Унгарскиот парламент денеска едногласно, со 139 гласа „за“ и без ниту еден глас против или воздржан, му го укина имунитетот на премиерот Петер Маѓар, со што е отстранета правната пречка за продолжување на истрагата за инцидентот од 2024 година.

Унгарското обвинителство минатата недела побара укинување на неговиот имунитет за да може истрагата да продолжи и, доколку се исполнети законските услови, премиерот да биде сослушан во својство на осомничен. Случајот се однесува на инцидент од 21 јуни 2024 година во будимпештанскиот клуб „Еткерт“, во кој Маѓар е осомничен дека за време на конфликт со маж кој го снимал му го одзел мобилниот телефон, а потоа го фрлил во Дунав, по што телефонот бил пронајден со помош на нуркачи.

Постапката првично беше покрената додека Маѓар беше пратеник во Европскиот парламент, кој во октомври 2025 година го одби барањето за укинување на неговиот имунитет. По завршувањето на мандатот во ЕП во мај годинава, Маѓар беше избран за пратеник во унгарскиот парламент и за премиер на Унгарија.

Пред самиот чин на гласање, Маѓар ги повика пратениците од неговата партија Тиса да го поддржат укинувањето на имунитетот.

– Не сум сторил никакво кривично дело. Одговорен сум за сите свои постапки, зборови и дела – порача Маѓар, истакнувајќи дека нема причина да се повикува на имунитет.

Тој истовремено упати критики до обвинителството, тврдејќи дека се обидува неговиот случај да го стави во ист контекст со истрагите за корупциските афери вредни милијарди, а поврзани со поранешни владини функционери. Маѓар и претходно ја нарекуваше постапката против него за обид за политичка дискредитација, а обвинителството ги отфрла таквите обвинувања.

Со одлуката на парламентот истрагата може законски да продолжи. Доколку биде поднесено обвинение, за вината на Маѓар ќе одлучува надлежниот суд.

The post МАЃАР ФРЛИЛ ТУЃ ТЕЛЕФОН ВО ДУНАВ, ИСТРАГАТА ЌЕ ПРОДОЛЖИ Унгарскиот парламент едногласно му го укина имунитетот appeared first on plusinfo.mk.