 6 уставни одредби и Актот на Судот, оценувајќи дека намерата на уставотворецот била да го заштити Судот од политички интервенционизам.

– Мислам дека овој Уставен суд во овој состав во изминативе две години навистина постапува како што го замислил Уставотворецот. Штом државните органи се нервозни и претставува проблем во нивната работа, тоа значи дека Уставниот суд добро си ја работи својата работа – изјави Костадиновски.

За предметот поврзан со долговите на јавните претпријатија, тој предупреди дека евентуалната одлука може да има сериозни последици врз државниот систем и економијата.

– Последиците од нашата евентуална одлука можат да бидат катастрофални, дури и од катаклизмични размери, бидејќи долговите на јавните претпријатија се околу една милијарда евра – истакна Костадиновски.

Тој нагласи дека државата мора да воведе финансиска дисциплина и да стави крај на неодговорното работење на јавните претпријатија.

– Не може јавните претпријатија да се однесуваат бахато и комотно, а приватни компании да пропаѓаат затоа што не можат да си ги наплатат долговите. Мора државата да најде некој начин како да се справи со ова или со партиската превработеност. За тие да земат плата, на пример, приватна компанија треба да пропадне, мора да се стави крај на ова – порача претседателот Костадиновски.

Претседателот ја нагласи потребата од воведување на уставна тужба, оценувајќи дека Македонија е единствена држава во Европа со толку ограничен опсег на непосредна уставно-судска заштита.

Костадиновски зборуваше и за новата иницијатива поврзана со платите на судиите, при што рече дека е разочаран од барањата повторно да се интервенира во законското решение што Судот претходно го оживеал.

– Ме разочара, сега ќе ви кажам од кој аспект. Ние кога ја носевме одлуката за платите на судиите секако дека имавме предвид што ќе значи тоа за Буџетот, намерно ја запревме постапката за законот кој сега повторно е оспорен со нова иницијатива, за да можеме со поништувањето на новиот закон да ја вратиме во живот. За платите на судиите да бидат достоинствени. И што ме разочарува? Сега се оспорува тој закон што ние го оживеавме, односно сакаат да се врати претходниот закон, што тоа би значело. Ако хипотетички Уставниот суд интервенира во овој закон сега што ни го оспоруваат, тогаш платите на основните судии на апелационите судии, односно коефицинетот на платите ќе дојде на нивото на претседателот на државата, на премиерот на државата, на спикерот, дали е тоа реално? Не е – рече Костадиновски.

The post ЈАВНИТЕ ПРЕТПРИЈАТИЈА ДОЛЖАТ МИЛИЈАРДА ЕВРА Катаклизмични последици за економијата може да донесе одлуката на Уставниот суд appeared first on plusinfo.mk.

Министерот за внатрешни работи Панче Тошковски во вечерашното гостување на емисијата „За или против“ на ТВ АЛФА најави дека ќе предложи до пратениците во Собранието одложување на примената на новиот Закон за внатрешни работи и измените на Законот за полиција, со цел тие да стапат во сила по завршување на следниот изборен процес.

Оваа најава следува по обвинувањата на опозициската СДСМ дека полицијата се партизира и дека новиот Закон за внатрешни работи е противуставен. Тошковски оцени дека станува збор за обид на опозицијата однапред да создаде алиби за изборниот пораз што, според него, ја очекува на наредните парламентарни избори.

– За да не им се даде алиби и да не им се остави простор да критикуваат и да бараат излезно сценарио, ќе предложам до пратениците во Собранието, најбрзо што може, измена со која и новиот Закон за внатрешни работи и измените на Законот за полиција ќе се одложат и ќе стапат во сила по завршување на изборниот процес – изјави Тошковски.

Министерот посочи дека, со оглед на тоа што редовните парламентарни избори би се одржале за околу две години, законите би требало да стапат во сила по истекот на тој период, односно по завршување на изборите. Според него, целта е изборниот процес да се одвива според истите правила кои важеле и досега, без можност опозицијата да тврди дека законските измени влијаеле врз условите за избори.

– Сè со цел да не им дозволиме ни најмала излезна варијанта во насока на наоѓање алиби кое би го оправдало нивниот дебакл на наредните парламентарни избори – нагласи Тошковски.

Тој додаде дека СДСМ, откако го изгубиле аргументот поврзан со техничката Влада, сега се обидуваат политичкиот фокус да го пренасочат кон новиот Закон за внатрешни работи.

– Претходно беше техничката Влада. Еве, сега остана техничката Влада за наредните избори. Денеска со соопштение се фокусирани на МВР и наводно противуставниот закон кој тие го детектирале, па сега тоа било проблем. Не смееме да дозволиме какво било алиби кое утре би можело да им биде основ да се повикуваат дека законот бил сменет и дека не им биле овозможени услови какви што тие барале – рече министерот.

Тошковски истакна дека предложените законски решенија се значително подобри од постојните, но дека во интерес на политичката одговорност и јавната доверба, нивната примена ќе биде одложена.

– Законските измени се неспоредливо подобри во однос на оние кои ги имавме со старото законско решение, но факт е дека нападот од страна на опозицијата е фокусиран токму тука – посочи Тошковски.

