Јавноста повторно беше сведок на уште еден обид на СДСМ преку политички конструкции, заплашувања и веќе препознатливата драматургија да ја дефокусира дебатата од суштината, од реформи во изборниот систем и надминување на модел кој одамна ја има изгубено својата првична цел, пишува Движењето ЗНАМ во соопштение.

„Тврдењето дека укинувањето на таканаречената Пржинска влада претставува „автократски манир“ е не само неточно, туку и политички лицемерно. Законот за техничка влада беше донесен во специфични околности, во време на длабока политичка криза, објавување на незаконски стекнати материјали и постоење на специјално обвинителство. Тој закон ја заврши својата улога. Денес, државата не смее да остане заложник на привремени решенија кои се претвораат во трајни алатки за политичко условување.

Новото законско решение не ја укинува контролата, туку напротив, предвидува јасен транзициски период, со можност техничка влада да постои за следните парламентарни избори. Ова е компромисно и одговорно решение, кое ги зема во предвид сите политички чинители, вклучително и СДСМ, чии предлози во најголем дел се вградени во текстот на законот.

Особено симптоматично е што лидерот на СДСМ одби да присуствува на лидерската средба каде токму овие прашања требаше отворено да се дискутираат. Наместо аргументи на маса, гледаме политички настапи пред камери и однапред подготвени изговори.

Дополнително, јавноста со право се прашува: нели СДСМ тврдеше дека е подготвен за нови избори? Ако тоа е така, зошто тогаш ваква нервоза, ваква реторика и обиди за блокада? Ако има доверба во граѓаните, тогаш нема потреба од панични реакции и инсистирање на механизми кои одамна требаше да останат во минатото.

Затоа, денешната реторика на СДСМ е контрадикторна сама по себе. Истата таа партија ги призна сите изборни резултати во изминатиот период, вклучително и локалните избори, без суштински забелешки за нивната регуларност. Како тогаш одеднаш техничката влада станува „единствен гарант“ за фер избори?

Заканата дека ќе се повлечат од работата на изборниот закон не е ништо друго освен политички притисок и обид за блокада. Демократијата не се гради со уцени, туку со учество и аргументи.

Движењето ЗНАМ смета дека на Македонија и се потребни стабилни институции, а не ад-хок политички конструкции од минатото. Наместо да бега од реформи, СДСМ треба да покаже политичка зрелост и да придонесе кон создавање современ изборен систем кој ќе гарантира доверба кај граѓаните, без разлика кој е на власт.

Државничкиот пристап подразбира одговорност, а не закани. Македонија одамна заслужува да излезе од сенката на кризното управување и да зачекори кон нормално институционално функционирање“ – се вели во соопштението на Центарот за комуникации и аналитика на ЗНАМ.

The post ТЕХНИЧКАТА ВЛАДА ЈА ЗАВРШИ СВОЈАТА УЛОГА, НЕ СМЕЕ ДА ОСТАНЕМЕ НЕЈЗИН ТРАЕН ЗАЛОЖНИК Блокадите на СДСМ се лицемерни, оценува ЗНАМ appeared first on plusinfo.mk.

СДСМ преку ноќ го менува ставот за техничката влада од крајност во крајност – од изјави во минатото дека треба да се укинување до нејзина силна одбрана денес, изјави пратеникот од редовите на ВМРО-ДПМНЕ Бојан Стојаноски во гостување на ТВ 24.

Пратеникот Стојаноски нагласи дека техничката влада е нефункционална, го нарушува имиџот на државата и претставува финансиски товар. Според него, ваквиот модел не постои во европските демократии и не придонесува за ефикасност на институциите.

– Кога зборуваме за консензуално донесен закон јас навистина сум збунет, е сега со кој СДСМ ние зборуваме? Затоа што, политичките актери во СДСМ и тогаш и сега беа исти. Дали со оние кои, кога беа на власт велеа дека техничката влада треба да се укине како ентитет? Има такви изјави безброј, од поранешниот претседател Ковачевски па и Зоран Заев па и тогашните министри кои што се сега пратеници. Или зборуваме сега со некој друг СДСМ кој што, ете преку ноќ, смета дека оваа влада не треба да постои? Тоа е едното прашање. Ние од кога бевме опозиција баравме таа влада да престане да постои, заради тоа што, прво, не е функционална, второ, апсолутно го нарушува имиџот на државата заради тоа што во Европа не пости друга влада и трето, чини многу пари – рече Стојаноски.

