унгарски кредит Archives - plusinfo.mk

ИМАМЕ ПОВИСОК РАСТ ОД ЕКОНОМИЈАТА НА ЕУ Мицкоски оцени дека унгарскиот кредит го поттикна растот на економијата

плусинфо — Tue, 28 Jul 2026 12:01:23 +0000

Премиерот Христијан Мицкоски оцени денеска дека кредитот што Владата го зеде од Унгарија бил добар двигател на економијата која расте веќе неколку квартали со 3%, што е за 2% повеќе од растот во Европската Унија.

Тој рече дека кредитот бил искористен за да се врати еврообврзница од половина милијарда евра, додека пак 250 милиони биле инвестирани во општеството и 250 милиони во стопанството преку комерцијалните банки со повластена каматна стапка од 1,95%, што претставува добар поттик во економијата и резултира со пораст на бруто-домашниот производ на земјава.

– Од третиот квартал во 2024 до првиот квартал во 2026 година заклучокот е дека македонската економија расте со 3% во реални параметри, а кај нашиот најголем партнер ЕУ порастот е 1,4% и во еврозоната 1,25%. Што значи дека во услови кога нашиот најголем трговски партнер економијата условно расте со два и пол пати помала стапка, ние благодарение на овие проактивни политики успеавме да обезбедиме значаен раст којшто нè доведе до оваа ситуација во којашто денеска сме, а во номинални услови нашата економија расте со над над 8%, што е нешто исто така многу значајно. И да бидам попрецизен, според Светска банка и според Меѓународен монетарен фонд, за две години оваа Влада номиналниот бруто домашен производ го зголеми за некаде отприлика 4,65 милијарди долари. Претходната Влада за 6 години го зголеми номиналниот бруто домашен производ за 4,5 милијарди долари – рече Мицкоски.

Минатата недела унгарскиот премиер Петер Маѓар најави дека унгарска влада ќе истражува дали има можна злоупотреба на државни средства во однос на кредитот од една милијарда евра што државната „Ексимбанка“ ѝ го даде на Македонија за време на претходната влада на Виктор Орбан зашто тој бил даден под многу поволни услови со каматна стапка од 3,25%.

The post ИМАМЕ ПОВИСОК РАСТ ОД ЕКОНОМИЈАТА НА ЕУ Мицкоски оцени дека унгарскиот кредит го поттикна растот на економијата appeared first on plusinfo.mk.

КОМПАНИИТЕ ДОБИВААТ УШТЕ 2,4 МИЛИОНИ ЕВРА ДРЖАВНА ПОДДРШКА ЗА ИНВЕСТИЦИИ Досега за оваа намена се потрошени околу 236 милиони евра

плусинфо — Wed, 08 Jul 2026 11:50:33 +0000

Министерството за финансии изврши трансфер на нови 148,6 милиони денари или 2,4 милиони евра кон Развојната банка, а средствата се наменети за поддршка на инвестиции во домашните компании.

Со последниот трансфер од централниот буџет кон Развојната банка вкупната сума којашто е пласирана во домашната економија за реализација на инвестиции од страна на компаниите изнесува 14,5 милијарди денари или 235,8 милиони евра.

Вкупниот буџет за поддршка на домашните компании предвидени во Буџетот изнесува 250 милиони евра, а вредноста на инвестицискиот циклус се проценува на околу 300 милиони евра.

Средствата што ги обезбеди Владата и се пласираат кон домашите компани по поволни услови се во насока на реализација на приватни инвестиции, коишто ќе обезбедат сопствен развој и поттикнување на економскиот раст. Средствата се пласираат до крајните корисници преку деловните банки, каматната стапка е 1,95% годишно, рокот на отплата е до 15 години и грејс период до 3 години, соопшти Министерството за финансии.

The post КОМПАНИИТЕ ДОБИВААТ УШТЕ 2,4 МИЛИОНИ ЕВРА ДРЖАВНА ПОДДРШКА ЗА ИНВЕСТИЦИИ Досега за оваа намена се потрошени околу 236 милиони евра appeared first on plusinfo.mk.

ИНДСТУРИЈАТА ВО АПРИЛ ПОРАСНАЛА ЗА 7,5% СПОРЕДЕНО СО ЛАНИ Бројките ги демантираат оние кои не сакаат Македонија да успее

МИА — Mon, 15 Jun 2026 11:04:09 +0000

Растот на индустријата во април е лоша вест за оние што не сакаат државата да успее, кои создаваат хистерија и паника, шират невистини и манипулираат, вели премиерот Христијан Мицкоски, коментирајќи ги статистичките податоци за индустријата.

