71-годишен скопјанец, пријавен за исчезнат еден ден претходно, е пронајден мртов во водите на реката Вардар, во атарот на селото Трубарево.

Од СВР Скопје информираат дека на 24 декември 2025 година околу 14:20 часот било пријавено оти околу 11 часот е забележано и извлечено тело на машко лице од реката. По извршената идентификација било утврдено дека станува збор за П.С. (71) од Скопје, за кого на 23 декември семејството пријавило дека се оддалечил од домот.

На местото бил извршен увид, а по наредба на јавен обвинител телото е предадено на обдукција, со цел да се утврдат причините за смртта.

Исчезнувањето на Петар ја вознемири јавноста откако неговиот син, Владимир Стојановски, на социјалните мрежи побара помош од граѓаните. Во објавата наведе дека татко му излегол од дома рано наутро, облечен само во пиџами, и дека боледувал од деменција.

„Татко ми е исчезнат рано утрово, нешто околу 6:30 часот. Искочен е од дома најверојатно само по пиџами и е со деменција… Ве молам споделете“, напиша тогаш Стојановски, апелирајќи за било каква информација.

Апелот беше масовно споделуван, а граѓаните се вклучија во потрагата, надевајќи се на среќен исход. За жал, денеска синот ја објави тажната вест.

„Сакам да ве известам дека татко ми е пронајден. Нека му е лесна земјата. Немаме зборови да опишеме колку сме ви благодарни за целата грижа, поддршката и споделувањето. Останете убави и добри луѓе“, напиша Стојановски.

Случајот и понатаму е предмет на истрага, а јавноста ја очекува официјалната информација по завршување на обдукцијата.

The post ТРАГИЧЕН КРАЈ НА ПОТРАГАТА ПО ИСЧЕЗНАТИОТ СКОПЈАНЕЦ Пронајден мртов кај Трубарево, телото е извлечено од Вардар appeared first on plusinfo.mk.

Во скопската населба Аеродром се случи физички напад врз Р.З. (65) од село Трубарево.

Инцидентот се случил на 15 ноември околу 13 часот додека мажот извршувал работни задачи во двор. Две жени, кои биле сопственици на дворот, го нападнале по претходна расправија.

Очевидци велат дека нападот бил наголем и дека мажот успеал да се повлече со помош на соседите. Засега нема информации за сериозноста на повредите, но полицијата ја презема истрагата за целосно расчистување на случајот.

The post НЕ ИМ СЕ ДОПАДНАЛО КАКО ГО СРЕДИЛ ДВОРОТ, ПА ГО НАПАДНАА Маж натепан од две жени во Аеродром appeared first on plusinfo.mk.

Двајца млади од скопското село Трубарево, на возраст од 23 и 26 години, се уапсени од полицијата поради „предизвикување општа опасност“ во населбата Аеродром.

Според информациите на МВР, во неделата околу 12:30 часот, полициски службеници од СВР Скопје – Полициска станица Аеродром ги лишиле од слобода Т.М.(23) и И.М.(26). Случајот бил пријавен од вработен во Општина Аеродром, кој информирал дека во парк на булевар „Февруарски поход“ две лица палеле кабли.

По брзата интервенција на полицијата, двајцата биле затекнати на местото на настанот и приведени. Тие се задржани во полициска станица, а од МВР најавуваат дека по целосно документирање на случајот ќе биде поднесена соодветна пријава.

The post ПАЛЕЛЕ КАБЛИ ВО ПАРК ВО АЕРОДРОМ Двајца млади уапсени поради „предизвикување општа опасност“ appeared first on plusinfo.mk.

Министерот за здравство Азир Алиу нема информација дека зеленчкуот и овошјето од Трубарево не треба да се консумираат. Тој денеска, одговорајќи на новинарски прашања, укажа дека според официјалните резултати од направените анализи, нема радиоактивност во водата и опасни тешки метали во почвата по пожарот во ова скопско село.

Во однос на скринигот, повтори дека вкупно 18 лица треба да продолжат со натамошни лекарски процедури.

Ова, напомена, не е завршна фаза, зашто според протоколите ќе треба да се прави скрининг уште два пати, по три и по шест месеци.

Стручната комисија на Министерството за здравство ги заврши осумте предмети од „кардиолошките случаи“, а во вторник ќе продолжи со работа по новите пет, соопшти денеска ресорниот министер Азир Алиу.

