Унгарија ќе ја следи политиката што ја објави пред неколку дена американскиот претседател Доналд Трамп и ќе го означи левото, антифашистичко движење „Антифа“ за терористичка организација, изјави унгарскиот премиер Виктор Орбан.

„Антифа“, скратеница од „антифашист“, е општ термин за високо децентрализирана мрежа на автономни екстремно левичарски активистички групи кои се спротивставуваат на фашизмот, фашистите и на неонацистите, особено за време на демонстрациите. „Антифа“ е повеќе како идеологија отколку организација, иако некои од групите усвоија тактики што вклучуваат насилство.

Орбан, десничар и верен сојузник на Трамп, денеска на државното радио рече дека е „задоволен“ од одлуката на Трамп да ја означи Антифа како „голема терористичка организација“ во Соединетите Американски Држави.

– „Антифа“ е навистина терористичка организација. Во Унгарија е време да се класифицираат организации како „Антифа“ како терористички организации, следејќи го американскиот модел – рече Орбан.

Тој се осврна на инцидент од 2023 година во кој антифашистички активисти нападнаа неколку наводни учесници на годишен настан на крајната десница во Будимпешта. Меѓу осомничените беше и италијанската антифашистичка активистка и актуелна европратеничка Иларија Салис, која беше притворена во Унгарија повеќе од една година, што доведе до дипломатски спор меѓу Будимпешта и Рим околу нејзиниот третман зад решетки.

Салис беше ослободена во домашен притвор во мај 2024 година, пред да освои место во Европскиот Парламент, што ѝ даде правен имунитет. Унгарија продолжува да бара таа да биде вратена во земјата за да се соочи со судење, а унгарските обвинители бараат 11-годишна казна.

Орбан денеска изрази жалење за ослободувањето на Салис, велејќи дека антифашистите „дојдоа во Унгарија и тепаа мирни луѓе на улиците, од кои некои беа претепани речиси до смрт, а потоа станаа членови на Европскиот Парламент и оттаму ѝ држат предавања на Унгарија за владеењето на правото“.

The post И УНГАРИЈА ЌЕ ЈА ПРОГЛАСИ „АНТИФА“ ЗА ТЕРОРИСТИЧКА ОРГАНИЗАЦИЈА Виктор Орбан по стапките на Доналд Трамп appeared first on plusinfo.mk.