Претставници на 9 германски компании од 20 до 24 април ќе престојуваат во земјава каде што на лице место ќе се информираат за можностите за соработка и ќе остварат конкретни средби со локални претставници од туристичкиот сектор, добавувачката индустрија и релевантните институции во Македонија.

Ова го најави денеска  Антје Ванделт, директорка на Германско-македонската комора (АХК ) која е  дел од мрежата на германските стопански комори во странство во своето редовно обраќање.

Целта на посетата, како што најави Ванделт, е идентификување на одржливи бизнис модели, воспоставување партнерства и понатамошно позиционирање на регионот како значајна и кон иднината ориентирана туристичка дестинација.

Ванделт додава дека оваа активност е дел од планот на комората да ја стави одржливоста како водечка тема во реализацијата на своите активности и да ја интегрира во своите клучни проекти и партнерства. Туризмот, вели таа има значителен потенцијал за поврзување на одржливото создавање вредности, регионален развој и меѓународната соработка.

– Со ваквото сеопфатно разбирање на одржливоста, даваме активен придонес кон економската трансформација на регионот и кон продлабочување на германско-македонските деловни односи. Да не зборуваме само за одржливоста, туку заеднички и конкретно да ја спроведуваме во пракса во нашите компании, да ја направиме да биде дел од нашиот секојдневен живот и од нашите домови -вели Ванделт.

Комората веќе работи на проекти за циркуларна економија, со кои, вели Ванделт, се дава силен импулс за поттикнување на ефективно користење на ресурсите, како и за развој на модели на стопанисување кои се ориентирани кон иднината.

– Целта е на компаниите да им се понудат конкретни решенија кои обединуваат еколошка одговорност и економска ефикасност, а истовремено да се овозможи усогласување и имплементација на бараните регулативи – вели таа.

Таа додава дека продолжувањето на програмата YEE (Young Energy/Environmental Experts) го потврдува стремежот одржливата трансформација да се поддржи не само структурно, туку и преку човечкиот капитал со активно вклучување на младите стручни кадри во процесите кои носат конкретни промени во работењето на компаниите.

The post ГЕРМАНСКАТА КОМОРА ГО ВКЛУЧУВА ТУРИЗМОТ ВО СВОИТЕ АКТИВНОСТИ Претставници на 9 германски компании на лице место ќе се информираат за туристичките можностите appeared first on plusinfo.mk.