Град Скопје спроведува засилени активности за уредување и подобрување на јавниот простор низ целата територија на градот, паралелно со тековните инфраструктурни проекти.

Во рамки на активностите се работи на обновување на хоризонталната сообраќајна сигнализација и замена на дотраените сообраќајни знаци, со цел зголемување на безбедноста и подобра организација на сообраќајот на градските булевари и улици.

Паралелно, долж клучните сообраќајници се поставуваат заштитни столпчиња со кои се штитат пешачките и велосипедските патеки, но и се спречува непрописно паркирање и узурпација на јавниот простор.

Од Град Скопје информираат дека засилено се работи и на одржување и уредување на зеленилото, при што се интервенира во парковите, булеварите и останатите јавни површини кои се под надлежност на градот. Дополнително, континуирано се спроведува чистење на коритото на реката Вардар на територијата на Скопје.

Во тек се и активности за уредување на пешачките зони во Зоолошката градина, како и за подобрување на пешачката и велосипедската инфраструктура низ градот.

Градоначалникот на Скопје Орце Ѓорѓиевски истакна дека овие активности се дел од поширока стратегија за враќање на урбаниот ред и функционалноста на јавниот простор.

– Наш приоритет е Скопје да биде почист, побезбеден и поуреден град за сите граѓани. Затоа паралелно работиме на инфраструктурата, сигнализацијата, зеленилото и чистењето на Вардар. Ова е континуиран процес кој нема да застане – порача Ѓорѓиевски.

Од Град Скопје додаваат дека сите јавни претпријатија се целосно ангажирани и работат со полн капацитет со цел подобрување на квалитетот на животот и урбаната слика на градот.

The post 📽️ ПРОЛЕТНАТА ГЕНЕРАЛКА ВО СКОПЈЕ СЕ ВРШИ СО ЗАСИЛЕНО ТЕМПО Градот во акција за чистење, сигнализација и уредување appeared first on plusinfo.mk.

Градоначалникот на Општина Центар, Горан Герасимовски, денеска изврши увид на терен на булеварот Теодосиј Гологанов, во близина на Католичката црква, заедно со деканот на Градежниот факултет, инспекциските служби на Општина Центар и стручни лица, каде се спроведуваат итни мерки за обезбедување и стабилизација на просторот по евидентираното свлечиште на земјиштето во непосредна близина на градежен зафат.

Според стручните насоки од Градежниот факултет, започнато е затрупување и зацврстување на земјиштето на градилиштето со цел да се спречат дополнителни оштетувања и да се обезбеди безбедноста на граѓаните и околните објекти, информираат од Општина Центар.

Герасимовски упати благодарност до деканот и стручниот тим на Градежниот факултет, кои веднаш излегоа на терен и дадоа конкретни насоки за надминување на состојбата.

– Безбедноста на граѓаните нема цена. Од првиот момент реагиравме веднаш, а денеска на терен заедно со стручните лица ги следиме активностите за стабилизација на просторот. Голема благодарност до деканот и тимот на Градежниот факултет за експертската помош и професионалниот пристап. Ќе постапуваме строго и без компромис кога се работи за неодговорно и несовесно градење – изјави Герасимовски.

Инспекциските служби на Општина Центар и натаму се на терен и продолжуваат со надзорот и постапувањето. Досега се изречени повеќе санкции, а постапките против инвеститорот и изведувачот продолжуваат, откако е утврдено дека дел од градежните активности не биле изведувани согласно одобрението за градење издадено од Општина Центар.

Општина Центар останува целосно посветена на надминување на состојбата, обезбедување на просторот и утврдување одговорност за сите констатирани неправилности. 

The post СЕ ЗАТРУПУВА И САНИРА ГРАДЕЖНАТА ЈАМА ВО ЦЕНТАР Герасимовски и деканот на Градежен факултет се на увид appeared first on plusinfo.mk.

Советот на Општина Центар на денешната седница гласаше за недонесување на одлуката за техничка исправка на Деталниот урбанистички план за дел од локалитет Буњаковец 1, конкретно за ГП 13.1 и ГП 13.11, со локација кај поранешната печатница „Нова Македонија“ информира Општина Центар во соопштение.