– Се консолидиравме по шокот во март, кога ескалираше кризата во Заливот и се продлабочи енергетската криза. Веќе во април индустријата бележи значителен раст, односно зголемување од околу 7,4 до 7,5 проценти во споредба со истиот месец минатата година, изјави денеска Мицкоски, кој присуствуваше на официјалното отворање на новата фабрика на компанијата „Brainchild“ во индустриската зона Жабени во Битола.

Една од причините зошто има раст на индустријата во април, според премиерот, е и тоа што преку унгарскиот кредит слеани се финансиски средства во домашните компании каде се очекува инвестициите да бидат најмалку двојно поголеми од вложените средства.

The post ИНДСТУРИЈАТА ВО АПРИЛ ПОРАСНАЛА ЗА 7,5% СПОРЕДЕНО СО ЛАНИ Бројките ги демантираат оние кои не сакаат Македонија да успее appeared first on plusinfo.mk.

МАКЕДОНИЈА ИМА ШЕСТ КВАРТАЛИ РАСТ ОД 3,5 ПРОЦЕНТИ Стојаноски најави силен инвестициски циклус

плусинфо — Wed, 27 May 2026 19:29:58 +0000

Пратеникот од ВМРО-ДПМНЕ, Бојан Стојаноски, во емисијата „Став на регионот“ на телевизија „Њузмакс Балканс“ изјави дека Владата продолжува со економска политика насочена кон капитални инвестиции и поддршка на градежниот сектор, со цел зголемување на бруто-домашниот производ, се наведува во соопштението од ВМРО-ДПМНЕ.

– Овие 260 милиони евра што Република Македонија ќе ги повлече ќе бидат наменети за финансирање капитални проекти што се реализираат преку централниот буџет. Кога ја презедовме власта, кажавме дека нашата економска филозофија ќе почива на неколку столба, а еден од нив е силен поттик за капитални инвестиции преку кои, особено преку градежништвото, ќе го зголемиме бруто-домашниот производ. Тоа веќе се гледа во пракса – рече Стојаноски.

Тој нагласи дека државата годинава има обврска да врати 2,6 милијарди евра стари долгови, што, според него, претставува третина од Буџетот, но и покрај тоа, како што рече, обезбедени се средства за повисоки плати, пензии и инфраструктурни проекти.

– Оваа година имаме обврска да вратиме 2,6 милијарди евра стари долгови, но и покрај тоа успеваме да обезбедиме средства за повисоки плати, повисоки пензии, реконструкции и реализација на капитални проекти. Просечната пензија за две години е зголемена за 32 проценти, а сите пензионери добија покачување од 7.000 денари. Секој студент доби ваучер од 250 евра. Просечната нето-плата, според Државниот завод за статистика, е зголемена за 15,5 проценти, односно за околу 6.500 денари. Дополнително, имаме и 17.700 новоотворени работни места – изјави Стојаноски.

Тој посочи дека преку унгарскиот финансиски пакет, но и преку средства од Буџетот на Министерството за транспорт, се финансираат бројни проекти во општините.

– Во сериозна подготвителна фаза сме за почеток на изградбата на железничката пруга на Коридорот 10, а автопатот Прилеп-Битола се реализира со задоволително темпо. Кога ќе се соберат сите овие проекти, станува збор за инвестиции вредни неколку милијарди евра – истакна Стојаноски.

Тој додаде дека економската стратегија на Владата се темели на три клучни принципи: капитални инвестиции, привлекување странски директни инвестиции и поддршка на домашното стопанство.

– Во овој момент тоа ни обезбедува економски раст од 3,5 проценти шест квартали по ред, што нè рангира меѓу третото и петтото место во Европа на квартално ниво – рече Стојаноски.

The post МАКЕДОНИЈА ИМА ШЕСТ КВАРТАЛИ РАСТ ОД 3,5 ПРОЦЕНТИ Стојаноски најави силен инвестициски циклус appeared first on plusinfo.mk.

ШТИПСКА „АКТИВА“ ГО ЗГОЛЕМИ ПРОИЗВОДНИОТ КАПАЦИТЕТ Мицкоски задоволен како компанијата ги потрошени парите од унгарскиот кредит

плусинфо — Thu, 05 Mar 2026 13:18:25 +0000

Според премиерот, токму овие пари овозможиле компанијата да добие „нова физиономија“ и да инвестира во капацитети со голема додадена вредност за македонската економија.

