Новата унгарска влада ќе ги отвори историските архиви на тајната полиција од комунистичкиот период, изјави Балинт Руф, кој ќе го води кабинетот на Петер Маѓар, кој се очекува да стане премиер на Унгарија на 9 мај.

Партијата од десниот центар Тиса победи на изборите на 12 април, поразувајќи ја Фидес на долгогодишниот лидер Виктор Орбан, меѓу другото со ветувања за враќање на Унгарија на проевропскиот пат, оживување на ослабената економија и деблокирање на милијарди евра средства од Европската Унија.

Руф, кој е адвокат и политички советник, изјави дека отворањето на архивите ќе биде негов „приоритет број еден“.

– Ова е задача за историчарите, но јас ќе обезбедам следната влада да создаде рамка за таа работа, односно да овозможи истражување без политички притисок – изјави тој.

За разлика од Полска или Чешка, Унгарија никогаш официјално не ги објавила имињата на соработниците на тајната полиција од комунистичкото време, иако дел од нив повремено се појавуваа во медиумите.

Поединци имаат пристап до сопствените досиеја, но не и до материјали за други лица, вклучително и за поранешните доушници.

Историчарот Криштијан Унгвари, силен поддржувач на целосна транспарентност, во 2023 година изјави дека, иако „минатото на јавните личности не е јавно, тие постојано ќе бидат изложени на уцени од оние што имаат пристап до тие информации“.

The post УНГАРИЈА ЌЕ ГИ ОТВОРИ АРХИВИТЕ НА ТАЈНАТА ПОЛИЦИЈА ОД ВРЕМЕТО НА КОМУНИЗМОТ Се најавува истрага без политички притисок appeared first on plusinfo.mk.