Владата денеска го усвои Предлог-законот за заштита од употреба на производи од тутун или сродни производи, соопшти Министерството за здравство.

„Ова е важен чекор за јавното здравје и за создавање поздрав, побезбеден и поодговорен јавен простор. Законот е резултат на широк институционален процес, разговори со засегнатите страни, консултации со тутунската индустрија, угостителскиот сектор, надлежните институции, инспекциските органи, експертската јавност и поддршка од Светската здравствена организација“, објави Министерството за здравство на Фејсбук.

Премиерот Христијан Мицкоски на завршниот состанок со претставниците од тутунската индустрија и угостителскиот сектор пред неколку дена, изјави дека очекува по усвојувањето од Владата, предлог-законот во најбрз можен рок да помине и во Собранието. Како што најави, законот ќе стапи во сила веднаш, освен одредбата согласно која угостителите треба да ги преадаптираат и пренаменат терасите на своите локали, за што им е даден рок од една година.

Мицкоски нагласи дека предложениот текст е компромисно решение, изготвено низ инклузивен процес, со консултации на сите засегнати страни – здруженијата, производителите, дистрибутерите, хотелиерите, луѓето кои имаат свои ресторани, ноќни клубови…

И претставниците на бизнис-секторот потврдија дека законот се креираше со партнерски пристап и искажаа благодарност за разбирањето од страна на Владата, која им даде 12 месеци за соодветно да ги преуредат терасите, на кои пушењето ќе биде дозволено ако се отворени од најмалку две страни.

Премиерот Мицкоски и министерот за здравство Азир Алиу порачаа дека очекуваат доследна примена на законот и нагласија дека ќе има строги контроли и ќе нема да има повластени.

The post ВЛАДАТА ГО УСВОИ ЗАКОНОТ ЗА ЗАШТИТА ОД ПУШЕЊЕТО Се очекува во најкраток рок да биде изгласан во Собранието appeared first on plusinfo.mk.

Во првото тримесечје од 2026 година имало 10.247 слободни работни места. Најмногу работници биле барани во услужните дејности и трговијата, покажуваат податоците на Државниот завод за статистика.

Стапката на слободни работни места во првото тримесечје од 2026 година изнесува 2,07%, а најголем број слободни работни места, 2.346, има во услужните дејности и трговијата.

Вардарскиот Регион има највисока стапка на слободни работни места од 2,28%.

Највисока стапка на слободни работни места од 4,94% има во секторот „сместување и послужување храна“, додека најмала е стапката во секторот „снабдување со електрична енергија, гас, пареа и климатизација“, во кој изнесува 0,15 %.

Деловните субјекти со 10 до 49 вработени имаат највисока стапка на слободни работни места од 3,05 %.

Државниот завод за статистика информира и дека почнувајќи од првото тримесечје од 2026 година, согласно со регулативите на ЕУ и препораките на Евростат, податоците за слободните работни места се објавуваат според новата Национална класификација на дејностите (НКД), рев. 2.1. наместо според НКД, рев. 2.

The post ВО АПРИЛ ИМАЛО 10.247 СЛОБОДНИ РАБОТНИ МЕСТА Хотелите пред сезоната барале повеќе од 1.000 работници appeared first on plusinfo.mk.

Предлог-законот за заштита од употреба на производи од тутун или сродни производи во вторник треба да се разгледа на владина седница, по што се очекува, во најбрз можен рок, да помине во Собранието. Како што рече денеска премиерот Христијан Мицкоски на завршниот состанок со претставниците од тутунската индустрија и од угостителскиот сектор, законот ќе стапи во сила веднаш, освен одредбата согласно која угостителите треба да ги преадаптираат и пренаменат своите локали. За оваа одредба се предвидени 12 месеци грејс период.

Пушењето во угостителските објекти ќе биде дозволено на терасите, кои мора да бидат отворени од најмалку две страни.

Претставниците на бизнис секторот потврдија дека законот е креиран со партнерски пристап и искажаа благодарност за разбирањето од страна на Владата – да им се овозможи период од една година за соодветно да ги преуредат терасите во објектите.

