Во Клиничкиот Центар „Мајка Тереза“ при Медицинскиот факултет во состав на Универзитетот „Св. Кирил и Методиј “ во Скопје беше добиен и поставен демо роботски хируршки систем EdGe Medical на кој успешно е изведена првата робот-асистирана уролошка операција во Македонија, а според достапните информации и прва од ваков тип во поширокиот регион.

Станува збор за уролошка операција кај пациент со карцином на простата, изведена со примена на најсовремена роботска технологија и минимално инвазивен хируршки пристап.

Со оваа интервенција, како што информира Клиниката за урологија, македонското државно здравство прави историски исчекор во развојот на минимално инвазивната роботска хирургија, отворајќи нови можности за современ третман.

– Овој успех се должи на спремноста на државното здравство да вложува во континуирана едукација на стручните кадри и  соодветна  најсовремена опрема во клиниките и со тоа да создаде услови за развој и имплементација на најсовремените хируршки методи и технологии. Операцијата ја изведе тимот на Клиниката за урологија, предводен од д-р Виктор Станков, научен соработник и специјалист уролог. При зафатот беше користен роботскиот хируршки систем EdGe Medical, со примена на Single Site метода, односно хируршки пристап преку еден единствен отвор, наведува Клиниката.

Овој пристап овозможува поголема прецизност при интервенцијата, помала траума за пациентот, намалена постоперативна болка и побрзо закрепнување. Според достапните сознанија, ова е и прва примена на Single Site метода од ваков тип во Европа.

Овој роботски систем, покрај во урологијата, ќе има можност да се користи и во гинекологијата и во други хируршки домени во рамките на државното здравство.

– Со имплементирање на роботскиот хируршки систем Македонија застанува рамо до рамо со останатите развиени европски земји, отворајќи нови можности за современ третман на пациентите во земјава, велат од Клиниката за урологија.

The post ПРВАТА ОПЕРАЦИЈА АСИСТИРАНА СО РОБОТ ИЗВЕДЕНА НА КЛИНИЧКИ Станува збор за уролошка операција кај пациент со карцином на простата appeared first on plusinfo.mk.

Првпат во Македонија и регионот во Клиничката болница „Аџибадем Систина“ се изведени две минимално инвазивни процедури за третман на упорни и/или повторувачки стеснувања – стриктури на мочниот канал (уретра).

– Оваа процедура се изведува без рез, ендоскопски и под флуороскопска контрола, со специјално дизајнирани балони чиј ѕид е обложен со лек паклитаксел – цитостатик со локално дејство, чиe ослободување во ѕидот на мочниот канал не дозволува повторно формирање на сврзно ткиво и стеснување на каналот. Пациентите се испишуваат од болница истиот ден со носење на тенок уринарен катетер само три дена. Лекот останува да дејствува во клучниот период од еден месец, без системско дејство на телото – објаснува д-р Александар Мицковски, специјалист по урологија.

Клучно е тоа што стапката на повторување на стриктурите се намалува за 75%, а потребата од изведување голема отворена операција со трансплантација на слузница од образ се намалува за 50%. Споредбено, стапката на успех на класична DVIU (интерна уретротомија, една од најчестите уролошки операции) од 27% во период од 5 години ја зголемува на фантастични 75% – ROBUST III студија. Како процедура е максимално безбедна, а компликациите се ретки и минливи.

Д-р Мицковски вели дека овој вид процедури е одобрен и е дел од официјалниот протокол на лекување стриктури – стеснувања на мочниот канал во водичите на двете највлијателни уролошки асоцијации – американската AUA и европската EAU, а има одобрение и од американската ФДА.

Се изведува рутински во најмодерните уролошки центри, а на големо задоволство и кај нас.

The post ВО „АЏИБАДЕМ СИСТИНА“ УСПЕШНО ИЗВЕДЕНИ ДВЕ МИНИМАЛНО ИНВАЗИВНИ ПРОЦЕДУРИ Третман на стеснувања на мочниот канал со употреба на хемиски обложен балон appeared first on plusinfo.mk.

Универзитетската клиника за урологија во Скопје, започна со изведување операции за вградување вештачки уринарен сфинктер, нова процедура, која досега се спроведуваше само во странските и во приватните медицински центри, соопштија од Универзитетската клиника за Урологија.