Стојаноски во емисијата упати критики кон СДСМ поради нивната неконзистентност и недоволна ангажираност во комисиската расправа за Законот за укинување на техничка влада, потенцирајќи дека и покрај јавните настапи и изјавите не поднеле ниту еден амандман.

– Не е во ред вие да имате прес-конференција во Собранието, неколку дена да ја актуелизирате темата во јавноста, а на крај да дојдете на Комисијата за политички систем со нула амандмани. Ама, СДСМ вели дека ова е рушење на систем, дека се нарушува принципот на консензуалност, дека ќе го напуштат Собранието, а на комисиската расправа вие да немате ниту еден амандман тогаш тоа укажува на нешто. Тоа, знаете на што е еднакво, исто како оној балон пуштен во јавноста со црвените линии, којшто никогаш и не дојде на Собранието. Така да, не е исклучена таа можност да се најави нешто бомбастично, а потоа од реализацијата да отсуствува комплетно – рече Стојаноски.

The post СДСМ КОМПЛЕТНО ГО СМЕНИЛ СТАВОТ ЗА ТЕХНИЧКАТА ВЛАДА Некогаш бараше нејзино укинување, сега ја брани appeared first on plusinfo.mk.

Техничката влада е резултат на политички договори и не треба повеќе да постои, бидејќи ја нарушува демократијата, вели Миле Лефков, пратеник од ВМРО-ДПМНЕ.

Според него,  власта треба да произлегува директно од волјата на граѓаните, а не од политички договори.

– Предлогот за измени и дополнување за Законот за влада, со којшто се врши соугласување со дел од новиот Закон за организација на државната управа и најважното, се укинува она што се нарекува пржинска влада или техничка влада, кое што беше договорено и е дел на политички договор, влезе денеска во Собрание – рече Лефков во гостување на Алфа.

Лефков кажа дека потребно е да се стави крај на политичките пазари и преговори.

– Таканаречената пржинска влада е дел на политички договор, а политиката редно време е да ѝ користи на државата и државните инсититуции, а не да биде обратно. Волјата на граѓаните преку Собранието се рефелктира во Владата и таа влада е одговорна и кон граѓаните и одговорна за своите постаки – рече Лефков.

Според него, оваа техничка влада е дивоградба во самиот систем, каде политички преговори или ставови на политички партии и меѓусебни договори овозможуваат некој да заземе место и на овој начин се искривуваат  демократијата и демократските процеси.

– Гледаме сега и во јавноста и во медиумите, дека опозицијата, односно СДСМ се противи, се спротиставува лицемерно на ова решение, иако гласаа за потребата за овој предлог закон во Собрание. Зошто е непотребната драма не знаеме, меѓутоа гледаме дека навистина им е тешко да се разделат со пржинската влада, иако немаат никаков основ. Со овој предлог за изменување на Законот за влада се предвидува техничката влада да функционира и за следните парламентарни избори, без разлика дали се редовни или предвремени – рече тој.

Лефков смета дека време е политиката да застане во улога на институциите и во улога на државата.

– Постомонитогрингот за Македонија се укина, со што практично е признаена Македонија како држава со стабилни институции и со стабилна демократија и навистина е бесмислено да имаме еден ваков закон во кој политката се става над демократијата. Нивните ставови во овој момент се во насока на рушење или спротивствавувње на основните принципи на демократијата. Самото градење на ваква техничка влада значи дека некој којшто не е избран од народот, не го претставува народот, не доаѓа од народот, ќе седне во одредено министерско столче и тој ќе може да гради одредени политики – вели пратеникот Лефков.

The post ТЕХНИЧКАТА ВЛАДА Е ДИВОГРАДБА ВО СИСТЕМОТ Власта мора да произлегува директно од волјата на граѓаните appeared first on plusinfo.mk.

Измените на Законот за Влада, со кои се предвидува укинување на техничката, односно т.н. пржинска влада, се наоѓаат во завршна фаза, рече министерот за јавна администрација, Горан Минчев, во гостување на Сител телевизија.

Министерот истакна дека процесот се водел транспарентно и инклузивно, со активно вклучување и на опозициските политички партии.

– На лидерската средба ова прашање беше отворено како една од главните теми. Иако постоеја различни ставови, ние постапката ја водевме максимално транспарентно, со можност и опозицијата да учествува во креирањето на законското решение – рече Минчев.