– Од самиот почеток ја искажавме нашата поддршка во носењето на законот за забрана од пушење во неговата крајна цел, а тоа е заштита на јавното здравје. Сакам да искажам благодарност до премиерот и Владата, како и до министерот за здравство за фазната имплементација, односно за т.н. едногодишен грејс период во кој ние како угостителски сектор ќе имаме можност да ги преадаптираме нашите тераси согласно новите законски решенија, со цел нашиот сектор да претрпи колку што е можно помали економски последици – рече Перица Голомеиќ од Туристичко угостителската комора при Сојузот на стопански комори.

Според Васко Ристовски од Групацијата за производство на цигари при Стопанската комора, бизнисот го цени тоа што при подготовката на законот се земени предвид дел од доставените забелешки, ставови и укажувања на деловната заедница.

– Цврсто ги поддржуваме заложбите за засилување на заштитата на малолетните лица, вклучително и ограничувањето на пристапот, продажбата и употребата на тутунски и сродни производи од нивна страна – принцип кој и самите секојдневно го применуваме во нашето работење преку конкретни механизми и програми. Истовремено, го поддржуваме носењето на балансирани регулаторни решенија кои овозможуваат одржливост, препознатливост и диференцијација меѓу различните традиционални и нови тутунски производи, преку сите нивни специфики. Регулацијата на новите производи и понатаму треба да остане во фокусот на идната регулатива и нашата понатамошна соработка, каде ја нудиме целосната експертиза како мултинационални компании со светско искуство – рече Ристовски.

• ПРЕКУМЕРНАТА РЕГУЛАЦИЈА МОЖЕ ДА ДОВЕДЕ ДО РАСТ НА НЕЛЕГАЛНАТА ТРГОВИЈА Групацијата за производство на цигари поддржува балансирани регулаторни решенија

Премиерот Мицкоски и министерот за здравство Азир Алиу порачаа пред еснафот дека очекуваат доследна примена на законот по неговото донесување и апелираа дека нема да има повластени.

– Ако некој мисли дека ќе биде повластен, па бил близок со овој, оној, па нема да го почитува законот, па него немало да го фатат и слично, се лаже. Можете еднаш да поминете неказнети, ако не ве фатиме, па дури и вторпат, но третпат сигурно ќе бидете фатени и ќе бидете санкционирани – потенцира Мицкоски.

ЗАКОНОТ ЗА ЗАШТИТА ОД ПУШЕЊЕТО Е КОМПРОМИСНО РЕШЕНИЕ Ќе нема привилегирани, ќе има строги контроли

The post ЌЕ СЕ ПУШИ НА ТЕРАСИ КОИ СЕ ОТВОРЕНИ НАЈМАЛКУ ОД ДВЕ СТРАНИ Угостителите добија рок од една година да ги адаптираат објектите appeared first on plusinfo.mk.

Угостителските објекти во земјава ќе мора да направат јасна физичка поделба меѓу пушачите и непушачите, а во некои случаи и посебен влез, предвидува новиот закон за заштита од пушење кој наскоро ќе се најде пред Владата.

Министерот за здравство Азир Алиу најави дека предлог-законот ќе биде разгледан на владина седница на 24 март, по што ќе продолжи во собраниска процедура.

Тој вели дека по бројни реакции од угостителите и тутунската индустрија, направени се дополнителни анализи и разговори, по што решенијата се прилагодени.

– Сите отворени прашања се затворени. Очекувам законот брзо да помине и нашата земја да биде препознаена и на европско ниво – изјави министерот Алиу на денешната прес-конференција.

Една од клучните новини е што терасите ќе можат да функционираат како дел за пушење и со две отворени страни, наместо претходно предложените три. Според министерот, ова решение е донесено врз основа на научни анализи, кои покажале дека воздухот во такви услови доволно се прочистува.

– Со две отворени страни воздухот циркулира и се одржува квалитетот. Во спротивно, голем дел од угостителските објекти, особено во Скопје, не би можеле да ги исполнат условите – појасни Алиу.

Сепак, најголемата обврска за сопствениците на локали ќе биде да обезбедат одвоен влез за делот каде што не се пуши, со цел да се заштитат граѓаните кои не консумираат цигари.

– Целта е секој непушач да може да влезе во објект без да биде изложен на чад, а пушачите да имаат јасно определен простор – додаде министерот.