Интервенциите биле изведени од виш научен соработник д-р Огнен Ивановски. Првите две интервенции се извеле под менторство на професор д-р Сергеи Владиславович Котов од Клиниката за урологија Пирогов во Москва, Русија.

Веќе се изведени 10 интервенции

Досега, изведени се вкупно 10 вакви интервенции, што ја вбројува Универзитетската клиника за урологија помеѓу ретките центри, кои се лиценцирани за изведување на овој тип нови процедури. Во изминатава година, во однос на земјите од регионот, во Македонија се вградени најголем број уринарни сфинктери на пациенти кај кои е неопходна ваква интервенција. Операцијата на вградување сфинктер е целосно покриена од Фондот за здравствено осигурување на Македонија и претставува нова услуга во јавното здравство.

Како помага вештачкиот сфинктер?

Неконтролираното истекување на урина од мочниот меур (уринарна инконтиненција) најчесто се јавува по оперативно вадење на простатата поради карцином. Неволното истекување на урината најчесто се јавува при стоење или при одење, а станува поинтензивно при активности како кревање товар, смеење, кашлање или кивање. Оваа состојба во голема мера го нарушува квалитетот на живот на пациентот и претставува сериозен социјален и хигиенски проблем.

– Повеќе од 10 месеци сме посветени на оваа нова процедура. Горди сме што можеме да понудиме решение на проблем за кој претходно пациентите беа принудени да патуваат во странство. Вградувањето на вештачкиот уринарен сфинктер е златен стандард за решавање на уринарната инконтиненција, особено кај пациенти по операција на простата. Оваа интервенција значително ја подобрува контролата на урината кај пациентите, за кои ова е комплетно решение – вели вишиот научен соработник на Универзитетската клиника за урологија во Скопје, д-р Ивановски.

Пациентите веќе нема да мора да патуваат во странство

По стекнувањето на соодветна експертиза во странски центри, како што е работа на 3Д испечатени модели на мала карлица во Турција, курсеви на кадавер, како и клинички стаж во Левен, Белгија, д-р Ивановски за првпат самостојно изведе операции за вградување на вештачки уринарен сфинктер кај 10 македонски пациенти.

– Со воведувањето на оваа процедура, Универзитетската клиника за урологија не само што ја проширува понудата на здравствени услуги во јавниот сектор, туку и го подобрува животот на пациентите, кои досега немале можност за третман на уринарната инконтиненција во рамките на земјава – изјави директорот на Универзитетската клиника за урологија, д-р Башким Шабани.

Карциномот на простата е најчесто дијагностицирана малигна болест кај мажите над 50-годишна возраст. Се проценува дека 1,4 милиони мажи годишно го добиваат овој карцином, а 375.000 од нив умираат како директна последица од болеста.

The post СПАС ЗА МАЖИТЕ КОИ ИМААТ НЕВОЛНО ИСТЕКУВАЊЕ НА УРИНАТА Вештачки уринарен сфинктер веќе се става и на скопска Урологија appeared first on plusinfo.mk.

На Клиниката за урологија ќе работи една сала во две смени, од денеска и официјално имаме известување од директорот дека ќе се почнува со елективна програма, најдено е некое привремено решение, затоа што еве веќе три недели има технички проблем. Привремено решение со поставени компресори однадвор, но и мобилни компресори во сала. Сѐ уште нема трајно решение за оперативните сали. Каков ќе биде целиот систем на гасовод и на компресорските станици, уште не се знае. Не работиме со полн капацитет. Најавено е дека од понеделник ќе бидеме спремни да работат две сали со елективна програма.

Ова попладнево го истакна Башким Шабани, вработен на Клиниката за урологија во Скопје, хирург уролог.

Тој појасни дека според нивните информации, сите хируршки клиники претходно имале околу сто операции дневно. Проблемот со оперативниот блок на хирургија трае околу еден месец. Се работи за околу две илјади операции, а поради одморите, рече тој, листата на чекање ќе се пролонгира за уште два – три месеци.