За недонесување на предлог-одлуката гласаа сите 23 советници.

– Ние, како администрација, имаме обврска точката да ја ставиме на дневен ред и воедно да ги посочиме сите импликации. Советниците се тие што гласаат и ја носат одговорноста. Нема потреба од прозивки, медиумски пиар и театар. Овде станува збор за буџетот на граѓаните, а не за партиски интереси. Советот мора да носи одлуки во интерес на граѓаните, а не за дневнополитички калкулации – рече градоначалникот на Општина Центар Горан Герасимовски.

Претходно, Комисијата за урбанизам на Општина Центар даде позитивно мислење за предлог-одлуката.

– Тука веќе е толку пренатрупано, па замислете каков хаос ќе се случи доколку се изгради ова чудовиште. Не знам каде ќе се паркираат сите тие возила и дали ќе остане слободен простор за живеење. Ве молиме да најдете начин и да не дозволите оваа зграда да се изгради – рече Ангел Цветков, трета генерација жител во зградите зад „Нова Македонија“.

Согласно законот за техничка грешка, исправката во донесен урбанистички план не подразбира никакви измени во планирањето или параметрите на планот туку станува збор исклучиво за корекција на грешка во техничкиот дел на исцртување на планот. Во конкретниот случај, градежната парцела во мал дел не била целосно затворена, односно оформена.

– ДУП-от за овој дел е донесен во 2012 година. Сите знаете дека и со измена на план не можеме да намалиме катност, не може да се одземе веќе дадено право. Денес станува збор за техничка исправка во парцелата. Исто така манипулирате со бројки, максималната дозволена висина е 25 ката, но може инвеститорот ќе гради помал објект – рече претставник на Секторот на урбанизам.

Советнците од СДСМ и од ВМРО-ДПМНЕ рекоа дека ќе гласаат против, но им пречеше што советнците од „Шанса за Центар“ и Левица прават пи-ар и дека од вчера создаваат паника објавувајќи слика од зградата на Фејсбук. Рекоа дека на Комисијата за урбанизам едногласно било одлучено дека нема да се поддржи оваа точка и нема потреба да се водат дискусии кога сите биле против изградбата на зградата.

The post НЕМА ДА СЕ ГРАДИ 25-КАТНИЦА ПОЗАДИ НЕКОГАШНА НИП „НОВА МАКЕДОНИЈА“ Советот на Општина Центар едногласно го отфрли предлогот за корекција на ДУП appeared first on plusinfo.mk.

Поранешен градоначалник на Пробиштип и двајца вработени во општината се соочуваат со кривична пријава поради сомнение за несовесно работење во службата, информира полицијата.

Надворешната канцеларија за криминалистички работи Пробиштип поднела пријава против три лица од Пробиштип, на возраст од 61, 53 и 44 години. Според пријавата, случајот се однесува на незаконско издавање одобрение за градење угостителски објект – ресторан, во текот на 2023 година.

Според истрагата, двајцата вработени во Одделението за урбанизам во Општина Пробиштип, иако имале официјално негативно мислење од Електродистрибуција ДООЕЛ – КЕЦ Кочани, не го одбиле барањето за градење. Во мислењето јасно било наведено дека објектот не може да се приклучи на електродистрибутивната мрежа, бидејќи е предвиден во близина на постоечки електроенергетски објект, што е спротивно на Законот за енергетика.

И покрај тоа, барањето не било одбиено, а одобрението за градење било потпишано од тогашниот градоначалник, со што им било овозможено на инвеститорите да изградат ресторан на парцели кои не се наменети за таква градба.

Од полицијата информираат дека со ваквото постапување биле прекршени законските прописи, а со тоа била овозможена незаконска градба. По целосното документирање на случајот, до надлежното обвинителство е доставена кривична пријава.

The post БИЛА ЗАБРАНЕТА ГРАДБА, АМА СЕ ПОТПИШАЛО Кривична за екс-градоначалникот на Пробиштип, дозволил ресторан каде што не смее appeared first on plusinfo.mk.

