Рекол дека нема да шпекулира за датум кога Македонија ќе стане дел но дека – „ЕУ ќе преферира Македонија да ги стигне Црна Гора и Србија, кои веќе одамна преговараат со Унијата и ако има политичка волја во земјата, 2030 година е реална цел“! Дали нашиве политичари, кои со 2030 година го лажат народот, влијаеле и на него, не е јасно. Во секој случај, тој тера вода на нивната воденица, што е тешка шпекулација и уште пострашна измама. Се разбира, доколку спомнатиот не е – видовит. Без тоа, шансите Македонија да влезе во Унијата во следните барем 20 години, се рамни на – нула.

Прво, ако Брисел навистина „преферира“ Македонија да ги стигне Црна Гора, која преговара од средината на 2012, и Србија, која тоа го прави од почетокот на 2014, тоа е крајно некоректно кон овие две земји. Впрочем, ако е тоа навистина така, тогаш Васало не смеел јавно да го каже. Тоа мора да биде голема политичка тајна. Или, ни се додворувал?

Второ, јасно е дека Унијата нема да се проширува следните 10-тина години, а тоа веќе ја преминува 2030. Јавна тајна е дека Франција и Германија, двете локомотиви на Унијата, се против проширувањето бидејќи преку 60 проценти од нивните граѓани тоа не го прифаќаат. За таа цел беше измислена и новата процедура на преговорите за членство. Многу е тешко да се верува дека некој од кандидатите ќе ги задоволи новите критериуми. Македонија најмалку бидејќи Бугарија и Грција нема да го дозволат тоа, во никој случај.

Трето, човеков се дрзнува да ја критикува опозицијата која – „во еден момент ќе треба да преземе одговорност и да докаже дека е за евроинтеграција, како што тврди“! Ова е ем мешање во внатрешните работи, ем делење лекции. Меѓутоа, тоа не го измислил тој и е само мал дел од жестокиот притисок врз опозицијата да го свитка ’рбетот, да капитулира на национален план, и да прифати промена на Уставот. На 26/7/2022, уште подиректно, истото го соопштија комесарот Вархеи и шефот на Васало, Гир. Според мкд.мк, првиот порачал – „Опозицијата во Македонија да се отрезни, ги помина демократските црвени линии“!? Додека вториот, според Канал 5, не опоменал дека – „Македонија мора да ги внесе Бугарите во Уставот, како што бара Бугарија, инаку по скринингот ќе запре процесот“!? Тој нагласува дека самите сме ја презеле обврската за Уставот ама, се разбира, не кажува дека тоа беше ултиматум на неговите од Брисел.

Четврто, и клучно, неспорен факт е дека Брисел ја уцени Македонија со вклучување на неколку стотици измислени Бугари во Уставот. Како и Васало, и тамошните лидери не се сетија на положбата на барем стотина илјади Македонци во Бугарија, кои не уживаат никакви малцински права. Барем, мораа да се прашаат зошто не се спроведуваат пресудите на Европскиот суд за човекови права? Место тоа, некојси Гир и Васало, сега ни држат лекции дека, со Бугарија, сами сме се обврзале за промена на Уставот и, демек, од нас зависел напредокот кон Брисел!? Васало дури се осмелил да оцени дека – „со внесувањето на Бугарите во Уставот, нема ништо фундаментално да се промени“. Оваа површност може и да му се прости бидејќи суштината на бугарските аспирации кон Македонија и не мора да му биде до крај јасна. Тие не сакаат да бидат малцинство туку конститутивен народ во Уставот. Со оглед дека сега и Брисел е сериозно ангажиран во затворањето на „Македонското прашање“, кога Македонците ќе мораат да ги прифатат „бугарските корени“, ако сакаат во ЕУ, тогаш државата автоматски станува втора бугарска. Васало нека си ја заработува платата, ама со усул. Македонците не се слепи иако нивните „генијални водачи“ не ги оспориле бугарските фантазмагории, и затоа се тие сега и бриселски.

Петто, или Васало се правел недоветен, или новинарите така ги третирал. Им рекол – „Знаеме дека Македонија и Бугарија дискутираат меѓу себе за историјата. ЕУ не се занимава со историја. Ние ја оставаме историјата зад себе и одиме напред. Во ЕУ сакаме да гледаме напред а не да гледаме на работите од минатото“!? Зарем не му кажале дека токму Брисел, преку Берлин и Париз, не присили да ги прифатиме бугарските историски и нецивилизациски синдроми во преговарачката рамка?

Сепак, да го потсетиме. Во точка 5 од преговарачката рамка стои дека (главен?) критериум за Македонија ќе биде – „посветеноста за добрососедски односи …, вклучително и преку постигнување на видливи резултати и спроведување на билатералните договори во добра волја, вклучително … и Договорот за добрососедски односи со Бугарија од 2017 година, КАКО И ГОДИШНИТЕ ПРЕГЛЕДИ И МЕРКИ ЗА НЕГОВО ЕФЕКТИВНО СПРОВЕДУВАЊЕ според член 12“ … Васало мора да знае дека „годишните прегледи“ се однесуваат исклучиво на реализацијата на бугарските историски будалштини во однос на Македонија. Се мисли на резултатите на заедничката историска комисија. Мора да му е познато дека Софија ултимативно ни наметнува дека историјата ни е заедничка, односно бугарска. Со уцени и блокади, Софија сака да докаже дека ние сме – Бугари, а Брисел тоа го става како критериум во преговарачката рамка и бара „ЕФЕКТИВНО СПРОВЕДУВАЊЕ“. И, сега, како тоа ЕУ не се занимавала со историја? Всушност, Васало нека ги прочита членовите 2, 3 и 4 од заклучоците на Советот, и ќе види дека со нив се велича протоколот од втората меѓувладина комисија со Бугарија, со којшто прифативме и заедничка историја, и понижувачка промена на Уставот, и …

Како изгледа, никој од новинарите не го прашал – а, зошто за Македонија не важат Копенхашките критериуми, туку важат некакви бугарски фантазмагории?