Во однос на иницијативата до Уставниот суд за оценување на уставноста на законот, министерот рече дека одложувањето ќе овозможи доволно време за институционална, правна и јавна дебата околу сите спорни прашања, без каков било впечаток дека се врши притисок врз Судот.

– Законот требаше да стапи во сила од 1 јули, но за да не излезе дека правиме притисок врз Уставниот суд, во овој период од две години ќе има доволно можност и време за дебата дали одредени законски одредби се исправни или не се исправни – рече Тошковски.

Министерот порача дека полицијата ќе продолжи да работи професионално, законито и во интерес на граѓаните, а политичките обиди за создавање алиби нема да ја одвратат институцијата од реформскиот процес.

 – Ќе го одложиме законот две години. Ќе стапи во сила откако ќе заврши техничката Влада, согласно истите правила на игра какви што биле и претходно – заклучи Тошковски.

The post ЗА СДСМ ДА НЕ ВЕЛИ ДЕКА ПРАВИЛАТА СЕ СМЕНЕТИ ПРЕД ИЗБОРИ Тошковски ќе предложи новите закони за полиција да се применуваат по следните редовни избори appeared first on plusinfo.mk.

Претседателот на Уставниот суд, Дарко Костадиновски, во интервју за емисијата „Со факти“, емитувана на 08.04.2026 година на МРТ 1, упати јасна порака до јавноста во врска со Законот за употреба на јазиците за кој се води предмет во Судот, нагласувајќи дека неосновано се создаваат стравови и политички тензии околу ова прашање.

– Сакам да упатам еден апел бидејќи гледам премногу се манипулира со ова прашање. Никој нема да го чепне албанскиот јазик. Уставниот суд постои за да помогне во уставно-загарантираните права дали се јазични, дали се соодветна правична застапеност, да бидат заштитени а не да ги укине. Тие се уставна категорија така што не ги прифаќам никако тие квалификации дека некој сака да го укине, да ја намали употребата или да го загрози албанскиот јазик. Апсолутно се неточни – рече Костадиновски.

Тој потенцира дека одлуките на Судот ќе имаат за цел да ја олеснат практичната примена на правата.

– Нашите одлуки можат само да ја олеснат примената на албанскиот јазик така што нашите сограѓани Албанци да бидат спокојни, никој нема да го чепне албанскиот јазик – порача тој.

Костадиновски посочи дека мислењето на Венецијанската комисија не треба да се толкува селективно, бидејќи содржи и пофалби, но и забелешки.

– Прво Венецијанската комисија кажува за разлика од Законот од 2008 година. Овој закон од 2018 година значително ја проширува употребата на албанскиот јазик и Венецијанската комисија вели дека тоа е за пофалба, дури и се поздравува волјата на властите во Македонија за унапредување на јазикот на заедниците, и тоа навистина за пофалба, но Венецијанската комисија вели дека со одредени одредби во одредени области се оди предалеку – рече тој.

Во врска со поништувањето на измените за платите на судиите од страна на Уставниот суд, тој рече:

– Постојат бројни меѓународни стандарди како што е Европската повелба на судиите, како што е Венецијанската комисија… Сите тие укажуваат дека дури и во услови на криза, не може да се намалуваат платите на судиите. Зошто? Затоа што така се гарантира нивната независност и самостојност. Во околности во кои се наоѓа Македонија каде што недовербата во системот е на историски најниско ниво, вреди да се заштити независноста и самостојноста на судската власт, но и таа власт стварно треба да почне да испорачува резултати.

The post НИКОЈ НЕМА ДА ГО ЧЕПНЕ АЛБАНСКИОТ ЈАЗИК, НЕКА БИДАТ СПОКОЈНИ ГРАЃАНИТЕ Костадиновски вели дека премногу се манипулира со ова прашање appeared first on plusinfo.mk.

Важно е да се обезбеди максимална независност и самостојност на правосудните органи, како суштински предуслов за владеење на правото, истакнаа државниот обвинител Ненад Савески и претседателот на Уставниот суд, Дарко Костадиновски, кои денеска одржаа работна средба.

На средбата беа разменети мислења и информации за состојбите во правосудниот систем и владеењето на правото, како и за улогата и одговорностите на двете институции во насока на нивно унапредување и градење функционална правна држава.

Претседателот на Уставниот суд Костадиновски нагласи дека политиката и државните органи треба да покажат повисока уставна, правна и политичка култура и да се воздржат од какви било влијанија и притисоци врз правосудството. Тој посочи дека транспарентноста е еден од клучните приоритети на Судот, при што воведувањето на јавно емитување на седниците претставува значаен чекор кон поголема отвореност и отчетност.

– Обидите за политизација и етнизација на работата на Уставниот суд и на кој било правосуден орган, како и креирањето перцепција за недоверба во институциите, претставуваат директен удар врз демократијата. Крајно време е политиката да ги тргне рацете од правосудниот систем, а правосудниот систем да испорача конкретни резултати – истакна Костадиновски.