Тој појасни дека нацрт-верзијата на законот била доставена до сите координатори на пратеничките групи во Собранието, со рок за доставување забелешки и сугестии, од кои дел биле прифатени.

– Прифатени се забелешките на опозицијата, односно барањата на СДСМ, дополнителните министри да бидат распределени во ресорите кои тие ги предлагаа – нагласи министерот.

Како компромисно решение, прифатено е техничката влада да важи уште за следните парламентарни избори, без разлика дали тие ќе бидат редовни или вонредни, а потоа целосно да се укине.

Министерот потенцираше дека предлог-законот ќе биде доставен од Министерството за јавна администрација до Владата, по што ќе следи собраниска расправа.

– Овој закон се носи со 61 пратеник и без Бадентерово мнозинство. Сметаме дека 100-те дена техничка влада сериозно го кочат интензитетот на реформите. Пржинската влада беше воведена во 2016 година за обезбедување фер и демократски избори, а по повеќе изборни циклуси со позитивни оценки, сметаме дека го исполни својот мандат и треба да остане во минатото – заклучи Минчев.

The post Ѝ СЕ ГЛЕДА КРАЈОТ НА ПРЖИНСКАТА ВЛАДА Ќе важи уште за следните парламентарни избори appeared first on plusinfo.mk.

На иницијатива на премиерот и претседател на ВМРО-ДПМНЕ, Христијан Мицкоски, денеска во Клубот на пратениците треба да се одржи лидерска средба на претседателите на парламентарните партии кои имаат пратенички групи во Собранието, на која, како што е најавено, ќе се разговара за реформските закони од правосудството, за изборот на народен правобранител, за Изборниот законик и за укинување на техничката влада, но и за други прашања на предлог на учесниците на средбата.

Од опозициските пратенички групи, потврда за учество има од лидерите на Левица и на ДУИ, Димитар Апасиев и Али Ахмети, додека претседателот на СДСМ, Венко Филипче, го одби повикот на Мицкоски за консензус за клучните прашања за државата.

Од коалициските партнери во Владата на средбата се очекуваат претседателот на ЗНАМ и градоначалник на Куманово, Максим Димитриевски, а од коалицијата Вреди, градоначалникот на Тетово, Биљал Касами.

– Ние ја прифативме поканата и одлучивме да одиме налидерската средба. Таму ќе присуствуваме јас како координатор и Биљал Касами како еден од лидерите на Вреди. Во поканата нема конкретни прашања – рече вчера координаторот на пратеничката група на Вреди, Беким Ќоку.

Во врска со т.н. пржинската влада, тој нагласи дека не ѝ прилега на една земја што преговара за влез во ЕУ да има техничка влада, како и дека Македнија на локалните избори докажала дека и без техничка влада може да организираат фер и демократски избори.

Движењето ЗНАМ – За наша Македонија ја поздрави иницијативата на претседателот на Владата за лидерска средба оценувајќи ја како можност сите релевантни политички фактори да покажат одговорност кон државата и граѓаните, а одбивањето дијалог на СДСМ го оцени признание за слабост.

ДУИ одлуката за учество на Ахмети ја донесе синоќа на состанок на Генералниот совет на партијата во Мала Речица. Портпаролката на ДУИ, Арта Биљали Зендели изјави дека одлуката е донесена едногласно од членовите на Генералниот совет, но не прецизира кои ќе бидат барањата на партијата на средбата на лидерите, посочувајќи оти „тоа е ексклузивно право на Ахмети“.

Левицата најави дека прифаќа да се укине техничката влада, но само ако се воведе една изборна единица.

– Како парламентарна партија, која една и пол година се обидува да воспостави комуникација со парламентарното мнозинство преку предлагање закони, преку консензус за некои државни прашања, сметаме дека сега е времето да влеземе во конструктивен дијалог – изјави Мециновиќ.

Лидерската средба ја поздравија и ЛДП и ДОМ. ЛДП преку соопштение изрази подготвеност да присуствуваат на најавената лидерска средба, но не само за укинување или задржување на техничката влада како „изолирана и празна тема“, туку заради одговори на клучните прашања, кои директно го засегаат животот на граѓаните.

Од ДОМ ја поздравија можноста за дијалог за суштински политички консултации за важни реформски закони и процеси, кои треба да ја зајакнат демократијата и повикаа да се разговара и за една изборна единица и отворени листи без изборен праг.