– Здравствениот систем во Македонија е централизиран. Најголемите хируршки интервенции се прават во Клиничкиот центар. За жал, ова многу ќе влијае во здравствената состојба на пациентите. Има пациенти со карцином на простата, на пример, таму има простор за чекање. Меѓутоа, има тумори на мочен меур, на бубрег, што навистина не можат да чекаат многу, бидејќи, додека се чека, може да се појават и метастази – појасни докторот.

Тој нагласи дека трајното решение е во смена на компресорската станица со цевководите, целиот компресорски систем. Станицата била стара 30 години, а според тоа што го слушнале и германските експерти кои биле на увид на целиот систем на гасовод, компресорска станица, кажале дека станицата е стара со цевководите и рокот на траење на таквите станици е толкав.

– Се доцни со изградба на нов клинички центар. Тежок удар е да не работи оперативниот блок толку време, Клиничкиот центар е столбот на здравството – рече тој, истакнувајќи дека многу порано требало да се размислува од надлежни фактори, за да не дојде до ова што се случува изминативе денови.

The post ПРВО КИСЛОРОДОТ, ПОСЛЕ ОДМОРИТЕ Листите за чекање за операции само ќе се издолжуваат appeared first on plusinfo.mk.

Кога се применува ласерот?

Quanta Cyber Ho е холмиумски ласер од најнова генерација, кој успеа да ги исполни очекувањата на уролозите, да биде единствена платформа што ќе ги изведува сите ендоскопски уролошки процедури, односно:

– кршење на камчиња во уретра, преку ригидна уретроскопија

– кршење на камења во бубрег, преку флексибилна реноскопија

– PCNL (перкутана нефролитотрипсија)

– вапоризација на простата

– вапоресекција на простата

– енуклеација на простата (вадење)

– аблација на тумори на мочен меур

– инцизија (бескрвно сечење) на стеснувања на кој било дел на уринарниот тракт.

Брзо и безболно ги елиминира камчињата во уринарниот систем

Високософистицираниот Holmium ласерски систем на минимално инвазивен начин ќе ве ослободи од проблемите предизвикани од камчињата во уринарниот тракт. Ласерскиот сноп влијае директно врз камчињата, ги разбива на поситни парчиња, без да го оштетува околното здраво ткиво, притоа не предизвикувајќи ударни бранови. Досегашните искуства покажале дека Holmium ласерот е ефективен, без оглед на големината, локацијата, цврстината и составот на камчињата. Одлични резултати дава и кај пациенти со поголем број камчиња. Овој моќен ласер e извонредна иновација, која со помош на моќните технологии што ги поседува прави ефикасна фрагментација на сите типови калкули, со извонредна контрола на ретропулсијата, односно моќноста камчињата да „побегнат нагоре“. Поедноставно кажано, буквално го претвора во прашина секој камен во уринарниот тракт.

Скратено време на третман и болничко лекување, без постоперативни компликации

Нудејќи ги можностите за раскршување и претворање во прашина со енормна брзина, значително го намалува времето на литотрипсија кај пациенти со големи камења во уретрите (мочните канали) или бубрежни камења, кои на уролозите што ги изведуваат овие интервенции им овозможуваат да ги изведуваат сите познати процедури за елиминирање на камења, односно URS, FURS, RIRS, PCNL. Набројаните процедури Cyber Ho ги спроведува со употреба на 7 модалитети на нивото на пулниот удар, споредено со досегашните 3 кај другите ласери.

Златен стандард за интервенции на зголемена простата

Cyber Ho е ласер со висока енергија кој нуди опција за успешно оперирање на простати со различна големина, затоа што ваквите ласери можат да изведуваат вапоризација, дизајнирана опција да елиминира повеќе ткиво во единица време, со истовремена контрола на крвавење, со специјално дизајнираната двојна педала. Исто така, со овој ласер се отстрануваат и зголемени простати со методата HoLep – новиот златен стандард за третман на бенигно зголемени простати. Овие две методи го подобруваат исходот во лекувањето на бенигното зголемување на простатата, го скратуваат оперативното време, го намалуваат степенот на компликации, го скратуваат престојот во болница и потребата од трансфузија на крв. Процедурите се особено корисни затоа што може да се употребат кај постари пациенти, без да ја прекинуваат антикоагулантната терапија. На ист начин, може да енуклеира и тумори на мочен меур. Исто така, има и мод за бескрвна инцизија – сечење на стеснувања на уринарните канали на која било локација.

