Реконструкцијата на култната Универзална сала во Скопје конечно се одвива со посакуваната динамика, а граѓаните може да очекуваат нејзино отворање на почетокот на 2028 година, изјави министерот за култура и туризам Зоран Љутков во гостување на 4ТВ.

– Пожарот и долгиот застој наложија ревизија на целиот проект, со што се увидени одредени недостатоци кои сега се коригираат за да се добие модерен и безбеден објект – рече министерот.

Според него, новата челична конструкција е десетпати постабилна и побезбедна од претходната. Таа е специјално направена за да може да ја издржи новата фасада и најсовремената сценска технологија.
Новата сала ќе има помал број на седишта, но ќе има поголем комфор.

– Доколку старата Универзална сала имаше околу 1.500 седишта, новиот капацитет е намален на околу 1.200 (1210) места. Ова овозможува поголема ширина помеѓу седиштата за максимален комфор на посетителите. Предвиден е поголем простор за влезови и излези, што е клучно за брза и сигурна евакуација во случај на потреба. Бидејќи објектот се наоѓа меѓу станбени згради, предвидена е дополнителна звучна изолација, како и комплетно нови системи за дополнително греење и ладење – рече министерот,

Планот е објектот да биде отворен на почетокот на 2028 година (февруари или март), како дел од активностите за Скопје – Европска престолнина на културата. Доколку не се испочитува рокот од страна на изведувачот, ќе биде активирана банкарската гаранција.

The post 📷 ПОГЛЕДНЕТЕ КАКО ЌЕ ИЗГЛЕДА НОВАТА УНИВЕРЗАЛНА САЛА Помалку седишта, за поголем комфор appeared first on plusinfo.mk.

Миро Кацаров времено ќе ја извршува должноста директор на Универзална сала додека следната недела ќе се распише нов оглас на кој заинтересираните кандидати ќе можат да аплицираат. Вака информираше градоначалникот Орце Ѓорѓиевски за Курир.

– Јас не велам дека секогаш правиме совршени кадрови потези, сите досега се покажале дека се исправни во Град Скопје, затоа и состојбата е таква каква што е, но овде станува збор за културна институција, апсолутно ми е важно мислењето на граѓаните – вели градоначалникот.

Ѓорѓиевски истакна дека конкурс за директор бил распишан по завршување на мандатот на претходниот директор и дека првиот распишан оглас пропаднал поради недоволен интерес во јавноста. Потоа за в.д. директор бил назначен Кацаров.

– Кога станува збор за тоа кадровско решение, јас морам да истакнам во јавноста, лицето Миро Кацаров е вработен во таа институција со години наназад. На директорот кој претходно беше на таа позиција, му заврши мандатот и ние моравме да ставиме таму вршител на должност директор. Лице кое ќе ја извршува должноста додека да спроведеме нов оглас. Зошто? Затоа што првиот оглас пропадна таму. Ние имавме еден оглас таму кој го спроведовме, дали немаше доволно интерес во јавноста, можеби и недоволно јавен беше процесот, но доведе до тоа да пропадне огласот и не можев јас таа институција да ја оставам вработените да немаат плата, рече градоначалникот.

The post КАЦАРОВ Е САМО ВРЕМЕНО РЕШЕНИЕ Следната недела ќе се распише нов оглас за директор на Универзална сала appeared first on plusinfo.mk.

Телевизискиот водител Миро Кацаров ќе раководи со Универзалната сала во Скопје.

Според податоците на Централниот регистар, Кацаров ќе биде вршител на должноста директор, а назначен е од скопскиот градоначалник, Орце Ѓорѓиевски.

Обновата на Универзалната сала почна кон крајот на апри, а се очекува да биде завршена до крајот на 2027 година, пред манифестацијата Скопје, европска престолнина на културата 2028.

Кацаров доаѓа на местото на Горјан Христовски, кој претходно ја извршуваше функцијата директор.

The post ВОДИТЕЛОТ МИРО КАЦАРОВ ЌЕ РАКОВОДИ СО УНИВЕРЗАЛНАТА САЛА Ѓорѓиевски го назначи за вршител на должноста директор appeared first on plusinfo.mk.

Почна обновата на Универзалната сала во Скопје, проект вреден 20 милиони евра.

Премиерот Христијан Мицкоски, кој заедно со министерот за култура Зоран Љутков и со градоначалникот на Скопје Орце Ѓорѓиевски денеска го посети градилиптето очекува изградбата да биде завршена во рамките на рокот и во рамките на предвидениот буџет.

