Цената на природниот гас на европскиот пазар од почетокот на годинава порасна за 171%, покажуваат податоците од стоковите берзи.

Тековната цена на референтниот холандски природен гас на берзата TTF изнесува околу 76 евра за мегават-час (MWh) за ноемвриските фјучерси, 74,5 евра за декемвриските фјучерси. Слични се цените и за фјучерсите за јануари и февруари.

Овие цени најавуваат турболентна грејна сезона не само во Европа каде што резервите не се на посакуваното ниво, но и кај нас иако цената на парното веќе е утврдена и не зависи од берзанската цена. На ова предупреди деновиве и претседателот на Регулаторната комисија за енергетика Ацо Ристов.

Ристов потсети дека цената на топлинската енергија за домаќинствата е зголемена во просек за 5,96 отсто и дека актуелните цени се формирани со влезни параметри за природниот гас кои значително се разликуваат од денешните берзански цени.

-Кога ги формиравме цените кои важат од први август, влезните параметри на гасот беа различни. Во тој момент калкулиравме со околу 40 евра за мегават-час за набавната цена на гасот, а денеска на берзите веќе е 70-72, па беше и до 80- рече Ристов.

Според него, засега високата цена на гасот не се чувствува целосно кај компаниите за производство и дистрибуција на топлинска енергија, бидејќи грејната сезона сè уште не е започната. Но, доколку цената остане на ова ниво, компаниите би можеле да побараат нова пресметка.

-Уште не е почната грејната сезона, па компаниите не го чувствуваат како удар, бидејќи не почнале да трошат од гасот. Меѓутоа, со почнување на грејната сезона и доколку не се смири пазарот, тие сигурно ќе побараат од нас интервенција во калкулациите – објасни Ристов.

Тој појасни дека евентуалната нова пресметка автоматски не значи и зголемување или намалување на цената на топлинската енергија.

Цената, како што рече, се формира врз основа на повеќе елементи, меѓу кои оперативните трошоци и трошоците за набавка на енергенсите. РКЕ ги зема предвид просечните набавни цени од повеќе компании што увезуваат гас.

Регулаторите, според она што го рече Ристо, прават анализа на пресметка на цената на гасот според цените на берзата, а не според влезните цени.

The post ЦЕНАТА НА ГАСОТ ВО ЕВРОПА ГОДИНАВА ПОРАСНА ЗА 171% Најавена е турболентна грејна сезона, а како ќе биде кај нас appeared first on plusinfo.mk.