Ова е еден од најтешките денови оваа сезона на пожари на отворен простор. Имаме повеќе од 15 активни пожари во овој момент, околу 17 часот попладне. Два од нив загрозуваат и населени места, изјави попладнево директорот на ДЗС Стојанче Ангелов кој апелираше на поголема внимателност на граѓаните, бидејќи, како што рече, доволна е една искра за вистинска катастрофа.

– Пожарот којшто изби во непосредна близина на село Баница и Водоча, односно веднаш до Струмица, ги загрози дури и првите куќи од Струмица, е сопрен како што може да се забележи на неколку метри од самите куќи благодарение на брзата интервенција на храбрите струмички пожарникари, со поддршка на пожарникарите од Валандово и Радовиш коишто веднаш ги пратив овде да помогнат. Градоначалникот беше тука цело време, максимално употребувавме механизација за правење на пресеки и помогна и еден ер-трактор на Дирекцијата – рече Ангелов.

Тој додаде дека, за жал, пожарот е сè уште активен од спротива во полето, и изрази надеж дека нема да се прошири кон другите села.

-​ Вториот тежок пожар е на територијата на општина Прилеп, некаде спроти гробиштата, над гробиштата, којшто ги загрози викендиците, односно викенд населбата непосредно во близина на гробиштата. Сега тој е ставен под целосна контрола, таму работеа пожарникарите од Прилеп, на коишто им честитам на ваквата жестока битка со огнот, со поддршка на тимот од Битола и тимот од Кавадарци коишто дојдоа нешто подоцна, како и два ер-трактори на Дирекцијата за заштита и спасување – рече Ангелов.

Директорот на ДЗС додаде дека тешки пожари има и на територијата на општина Желино, односно пожарот којшто е некаде спроти областа Карпалак, којшто гори високо во планината, но, како што истакна, може да загрози неколку викендици и земјоделски површини. Таму, нагласи, се наоѓаат тетовските пожарникари. ​

– Тежок пожар имаме и на територијата на општина Маврово и Ростуше, којшто е активен во текот на вчерашниот ден, доцна во попладневните часови, но и сега. ​Исто така, имаме тешки пожари непосредно коишто изби во непосредна близина на Драчево, над бензинската пумпа, таму е скопската бригада, очекувам бргу да го изгаснат. ​Повторно имаме реактивиран пожар над Китка, којшто исто така се заканува да тргне кон некои од блиските села, планински, полунапуштени села, вели Ангелов.

Потенцира дека пожари има и на други места во земјава.

– За жал, нашите апели не вродуваат со плод, а високите температури коишто се блиску 40-тиот степен, ветерот кој што е засилен, но и го менува правецот, дополнително го отежнуваат гаснењето на овие пожари. Затоа апелирам до сите граѓани да бидат исклучително внимателни, затоа што доволна е искра за вистинска катастрофа – рече директорот на ДЗС Ангелов.

The post ОВА БЕШЕ ЕДЕН ОД НАЈТЕШКИТЕ ДЕНОВИ ОВАА СЕЗОНА Има уште 15 активни пожари, два загрозуваат куќи appeared first on plusinfo.mk.