Институциите континуирано комуницираат со концесионерот на комплексот „Македонско село“ со цел објектот успешно да функционира и да не биде затворен, изјави директорот на Службата за општи и заеднички работи (СОЗР), Ивица Томовски, во гостување во „Ноќно студио“ на 4ТВ.

Томовски истакна дека државата обезбедува логистичка и институционална поддршка и додаде дека комплексот веќе околу една година работи стабилно.

– Постојано комуницираме со концесионерот и стоиме како логистика и поддршка. Целта е објектот да функционира и да не се затвори. Во моментов сметам дека работи добро. Периодов подобро функционираат ресторанските услуги, додека хотелските капацитети имаат потреба од дополнителна поддршка – рече Томовски.

Тој посочи дека за подобро искористување на сместувачките капацитети во комплексот е потребна поголема поддршка и од туристичките агенции и од институциите.

– Овие објекти не се класични хотелски капацитети и не можат да учествуваат во одредени јавни набавки како хотели. Тие се водат како апартманско сместување и затоа им е потребна поголема промоција и поддршка, за да се развие тој сегмент и да се испочитува договорот – додаде тој.

Во однос на пристапноста, Томовски истакна дека до комплексот може да се стигне и со автобуски превоз на ЈСП, а веќе се разговара за воведување почести линии. Тој додаде дека државни институции сè почесто организираат настани таму, а странските посетители, како што рече, се воодушевени од амбиентот.

Томовски се осврна и на пријавите од граѓани за наводни злоупотреби на службени возила, нагласувајќи дека секој случај се проверува.

– Граѓаните сè почесто пријавуваат. Наша задача е да побараме одговор од институцијата и да утврдиме дали станува збор за злоупотреба или за службена задача – рече тој.

Тој информираше и дека СОЗР започнал со чистење на возниот парк од нефункционални возила, при што досега се расходувани над 100 возила кои со години биле надвор од употреба.

The post „МАКЕДОНСКО СЕЛО“ СЕ ОДРЖУВА ВО ЖИВОТ Томовски најави институционална поддршка и нови линии на ЈСП appeared first on plusinfo.mk.

Одрон на карпа на пешачка патека во Кањон Матка за малку ќе завршеше со трагедија, откако огромна карпа се урна додека во непосредна близина имало посетители.

Инцидентот се случил на 7 јануари годинава, а според видеоснимки до кои дојде КУРИР, јасно се гледа моментот кога карпата паѓа, само неколку секунди откако посетителите се тргнале од местото.

Речиси за влакно беше избегната несреќа, бидејќи луѓето кои се наоѓале на патеката непосредно пред одронот се оддалечиле на два до три метри и продолжиле да го фотографираат кањонот, несвесни за опасноста што следела.

За среќа, во инцидентот нема повредени лица, но настанот повторно го отвора прашањето за безбедноста на пешачките патеки во Кањон Матка, особено во зимскиот период кога зголемена е можноста за одрони.

Засега нема официјална информација дали надлежните служби извршиле увид на терен и дали ќе следуваат дополнителни мерки за заштита на посетителите.

The post 📽️ ЗА ВЛАКНО ИЗБЕГНАТА ТРАГЕДИЈА НА МАТКА Карпа се урна додека имало посетители, нема повредени appeared first on plusinfo.mk.

Скопје од денеска е директно поврзано со шпанската престолнина Мадрид — нова авиолинија која, според вицепремиерот и министер за транспорт Александар Николоски, е дел од стратегијата за развој на воздушниот сообраќај и зголемување на туристичкиот потенцијал на Македонија.

На свеченото означување на првиот лет присуствуваа вицепремиерот Николоски, амбасадорот на Шпанија во Македонија Рафаел Сориано Ортиз и генералниот директор на ТАВ Македонија, Неџат Курт.

– Многу ми е драго што денеска почнува директна линија меѓу Скопје и Мадрид. Поврзуваме два главни града — нешто што е многу значајно за развојот на туризмот, бизнисот и културната размена помеѓу нашите народи – изјави Николоски.

Тој нагласи дека Владата заедно со ТАВ изработила нова стратегија за отворање на дестинации и вовела иновативен модел на субвенционирање, со зголемени стимули за авиокомпаниите кои носат патници во земјава.