Градоначалникот на Општина Центар, Горан Герасимовски, во гостување на Сител изјави дека во неговиот мандат не е продаден ниту еден квадратен метар државно земјиште, а сите донесени детални урбанистички планови (ДУП-ови) се насочени кон зголемување на зеленилото и намалување на бројот на градби.

– Со носење на секој Детален урбанистички план го зголемуваме бројот на зеленилото во општината. Вклучуваме пошироки улици, дополнителни пешачки и велосипедски патеки, намалување на катноста, отстранување на парцели за градба и нивно претворање во зелени појаси – изјави Герасимовски.

Тој потенцираше дека урбанизмот во Центар се води од принципи на заштита на јавниот интерес и дека општината преку ЗЕЛС поднела иницијатива до Министерството за транспорт и врски за измени на правилото „70-30“, кое овозможувало инвеститор со само 30% сопственост да оформи парцела за градба.

– Ние бараме да се поседува минимум 70% од парцелата за да може да се дооформат уште 30%. На тој начин директно го штитиме државното земјиште – истакна градоначалникот.

Како други примери на резултати во урбаното уредување, Герасимовски ги наведе: отстранување на дупли паркирања и импровизирани детски елементи што ја загрозувале безбедноста, уредување на парцели со обврзувачки стандарди за пристапни рампи, паркинг за велосипеди и садење високи дрвја, транспарентност во постапките за издавање одобренија за градба.

Во вториот дел од изјавата, градоначалникот остро одговори на тврдењата на неговиот противкандидат и, како што рече, неговиот ментор, кои, според него, шират дезинформации во јавноста.

– Вчера на ова столче седеше и неговиот ментор и изнесе многу лаги, почнувајќи од бројот на издадени дозволи, до тоа колку одобренија се во тек. Спомна 80 барања што наводно „седеле на маса“, вистината е дека во моментов има само осум барања во завршна фаза, и тие се јавно достапни преку системот на ЗЕЛС – објасни Герасимовски.

– Целата кампања се служи со лаги и невистини. Тоа е класична црна кампања, која граѓаните на Центар ја препознаваат. Тие се доволно мудри и во првиот круг веќе кажаа на кого му ја даваат довербата – заклучи Герасимовски.

Првата рампа за затворање на Дебар маало веќе е поставена, Центар добива и 30 мерачи за бучава

Општина Центар наскоро ќе стане првата општина во земјава со систем за мерење на бучава во реално време, најави градоначалникот Горан Герасимовски. Според него, јавната набавка е завршена, а веднаш по изборите ќе бидат поставени 30 мерни единици на различни локации.

– Заврши јавната набавка, чекаме да поминат изборите за да ги поставиме мерните единици, првично 30. Преку мобилна апликација, секој граѓанин ќе може да провери каква е фреквенцијата на бучава на одредена локација – изјави Герасимовски.

Системот, како што објасни, ќе им овозможи на граѓаните докази при пријавување во Министерството за внатрешни работи или до општинските инспекциски служби. Целта е брза и ефикасна реакција на прекршителите, особено во зони каде што постојат проблеми со прекумерна бучава од угостителски објекти и сообраќај.

Во вториот дел од изјавата, Герасимовски зборуваше за следниот голем проект на општината – постепено затворање на Дебар Маало за моторен сообраќај, со што ќе се намали хаосот со паркирањето и ќе се создаде подобар квалитет на живот за жителите.

– Имаме ревидиран проект за затворање на Дебар Маало. Тој е доставен до Министерството за внатрешни работи и веќе имавме два состанока со МВР за да го подобриме и да добиеме одобрување. Така и беше договорено на последниот состанок – рече Герасимовски.

Планот е Дебар Маало да се затвора дел по дел, почнувајќи веднаш по завршувањето на изборниот процес, а првата рампа веќе е поставена.

– Веќе поставивме рампа на почетокот на Боемска улица. Разговараме за начинот на кој таа зона ќе функционира, и тоа ќе биде пример за затворање и на други населби каде што сообраќајот и паркирањето се хаотични – додаде градоначалникот.

The post „НЕ ПРОДАДОВМЕ НИТУ МЕТАР ДРЖАВНО ЗЕМЈИШТЕ“ Герасимовски обвини дека противниците шират дезинформации за Центар appeared first on plusinfo.mk.