-Задоволство е што како Влада учествувавме овој капацитет да се прошири. Сопствениците го искористија заемот за вложување во нови поразводни капацитети, а тие имаат голема додадена вредност во македонската економија и во локалната економија, овде во Штип – рече Мицкоски.

Тој рече дека Влада, ќе стори се што е потребно македонските компании да добијат услови коишто ќе им овозможат да се развиваат, а со тоа и да ја развиваат македонската економија.

-Тоа е наш приоритет, така се однесувавме до сега, така и ќе се однесуваме и од сега- рече Мицкоски.

Во компанијата работат 580 работници.

The post ШТИПСКА „АКТИВА“ ГО ЗГОЛЕМИ ПРОИЗВОДНИОТ КАПАЦИТЕТ Мицкоски задоволен како компанијата ги потрошени парите од унгарскиот кредит appeared first on plusinfo.mk.

УШТЕ 6,9 МИЛИОНИ ЕВРА КРЕДИТНА ПОДДРШКА ЗА КОМПАНИИТЕ Министерството за финансии ги уплати парите во Развојна банка

плусинфо — Fri, 09 Jan 2026 09:42:45 +0000

Министерството за финансии од Буџетот изврши исплата нова транша во вредност од 6,9 милиони евра кон Развојната банка за поддршка на домашните компании.

Со исплатата на оваа транша вкупната поддршка на државата кон домашната економија изнесува 224,3 милиони евра од вкупно планираните 250 милиони евра за поддршка на домашните компании.

Владата ги обезбеди овие средства преку кредитна линија од Унгарската експорт-импорт банка со цел поддршка на домашната економија. Поддршката се состои од пласман на средства по поволни услови за компаниите во насока на реализација на приватните инвестиции, со што тие ќе обезбедат сопствен развој и поттикнување на економскиот раст.

Парите се пласираат до крајните корисници преку деловните банки, каматната стапка е 1,95% годишно, рокот на отплата е до 15 години и грејс период до 3 години.

The post УШТЕ 6,9 МИЛИОНИ ЕВРА КРЕДИТНА ПОДДРШКА ЗА КОМПАНИИТЕ Министерството за финансии ги уплати парите во Развојна банка appeared first on plusinfo.mk.

УШТЕ 14,2 МИЛИОНИ ЕВРА ОДАТ ЗА ПОДДРШКА НА КОМПАНИИТЕ Досега бизнисот доби речиси 218 милиони евра од унгарскиот кредит

плусинфо — Tue, 23 Dec 2025 12:41:16 +0000

Министерството за финансии (МФ) од Буџетот изврши исплата на две нови транши кон Развојната банка за поддршка на домашните компании во вкупен износ од 14,2 милиони евра.

Со исплатата на овие транши, информираат од Министерството, вкупната поддршка на државата кон домашната економија изнесува 217,5 милиони евра од вкупно планираните 250 милиони евра за поддршка на домашните компании.

Владата средствата ги обезбеди преку кредитна линија од унгарската Експорт-импорт банка, со цел поддршка на домашната економија, а преку пласман на средства по поволни услови за компаниите за реализација на приватните инвестиции во развој на компаниите и поттикнување на економскиот раст. Средствата се пласираат до крајните корисници преку деловните банки, каматната стапка е 1,95% годишно и рок на отплата до 15 години и грејс период до 3 години.

Вкупниот буџет за поддршка на домашните компании предвидени во Буџетот изнесуваат 250 милиони евра, а вредноста на инвестицискиот циклус се проценува на околу 300 милиони евра.

The post УШТЕ 14,2 МИЛИОНИ ЕВРА ОДАТ ЗА ПОДДРШКА НА КОМПАНИИТЕ Досега бизнисот доби речиси 218 милиони евра од унгарскиот кредит appeared first on plusinfo.mk.

ВО ПЕТРОВЕЦ СЕ ГРАДИ НОВ КУЛТУРЕН ДОМ Мицкоски најави старт на ветените капитални проекти

плусинфо — Thu, 06 Nov 2025 12:10:12 +0000

Премиерот Христијан Мицкоски денеска, заедно со градоначалникот на Општина Петровец Борче Митевски, присуствуваше на поставувањето на камен-темелникот за изградба на нов Културен дом во Петровец. Новиот објект, со површина од 385 метри квадратни, ќе се гради со средства во висина од 29,5 милиони денари, обезбедени преку Владата од унгарскиот кредит.