Тимот уролози лидери во регионот

Покрај стандардните процедури за дијагноза и третман, како и превентивни уролошки прегледи, уролошкиот тим ги изведува и најсложените реконструктивни операции на урогениталниот тракт кај деца и возрасни. Тимот доктори се пионери во многу сложени интервенции, со што може да се каже дека Одделот за урологија е лидер во земјава и регионот.

Специјални попусти во месецот на машкото здравје

По повод месецот на машкото здравје, Клиничката болница „Аџибадем Систина“ подготви специјален превентивен уролошки пакет со 50% попуст. Во пакетот се вклучени: специјалистички консултативен преглед, PSA-маркер и ехо на урогенитален тракт со урофлометрија по цена од 6.000 денари, како и попуст за одредување на ризик за карцином на простата преку снимање со MRI 3 Tesla со 40% попуст.

The post НАЈСОФИСТИЦИРАН ЛАСЕР ЗА УРОЛОГИЈА ВО „АЏИБАДЕМ СИСТИНА“ Безболно елиминира камчиња, успешно оперира простата appeared first on plusinfo.mk.

– Во „Аџибадем Систина“ се изведуваат најсложените реконструктивни уролошки интервенции врз пациенти кои имаат сериозни проблеми, а овде имаме совршени услови за да ги изведеме беспрекорно и успешно. Чест ни е што имаме посета од нашите колеги од Австрија и од Грција, д-р Наталија Гарцка и д-р Акилас Котурис, кои изразија желба да дојдат и да го усовршат своето знаење. „Аџибадем Систина“, за разлика од многу други клиники, нуди сè, сè што е потребно за да биде успешно излечен еден пациент, но од друга страна, нуди и сè што му треба на еден доктор хирург за да биде успешно изведен еден оперативен зафат. Комплетно сè – од дијагностика, организација од страна на шефот на одделот, д-р Александар Мицковски, како и операциони сали и опрема и болничко сместување, сè е на светско ниво – рече д-р Владимир Којовиќ.

Нивниот престој се состоеше од два дела. На првиот ден од нивната посета тие се запознаа со амбулантскиот дел на овој оддел и процесите што се применуваат кај уролошките пациенти. Во вториот дел им беа презентирани операционите сали, интензивната нега и интервенциите што се изведуваат.

– Првпат доаѓам во „Аџибадем Систина“. Многу сум импресионирана, болницата е многу модерна, нуди современа опрема и ефективен тим. Сакам да го усовршам моето знаење во реконструктивната урологија, јас сум соработник на проф. д-р Којовиќ. Запознав многу добар тим тука и воопшто многу е убаво. Имам впечаток дека болницата е многу голема, многу добро организирана, стандардите се на највисоко ниво – рече д-р Наталија Гарцка, специјалист по урологија од Медицинскиот универзитет во Виена, Австрија.

Тимот доктори беше изненаден од целосната инвестиција, модерната технологија и условите што „Аџибадем Систина“ ги нуди за своите пациенти, која, како што изјавија, не може да се сретне и во дел од најразвиените земји.

– Сметам дека „Аџибадем Систина“ е модерна болница, ги покрива потребите на една европска болница и топло ја препорачувам. Ја видов опремата, ја видов болницата, многу средства се инвестирани тука… Задоволство ми е да бидам дел од тимот, јас соработувам со проф. д-р Којовиќ веќе 4 години. И се надевам дека ќе продолжиме и во иднина. И последен, но не помалку важен момент е соработката со д-р Мицковски, кој стои зад целокупната работа на тимот тука – изјави д-р Акилас Котурис, специјалист по урологија од Грција.