На прес-конференција во населбата Крњево, портпаролот на Движење ЗНАМ за Наша Македонија, Никола Мемов, откри дека актуелниот градоначалник Горан Герасимовски се обидува да продаде „лажна приказна“ за уредување на просторот кој, според важечките урбанистички планови, е наменет за изградба на булеварот Крушевска Република, а не за игралишта и зеленило.

– Она што го гледаме денес не е пример за грижа кон жителите, туку пример за самоволие, злоупотреба и грубо прекршување на сите урбанистички норми – рече Мемов од лице место, додавајќи дека активностите се изведуваат без проектна документација и без градежна дозвола.

Според него, станува збор за манипулација со јавноста, бидејќи на граѓаните им било ветено дека ќе се изгради детско и спортско игралиште, додека документите покажуваат дека на тоа место треба да има сообраќајна инфраструктура.

– Тоа што треба да го руши дивоградбите, сега сам ги гради. Ова е скандалозно и спротивно на законите – потенцира Мемов.

Тој повика институциите да проверат дали има издадена градежна дозвола за изведување активности на таа локација и зошто, како што рече, се извршуваат градежни работи без јавна транспарентност.

– Граѓаните на Центар се изморени од лаги и празни ветувања. На 19 октомври ќе изберат човек кој навистина ќе работи во нивен интерес, ќе го заштити јавниот простор и ќе го врати достоинството во општината – порача Мемов.

The post РАЗОТКРИЕНА НОВА МАНИПУЛАЦИЈА ВО ЦЕНТАР Мемов тврди дека Герасимовски гради без дозвола и ги лаже граѓаните appeared first on plusinfo.mk.

Аеродром се соочува со сериозни инфраструктурни предизвици – метеж, недостиг од паркинг-простор и небезбедни пешачки и велосипедски патеки. Решенијата ги понуди кандидатот за градоначалник од редовите на СДСМ, Александар Трајановски, кој на денешната прес-конференција истакна дека неговата програма нуди конкретни мерки, а не празни зборови.

– Во соработка со Град Скопје ќе ја завршиме изградбата на булевар АСНОМ и ќе обезбедиме нови коридори за поврзување со соседните општини. Ќе изградиме нова сообраќајница меѓу Аеродром и Кисела Вода и ќе ја реконструираме улицата Фрањо Клуз и нејзините краци – изјави Трајановски.

Тој додаде дека во секој дел од Аеродром ќе има локални реконструкции и проширувања.

– Ќе ја направиме целосната реконструкција на споредни улици во Горно и Долно Лисиче, ќе уредиме нови паркинг-простори зад ТЦ Скопјанка, ТЦ Бисер и во Ново Лисиче. Со тоа ќе го решиме проблемот со паркирањето кој со години ги мачи жителите – нагласи кандидатот на СДСМ.

Според него, посебен акцент ќе се стави на безбедноста на пешаците и велосипедистите.

– Ќе воведеме „зона 30“ во сите сервисни улици, ќе изградиме нови велосипедски патеки и ќе воспоставиме нулта толеранција за паркирање на тротоари и пешачки патеки. Кај сите училишта ќе бидат поставени нови семафори за максимална заштита на децата – рече Трајановски.

Тој најави дека проблемот со паркирањето ќе се решава со паметни паркиралишта и катни гаражи, со почитување на принципите на одржлива урбана мобилност.

– Ова се решенија што директно ќе влијаат врз секојдневието на нашите граѓани – побезбеден сообраќај, поуредени улици и поголема мобилност за сите. Заедно ќе ставиме крај на сообраќајниот хаос и ќе изградиме модерна, европска општина Аеродром – општина по мерка на граѓаните. Се бориме за нашиот дом! – порача Трајановски.

The post КАТНИ ГАРАЖИ, НОВИ УЛИЦИ И ВЕЛОСИПЕДСКИ ПАТЕКИ Александар Трајановски најави голема реконструкција на Аеродром appeared first on plusinfo.mk.

Албанскиот премиер Еди Рама објави снимки од операцијата за ослободување на јавните простори во градот Скадар.