Градоначалникот Митевски посочи дека објектот се очекува да биде завршен за една година и дека со тоа општината ќе добие современ простор за културни настани и манифестации.

– Културниот дом е со големина од 385 метри квадратни, а средствата во висина од 29.500.000 денари се обезбедени преку нашата Влада од унгарскиот кредит. Очекувам за само една година да имаме свечено пуштање на објектот. Му благодарам на премиерот Мицкоски за поддршката, не само за Петровец, туку и за сите општини низ државата – изјави Митевски.

Премиерот Мицкоски во своето обраќање нагласи дека со завршувањето на изборниот процес започнува период на интензивна реализација на ветените капитални инвестиции.

– Изборите завршија, време е да продолжиме со реализација на проектите што сме ги ветиле. Му честитам на градоначалникот, кој веќе петти пат добива доверба од граѓаните и тоа со причина, затоа што работи посветено. Владата ќе продолжи да ги поддржува општините во испорачување на проекти што носат реална корист за граѓаните – истакна Мицкоски.

Со изградбата на новиот Културен дом, жителите на Петровец ќе добијат простор кој ќе служи за културни и општествени активности, а проектот претставува дел од пошироката стратегија на Владата за зајакнување на локалниот развој.

The post ВО ПЕТРОВЕЦ СЕ ГРАДИ НОВ КУЛТУРЕН ДОМ Мицкоски најави старт на ветените капитални проекти appeared first on plusinfo.mk.

УШТЕ 19,4 МИЛИОНИ ЕВРА ОД УНГАРСКИОТ КРЕДИТ ОДАТ ЗА КОМПАНИИТЕ Досега компаниите повлекле 190 милиони евра

плусинфо — Fri, 03 Oct 2025 07:17:07 +0000

Вкупно 19,4 милиони евра нова транша е исплатена од кон Развојната банка за поддршка на домашните компании, пари кои Владата ги обезбеди по поволни услови од унгарскиот заем

Парите се наменети за кредити на компаниите кај комерцијалните банки за инвестициски проекти.

Со оваа транша вкупната поддршка што од централниот Буџет е исплатена кон домашната економија преку оваа владина мерка изнесува 190,5 милиони евра.

Во Буџетот за 2025 година се планирани вкупно 250 милиони евра кои се наменети за поддршка на инвестициски проекти на домашните компании, а кои треба да покренат инвестициски циклус во приватниот сектор од околу 300 милиони евра.

Средствата за оваа намена ги обезбеди Владата по поволни услови преку унгарската Експорт-импорт банка.

The post УШТЕ 19,4 МИЛИОНИ ЕВРА ОД УНГАРСКИОТ КРЕДИТ ОДАТ ЗА КОМПАНИИТЕ Досега компаниите повлекле 190 милиони евра appeared first on plusinfo.mk.

ФИЛИПЧЕ НАЈАВУВА СЕРИОЗНО ОКРУПНУВАЊЕ НА ОПОЗИЦИЈАТА Нема да се повлече од лидер на СДСМ, каков и да е резултатот

плусинфо — Mon, 29 Sep 2025 21:32:31 +0000

Лидерот на опозицискиот СДСМ, Венко Филипче, најавува „енергична и ентузијастична битка“ во сите општини каде што СДСМ и коалицијата предложија кандидат за градоначалник. Тој и смета дека енергијата и желбата за политичка борба се зголемуваат кај членовите и симпатизерите на СДСМ.

Според Филипче, анкетите на ВМРО-ДПМНЕ лажно покажуваат мала поддршка за СДСМ, а владејачката партија е во паника од падот на рејтингот.

– Тие имаат изгубено стотина илјади гласа споредено со минатата година, што никогаш досега не се случило една влада да има толкав пад на популарноста за само една година. Меѓутоа, тоа не е чудно, едноставно, со ништо не се справија. Покажаа дека немаат ниту човечки капацитет, ниту работна навика. Не се впуштија во решавање на проблемите на граѓаните, туку влегоа во партизација на институциите. Влегоа во тендери преку свои компании, преку коишто понатаму се исплаќаат хонорари на разни советници на премиерот во Владата, нивни сопружници – рече Филипче во интервју за емисијата „360 степени“ на МРТ1.

