Поранешниот гувернер на мексиканската сојузна држава Гереро, Анхел Агире, е уапсен поради сомнение дека наредил уништување докази што можеле да помогнат во истрагата за случајот со исчезнувањето на 43 студенти од учителската школа Ајоцинапа во 2014 година.

Агире, кој претходно негираше каква било вмешаност, е осомничен за попречување на правдата и присилно исчезнување, изјави државната обвинителка, Ернестина Годој.

Случајот со исчезнувањето на 43-те студенти е едно од најтешките кршења на човековите права во поновата историја на Мексико. Наодите од спроведените меѓународни истраги укажуваат дека студентите кои патувале кон Мексико Сити за учество на протест биле убиени од припадници на организирани криминални групи, а во случајот била вмешана и полицијата.

Досега се идентификувани посмртни останки на тројца студенти, додека потрагата по останатите продолжува.

Според Обвинителството во Мексико Сити, новите сведоштва собрани во јануари и во мај годинава, меѓу кои и исказ на заштитен сведок, укажуваат дека Агире на состанок со високи функционери од неговата администрација наводно наредил уништување докази поврзани со случајот.

Годој изјави дека властите првично тврделе дека не постојат снимки од безбедносни камери на кои се гледаат студентите во автобуси во близина на административна зграда на Гереро. Сепак, годинава се појавил сведок кој претходно молчел поради закани.

Анхела Буитраго, членка на независна експертска група што го истражувала случајот, изјави дека новите докази го потврдуваат претходниот заклучок за вмешаност на државни структури во прикривање на случајот.

Според неа, снимката за која се тврди дека било наредено да биде уништена можела да помогне во пронаоѓањето на исчезнатите студенти.

Случајот со исчезнувањето на 43-те студенти од руралната учителска школа „Раул Исидро Бургос“ во Ајоцинапа е едно од најшокантните и најконтроверзни злосторства во поновата историја на Мексико. Тој не е само приказна за исчезнати млади луѓе, туку за можен спој меѓу организираниот криминал и државните институции. Повеќе од една деценија подоцна, случајот сè уште не е целосно разрешен.

На 26 септември 2014 година, околу 100 студенти заминале во градот Игуала, во сојузната држава Гереро. Тоа не било необично. Студентите од овие учителски школи со децении имаат практика да „позајмуваат“ автобуси, без намера трајно да ги украдат, за да патуваат на протести и комеморации. Тој пат сакале да отпатуваат во Мексико Сити на годишното одбележување на масакрот врз студентите во Тлателолко од 1968 година.

Но, таа вечер ги пресретнала полицијата. 43 студенти биле приведени од локалната полиција и потоа исчезнале без трага. Тогашниот државен обвинител Мурилло Карам во 2015 година објави дека полицијата ги предала студентите на картелот Гуерерос Унидос, картелот ги убил, телата биле изгорени на депонијата во Кокула, а
пепелта била фрлена во река.

Но, независните експерти ја урнаа официјалната приказна. На барање на семејствата беше формиран независен меѓународен тим на експерти, под покровителство на Интер-американската комисија за човекови права. Тие утврдија дека нема физички докази дека на депонијата имало пожар доволно голем за кремирање на 43 тела.

Едно од најголемите прашања е зошто студентите биле нападнати?

Една од најсериозните истражни насоки е дека студентите, без да знаат, земале автобус во кој картелот превезувал дрога кон САД. Според оваа теорија картелот мислел дека ќе изгуби огромна пратка и затоа веднаш ја активирал локалната полиција, која го пресретнала автобусот.

Подоцна се откри дека армијата речиси во реално време ги следела движењата на студентите, но не интервенирала.

Во 2022 година мексиканската Комисија за вистина заклучи дека исчезнувањето било „државно злосторство“.

Повеќе од 10 години подоцна, родителите на исчезнатите студенти сè уште маршираат секој месец барајќи едноставен одговор: Што навистина им се случи на нивните деца? И покрај бројните истраги, апсења и нови докази, целосната вистина сè уште не е утврдена.

The post КОЈ ГИ УБИ 43-ТЕ СТУДЕНТИ ВО МЕКСИКО? Уапсен поранешен гувернер поради прикривање докази appeared first on plusinfo.mk.