Министерката за образование и наука, Весна Јаневска, е запознаена со случајот на врсничко насилство во училиштето во Ѓорче Петров. Како што изјави денеска, училиштето веќе постапило, го пријавило случајот во полиција и во социјалните служби, а презело и сопствени мерки. Таа апелира до родителите да внимаваат повеќе и да поминуваат повеќе време со своите деца.

– Жал ми е што се соочуваме со вакви случаи. Министерството добива информации за ваквите настани и презема мерки. Во соработка со компании и со Бирото за развој на образованието, постојано подготвуваме упатства и прирачници за тоа како да се постапи во вакви ситуации. Постапено е како што треба и во овој случај – училиштето пријавило во полиција и во социјалните служби и презело мерки. Сите ние како одговорни институции можеме да правиме сѐ како што треба, но ако немаме помош од родителите, не можеме да имаме целосен успех. Ќе има одреден процент успех, но клучна улога имаат родителите. Сега имаме иницијатива за проект за семејно насилство, бидејќи најчесто овие агресии се резултат на она што се случува дома – истакна министерката, одговарајќи на новинарски прашања.

Во врска со новиот закон за високо образование, Јаневска рече дека академската заедница веќе е раздвижена. Првите ефекти може да се очекуваат за три до четири години, а најголем пик ќе има по осум години, кога, според неа, земјава би можела да се најде меѓу првите 1.000 универзитети на Шангајската листа.

– Веќе избраните редовни доживотни професори не се опфатени со новите критериуми, но за прв пат имаат други задолженија. Ако сакаат да градат кариера, особено помладите, ќе треба да исполнат критериуми за менторство, да пријавуваат проекти – домашни и меѓународни, и да аплицираат за најголемите проекти на ЕУ. Не е баш така како што се обидува да се прикаже во јавноста – дека се поштедени од сѐ. Огромен број млади го поздравуваат законот, но неговата целосна примена ќе потрае. Првите ефекти ќе се почувствуваат за три до четири години, а најголемиот резултат по осум години. Најважно беше да се почне реформата, која долго време не беше ни тема. Сигурна сум дека за осум години ќе бидеме меѓу првите 1.000 универзитети на Шангајската листа – рече Јаневска.

Во однос на утврдените нерегуларности при упис на студенти на магистерски и докторски студии на Филозофскиот факултет и на еден приватен универзитет, министерката информира дека контролите се зајакнати.

– Има вонредни надзори по пријави од Државниот просветен инспекторат, а Агенцијата за квалитет почна да постапува регуларно, како што и досега требаше да работи при акредитација на нови студиски програми или повторна акредитација на постојните. На терен се проверува не само документацијата, туку и инфраструктурата – сѐ што опфаќа евалуацијата. За Филозофскиот факултет процедурата е завршена, извештајот стигна до нас и денес очекуваме да биде финализирано решението кое треба да го донесе министерството. Случајот ќе биде пријавен во Јавното обвинителство. И другиот случај, кој се однесува на приватен универзитет, е завршен и ќе биде пријавен – изјави Јаневска.

The post БЕЗ РОДИТЕЛИТЕ НЕМА УСПЕХ ПРОТИВ ВРСНИЧКО НАСИЛСТВО Јаневска посочи дека проблемот не се решава само институционално appeared first on plusinfo.mk.

Министерката за образование и наука, Весна Јаневска, изјави дека јавната дебата за новиот Закон за високо образование сè уште трае и дека Министерството очекува официјални и интегрирани забелешки од универзитетите.

Одговарајќи на новинарско прашање на традиционалната прослава по повод празникот Свети Трифун на Опитното поле на Факултетот за земјоделски науки и храна при Универзитет „Св. Кирил и Методиј“ во Скопје, Јаневска најави дека од следната недела, по договор со универзитетите, Министерството ќе започне посети и јавни расправи.

– Сè уште не е завршена јавната дебата и сè уште очекуваме забелешки. Добиваме предлози преку ЕНЕР и по електронска пошта, но очекуваме универзитетите официјално да ги достават своите интегрирани забелешки. Сè што е разумно ќе биде прифатено, а сè што може да претставува проблем ќе биде предмет на дискусија – изјави Јаневска.

Таа посочи дека ќе следуваат средби со професори и академската заедница, на кои ќе се разгледаат спорните членови од законот. Според неа, во најголем дел нема суштински забелешки, но остануваат неколку прашања за кои ќе треба дополнително усогласување.

Министерката нагласи дека образованието и науката мора да бидат приоритет.

– Немаме повеќе време за просечни и потпросечни резултати кои нè доведуваат во оваа ситуација. Мора да тргнеме напред. Министерството и законски и финансиски ќе го поддржи напредокот – истакна Јаневска.

На прославата по повод Свети Трифун, таа упати честитки до граѓаните, особено до земјоделците, лозарите и овоштарите, изразувајќи поддршка за Факултетот за земјоделски науки и храна и за проектите поврзани со аграрниот сектор.

The post ЌЕ СЕ МЕНУВА ЛИ ЗАКОНОТ? Јавната дебата сè уште трае, МОН очекува официјални забелешки appeared first on plusinfo.mk.