– Проектот „Европска престолнина на културата“ после сите оние застои во минатото, конечно добива некаква динамика, а мораме до 2028 комплетно да ги затвориме сите објекти. Јас сум благодарен од мое име, од името на граѓаните на градот Скопје, што овој објект после сите оние перипетии од минатото ќе добие некаква физиономија. Според она што го видов и што го презентираше проектантот ќе биде навистина прекрасно дело. Па, ајде да не зборуваме што се вели пред време, да го завршиме и потоа сите заедно да се радуваме и да уживаме во културните настани коишто тука ќе се организираат – рече премиерот Мицкоски.

Министерот за култура Зоран Љутков, вели дека Универзалната сала ќе биде готова до крајот на 2027 година, а нејзиното отворање со некаков настан да се означи на почетокот на 2028 година.

– Универзалната сала ќе биде завршена до крајот на 2027 година. Ќе биде дел од „Скопје – европска престолнина на културата во 2028 година“. Имаше правни пречки, имаше поделени стопанисувања меѓу Град Скопје и Министерството за култура, не се знаеше кој е одговорен во овој дел. Кога ги решивме овие пречки, во истиот момент продолживме со целата процедура. Инвеститор е Министерството за култура, преку Владата, а парите, 20 милиони евра, ги обезбеди Владата – изјави министерот Љутков.

Прашан дали се гарантира безбедноста во поглед на пожари, Љутков рече дека се направени  неколку испитувања во врска со тоа, првите две нарачани од самиот изведувач, а потоа уште едно.

– Останува истата челична конструкција, која се покажа дека не е оштетена при пожарот – рече Љутков.

Нека е аирлија, ова е момент кој Скопје долго го чекаше, почнува реконструкцијата на Универзална сала, објави градоначалникот Ѓорѓиевски на Фејсбук.

„Премногу време овој процес беше закочен, премногу време стоеше во место, а скопјани останаа без еден од најпрепознатливите симболи на градот. Универзалната сала е спомен на солидарноста, на пријателството и на човечноста, изградена по разорниот земјотрес, како доказ дека Скопје никогаш не било само и дека секогаш знаело да се издигне“, порача Ѓорѓиевски.

Многумина во минатото имаа можност да го вратат достоинството на овој простор, додаде тој.

„Но, како што е познато, само Влада предводена од ВМРО-ДПМНЕ гради, создава и ја развива државата. Затоа, сакам да упатам искрени честитки и благодарност до премиерот Христијан Мицкоски за силната поддршка, визијата и за одлучноста овој проект конечно да се придвижи.
Благодарност и до министерот за култура, Зоран Љутков, за посветеноста и за конкретниот придонес во реализацијата на оваа важна инвестиција за Скопје и за македонската култура“, вели градоначалникот.

Универзалната сала е дел од колективната меморија на нашиот град, потсети тој.

„Тука се одржувале концерти, фестивали, претстави и настани кои оставиле трага во животот на многу генерации. Речиси секој скопјанец има свој спомен поврзан со ова место. Затоа нејзината обнова не значи само реконструкција на една зграда, туку враќање на еден важен дел од душата на Скопје“, вели градоначалникот Ѓорѓиевски.

Проектот за реконструкција на Универзалната сала ќе се реализира по принципот „клуч на рака“, со што се обезбедува целосна изведба и подготвеност за употреба, без дополнителни интервенции.

„Овој проект претставува еден од клучните чекори во подготовките на Скопје за освојување и за достојно носење на престижната титула Европска престолнина на културата 2028. Со обновениот изглед, Универзалната сала ќе прерасне во модерна, функционална и репрезентативна културна институција, способна да биде домаќин на врвни театарски претстави, концерти, фестивали и други значајни културни настани. По завршувањето на реконструкцијата, објектот ќе биде целосно предаден во владение на Град Скопје, како простор кој повторно ќе им служи на граѓаните, на уметниците, на младите и на сите генерации што ја сакаат културата“, вели Ѓорѓиевски.

Универзалната сала требаше да биде изградена во мандатот на претходната градоначалничка на Скопје, Данела Арсовска. Но, таа не ја градеше, па Министерството за култура ги презеде ингеренциите од Град Скопје и почна да ја гради. За време на изградбата, во април 2024 година,  градилиштето се запали и изградбата беше стопирана.

The post 📷 ОБНОВАТА НА УНИВЕРЗАЛНАТА САЛА ЌЕ ЧИНИ 20 МИЛИОНИ ЕВРА Објектот ќе биде целосно готов до крајот на 2027 година appeared first on plusinfo.mk.

По повеќе од една деценија чекање, започнува реконструкцијата на Универзална сала, најави министерот за култура и туризам Зоран Љутков. Објектот беше затворен 11 години, односно од 2015 година, поради административни пречки и одложувања.

