Општина Центар ја урна бесправната доградба на деловен објект на улица Орце Николов бр. 139, во Дебар Маало, поставена без одобрение за градење и на јавна површина која е предвидена да им служи на сите граѓани. Доградбата, со димензии 15 x 5,7 метри, била изградена од страна на инвеститорот „Екотон Дизајн“, кој не постапил по решението за отстранување издадено од градежниот инспектор.

Градоначалникот на Општина Центар, Горан Герасимовски, посочи дека општината нема да дозволи узурпирање на јавниот простор.

– Јавните површини во Центар им припаѓаат на сите граѓани и нема да дозволиме да станат приватен имот поради самоволие – изјави Герасимовски.

Тој додаде дека секој бесправен објект ќе биде санкциониран со решенија и постапки за негово целосно отстранување.

Општинските служби интервенирале откако инвеститорот не ги почитувал ниту решението, ниту неколкуте опомени.

– Ова е порака дека редот мора да важи за сите. Продолжуваме со акцијата за расчистување на дивоградби низ општината – нагласи Герасимовски.

Во рамките на пошироката стратегија за уредување на урбаниот простор, Општина Центар спроведува засилени инспекциски контроли со цел заштита на јавниот интерес и враќање на просторот назад кај граѓаните.

The post УРНАТА ДИВОГРАДБА ВО ДЕБАР МААЛО Герасимовски најави засилени контроли и нови акции appeared first on plusinfo.mk.

Градоначалникот на Скопје, Орце Ѓорѓиевски, денеска соопшти дека е распишана јавната набавка за изградба на нов модерен кружен тек на една од најопасните крстосници во градот, раскрсницата меѓу булеварите Ѓорче Петров и Македонска војска.

На средбата присуствуваа и пратеникот Бојан Стојаноски и градоначалникот на Општина Ѓорче Петров Александар Стојкоски, кои го поддржаа почетокот на проектот што треба да донесе побезбидно и побрзо движење во овој дел од Скопје.

– Ѓорче Петров добива модерен кружен тек на локација која со години е критична точка во Скопје. Со овој проект обезбедуваме повеќе безбедност, помалку метеж и побрзо движење – изјави градоначалникот Орце Ѓорѓиевски.

Тој нагласи дека кружниот тек е само дел од пошироката програма „Нула несреќи“, стратегија со која до 2030 година ќе се редизајнираат 50 опасни крстосници и улици според европски стандарди.

– Нашата визија е јасна, Скопје да стане град во кој секој возач, пешак и велосипедист се движи сигурно и без страв – додаде Ѓорѓиевски.

Градоначалникот најави и други инфраструктурни зафати што ќе го сменат сообраќајниот изглед на западниот дел од градот.

– Следуваат сериозни инвестиции во Ѓорче Петров – ново поврзување на улицата Лука Геров, реконструкција на улица 101 во Волково, проект за новата сообраќајна артерија Веле Марков, како и изградбата на Шарпланинска со модерна инфраструктура и зеленило – рече тој.

Според него, овие проекти значат подобар квалитет на живот за жителите и поголема мобилност на целиот западен дел од Скопје.

– Продолжуваме со работа, со јасен план и со љубов кон Скопје – порача Ѓорѓиевски.

The post ГОЛЕМА ПРОМЕНА ВО ЃОРЧЕ ПЕТРОВ Ќе се гради модерен кружен тек на најризичната крстосница во Скопје appeared first on plusinfo.mk.