Јавниот обвинител Савески потенцираше дека без јасна одговорност и мерливи резултати не може да се говори за вистинско владеење на правото. Тој додаде дека транспарентноста е неопходен предуслов за зајакнување на довербата на граѓаните во институциите.

– Јавното обвинителство останува цврсто посветено на доследно, навремено и непристрасно постапување, но истовремено е неопходно сите институции да преземат активна улога и да придонесат кон создавање систем што дава резултати. Недовербата во правосудството може да се надмине само преку конкретни постапки, професионален интегритет и видлива отчетност. Владеењето на правото не е декларативна определба, туку обврска која бара континуирана и одговорна акција – истакна Савески.

The post ПОЛИТИЧАРИТЕ ДА СЕ ВОЗДРЖАТ ОД ВЛИЈАНИЈА И ПРИТИСОЦИ ВРЗ ПРАВОСУДСТВОТО Треба да покажат повисока уставна, правна и политичка култура appeared first on plusinfo.mk.

Раководството на СКРМ веќе подолг период свесно и тенденциозно пласира неточни информации во јавноста, со јасна намера да создаде погрешна слика дека јас, како министер за култура, делувам против интересите на културните работници. Ваквиот пристап е неодговорен и претставува обид за манипулација на јавноста и инструментализирање на културниот сектор за политички цели, се вели во отвореното писмо на министерот за култура Зоран Љутков објавено на неговиот профил на Фејсбук.

Претходно Синдикатот на културата на Република Македонија упати тешки обвинувања кон министерот за култура и туризам Зоран Љутков, тврдејќи дека зад затворени врати работел против Колективниот договор за култура, иако во јавноста настапувал како негов бранител.

Во соопштението, СКРМ наведува дека на 131-та седница на Владата биле доставени пресметки за плати, судски одлуки, листи на предмети и други материјали, со, како што тврди синдикатот, цел да се дискредитира Колективниот договор за култура и тој да се прикаже како незаконски и неуставен. СКРМ оценува дека ваквиот пристап претставува двојна улога на министерот и обид за избегнување одговорност, наместо заштита на правата на културните работници.

Во својот одговор министерот Љутков порачува:

„Во ниту еден момент не сум ги довел во прашање правата на културните работници. Напротив, континуирано и активно се залагам за реален, а не декларативен социјален дијалог. Тоа е потврдено преку бројни иницијативи за состаноци и отворена комуникација, кои од страна на СКРМ често се игнорираат или одбиваат.

Фактот што колективниот договор е истечен веќе четири години е сериозен институционален проблем. Овој застој не е резултат на недостиг на волја од моја страна, туку на однесувањето на раководството на СКРМ, кое наместо конструктивен дијалог, избра конфронтација и создавање на кризи.

Дополнително, нивното јавно пласирање информации поврзани со судски процеси пред тие да бидат донесени претставува сериозен обид за притисок врз независноста на судството и создава неприфатлив преседан.

Поднесените иницијативи пред Уставниот суд се дел од демократскиот и институционален процес. Уставниот суд е единствен надлежен да ја оценува уставноста на правните акти, а не синдикалните раководства кои се обидуваат да преземат таква улога.

Доколку дојде до поништување на Колективниот договор, тоа ќе биде директна и неизбежна последица на долготрајниот застој, систематското одбивање за дијалог и институционален притисок од страна на раководството на СКРМ. Јас лично се надевам дека до таков исход нема да дојде, но фактите јасно покажуваат дека Колективниот договор повеќепати е оспоруван пред Уставниот суд како директен резултат на нивниот пристап, кој наместо решение, произведува блокади и нови проблеми.

Синдикалните организации мора да се вратат на својата основна функција заштита на правата на работниците и да се воздржат од политичко делување, притисоци врз институции и мешање во процеси кои не се во нивна надлежност.

Обидите моето институционално делување да се претстави како „предавство“ се неосновани, навредливи и политички мотивирани. Вистински проблем претставува токму користењето на културните работници како инструмент за лични и политички пресметки.

Културните работници не смеат да бидат заложници на раководство кое наместо да работи во нивен интерес, систематски шири дезинформации, создава поделби и ја попречува можноста за конструктивни решенија.

Прашањето за финансиските импликации не е негирање на права, туку прашање на одговорно и одржливо управување со јавните финансии. Секој колективен договор мора да биде реален, спроведлив и во согласност со буџетските можности.

Зголемениот буџет за култура е конкретен доказ за мојата посветеност како министер кон подобрување на условите во културниот сектор, преку мерки и политики, а не преку празни декларации.

Потребно е враќање на професионалниот дијалог и прекин на политичките манипулации. Културата заслужува стабилност, институционална зрелост и партнерство, а не притисоци и лажни наративи“ – се вели во објавата на министерот Љутков.

The post ОБИДИТЕ ДА МЕ ПРЕТСТАВАТ КАКО „ПРЕДАВНИК“ СЕ НЕОСНОВАНИ, НАВРЕДЛИВИ И ПОЛИТИЧКИ МОТИВИРАНИ Министерот Љутков им одговори на синдикалците во културата appeared first on plusinfo.mk.