Управата за финансиска полиција до Основното јавно обвинителство за гонење на организиран криминал и корупција Скопје поднесе кривична пријава против три физички лица и едно правно лице поради постоење на основано сомнение за сторено кривично дело „Злоупотреба на службена положба и овластување” од член 353-в ст. 5 вв став 1 од Кривичниот законик, сторено кривично дело поттикнување казниво по член 23 в.в. со кривично дело злоупотреба на службена положба и овластување по член 353 став 5 од Кривичен законик, информираат од Финансиска полиција.

– Првопријавеното лице, во својство на раководно лице во Управата за водење на матични книги и второпријавеното лице вработено во УВМК, како лица што ги изработиле техничките спецификации и условите за квалитативен избор, поттикнати од третопријавеното лице во својство на сопственик и управител на четвртопријавеното правно лице НОВАТЕК ИНВ ДООЕЛ Скопје, ја злоупотребиле службената положба и овластување на начин што спротивно на начелото за економичност, ефикасност и ефективно користење на јавните средства, во текот на 2021 година изработиле тендерска документација со дискриминаторски и несразмерни услови за квалитативен избор за јавна набавка на услуги за дигитализација на матичните книги и јавна набавка на компјутерска опрема и за четвртопријавеното правно лице НОВАТЕК ИНВ ДООЕЛ Скопје прибавиле корист – право да учествува во постапка за јавна набавка и да склучи договори на вкупен износ од 35.621.240 денари, известуваат од Финансиска полиција.

Оттаму потенцираат дека со така дефинираните дискриминаторски и несразмерни критериуми за квалитативен избор и склучениот договор со НОВАТЕК ИНВ ДООЕЛ Скопје, реализирана е набавка на компјутерска опрема за потребите на Управата за водење на матичните книги по цени далеку повисоки од реално пазарните цени и на тој начин пријавените лица предизвикале штета на Управата за водење матични книги во вкупен износ од 2.836.260 денари.

– Дополнително, прво и второпријавеното лице, поттикнати од третопријавеното физичко лице, во техничките спецификации за јавната набавка на услуги за дигитализација, предвиделе ставка за „техничка поддршка при процесот на внесување на податоци” во висина од 359.507 денари месечен паушал, за кои услуги во моментот Управата за водење на матичните книги имала склучен договор со друг правен субјект и на тој начин без да постои реална потреба кон Управата се фактурира за иста услуга два пати, еднаш од страна на НОВАТЕК ИНВ ДООЕЛ Скопје, и еднаш од страна на другиот правен субјект, со што е предизвикана штета на Управата за водење на матични книги во вкупен износ од 2.157.042 денари, соопштуваат од Финансиската полиција.

The post НАМЕСТИЛЕ ТЕНДЕР ЗА КОМПЈУТЕРИ, ПЛУС ДВОЈНО ФАКТУРИРАЛЕ ЗА ОДРЖУВАЊЕ? Криминал во управата за водење матични книги, поднесена кривична пријава appeared first on plusinfo.mk.

Директорот на Управата, Блерим Абази за медиумите изјави дека со договорот, кој денеска бил потпишан по неколку средби на штрајкувачкиот одбор, дополнително се унапредени правата на вработените во Управата. Тој се заблагодари на Министерството за правда и министерот Никола Тупанчески за поддршката и на граѓаните кои во изминатиот период, како што рече, имале разбирање за прекинот на работата на вработените во Управата.

– Со колективниот договор се утврдуваат критериумите за годишен одмор, платените и неплатените отсуства, надоместоци на плата и други примања, исплата на регрес за годишен одмор, додаток на плата, исплата на јубилејна награда итн. Синдикатот и работодавачот во договорот го утврдија правото минималната плата да биде основна плата – изјави Абази.

Тој додаде дека како директор ќе се заложи во Предлог-буџетот за 2023 да бидат предвидени повисоки плати за Управата, а за покачување на платите во оваа година пратил иницијатива до Владата да се најде решение во најбрз рок.