Премиерот Христијан Мицкоски во празничното интервју на 7 јануари најави дека ќе упати покани до политичките партии за лидерска средба, која би се одржала пред неговото заминување на Светскиот економски форум во Давос. Теми на средбата би биле консензус за реформските закони и укинување на техничката влада. За клучните прашања за државата, Мицкоски рече дека очекува консензус од лидерствата на сите парламентарни коалиции, како и дека дневниот ред може да биде проширен и дополнет од страна на другите.

– Да разговараме за изборот на народен правобранител. Да покажеме зрелост дека како политичари и како држава разговараме отворено на сите тие теми во врска со нашата цел – ЕУ и за законите што треба да се донесат. Ајде да седнеме и да разговараме. Јас не би сакал да влегувам во укинување на техничката влада без консензус затоа што тоа е политички некултурно, а ваков тип на измени во политичкиот систем треба да се носат со консензус. Ако велиме дека техничката влада е некаков имплант, ако велиме дека техничката влада можеби има проблеми и со уставноста, го кочи системот, не му дава доволно простор за маневар, ајде да ги направиме и тие измени – повика премиерот Мицкоски.

Откога Филипче го одби, премиерот Мицкоски рече дека мислел оти ќе се покаже зрелост и широчина.

– Тема на лидерската средба не е само Законот за владата. Ако ние се однесуваме неодговорно, како што се однесува тој, нам не ни е потребна лидерска средба, ние со 61 глас може да ја избришеме техничката влада, не ни е потребно мислењето на опозицијата. Но, сакавме процесот да биде инклузивен. Сакавме да поразговараме и за Изборниот законик, Законот за Јавното обвинителство, Законот за јавнообвинителската и судската служба, Законот за Советот на јавните обвинители – рече Мицкоски.

Лидерот на опозициската СДСМ, Венко Филипче, на прес-конференција на 8 јануари го одби повикот за лидерска средба за укинување на техничката влада, обвинувајќи дека Мицкоски „бара алиби за распишување предвремени избори“.

Според Филипче, техничката влада мора да остане затоа што била гарант за фер избори и контролен механизам за да се спречи злупотреба на институциите. За реформската агенда, пак, рече дека дискусијата за законите ќе се води во парламентот каде што СДСМ ќе ги поддржи сите. Додаде и дека СДСМ во секој случај ќе учествува на парламентарни избори, ако бидат распишани.

The post СИТЕ НА ЛИДЕРСКА СРЕДБА, СДСМ БОЈКОТИРА Ќе се разговара за реформските закони и за укинување на техничката влада appeared first on plusinfo.mk.

Премиерот Христијан Мицкоски утре во Клубот на пратениците ќе одржи лидерска средба со претседателите на парламентарните партии кои имаат пратенички групи во Собранието, на која ќе се разговара за реформските закони од правосудството, за изборот на народен правобранител, за Изборниот законик и за укинување на техничката влада. Освен за овие теми, како што најави премиерот, може да се разговара и за други прашања на предлог на учесниците на средбата.

Од коалициските партнери во Владата на средбата се очекуваат претседателот на ЗНАМ и градоначалник на Куманово, Максим Димитриевски, а од албанскиот партнер Вреди, градоначалникот на Тетово, Биљал Касами и координаторот на пратеничката група Беким Ќоку.

Од трите опозициски пратенички групи, засега има потврда за учество само од Левица и се очекува оваа партија да ја претставува нејзиниот претседател Димитар Апасиев.

ДУИ денеска попладне на седница на Генералниот совет на партијата ќе донесе одлука дали нејзиниот лидер Али Ахмети ќе дојде на состанокот. Вчера партијата одржа седница на Претседателството на Генералниот совет, свикана од Ахмети, на која се дискутирало за актуелните политички теми и за прашања за внатрепартиската организација.

Претседателот на СДСМ Венко Филипче, пак, веднаш по најавата од Мицкоски одби да учествува и дури ги повика и останатите опозициски партии да не учествуваат.

Филипче, кој претходно бараше лидерска средба за клучни теми и предлагаше да се укине техничката влада, ја одби поканата од Мицкоски со образложение дека немал намера да седи „со криминалци на маса“. За техничката влада рече дека немало да дозволи таа да се укине, затоа што била гарант за фер избори, како и дека ќе овозможи да нема злоупотреби на системот „Сејф сити“ за следење на опозицијата во предизборните периоди. За реформската агенда, пак, рече дека дискусијата за законите ќе се води во парламентот каде што СДСМ ќе ги поддржи сите. Додаде и дека ако сепак се укине техничката влада, СДСМ во секој случај ќе учествува на парламентарни избори.