Љутков информира дека постапката за избор на изведувач е успешно завршена, откако надлежната комисија ја одбила жалбата и го потврдила изборот на најповолна понуда.

– По долги години чекање и административни пречки, денес со гордост објавувам: започнува реконструкцијата и модернизацијата на Универзалната сала – еден од најзначајните културни симболи на Скопје и на Македонија – истакна министерот Љутков.

Според него, со ова се отстранува и последната правна пречка за почеток на градежните работи. Проектот ќе се реализира по принципот „клуч на рака“, а реконструкцијата е планирано да заврши до декември 2027 година.

– Со новиот лик на Универзална, Скопје ќе добие модерна, функционална и репрезентативна културна институција, која ќе биде домаќин на врвни театарски претстави, концерти, фестивали и големи културни настани – нагласи Љутков.

Министерот додаде дека проектот е дел од подготовките на Скопје за апликацијата за титулата Европска престолнина на културата 2028.

– Ова е инвестиција во иднината на македонската култура, инвестиција во нашите уметници, во нашата публика и во идните генерации – посочи министерот, додавајќи дека ќе продолжи со транспарентна реализација на капиталните проекти во културата.

The post ПОСЛЕ 11 ГОДИНИ СЕ ОТВОРА ПАТ ЗА УНИВЕРЗАЛНА Љутков најави старт на реконструкцијата appeared first on plusinfo.mk.

В понеделник ќе биде донесена одлуката за изведувач на Универзалната сала, но ќе мора да се причека рокот од осум дена за поднесување жалба, изјави денеска министерот за култура и туризам, Зоран Љутков.

Како што нагласи Љутков, едната постапка е завршена, а втората е во фаза на евалуација.

– Комисијата работи и процесот е веќе во завршна фаза. Одлуката за избор ќе биде донесена в понеделник – информира министерот одговорајќи на новинарски прашања по прес-конференцијата за претстојниот Саем за туризам, што ќе се одржи викендов во Скопје.

Во врска со пресудите за платите во културата, Љутков истакна дека сè уште стои на истиот став.

– Јас не ги добивам лично пресудите од првостепениот суд, некој друг веројатно ги добива пред да ги добиеме ние. Јас подоцна се информирам од институциите кога ќе стигнат, но знам дека пред три дена една од одлуките, првата од првостепениот од Битола, беше обжалена и Апелација одлучи во корист на институцијата – рече министерот.

The post В ПОНЕДЕЛНИК ЌЕ ИМА ОДЛУКА ЗА ИЗВЕДУВАЧ ЗА УНИВЕРЗАЛНА САЛА Ќе мора да се испочитува рокот од 8 дена за жалба appeared first on plusinfo.mk.

Обезбедена е нова документација и објавена е нова јавна набавка за реконструкција на Универзална сала, информираше министерот за култура и туризам Зоран Љутков.

Набројувајќи ги значајни активности што се реализираа минатата година во делот на капиталните проекти, министерот Љутков ги посочи Турскиот театар, Универзална сала, театарот во Струмица, Куманово и киното „Партизан“ во Битола.

– Обезбедена е нова документација и објавена е нова јавна набавка за реконструкција на Универзална сала; продолжи изградбата на Турскиот театар; деблокирана е изградбата на стариот театар во Струмица; а продолжуваме и со реконструкцијата на театрите во Куманово и во Битола, киното „Партизан“ во Битола се прави со забрзана динамика, завршена е првата фаза од санацијата на покривот на НУБ „Свети Климент Охридски“, додека санацијата на прокиснатите делови во НУ Македонски народен театар се одвива со засилена динамика – наброја министерот.

The post НЕМА ПРЕЧКИ ДА СЕ ОБНОВИ УНИВЕРЗАЛНА САЛА Обезбедена е документација, распишан е тендер appeared first on plusinfo.mk.

Тендерот за изведувач на реконструкцијата на Универзална сала не поминал, па Министерството за култура и туризам ќе мора да го распише одново. Според министерот Зоран Љутков, процесот ќе се одолговлечи најмалку уште два месеца, што значи дека нов изведувач ќе биде познат дури средината на јануари.

– За жал, добивме известување од Комисијата за жалби дека тендерот за Универзална сала не помина бидејќи имаше жалба во однос на изведувачот, кој беше единствениот понудувач. Според мене, проблемот не е суштински, но има известување и мораме да го почитуваме. Наредната недела повторно ќе го објавиме тендерот – изјави Љутков при посетата на Театар Комедија.

Министерот појасни дека новата постапка ќе биде пократка, бидејќи некои од фазите веќе се завршени.