Претседателот на независниот синдикат на Управата Тони Милошевски истакна дека првпат е потпишан Колективен договор, кој уредува многу досега недефинирани прашања, но нагласи дека штрајкот не е прекинат туку го ставаат во мирување до 20 јули 2022 додека не се реши и финансискиот дел.

– Потоа ќе одлучиме како ќе го изразиме незадоволството ако не ни се реши финансискиот дел во колективниот договор што остана и кој Владата треба да го реши – додаде Милошевски.

Претседателот на Конфедерацијата на синдикални организации на Македонија (КСОМ), Марјан Ристески во однос на финансиите рече дека контактираат со Владата и очекува да се реализира инцијативата на ССМ за зголемување на платите за 2.806 денари уште во јули и дека тоа ќе им следува и на вработените во Управата.

– Така што, ќе остане уште мал процент до оној што го бараат вработените и по пратената иницијатива од директорот, се надевам дека следната недела ќе имаме разговори во Министерството за  финансии. Кога ќе се одземат тие 2.806 денари што ќе ги добијат сите јавни службеници, остануваат уште до 10-15 проценти што мислам дека не е огромна сума за државата – изјави Ристески.

Тој рече дека е среќен што со потпишаниот Колективен договор конечно се нашол заеднички јазик и дека е тоа голем чин по речиси два месеца штрајк и „игра на нерви“. Ристески ги охрабри и останатите вработени во државните управи, агенции и фондови да си формираат свои синдикати за да може да потпишат вакви договори.

The post МАТИЧАРИТЕ ПОТПИШАА КОЛЕКТИВЕН ДОГОВОР Од утре непречено ќе се вадат уверенија appeared first on plusinfo.mk.

Синдикатот му даде рок на Министерството за финансии да одговори дали има пари за исполнување на барањата, кои претходно беа усогласени со Министерството за правда, а се однесуваат на отпремнини, исплата на К-15 во висина од 60 проценти од просечната плата.

– Ние подолг период бараме да имаме средба, но немаме и ќе протестираме. Ако немаме средба, ќе ги радикализираме чекорите. Апелирам да смогнат сили и да седнеме на заедничка маса да најдеме решение за овој проблем што го имаат вработените – изјави денеска Марјан Ристески од Конфедерацијата на синдикални организации.

Ристески обвини дека нема социјален дијалог во државата и дека не може да се преговара само со одделни синдикати.

– Нема дијалог. Јавно прашувам дали Владата е на сите граѓани во државата или почна да ги бира синдикатите – овие се подобни, овие не. Бараме јавно да се произнесе дали има намера да го продолжи социјалниот дијалог со независните синдикати – рече Ристески.

Според него, барањето на Сојузот на синдикати за зголемување на платите за 2.806 денари нема да го реши проблемот имајќи го предвид порастот на инфлацијата.

Штрајкот на вработените во Управата за матични книги трае повеќе од еден месец, а документи се издаваат само во итни случаи.

The post ВО СРЕДА ПОВТОРНО ПРОТЕСТ НА МАТИЧНАТА УПРАВА Чекаат покана од Владата за дијалог appeared first on plusinfo.mk.

Сара е најчестото женско, а Матеј најчестото машко име што граѓаните во земјава им го давале на своите новородени деца во текот на оваа година.

Според податоците на Управата за водење матични книги, меѓу најчестите имиња во 2020 година кај новородените женски бебиња се Сара, Јана, Јована, Марија, Софија, Асија, Елиф и Туана, додека кај машките деца најчести имиња се Матеј, Тадеј, Александар, Калин, Увејс и Дијар.

Како специфични имиња кои родителите изминатава година им ги даваа на своите новороденчиња се Антигона, Дуња, Аника, Валерија и Калија.

Според статистиката, минатата 2019 година најчести имиња кај новородените женски бебиња биле Дениција, Михаела, Јана и Катерина, додека кај машките деца најчести имиња биле Давид, Михаил, Стефан и Калин.

The post Сара и Матеј најчести имиња во 2020 година appeared first on plusinfo.mk.