На видеата се гледа како градежни машини уриваат натстрешници, импровизирани киосци, метални и дрвени објекти, тераси и покривки поставени на јавни површини, додека полициски службеници го надгледуваат отстранувањето.

Во објава на социјалните мрежи, Рама истакнува дека оваа акција е дел од поширока иницијатива што се спроведува паралелно во неколку градови низ земјата, објави Визион плус.

Според него, оваа интервенција има за цел да го подготви теренот за новата фаза на Урбаната преродба 2,0 – програма за соработка помеѓу Владата, локалната власт, стопанството и заедницата, чија цел е подобрување на квалитетот на јавните простори во функција на визијата за „Албанија 2030 во ЕУ“.

„Добро утро и со ослободувањето на јавните простори во Скадар, што продолжува како и во низа други градови, за да ѝ се отвори пат на Урбаната преродба 2,0, со нова програма: Влада – општина – стопанство – заедница, во функција на квалитетот на заедничките простори и на Албанија 2030 во ЕУ, ви посакувам мирен ден“, напиша Рама.

The post 📽 РАМА ИМ ИСПРАТИ БУЛДОЖЕР ЗА ДОБРО УТРО Масовно рушење натстрешници, киосци и други диви објекти во Скадар appeared first on plusinfo.mk.

Драматичен инцидент го потресе центарот на Белград, каде во текот на ноќта се урна таванот на натстрешница пред продавница за парфеми. Според изјавите на очевидци, во текот на денот сè изгледало стабилно, но утрово граѓаните ги пречекала глетка на распаднат таван и делови што висат над главите на минувачите.

Жена која работи во продавницата за парфеми изјавила за српската телевизија Н1 дека пред да замине од работа вечерта, ништо не укажувало на можно оштетување.

– Сè беше во ред до крајот на работното време. Утрово не можев да поверувам кога видов што се случило – изјавила таа.

Сцената на местото е вознемирувачка, делови од таванот се распрскани по шеталиштето, додека дел од оштетената настрешница и понатаму виси опасно над тротоарот. Како мерка на претпазливост, надлежните поставија црвени ленти со натпис „внимание, опасност“, со што овој дел од улицата е целосно затворен за движење на пешаците.

Локалните власти не даваат детали за причините за падот, но предупредуваат граѓаните да бидат внимателни при движење низ стари делови на градот, особено кај згради со дотраени фасади.

Се очекува тимови за градба и инспекција наскоро да ја проценат безбедноста на објектот и да отпочнат со отстранување на преостанатите опасни делови. Граѓаните, пак, апелираат до општинските служби за поголема контрола и санација на старите објекти низ Белград, пред да се случи некоја посериозна трагедија.

The post НОВ ИНЦИДЕНТ СО НАСТРЕШНИЦА ВО СРБИЈА Урнат дел сѐ уште виси над главите на минувачите во Белград appeared first on plusinfo.mk.

Државниот инспекторат за градежништво и урбанизам донесе решение за стопирање на изградбата на објект во заштитената зона на Старото градско јадро во Охрид, откако при вонредна контрола било утврдено дека инвеститорот градел без одобрение за градба.

Како што информираат од Инспекторатот, станува збор за објект што се гради во Старата охридска чаршија, во строго заштитена зона која е дел од светското наследство на УНЕСКО.

– Со решение број ИП 1бр 74-137 од вонреден инспекциски надзор, издадено од страна на Државниот инспекторат, изградбата е стопирана, а објектот затворен за понатамошни градежни активности – велат од Инспекторатот.

Поради непочитување на одредбите од Законот за градење, против инвеститорот ќе бидат поднесени соодветни пријави, а засилените контроли на инспекциските служби ќе продолжат и во наредниот период низ целата држава.

Од Инспекторатот нагласуваат дека заштитата на Старото градско јадро на Охрид е од суштинско значење за да се спречат дејства и појави што можат да доведат до уништување или деградација на ова културно-историско подрачје, кое уште од 1980 година е впишано на Листата на светско наследство на УНЕСКО.

The post ГРАДЕЛ ВО СРЦЕТО НА ОХРИДСКАТА ЧАРШИЈА Инспекторатот стопираше изградба во Охрид, следуваат кривични пријави appeared first on plusinfo.mk.