• ФИЛИПЧЕ НЕМА ДА ОДИ НА ЛИДЕРСКА СРЕДБА СО МИЦКОСКИ Техничката влада мора да остане

Од Владата велат дека добиле известување од СДСМ дека нема да учествува на состанокот.

Пратеникот на Левица, Амар Мециновиќ, вчера на прес-конференција во Собранието рече дека сега е моментот да се влезе во конструктивен дијалог за клучните прашања. Додаде дека како партија една и пол година се обидуваат да влезат во комуникација со владиното мнозинство преку предлагање закони и барање консензус за клучни државни прашања.

– Сметаме дека сега е време да влеземе во конструктивен дијалог, за да можеме да го обремениме овој процес со позитивни насоки, затоа што за нас најважно е да се создаде демократска атмосфера за време на избори и нашите барања ќе бидат во таа насока – рече Мециновиќ.

Левица најави дека прифаќа да се укине техничката влада, но, само ако се воведе една изборна единица и се обезбеди еднаков пристап до медиумското претставување во предизборниот период за сите политички субјекти.

Премиерот Мицкоски неодамна рече дека од лидерите очекува консензус за клучните прашања за државата.

– Да разговараме за изборот на народен правобранител. Да покажеме зрелост дека како политичари и како држава разговараме отворено на сите тие теми во врска со нашата цел, ЕУ, и за законите што треба да се донесат. Ајде да седнеме и да разговараме. Јас не би сакал да влегувам во укинување на техничката влада без консензус, затоа што тоа е политички некултурно, а ваков тип на измени во политичкиот систем треба да се носат со консензус. Ако велиме дека техничката влада е некаков имплант, ако велиме дека техничката влада можеби има проблеми и со уставноста, го кочи системот, не му дава доволно простор за маневар, ајде да ги направиме и тие измени – повика премиерот Мицкоски.

Откако Филипче го одби премиерот Мицкоски рече дека мислел дека ќе се покаже зрелост и широчина.

– Тема на лидерската средба е само Законот за влада. Ако ние се однесуваме неодговорно како што се однесува тој, нам не ни е потребна лидерска средба, ние со 61 глас може да ја избришеме техничката влада, не ни е потребно мислењето на опозицијата. Но, сакавме процесот да биде инклузивен. Сакавме да поразговараме и за Изборниот законик, Законот за Јавното обвинителство, Законот за јавнообвинителска и судска служба, Законот за Советот на јавни обвинители – рече Мицкоски.

Се очекува на лидерската средба да се дискутира и за законите за кои е потребно бадентерово мнозинство кои се заглавени во Собранието затоа што ДУИ не ги поддржува, особено за измените на Законот за прекршоците, од кои зависи дали од 1 февруари ќе профункционира казнувањето преку СМС и мејл на возачите чии прекршоци се регистрирани од камерите на „Сејф сити“.

САМИ МОЖЕМЕ ДА ЈА УКИНЕМЕ ТЕХНИЧКАТА ВЛАДА, НО САКАМЕ ИНКЛУЗИВЕН ПРОЦЕС До скоро СДСМ бараше лидерска средба, а сега Филипче ја одбива

The post ФИЛИПЧЕ СЕ САМОИЗОЛИРА, ЛИДЕРИТЕ ЌЕ ОДЛУЧУВААТ ЗА КЛУЧНИ ПРАШАЊА Мицкоски бара поддршка за укинување на техничката влада и за реформите во правосудството appeared first on plusinfo.mk.

Претседателот на Собранието, Африм Гаши се согласува дека е потребно да се укине техничката влада, која се формира пред парламентарните избори, а во која како министри и заменици министри учествуваат лица предложени од опозицијата.

На денешниот редовен брифинг со новинарите Гаши го изнесе својот личен став дека на државата повеќе не ѝ е потребна т.н. пржинска влада, која беше воведена во 2016 година, како и дека тоа е неугледно за една земја членка на НАТО.