Властите очекуваат со новите мерки во наредните години значително да се намали бројот на пушачи во земјава.

The post ПОСЕБЕН ВЛЕЗ ЗА НЕПУШАЧИТЕ ВО КАФЕАНИТЕ Новиот закон носи строги правила за пушење, Владата ќе го разгледува на 24 март appeared first on plusinfo.mk.

Новиот предлог-закон за заштита од пушење е еден од најдобрите закони што директно го засегаат здравјето на сите наши граѓани. Да ја заштиме повозрасната популација, но и она што е најбитно – и најмладите – изјави денеска проф. д-р Оливер Зафировски, директор на Клиниката за пулмологија и алергологија во Скопје.

Според статистиката, како што истакна, границата за консумирањето тутун веќе е падната на 12 до 14 години и сè повеќе млади деца почнуваат со користење тутун.

– Она што е пострашно е што сè повеќе во мода се електронските цигари. Иако има пропаганда дека тие воопшто не се штетни, напротив, тие се штетни и даваат долготрајни и тешки последици за нежните бели дробови на децата. Даваме поддршка затоа што ова не е казна, туку сакаме директно да ги заштитиме како помладите така и возрасните луѓе бидејќи една од основните причини за појава на белодробен карционом е никотинот, односно пушењето цигари – рече Зафировски.

Одговорајќи на новинарско прашање за откажување од пушење, Зафировски рече дека на Клиниката имаат психолог и цел дел кој работи за одвикнување од никотинска зависност. Сепак, мал број луѓе се пријавуваат за користење на неговите услуги

Од друга страна, угостителите денеска имаа средба со државниот секретар во Министерството за економија и труд на која побараа одложување на примената на законот.

Како што информира денеска министерот за економија и труд Бесар Дурмиши, идната недела, најверојатно, ќе се одржи уште еден состанок, на кој ќе бидат присутни и тој и министерот за здравство, а ќе се разгледаат сите можности.

Дурмиши не кажа дали можеби ќе се пролонгира имплементацијата на Законот, која треба да почне од 1 март, но напомена дека целта е грижа за јавното здравје.

– Ги слушнавме забелешките на угостителите, кои побараа одреден временски период до стапување во сила на Законот, односно да одиме првин со кампања, па потоа со информација додека почне примената, за да бидат на некој начин подготвени. Ние ќе им повториме која е целта и на крајот ќе донесеме одлука што ќе биде прифатена од сите засегнати страни вклучувајќи ги и угостителите – изјави Дурмиши.

The post ЗАКОНОТ ЗА ЗАШТИТА ОД ПУШЕЊЕ ЌЕ СПАСИ МНОГУ ЧОВЕЧКИ ЖИВОТИ Директорот на Онкологија со силна поддршка за предложените измени appeared first on plusinfo.mk.

Оператори со храна во 9 новогодишни куќарки во Струга беа казнети со по 200 евра бидејќи работеле во нехигиенски услови. При вонредна инспекција во чаршијата во Струга Агенцијата за храна и ветеринарство (АХВ) откри повеќе неправилности.

„Со контролата спроведена на 22 овој месец, утврдено е дека во куќарките работеле физички лица и тоа во нехигиенски услови, односно куќарките не биле поврзани на градската водоводна мрежа, немале спроведена задолжителна дезинфекција, дезинсекција и дератизација, лицата немале спроведени задолжителни здравствено – санитарни прегледи, а не се почитувале ниту правилата на Добра призводствена и Добра хигиенска пракса“, информира АХВ.

Операторите имаат забрана за работа додека не ги исполнат потребните услови.

The post ИНСПЕКТОРИТЕ ЗАТВОРИЈА 9 НОВОГОДИШНИ КУЌАРКИ ВО СТРУГА Работеле без дезинфекција, без вода од водовод, нехигиенски appeared first on plusinfo.mk.

Угостителските објекти во Скопје до Нова година ќе треба сами да обезбедат контејнери за одлагање на отпад и да организираат негово редовно собирање. Толеранција нема да има, порача градоначалникот на Скопје, Орце Ѓорѓиевски, во вечерашното гостување во „Топ тема“ на ТВ Телма.

Тој истакна дека со потпишувањето на договорите меѓу угостителите и ЈП „Комунална хигиена“ јасно ќе бидат утврдени обврските на двете страни.