На крај, мора да се признае дека заменик – шефот на Делегацијата е во право кога кажува дека Македонија има слаб капацитет на апсорпција на фондовите доделени од Унијата, што е крајно сериозна критика на Владата. Ние сме сиромашна држава, а кога некој ни дава пари, не сме способни да ги искористиме! Јасно е до каде сме, нели? И еден друг важен факт ни соопшти Васало: нашето законодавство е само 27 отсто хармонизирано со тоа на Унијата. Исклучително талентираниот Маричиќ, пак, кој забранува да го користиме терминот „македонски/а/о“, не уверува дека правото ни е со околу 50 проценти сообразено со Унијата, иако еднаш спомна и 40. Разликата е сепак огромна.

The post Кого лаже Џулијан Васало? appeared first on plusinfo.mk.

Во транспарентна кутија на плоштадот во Скопје, маскирано лице симболично уништува лажни банкноти, симболизирајќи ја корупцијата, преку која државата и нејзините граѓани секојдневно губат огромни суми пари, а граѓаните преку притискање на копчето СВИРИ КРАЈ! можат да го запрат процесот на уништување на нивните пари.

На настанот кој е дел од едукативната и информативна кампања на Регионалната антикорупциска иницијатива (РАИ), се обрати заменик шефот на Делегацијата на Европската Унија во земјава, Џулијан Васало, кој рече дека настанот ги прикажува разорните ефекти на корупцијата во сите нејзини форми.

– Борбата со корупцијата претставува предизвик, не само за Северна Македонија и Западен Балкан, таа и натаму е предизвик за земјите членки на Европската Унија. И покрај нашиот напредок, мораме да се погрижиме да го заштитиме и обезбедиме тој напредок со цел да не се соочиме со уназадување во ова поле. Потребни се напори и заложби, но, исто така, потребно е и добро законодавство и негово спроведување. Заложбите и напорите треба да дојдат и од јавните институции и од приватниот сектор и од граѓаните – истакна Васало.

Тој рече дека настанот е за граѓаните кои ѝ ставаат крај на корупцијата и оти укажувачите коишто дејствуваат во насока на заштита на јавниот интерес претставуваат пример за идеални граѓани.

– Тие се оние што не премолчуваат кога ќе забележат дека околу нив се случува нешто погрешно и кои се стремат да ја исправат таа состојба дури и кога тоа е ризично по нивната безбедност, а сепак знаеме дека укажувачите често пати се соочуваат со индиферентност, непријателски, дури и одмазда. Наместо да се сметаат за одговорни граѓани, тие се обележуваат како предавници на своите колеги, на организациите па дури и на владите и на земјите – посочи Васало.

Тој додаде дека таквата култура несомнено мора да се промени бидејќи укажувањето претставува уште еден од најделотворните начини за борба против корупцијата, а укажувачите можат да се охрабрат да пријават само ако навистина им веруваат на институциите кои ги примаат нивните поплаки и пријави.

Анета Арнаудовска, виш советник за борба против корупцијата во Секретаријатот на Регионалната антикорупциска иницијатива (РАИ) истакна дека борбата против корупцијата започнува од поединецот, од секој од нас лично.

– Ги покануваме нашите сограѓани и сограѓанки со притискање на копчето „СВИРИ КРАЈ!“ симболично да ја запрат корупцијата и уништувањето на нивните пари. Така ќе покажеме колку пари можеме да спасиме од уништување, доколку одбиеме да учествуваме во корупцијата. Дополнително, така испраќаме и порака за поддршка на „укажувачите“ – лицата кои со пријавување на корупцијата донесуваат храбра и несебична одлука, ставајќи се себеси во служба на јавниот интерес – рече Арнаудовска.

Софка Пејовска Дојчиновска, член на Државната комисија за спречување на корупцијата смета дека секој  може да придонесе во борбата против корупцијата.

– За да охрабриме што повеќе поединци да одбијат да учествуваат во корупција и активно да се вклучат во борбата против корупцијата, неопходна е и институционална поддршка. Секој кој сака да поднесе иницијатива за можна корупција, а особено укажувачите, мора да имаат поддршка и заштита од институциите – посочи таа.

Кампањата „СВИРИ КРАЈ!“ ја спроведува Регионалната антикорупциска иницијатива во рамки на проектот „Прекини ја тишината: Зајакнување на политиките и културата на пријавување на корупцијата од страна на „укажувачите“ во земјите на Западен Балкан и Молдавија“, финансиски поддржан од Европската Унија.

Регионалната антикорупциска иницијатива е меѓународна организација што обединува 9 земји од регионот околу заедничка цел – борба против корупцијата. Во рамките на овој проект, РАИ се фокусира на зајакнување на законодавната и институционалната заштита на укажувачите во земјите од регионот, во согласност со Директивата на ЕУ за нивна заштита, која стапи во сила во 2019 година.

The post Симболично се уништуваа банкноти, а граѓаните ѝ отсвирија крај на корупцијата appeared first on plusinfo.mk.