Љутков, кој денеска го посети локалитет во „Тумба Маџари“ во Општина Гази Баба поради пронајдените откритија, информираше дека веќе е изготвен елаборат за валоризација на локалитетот и Министерството за култура и туризам ќе даде поддршка во заштита на културното наследство.

– За откритијата и нивното значење оставам да говорат експертите, за нас, како Министерство, од голема важност е што новите наоди ни укажуваат дека границите на локалитетот се прошируваат, а тоа значи дека истражувањата продолжуваат – изјави Љутков.

Тој напомена дека ќе дадат засилена поддршка на партнерскиот однос во грижата за локалитетот што речиси две децении заеднички ја негуваат Археолошкиот музеј и Општина Гази Баба.

– Жалам што годинава со археолошки истражувања се продолжува по десет години застој. Веќе е изготвен елаборат за валоризација на локалитетот и Министерството за култура и туризам ќе даде силна поддршка во заштитата на културното наследство како наш врвен приоритет – додаде Љутков.

Тој рече дека овој локалитет ќе се прогласи за културно наследство од особено значење и „Тумба Маџари“, како дел од урбано Скопје, повидливо ќе се стави во функција на културниот туризам.

Директорката на Археолошки музеј Славица Бабамова, која денеска исто така го посети локалитетот, на новинарско прашање во што се состои вредноста во новооткриените артефакти, одговори дека ликовната интерпретација на жената, на родилката симболот на плодноста, неолитскиот вајар ја има претставено како големата мајка која е карактеристична за Тумба Маџари.

– Овде ликовната интерпретација на жената, на родилката симболот на плодноста неолитскиот вајар ја има претставено на сосема друг начин, единствен начин којшто го нема никаде на друго место во светот. Тој начин на ликовна интерпретација на овие жртвеници со претстава на големата мајка се карактеристични за Тумба Маџари. Културата на неолитот во Скопскиот регион многу се разликува од соседните култури од светските неолитски култури. Се надевам дека еден ден ќе се создадат услови овие претстави на големите мајки од Скопскиот и од Пелагонискиот регион, во соработка со Министерството за култура, да ги номинираме во УНЕСКО, за да добијат статус на светско културно наследство – рече Бабамова.

The post НОВА „ГОЛЕМА МАЈКА“ ОТКРИЕНА ВО ТУМБА МАЏАРИ Локалитетот ќе се прогласи за наследство од особено значење appeared first on plusinfo.mk.

– Тумба Маџари од 2008 година е актуелен со анимирање на јавноста преку научни, едукативни и туристички активности за сите возрасти. Во музејот под отворено „Неолитско село“ се изградени неколку куќи во духот на неолитската архитектура. Во нивната внатрешност преку копии на разновиден движен и недвижен покуќнински инвентар, како и сцени од секојдневниот живот, е направен обид за реконструкција на дел од животот на неолитскиот човек кој живеел на територијата од Македонија и пошироко пред 8000 години – велат од Археолошкиот музеј.

Неодамна во „Неолитското село“ заврши проектот финансиран со грант од Европската Унија преку програмата „Прекугранична иницијатива за културна размена (МАКС ФОРУМ)”. Целта на овој проект беше доуредување на продавницата за сувенири и обновување на постоечките содржини во овој комплекс, кои досега беа успешно користени за поголема популаризација на археолошкиот локалитет Тумба Маџари и на вредностите на неолитската култура на територијата на Македонија.

Посетата на „Неолитското село“, како и реализацијата на многубројните едукативни активности и културни манифестации во овој комплекс, ќе продолжат наскоро, а до тогаш ќе можете да направите виртуелна прошетка, чија техничка реализација и подготовка е овозможена од Дончо Наумовски и Елена Стојанова Канзурова.

The post Прошетајте виртуелно низ „Неолитско село“ во Тумба Маџари appeared first on plusinfo.mk.