– Сите тие имаат дејност за која наплаќаат од граѓаните. Од друга страна, граѓаните си плаќаат за уредно да го одлагаат отпадот во контејнери. Не може некој да биде држен во сива зона – изјави Ѓорѓиевски.

The post УГОСТИТЕЛИТЕ ДО НОВА ГОДИНА САМИ ЌЕ ТРЕБА ДА ОБЕЗБЕДАТ КОНТЕЈНЕРИ ЗА ОТПАД Ѓорѓиевски најави дека нема да има толеранција appeared first on plusinfo.mk.

Во пресрет на празничната сезона, Државниот пазарен инспекторат најави засилени контроли во угостителските објекти низ земјата, со цел да се спречат злоупотреби и да се гарантира безбедноста на гостите.

Од Инспекторатот велат дека очекуваниот наплив на прослави и приватни забави секоја година носи ризик од прекршувања, поради што надзорите ќе бидат почести и построги.

Инспекторите ќе проверуваат дали се почитуваат правилата за максимален број гости, работното време, забраната за пушење и сите други законски обврски што важат за угостителите.

– Апелираме угостителите да работат совесно и во целост да ги почитуваат законските прописи, особено сега кога се очекува зголемена фреквенција на гости – порачаа од ДПИ.

Од Инспекторатот истакнуваат дека за секое непочитување на правилата ќе следат казни и соодветни мерки, согласно надлежните закони.

Граѓаните кои ќе забележат неправилности може да пријават на телефонскиот број 191 или преку веб-страницата dpi.gov.mk.

The post ПРАЗНИЧНИТЕ ЗАБАВИ ПОД ЛУПА Казни ќе летаат за секое прекршување во угостителските објекти appeared first on plusinfo.mk.

Недостигот на персонал ги наведе албанските компании да се свртат кон странски работници. Први на списокот се работниците од Филипините, главно женска работна сила, кои работат во хотелите, во крајбрежните ресторани, во центрите за убавина, па дури и како испомош во семејствата.

Се фокусиравме на Филипинците бидејќи се многу вредни … Носиме од 20 до 80 луѓе месечно. Договорите траат до една година, но со можност за обновување, доколку двете страни се задоволни една од друга, изјави албанската бизнисменка Џоана Ситаза.

Таа додаде дека компаниите се тие што се грижат за целиот процес, од документи, визи, медицински тестови, обука.

– Започнува со поднесување апликации, правиме интервјуа, и во рок од еден месец им наоѓаме работа. Исто така, правиме и неколку интервјуа со клиентите и кога ќе се согласат за платата, градот и работните места и ќе го започнеме процесот на добивање виза, во рок од четири до шест недели се издава визата и тие доаѓаат во Албанија – додаде Ситаза.

Најценетата професија е шеф на кујна, платена до 2500 евра, додека санитарен работник почнува со плата од 600 евра.

The post АЛБАНСКИТЕ УГОСТИТЕЛИ КУБУРАТ СО РАБОТНИЦИ Без Филипинците ќе пропадне сезоната appeared first on plusinfo.mk.

Венко Крстевски, в.д. градоначалникот на Кочани, се сретна со сопственици на угостителски објекти и корисници на јавни површини. На средбата учествуваа и инспектори од Општината, ТППЕ – Кочани и Струмица.

Крстевски најави тендер за избор на фирма што ќе ги отстранува нелегалните објекти.

– Од наша страна ќе им дадеме 30 дена период за кој корисниците на јавните површини треба да ги отстранат или прилагодат објектите според соодветните одобренија, а ако не ги отстранат ќе дојде до насилно рушење што ќе претставува дополнителен трошок за нив – посочи Крстевски.

Угостителите се пожалија дека со години работат по ист принцип со дозвола од поранешни власти, и редовно ги подмируваат обврските кон државата и Општината.

Целта на отстранувањето е да овозможи побрз пристап за пожарникари, брза помош и полиција.

The post УГОСТИТЕЛИТЕ ВО КОЧАНИ ИМААТ 30 ДЕНА ДА ГИ ПРИЛАГОДАТ ОБЈЕКТИТЕ Во спротивно објектите ќе бидат срушени appeared first on plusinfo.mk.