Покрај стандардните процедури за дијагноза и третман, како и превентивни уролошки прегледи, уролошкиот тим од „Аџибадем Систина“ ги изведува и најсложените реконструктивни операции на урогениталниот тракт кај деца и возрасни. Тимот доктори се пионери во многу сложени интервенции, со што може да се каже дека Одделот за урологија во „Аџибадем Систина“ е лидер во земјава и регионот. Предводник на Одделот е д-р Александар Мицковски, специјалист по урологија, a тимот брои околу 10 истакнати специјалисти по урологија меѓу кои се и д-р Владимир Којовиќ, еден од најпознатите уролози, детски хирург и микрохирург, со над дваесетгодишно искуство во урологијата и во гениталната реконструктивна хирургија, како и д-р Зоран Крстаноски, кој е еден од најискусните уролози во Југоисточна Европа, пионер во воведување и стандардизирање на многу нови минимално инвазивни хируршки методи. На Oдделот за урологија во „Аџибадем Систина“, кој е составен од еминентни доктори од земјава и регионот, неодамна е набавен и најсофистициран и најсовремен ласер „Quanta Cyber No 150“.

The post ОДДЕЛОТ ЗА УРОЛОГИЈА НА НИВО НА ГОЛЕМИТЕ СВЕТСКИ ЦЕНТРИ Уролози од Грција и од Австрија во посета на „Аџибадем Систина“ appeared first on plusinfo.mk.

– Среќни сме што од година во година изнаоѓаме нови начини да го оправдаме филантропскиот принцип – еден од постулатите на нашата компанија. Покрај тоа што во текот на целиот месец преку различни активности ја подигаме свеста за постоењето и превенцијата на машките болести, со оваа донација даваме и придонес на една од институциите кои работат конкретно на оваа проблематика, а ова нè прави особено горди – велат од компанијата.

Ноември, или популарниот „Movember“ е месец во знакот на грижата на машкото здравје и ја нагласува важноста на свесниот начин на живот и редовни здравствени контроли. Ракот на простата е втор најчест карцином кај машката популација, додека ракот на тестисите е најчестиот облик на рак кај мажите на возраст меѓу 15 и 34 години, а редовните прегледи се најзначајниот фактор за превенција.

Грижата за машкото здравје не треба да се гледа како слабост или да биде фокусирана само во еден месец. Само со заедничка посветеност и заеднички сили може да се развие свеста за значењето на редовните прегледи, а со оваа донација на dm и да се подобри квалитетот на здравствените прегледи.

Dm дрогерие маркт, благодарение на постојаното вложување во здравствениот сектор е етаблиран како пријател на македонските здравствени институции. Во изминатата деловна година, компанијата донираше повеќе од 5,3 милиони денари во општествено одговорни цели. Меѓу другото, во текот на оваа година компанијата донираше повеќе од 1,6 милиони денари за подобрување на условите за родилките во пет јавни клиники во земјава.

The post ДЕН НА МАШКОТО ЗДРАВЈЕ Компанијата ДМ донираше 2 апарата за урологија во болницата „8 Септември“ appeared first on plusinfo.mk.

Со својот препознатлив босански шарм и долгогодишното актерско искуство, што особено се отсликува во неговите култни проекти „Топ листа надреалистa“ и „Аудиција“, Бранко Ѓуриќ Ѓуро преку „Ѓурологија“ навистина го дава најдоброто од себе.

Еден вид (анти)стенд ап шоу „Ѓурологија“, како што сака да го нарече самиот Ѓуро, е всушност збирка од неговите интимни размислувања и погледи на животот, кои ги раскажува на искрен и урнебесен начин, одржувајќи ја публиката воодушевена, и речиси со непрекинато смеење. Харизматичниот сараевчанец со холивудска и интернационална кариера како актер, режисер, кантавтор и рок музичар, во претставата ги обединува сите негови уметнички улоги и на публиката и претставува неспоредливо шоу од 90 минути.

Претставата веќе неколку години руши рекорди на гледаност во светот на театарот и стенд ап комедијата на нашите простори. Одиграна е повеќе од 450 пати и ја виделе преку 350.000 посетители, и сè уште продолжува да ја воодушевува публиката и да ги полни салите низ целиот регион. Билетите се веќе пуштени во онлајн продажба, достапни преку https://www.karti.com.mk.

The post ПОВЕЌЕ ОД 450 ИЗВЕДБИ И 350.000 ПОСЕТИТЕЛИ Бранко Ѓуриќ со комедијата „Ѓурологија“ доаѓа во Скопје appeared first on plusinfo.mk.