– Субвенциите по патник на скопскиот аеродром изнесуваат 9 евра, а на охридскиот 12 евра, со што директно го поттикнуваме доаѓањето на туристи во Македонија. Ги укинавме и претходните ограничувања што ги обесхрабруваа авиооператорите – рече Николоски.

Бројките, според него, се повеќе од охрабрувачки.

– Во периодот јануари–октомври бележиме раст од 7% на двата аеродрома, со вкупно 2.862.677 превезени патници — повеќе од бројот на жители во државата – вели вицепремиерот.

Само во последната година, Владата и ТАВ отворија 21 нова авиолинија кон европски градови како Париз, Истанбул, Барселона, Лион, Амстердам, Женева, Келн, Прага, Милано, Базел, Штутгарт и други.

– Сакам да се заблагодарам на директорот на ТАВ и на амбасадорот на Шпанија. Мадрид и Барселона нема да бидат последни шпански дестинации што ќе се поврзат со Македонија – најави Николоски.

За амбасадорот на Шпанија Рафаел Сориано Ортиз ова е историски ден бидејќи, потенцираше, првпат двата главни градови се поврзуваат со директен лет.

Ја истакна важноста и на неодамна воспоставнета авилинија со Барселона и порача дека поврзувањето е предуслов за подобрување на билатералните односи помеѓу двете земји.

– Убеден сум дека овој нов лет ќе биде многу успешен и ќе биде пресвртница во размената во туризмот, економијата, културата и ќе биде предуслов за поврзување на нашите две земји, рече амабасадорот Ортиз.

Неџат Курт, генерален директор на ТАВ Македонија, нагласи дека со оваа авиолинија, Скопјe и Мадрид стануваат поблиски од кога било, а Македонија и Шпанија ги зајакнуваат дипломатските и економските врски, што претставува огромна можност за сите.

– Од денес Мадрид, една од најпосакуваните дестинации на нашите патници, е реалност, и тие ќе можат да уживаат во градот на уметноста, музиката, животот, плоштадите и терасите. Дом на познатиот музеј Прадо, Кралската палата, стадионот Сантијаго Бернабеу, но и на луѓето познати по својата топлина и гостопримство – рече Курт.

Тој посочи дека оваа авиолинија, како и четирите нови што почнаа да сообраќаат овие денови, се доказ дека поврзаноста на Македонија со Европа се зголемува.

– Со зимскиот ред на летови, применлив од изминатиот викенд, Меѓународниот Аеродром Скопјe е поврзан со вкупно 49 редовни дестинации во текот на целата година и 13 чартер летови. За нас во ТАВ Македонија, секоја нова дестинација значи повеќе можности за нашите патници, за туризмот и економијата, но и за нови пријателства меѓу луѓето – истакна Курт.

The post ЛЕТАЈ ВО СРЦЕТО НА ШПАНИЈА Од денеска директни летови од Скопје до Мадрид! appeared first on plusinfo.mk.

Од 11 до 13 јули, таму каде што облаците се допираат со оџаците на куќите, а ехото го носи звукот на зурли и тапани, Галичник повторно ќе стане центарот на македонската традиција. Под сенките на Бистра, една од највеличествените културни манифестации – Галичката свадба, ќе ги отвори вратите на вековната убавина и обичаи пред илјадници посетители од земјата и од странство.

 

View this post on Instagram

 

A post shared by Plusinfo.mk (@plusinfo.mk)

Овојпат, Јован Филипоски, потомок на галичкото семејство Филипоски, и Лилјана Михајлоска ќе ги сторат венчалните обреди токму по чекорите на предците.

 

View this post on Instagram

 

A post shared by Plusinfo.mk (@plusinfo.mk)

– Уште како дете сонував еден ден да бидам дел од Галичка свадба. Тоа е многу повеќе од свадбарски обичај – тоа е љубов, идентитет и исконска гордост – вели Јован.

 

View this post on Instagram

 

A post shared by Plusinfo.mk (@plusinfo.mk)

– Чувството кога облекуваш автентична носија и кога чекориш низ истите патеки по кои чекореле генерации пред тебе е неописливо. За нас ова е завет и голема чест – додава Лилјана.