Според Алиу, пратен е допис до инститициите да се јават во здравствените установи ако некој од пожарникарите или од вработените во министертсвата за внатрешни работи и одбрана кои беа вклучени во гаснењето на пожарот почувствуваат некакви симптоми.

– Два дена имавме активен скрининг, првиот ден поминаа 111 лица од кои 11 продолжуваат на Клиниката за пулмоплогија, а вториот 103 граѓани поминаа низ процедурите и од нив 7 продожуваат на Пулмологија. Во однос на овошјето и зеленчук од Трубарево, направени се мерења во воздухот, водата и почвата, покажаа дека нема елементи над дозволените граници. Според протоколот, по еден месец повторно ќе се проверуваат вредностите и по првиот дожд. ИЈЗ ќе информира за елементите, а се надевам дека се активни и другите институции. Ние ќе излеземе со препораки. Но, нема радиоактивност таму, таа е во нормалните граници. Имаме Кризен штаб, досега немам информација дека зеленчкуот и овошјето не треба да се консумираат – подвлече министерот.

The post НЕМА РАДИОАКТИВНОСТ ВО ВОДАТА И ЗАГАДЕНА ПОЧВА ВО ТРУБАРЕВО Скринингот ќе се прави уште двапати, информира Алиу appeared first on plusinfo.mk.

Министерството за здравство во соработка со Клиниката за пулмологија спроведе дводневен скрининг на населението во Трубарево, со цел навремено откривање на евентуални симптоми на респираторни заболувања по големиот пожар што ја потресе оваа скопска населба.

– Само во текот на вчерашниот ден беа прегледани над 100 лица на двата пункта во Трубарево, од кои осум беа упатени на Клиниката за пулмологија поради хронични заболувања за кои подолго време не направиле контролни прегледи. Вкупно во два дена над 200 пациенти беа прегледани, а акцијата беше одлично прифатена од локалното население. Во следниот период продолжуваме да ја следиме состојбата во соработка со сите надлежни институции – изјави министерот за здравство Азир Алиу.

Според информациите од тимовите на Клиниката, кај дел од пациентите биле забележани симптоми како отежнато дишење, сува кашлица и стегање во градите, а кај други биле откриени и покачен крвен притисок.

Д-р Сеад Зејнел од Клиниката за пулмологија објасни дека најголем дел од упатените пациенти веќе имале хронични заболувања, кои се влошиле поради загадувањето.

– Станува збор за пациенти со астма или ХОББ, дел од нив се пушачи и не ги земале редовно претходно пропишаните лекови. Токму затоа ги упативме на Клиниката за да се направи ревизија на терапијата и дополнителни испитувања – нагласи д-р Зејнел.

Тој додаде дека кај голем број жители се јавиле симптоми како печење на носот, очите и грлото, како и помалку стегање во градите, кои, според него, најчесто се надминуваат со општи препораки.

Скринингот се спроведе на два пункта во населбата, каде што тимовите вршеа клинички прегледи, мерење на пулс, сатурација и процена на виталниот капацитет. Министерството за здравство апелира сите службени лица – пожарникари, полицајци и припадници на ДСЗ – кои учествуваа во гаснењето на пожарот, доколку имаат здравствени проблеми, директно да се обратат на Клиниката.

The post ЗАВРШИ СКРИНИНГОТ ВО ТРУБАРЕВО Прегледани повеќе од 200 жители, дел од нив имале хронични заболувања appeared first on plusinfo.mk.

Вкупно 111 граѓани поминале низ лекарските скрининг процедури по пожарот во Трубарево. Од нив 11 ќе продолжат со прегледи на Клиниката за пулмологија, додека другите поминале без знаци за натамошен третман, рече во гостување на ТВ Сител министерот за здравство Азир Алиу.

Граѓаните кои се пратени на дополнителни пулмолошки испитувања се повозрасни.

Алиу апелира сите граѓани кои имаат кашлица, главоболки, отежнато дишење и други симптоми да се пријават уште вечерва за скрининг.

– Скрингот проодлжува и утре од 10 – 16 часот, а ако е потребно ќе продолжи и понатаму зашто целта е да ги опфатиме сите граѓани кои мислат дека треба да поминат скриниг или ако чувствуваат некакви симптоми како кашлица, главоболки, отежнато дишење. Тие граѓани би ги замолил да се пријават уште вечерва за скрининг. Добро е порано да се детектираат здравствените проблеми, за да ги третираме – истакна Алиу.