Дополнително, тој вели дека е свесен дека временскиот рок од 15 месеци е прекраток за луѓето целосно да ја вратат довербата во СДСМ, но оти тие на овие избори излегуваат со професионалци, чесни луѓе кои имаат кредибилитет и легитимитет да ја побараат довербата од граѓаните.

На прашањето каде очекува победа на неговата партија, Филипче вели дека тоа ќе го кажат граѓаните. Во врска со анализите на ВМРО-ДПМНЕ дека СДСМ ќе победи во најмногу 6 општини, лидерот на СДСМ изјави дека по 19 октомври, но и по вториот круг од локалните избори, ВМРО-ДПМНЕ ќе биде непријатно изненадена, затоа што „повеќе не можат да излажат толку голем број на граѓани“, како на парламентарните и претседателските избори лани.

– Ние ќе се бориме за да ги повратиме гласовите од времето кога поддршката на СДСМ беше огромна, со наши автентични политики и со искрен пристап, со отворен, инклузивен контакт со граѓаните. Така што, јас верувам дека тие политики ќе ги препознаат и секако дека се бориме за секој глас, на секој еден граѓанин – рече Филипче.

Тој вели дека нивниот слоган на кампањата значи дека ќе се борат за „нашиот дом“ и оти тоа претставува сублимат на сите историски политики, започнувајќи од АСНОМ, па сè до евроатлантските интеграции на Социјалдемократскиот сојуз на Македонија. Тоа е повеќеслојна порака дека борбата е за секоја куќа, уличка, населба, општина, вели лидерот на СДСМ.

– Мотивирачки е слоганот, одлично го прифатија нашите членови. Сметам дека добро допира пораката дека нашиот народ кој традиционално се борел секогаш кога некој сакал да му ја земе слободата, кога сакал да го замолкне, кога сакал да го ограби, а токму тоа се случува сега со оваа власт – рече тој.

Независно од исходот на локалните избори, Филипче планира да остане на позицијата претседател на СДСМ. Тој рече дека ја презел партијата во многу тешко време, по катастрофалниот пораз на парламентарните и претседателските избори и дека неговата визија ги надминува овие локални избори.

– Мојата визија е малку подолгорочна, во периодот после локалните избори вклучува сериозно окрупнување на сите опозициски партии. Мотивацијата е сè поголема, имајќи предвид дека сметам дека земјава сериозно заглавува – рече Филипче.

Прашан што доколку одредени структури во партијата го постават прашањето за негова доверба, тој вели дека структури што креираат такви потенцијални сценарија ќе има, има и сега, но и оти независно од финалниот резултат, тој планира да остане на позицијата.

Тој смета дека средствата наменети за општински проекти од унгарскиот кредит нема да направат разлика на претстојните локални избори.

– Ако прашувате за проектите коишто беа најавени преку унгарскиот кредит, тука има еден многу важен аспект, а тоа е дека многу мал процент од тие проекти коишто беа најавени се започнати. Едноставно, никој не знае каде отидоа една милијарда евра од унгарскиот кредит – рече тој.

На забелешката дека 500 милиони евра беа наменети за враќање на еврообврзница и дека тоа се случи, Филипче праша каде се преостанатите 250 милиони кои беа најавени за кредити за компаниите.

– Кога велам каде се парите, не се потрошени. Прво, беше многу индикативно тоа што се сменија повеќе процедури за Македонската банка за развој по првпат да може да зема пари од буџетот. Дотогаш не можеше. Обично земаше од меѓународни финансиски институции. Сега, наеднаш, зема од буџетот. Нашите информации се дека парите се веќе потрошени. И компании ни кажуваат – тврди Филипче.

Според лидерот на СДСМ, имаме слаба економија, граѓаните не може да врзат крај со крај, Владата води лоши економски политики, цените не се под контрола, има пад на странските инвестиции, а намален е и извозот, особено кон Германија.

На прашањето како тогаш расте БДП со над 3% неколку квартали наназад, лидерот на СДСМ тоа го поврза со градежните активности на автопатите.

– Тоа се должи само и исклучиво на градежните работи на автопатите – „Бехтел-Енка“, нашите договори коишто ги плукаа дека се криминални – рече Филипче.

The post ФИЛИПЧЕ НАЈАВУВА СЕРИОЗНО ОКРУПНУВАЊЕ НА ОПОЗИЦИЈАТА Нема да се повлече од лидер на СДСМ, каков и да е резултатот appeared first on plusinfo.mk.