– Мој личен став е дека техничката влада беше едно ад-хок решение наменето за решавање на тогашната политичка криза. Се смени законот само за таа криза. Како на земја членка на НАТО, со стабилна влада, не е угледно  да формираме техничка влада, дотолку повеќе што гледаме дека во последните изборни циклуси изборите течат непречено, без забелешки. Еве, вчера завршија локалните избори, сите си честитаа, во две општини победија опозициски партии, немаше проблеми на изборите, немаше притисок. Нема зошто и натаму да влегуваме во  такви процеси. Не велам дека сме созреале до степен на скандинавска демократија, ама не сме ниту ризична земја во делот на демократијата и организирањето избори. Сметам дека многу сме напреднале во тој дел – вели Гаши.

Премиерот Христијан Мицкоски во среда ќе одржи лидерска средба со претседателите на парламентарните политички партии, на кои една од темите е измени на Законот за владата, со кои ќе се укине техничката влада.

Претседателот на Собранието Гаши изнесе личен став и за барањата на опозицијата за предвремени избори.

– Јас сум поборник на идејата за редовни избори, за носење закони во редовна постапка. Со предвремени избори креираме политичка и економска нестабилност. Треба да настојуваме да ги завршуваме мандатите до крај и граѓаните на избори да ценат колку власта исполнила од тоа што го ветила со програмата. Вака, на половина мандат власта може да рече дека немала доволно време да ги реализира ветувањата. Јас сум за редовни избори, но, за тоа одлучува мнозинство од 61 пратеник. Политичката волја на пратениците е таа што одлучува кога би оделе на избори – вели Гаши.

Синоќа, по победата на дополнителните локални избори на кандидатите на опозициската коалиција Национална алијанса за интеграција во општините Гостивар и Врапчиште, претседателот на едното крило од Алијанса за Албанците, Арбен Таравари, рече дека очекува предвремени парламентарни избори во мај или во октомври.

The post НЕ Е УГЛЕДНО ЧЛЕНКА НА НАТО ДА ФОРМИРА ТЕХНИЧКА ВЛАДА ПРЕД ИЗБОРИ Гаши не е за предвремени парламентарни, мандатите треба да се истераат до крај appeared first on plusinfo.mk.

Премиерот Христијан Мицкоски  утре ќе ги покани политичките партии за лидерска средба, која би се одржала во наредните 7 до 10 дена, пред неговото заминување на Светскиот економски форум во Давос. Теми на средбата би биле консензус за реформските закони и за укинување на техничката влада.

Премиерот очекува сите лидери на парламентарните коалиции да ја прифатат поканата за лидерска средба. Дневниот ред, како што вели, може да биде проширен и дополнет од страна на другите.

За клучните прашања за државата, Мицкоски очекува консензус од лидерствата на сите парламентарни коалиции.

– За правобранителот да разговараме. Да покажеме зрелост дека како политичари и како држава, можеме ете кога е предизвикот, посебно целта пред нас, а тоа е Европската Унија да разговараме отворено на сите тие теми, за кои  немаме дијаметрално различни ставови. Нели велиме сите сме за таму, законите имаат позитивно мислење од Венецијанската комисија, имаат позитивно мислење од Канцеларијата на Европската комисија. Ајде да седнеме и да разговараме – рече Мицкоски во гостување на телевизија Алфа.

Во врска со техничката влада, премиерот Мицкоски вели дека пред минатите избори и СДСМ рече дека таа пред избори повеќе не е потребна. Вели, за разлика од претходно, оваа Влада покажува една широчина, која што е потребна особено во период кога се говори за суштински реформи, реформи на политичкиот систем, но и за оние закони коишто се дел од реформската агенда за пристапување кон ЕУ. Потенцира дека за дел од нив е потребен консензус.

– Пред овие избори раководството на СДСМ велеше дека тие се за бришење на техничката влада, да видиме дали стојат на тој став. Јас не би сакал да влегувам во такви измени, иако таму нема дополнителни услови, нема бадентер, но, не би сакал да влегувам во таков процес без да имаме консензус, затоа што мислам дека е тоа политички некултурно, затоа што мислам дека таков тип на измени во политичкиот систем треба да се носат со консензус. Ако велиме дека техничката влада е некаков имплант, ако велиме дека техничката влада можеби има проблеми и со уставноста, го кочи системот, не му дава доволно простор за маневар, ајде да ги направиме и тие измени – порача Мицкоски.

The post МИЦКОСКИ ЌЕ ПОБАРА ДА СЕ УКИНЕ ТЕХНИЧКАТА ВЛАДА ПРЕД ИЗБОРИ Премиерот ќе свика лидерска средба за да се постигне консензус за клучни теми appeared first on plusinfo.mk.