– Двајца млади пациенти со болест на бубрезите кои беа на дијализа добија шанса за нов живот. Уште неколку пациенти со малигни болести и трауматски повреди, кои се лекуваат на Клиниката за ортопедија, во наредните недели ќе добијат можност да им бидат инплантирани здрави коскени ткива. Благодараност до семејството кое во своите најтешки моменти одлучи да помогне и да спаси друг живот. Сочувствуваме со нивната болка, ја почитиваме нивната одлука и благодариме за тоа што го направија. Во неделите кои се пред нас, неколку пациенти со тешка болест ќе добијат шанса за нов живот – истакна министерот д-р Беким Сали.

Ова е втора трансплантација од почетокот на годинава и 12-та од мај 2020 година, откако Програмата за трансплантација на Министерството за здравство се прошири во делот на мултиорганската трансплантација.

Според д-р Маја Мојсова-Мијовска, национален координатор за трансплантација, секоја трансплантација е голем успех за нив затоа што со сето тоа што го работат, вели таа, полека но сигурно го менуваат системот.

– Покажуваме колку можеме како лекари да направиме за нашите пациенти, а во исто време и како општество во целина да бидеме попозитивни во поглед на органодонорството. Уште еднаш благодарност до семејството на донорот за нивната хуманост. Благодарност до болничките координатори кои го водеа целиот процес во овие два дена, како и до екипите на клиниките за урологија, нефрологија, трансфузиологија, КАРИЛ, ортопедија, кардиологија, кардиохирургија, рендген и до Министерството за здравство – додава Мојсова-Мијовска.

The post ДВА ЖИВОТА СПАСЕНИ ОД ЕДЕН ДОНОР Семејството на младото момче ги донираше неговите органи appeared first on plusinfo.mk.

Овој ноември болницата нуди 20 отсто попуст на следните уролошки интервенции – отстранување на простата, ТУР на простата, циркумцизија (сунет) и отстранување камен во уретер. Во секоја интервенција освен попустот се добива и бесплатен специјалистички преглед кој секако е клучен за заштитата на машкото здравје.

На прегледот се прави анамнеза, се испитува здравствената кондиција на пациентот, се прави и ехо по што се дијагностицира промената, односно евентуалниот проблем, болест.

Кај кои интеревенциии се нуди 20 отсто попуст?

Отстранување на простата кај бенигна простатична хиперплазија е класична хируршка интервенција која се изведува преку мочниот меур, односно таканаречена трансвезикална простатектомија. Оваа операција се употребува кај пациенти каде проблем е волуменот на простата кој е поголем од над 80 или 100 грама. Отстранувањето на простатата е полесно и со подобар постоперативен тек ако се прави со овој тип операција.

Тур на простата е отстранување на простата преку ендоскопска метода, односно отстранување на простата преку уретралниот канал кај мажот со помош на струја. Се прави кога простатата е со помали димензии, а доколку пациентот е во потешка општа состојба и носи катетер.

Сунетот е една од најчестите интервенции кај машката популација, а се изведува кај мажи кај кои има стеснување на кожата на отворот на пенисот, кога е отежнато одржувањето хигиена на половиот орган или мокрењето. Помлади пациенти го прават како естетска операција, а во муслманската популација согласно религијата се прави кај секое дете од 1 до 10 години. За оваа интервенција е потребен само ден хоспитализација и нема постоперативни нус појави.

Ендоскопско отстранување на камен во уретер всушност е ласерско кршење на каменот во мочниот меур.  Клиничката болница „Аџибадем Систина“ е единствена во која се употребува ласер за оваа намена. Ендоскопската операција се изведува во општа анастезија, во уретерот се навлегува со посебен инструмент преку уретрата, се лоцира каменот и со помош на ласерската сонда се крши.

Со овој попуст на пациентите им се дава одлична можност да се лекуваат по пристапни цени во болницата која е најопремена кличничка болница во регионот, а во која интервенциите ги изведуваат најдокажани професионалци.

Граѓаните кои имаат какво било промена треба да одлучат и веднаш да појдат на лекарски преглед оти само така ќе се заштитат себе. Специјалистичкиот преглед со овие интервенции сега е бесплатен, а кај интервенциите е понуден попуст од 20 отсто.

The post МЕСЕЦ НА МАШКО ЗДРАВЈЕ ВО „АЏИБАДЕМ СИСТИНА“ 20% попуст за уролошки интервенции appeared first on plusinfo.mk.