– Сега постапката ќе трае пократко бидејќи фазата на изработка на тендерот траеше околу дваесет дена. Овојпат нема забелешки, така што веднаш по завршувањето на законскиот рок од десет дена ќе го објавиме новиот повик. Очекувам до средината на јануари да го имаме изведувачот – рече Љутков.

Министерството за култура и туризам претходно, на 18 октомври, соопшти дека е донесена одлука за избор на најповолен понудувач за проектот „Изведба на градежни и занаетчиски работи и ентериер на објект Универзална сала во Скопје – по принцип клуч на рака“.

Меѓутоа, поради жалба поднесена до Државната комисија за жалби по јавни набавки, постапката е вратена на повторно разгледување.

The post ТЕНДЕРОТ ЗА РЕКОНСТРУКЦИЈА НА УНИВЕРЗАЛНА САЛА ПОНИШТЕН ПО ЖАЛБА Нов оглас следната недела, изведувачот ќе биде познат во јануари appeared first on plusinfo.mk.

Министерството за култура и туризам информира дека е завршена постапката за избор на изведувач за реализација на проектот за реконструкција на објектот на Универзална сала во Скопје. Денес е донесена Одлука за избор на најповолен понудувач по јавната набавка за „Изведба на градежни и градежно-занаетчиски работи и ентериер на објект Универзална сала во Скопје – по принцип на изградба Клуч на рака“.

„По завршување на законските рокови за доделување на договорот ќе биде потпишан договорот за изведба, а по исполнување на сите потребни предуслови за почеток на градба и воведување на изведувачот во работа, ќе следи официјалното започнување на градежните активности.

Рокот за реализација на проектот е предвиден до декември 2027 година. Набавката се реализира по принципот Клуч на рака, што значи дека во предвидениот рок објектот ќе биде целосно изграден, уреден и подготвен за користење, односно за одржување на концерти, настани и други културни содржини“, велат од Министерството.

Од  Министерството за култура и туризам потсетуваат дека по преземањето на објектот на Универзална сала од Градот Скопје, а особено по настанатиот пожар, Министерството спровело низа активности со цел успешна реализација на проектот за нејзина реконструкција.

Како дел од овие активности, Министерството преку измени и дополнувања на проектната документација преземена од Градот Скопје, обезбедило целосно нова проектна документација на ниво на основен проект за реконструкција на Универзална сала.

„Овој проект беше претставен пред македонската јавност, а со неговата реализација ќе се зачува споменот и колективната меморија за објектот, а воедно  ќе му се даде и нов, современ и повеќенаменски  карактер“, велат од  Министерството за култура и туризам.

Според соопштението, Манифестацијата  „Скопје – Европска престолнина на културата 2028“ покрај во останатите објекти од областа на културата во градот ќе се одвива и во обновената Универзална сала.

The post ИЗБРАН ИЗВЕДУВАЧ ЗА РЕКОНСТРУКЦИЈА НА УНИВЕРЗАЛНА САЛА До декември 2027 треба да заврши изведбата по принцип „клуч на рака“ appeared first on plusinfo.mk.

На улицата Костурски херои во населбата Буњаковец поставени се нови столпчиња со цел да се подобри протокот на сообраќајот и да се зголеми безбедноста на граѓаните. Со оваа мерка, Општина Центар реши долгогодишен проблем со непрописното паркирање на автомобили и таксисти кај Универзалната сала, што често предизвикуваше застои и опасности за пешаците.

Градоначалникот на Центар, Горан Герасимовски, потенцира дека иницијативата произлегла директно од барањата на граѓаните.

– Оваа идеја произлезе од барањата на центарци во рамки на караванот Се гледаме во маало, каде што граѓаните активно учествуваа со предлози и идеи за подобрување на населбите во кои живеат. Со поставувањето на столпчињата на овој дел од Буњаковец, покажуваме дека го слушаме гласот на граѓаните и ги реализираме нивните барања. Ветивме и реализиравме – изјави Герасимовски.

Со новите столпчиња, улицата добива целосна функционалност – обезбеден е непречен проток на сообраќајот, подобрена е безбедноста на пешаците, а граѓаните можат слободно да се движат без пречки од неправилно паркирани возила.

Од Општината најавуваат дека ваквите мерки нема да застанат тука. Ќе се продолжи со уредување на јавниот простор и поставување слични решенија и во други делови од Центар, со цел да се зголеми безбедноста и да се овозможи поквалитетно секојдневие за сите жители.

The post ГРАЃАНИТЕ РЕКОА, ОПШТИНАТА ГИ СЛУШАШЕ Улицата „Костурски херои“ доби нов изглед и безбедност за пешаците appeared first on plusinfo.mk.