Гостите за време на тридневната програма ќе бидат сведоци на автентични ритуали – носии, песни, свадбарски ора, бајраци, обредни качувања по стрмните улици…

Галичката свадба – повеќе од настан, тоа е културен завет

Организатор е Месната заедница „Галичник“, чиј претседател Огнен Караѓозовски, честитајќи им на годинашните младенци, порача:

– Продолжуваме со посветеност да ја чуваме оваа ретка традиција жива. Радува фактот што секоја година се зголемува интересот кај младите генерации да бидат дел од Галичка свадба. Тоа за нас претставува најсилен доказ дека обичаите и културното наследство се темел на нашиот идентитет, сегашност и иднина. Благодарни сме на институциите и големиот број компании чија поддршка има пресудно значење за организирањето и одржувањето на атрактивноста на манифестацијата.

Партнерството што трае половина век – Пивара Скопје и СКОПСКО повторно во Галичник

– Чест ни е што и оваа година сме дел од Галичка свадба – симбол на љубовта, заедништвото, автентичната традиција и култура. Повеќе од половина век ја делиме оваа приказна со генерации младоженци, нивните семејства и големиот број посетители на овој настан, со кои нè врзуваат исти вредности: почитување на културното наследство, меѓусебна поддршка и создавање искуства кои зближуваат. На Јован и на Лилјана им посакуваме многу здравје, среќа и бериќет – нека нивната љубов биде долготрајна, како и нашето партнерство со Галичка свадба“, изјави Марија Мининчиќ – менаџерка за партнерства со заедницата во Пивара Скопје.

Покровители и безбедност

Годинашната манифестација е под покровителство на претседателката Гордана Сиљановска-Давкова, а поддршката од Министерството за култура и туризам дополнително ја зацврстува нејзината важност како национално културно богатство.

Воедно, организаторите најавија посебен сообраќаен режим во селото, како и апел за одговорно однесување, особено во однос на консумирањето алкохол и грижата за природната околина.

Програмата на Галичка свадба 2025 – традиција преточена во спектакл

Годинешната „Галичка свадба“ ќе се одвива во три дена, исполнети со богата програма која ја оживува вековната традиција на мијачкиот крај. Тридневната манифестација ќе започне во петок, 11 јули, со премиерна изведба на монодрама во чест на 150 години од издавањето на Тријазичникот на Ѓорѓија Пулески, што ќе биде изведена на мијачки дијалект. Потоа ќе следува забава со диџеј сет за помладите посетители.

В сабота, на 12 јули, започнуваат свадбарските обичаи, со пречек на тапаните, китење и поставување на свадбениот бајрак, симболичното „фрлање пушка“ од куќата на зетот и изведбата на свекрвиното оро. Особено впечатлив момент ќе биде изведбата на ората кои го симболизираат печалбарството и непокорот на луѓето од овој крај – „Невестинското“ и „Тешкото“ – од страна на националниот фолклорен ансамбл „Танец“, на платото пред прочуената чешма Упија. Во вечерните часови, невестата придружувана од свадбарите, со борини и факели во рака, ќе оди да полни вода од прочуените три чешми во селото: Секуличе, Динговиче и Упија – обичај поврзан со семејната среќа.

В недела, 13 јули, денот ќе започне со традиционалните „канење на мртвите“, „канење на кумот“, „бричење на зетот“ и „тргнување по невеста“, во чии рамки е и прочуениот обичај „гледање низ прстен“. Потоа следуваат испраќањето на невестата и дарувањето, како и венчавањето во храмот „Св. Апостоли Петар и Павле“. Настанот ќе заврши со свеченото испраќање на тапанџиите и зурлаџиите, кое го означува симболичното затворање на свадбената церемонија.

Целата програма, која ги вклучува сите традиционални свадбарски обичаи, ќе биде емитувана преку видео-екран поставен на централното плато во селото, а ќе биде емитувана „во живо“ и на социјалните мрежи, со што манифестацијата се доближува и до оние кои немаат можност да бидат физички присутни на настанот.

The post 📷 📽️ ГАЛИЧКА СВАДБА ЌЕ ЗАПИШЕ НОВА ЉУБОВНА ПРИКАЗНА Запознајте ги зетот и невестата appeared first on plusinfo.mk.