Според Протоколот, скрининг треба да се направи уште два пати, по три и по шест месеци, за да се види ефектот од загадувањето по пожарот.

Министерот информираше и дека 8 предмети од пријавените „кардиолошки случаи“ се завршени, уште пет нови се пристигнати во Фондот за здравство, но очекуваме да ни бидат доставени и други од институции и граѓани.

Алиу напомена дека резултатите од целиот овој процес ќе бидат соопштени на крај, кога ќе се изготви завршниот извештај. Нема да се оди со делумни информации во јавноста поради сензитивноста на случајот и пред се, за да се поштедат пациентите и нивните семејства.

Во експертизата се вклучени Стручна комисија од Министерството за здравство, тим од Лекарската комора по барање на министерот Алиу, како и тројца стручњаци од Словенија, Австрија и Италија кои допрва треба да дојдат во Македонија.

Министерот вели дека е свесен за недовербата на граѓаните во здравството, но таа, напомена, не е од сега, туку од поодамна. Еден од начините за подобрување на ситуацијата, рече, е дигитализација. Алиу потсети дека се работи на инфраструктурни инвестиции во вредност од 205 милиони евра.

The post ОД 111 ПРЕГЛЕДАНИ ГРАЃАНИ ВО ТРУБАРЕВО, 11 ПАК ЌЕ БИДАТ ИСПИТАНИ Скринингот продолжува и утре, Алиу апелира граѓаните да се пријават appeared first on plusinfo.mk.

Во оваа фаза е битен скринингот на пулмолози за жителите на Трубарево, но овој процес нема да застане тука, изјави вечерва министерот за здравство Азир Алиу.

– После хаваријата имавме и хоспитализирани и третирани граѓани од Брза помош кои живеат во тој радиус каде што се случи пожарот. Оттогаш досега немаме хоспитализирани пациенти, но затоа за да превенираме секаков вид на здравствени заболувања од утре почнуваме дводневна скрининг програма за сите жители на Трубарево и околината. Ќе одат два тима на лекари со медицински амбулантски возила и на лице место ќе направат скрининг на здравствената состојба на нашите граѓани – рече Алиу во гостувањето на „Топ тема“ на ТВ Телма.

Тој појасни дека ако лекарите проценат дека здравствената состојба е таква која бара понатамошен здравствен третман, тогаш во сабота и в недела ќе се работи само со тие пациенти на Клиниката за пулмологија на Клинички центар, за да може понатаму ако треба да се третираат и да се направи програма за тие граѓани.

– Ние како Министерство за здравство ги следиме и правиме скрининг на здравствената состојба. Исто така Институт за јавно здравје ќе ги следи процесите таму. Протоколот вели дека мора да се анализира почвата, воздухот и водата, после првиот дожд пак треба да се тестираат, исто така и после еден месец. Тоа е строг Протокол којшто ние го почитуваме и ќе излеземе со резултати како што излеговме и со првичните резултати каде што и јасно се гледа дека таму нема радијациска активност и сега ќе ги следиме процесите на вода, почва и воздух… Исто така Институтот за јавно здравје и Министерството за здравство ќе направиме програма за да може да се работи со млади и со возрасни лица во тој регион – рече Алиу.

Веќе се резервирани првите 15 термини за состанок со министерот за здравство Азир Алиу, беше соопштено на денешната прес-конференција во Министерството за здравство.

На прашањето зошто не се вклучени и токсиколози, со оглед на тоа дека експерти укажуваат на последиците по здравјето од горењето литумски батерии, кои можат да предизвикаат не само белодробни заболувања туку и рак, тој нагласи дека во оваа фаза битни се пулмолози за да се види дали има промени во дишните патишта, а потоа веројатно ќе се третираат и од други експерти.

Коментирајќи го барањето од страна на опозицијата за негова оставка, бидејќи според нив, цела екипа не дејствувала како што треба за време на хаваријата, тој вели дека нема место за критика.

– Ние веднаш формиравме институционална кризна група и кризна група внатре во Министерството за здравство за да може да ги следиме здравствените промени. Другиот ден организиравме група на експерти и на лекари, беа таму на лице место со амбулантски возила за евентуално ако има потреба веднаш да се реагира. За жал, и во овој случај опозицијата сакаше да излезе малце од тие протоколи и да критикува таму каде што реално немаше место за критика. Уште пожално е кога лидер на опозиција е доктор и во ваква ситуација, знаејќи ги тие протоколи, излегува и прави политика во ваква ситуација – рече Алиу.

На прашањето дека експерти велат таму е контаминирана почвата и оти таму нема да може да се сади подолго време, Алиу кажа дека не може да се излезе со комплетен извештај, без да се соберат сите податоци.

– Секојдневно имаме информации од сите институции што се случува во таа област, за да можеме ние да превенираме ако имаме индикатори. Сакам да ве уверам дека овој процес нема да застане тука и дека работната група работи и ќе излеземе со извештај, но притоа не смееме да излеземе и како институција и како држава со извештај без да ги имаме сите податоци – истакна Алиу.

The post АЛИУ НАЈАВИ ДВОДНЕВЕН СКРИНИНГ ВО ТРУБАРЕВО Ќе се проценува потребата од понатамошен третман на пациенти appeared first on plusinfo.mk.

Министерството за здравство, во соработка со Универзитетската клиника за пулмологија и алергологија, организира дводневен скрининг на населението во Трубарево, што ќе се одржи утре и задутре, 24 и 25 септември, информираа денеска во изјава за МИА, министерот Азир Алиу и директорот на Клиниката, Оливер Зафировски.

– Скринингот ќе го вршат две екипи од Клиника за пулмологија со две амбулантни возила. Прегледите се наменети за сите заинтересирани од Трубарево и од околните населени места, а особено за лицата кои чувствуваат потешкотии при дишењето или имаат симптоми кои укажуваат на заболувања на дишните патишта – појасни министерот Алиу.

Предвидено е скринингот да опфати: комплетен клинички преглед, спирометрија, ЕКГ и други потребни прегледи.

– Нашата цел е да обезбедиме врвна здравствена грижа за сите граѓани. Доколку се појави потреба од дополнителни испитувања, тие ќе бидат извршени на самото место или пациентите ќе бидат упатени на Клиниката за пулмологија – појасни министерот Алиу.

Со оваа акција, како што посочи министерот, се овозможува навремено детектирање евентуални симптоми кај населението, со цел обезбедување на потребната здравствена заштита.

The post СКРИНИНГ НА НАСЕЛЕНИЕТО ВО ТРУБАРЕВО Кој има тегоби, може да се прегледа appeared first on plusinfo.mk.

Околу 1800 ученици од четири основни училишта во Трубарево од денеска продолжуваат настава со физичко присуство, откако со одлука на Владата и МОН минатата седмица учеа онлајн поради штетни материи по пожарот во магацинот за рециклирање отпад.

Министерката за образование и наука Весна Јаневска денеска изјави дека доколку добијат информации од надлежните министерства за загрозеност на здравјето на учениците и наставниците, повторно брзо ќе се реагира и тие ќе учат онлајн. Но, засега, рече, нема опасност.

– Учениците од четирите училишта во Трубарево од денеска се со физичко присуство. Доколку Министерството за животна средина или Министерството за здравство нè информираат за промена во состојбата, така како што промптно, во сабота и недела, одлучивме да одат на онлајн-настава, така повторно би го направиле тоа. Но, сега засега нема опасности и тие ќе си одат со физичко присуство затоа што нема подобра настава и не се постигнуваат подобри успеси на учениците освен со физичко присуство – изјави Јаневска при посетата на училиштето „Св. Наум Охридски“.

Од 14 до 19 септември, онлајн настава беше организирана во основните училишта „Крум Тошев“, „Његош“, „Вера Јоциќ“ и „Наум Наумовски Борче“ кои се на територија на општина Гази Баба.

The post УЧЕНИЦИТЕ ВО ТРУБАРЕВО СЕ ВРАЌААТ НА НАСТАВА СО ФИЗИЧКО ПРИСУСТВО Згасна опасноста од штетни материи по големиот пожар appeared first on plusinfo.mk.

Основното јавно обвинителство Скопје, по анализа на сите докази прибрани во предистрагата до овој момент, денеска донесе Наредба за спроведување истражна постапка против четири физички и едно правно лице за кривично дело – Загрозување на животната средина и природата со отпад од член 230 став 2 во врска со став 1 од Кривичниот законик.

The post ПРИТВОР ЗА 4 ЛИЦА ЗА ПОЖАРОТ ВО ТРУБАРЕВО Продолжува истрагата за еколошкиот инцидент appeared first on plusinfo.mk.