На 30 јули, кога светот го одбележува Светскиот ден против трговија со луѓе, вниманието повторно е насочено кон еден од најтешките облици на организиран криминал. Годинашната порака на Обединетите нации „Заробени зад измамата“ предупредува дека криминалните мрежи сè почесто ги намамуваат луѓето со лажни ветувања за добро платена работа во странство, по што тие завршуваат во современо ропство, принудени да работат, да учествуваат во интернет-измами или да бидат сексуално експлоатирани.

Иако проблемот најчесто се поврзува со сиромашни земји, официјалните податоци покажуваат дека не ја одминува ниту Македонија. Според Советот на Европа, во периодот од 2019 до 2024 година во земјава биле идентификувани 46 жртви на трговија со луѓе.

Во најновиот извештај на американскиот Стејт департмент за 2025 година се наведува дека Македонија бележи одреден напредок во борбата против трговијата со луѓе, преку зголемени истраги, подобра идентификација на жртвите и нови оперативни процедури. Сепак, земјата сè уште не ги исполнува целосно минималните стандарди за елиминирање на овој криминал.

Во извештајот се посочува дека биле осудени помалку трговци со луѓе отколку претходно, а Основното јавно обвинителство за гонење организиран криминал и корупција немало доволно ресурси за да ги процесуира сите предмети. Дополнително, дел од локалните полициски служби и обвинителства не ги упатувале навремено сомнителните случаи до надлежните институции, а во одредени случаи користеле поблаги прекршочни наместо кривични постапки.

Стејт департментот забележува и дека Владата не обезбедила средства за мобилните тимови кои секоја година идентификуваат најголем број потенцијални жртви, иако претходно презела таква обврска. Исто така, не постои специјализирана поддршка за машките жртви, ниту долгорочни програми за рехабилитација и ресоцијализација за сите лица погодени од трговијата со луѓе.

Годинава Обединетите нации предупредуваат на нов тренд – жртвите најчесто се регрутираат преку интернет и лажни огласи за работа. Луѓето добиваат ветувања за високи примања во странство, а по пристигнувањето им се одземаат документите и се принудуваат да учествуваат во интернет-измами, финансиски измами или други облици на сајбер-криминал.

Генералниот секретар на Обединетите нации, Антонио Гутереш, оцени дека ова е една од најбрзо растечките форми на трговија со луѓе, која дополнително се поттикнува со развојот на современите технологии и вештачката интелигенција.

Глобалните размери на проблемот се загрижувачки. Според Меѓународната организација на трудот, во 2021 година околу 27,6 милиони луѓе живееле во услови на современо ропство. Освен присилен труд и сексуална експлоатација, трговијата со луѓе опфаќа и присилни бракови, домашно ропство, регрутирање деца во вооружени конфликти и нелегална трговија со органи.

Советот на Европа предупредува дека жртвите во Македонија често поминуваат низ долги судски и административни постапки, што дополнително ја отежнува нивната ресоцијализација. Особено загрижувачки се случаите на присилен брак на малолетни девојчиња, кои во одредени случаи претставуваат форма на трговија со луѓе.

Колку е сериозен проблемот покажува и меѓународната операција „Global Chain“, спроведена во јуни годинава во рамките на Европската мултидисциплинарна платформа против криминални закани (EMPACT), во која учествуваа 59 држави.

Во Македонија, за време на акцијата биле откриени три кривични дела за фалсификување исправи и 49 прекршоци, најголем дел сторени од странски државјани. Истражните органи отвориле и случај за нелегално посвојување поради сомневање за трговија со луѓе со цел присилно питачење.

На меѓународно ниво резултатите биле уште поалармантни – уапсени биле 1.024 лица, а идентификувани 2.070 жртви и потенцијални жртви, меѓу кои 162 малолетници.

Во Македонија, борбата против трговијата со луѓе ја спроведуваат Министерството за внатрешни работи, Националниот механизам за упатување, центрите за социјална работа, трудовите инспектори и невладините организации. Сепак, експертите предупредуваат дека се неопходни дополнителни мерки, меѓу кои создавање фонд за обесштетување на жртвите, поголема психосоцијална поддршка и поефикасно гонење на сторителите.

Современата трговија со луѓе одамна не се сведува само на присилен труд или сексуална експлоатација. Социјалните мрежи, интернетот и лажните понуди за работа стануваат главна алатка на криминалните мрежи за регрутирање нови жртви. Затоа институциите предупредуваат дека информираноста и навременото препознавање на ризиците остануваат една од најсилните алатки за спречување на овој тежок криминал.

The post ЛАЖНИ ВЕТУВАЊА, ВИСТИНСКО РОПСТВО Во Македонија откриени 46 жртви на трговија со луѓе, опасноста демне и на интернет appeared first on plusinfo.mk.

Москва сè почесто регрутира мажи од најсиромашните земји во светот за да ги испрати на првите линии на фронтот во Украина. Што им ветува?

Чарлс Мутока живее во Кенија. Седумдесет и двегодишниот маж сè уште жали по својот син, Оскар Кагола Мутока. Во летото 2025 година, поранешниот кениски војник заминал во Русија за да работи. Неговиот татко вели дека залудно се обидувал да го одврати од таа намера.

Оскар не му кажал на семејството каде точно оди. Само една недела подоцна испратил фотографија на која бил облечен во воена униформа. Потоа повеќе никогаш не стапил во контакт со нив. Подоцна семејството дознало дека загинал.

Семејството на Оскар Мутока не го добило ниту неговото тело, и покрај сите апели до кениските власти. Во мај 2026 година тие одржале симболична комеморација и направиле симболичен гроб, само за да имаат место каде што ќе можат да се помолат.

– Најлошо е што не знаеме дали и каде навистина е погребан. Или неговото тело едноставно било фрлено во некоја шума во Русија – вели Чарлс Мутока.

Оскар Мутока е еден од околу 27.000 странци за кои украинската воена разузнавачка служба ХУР проценува дека Русија ги регрутирала за да се борат во Украина.

Студија на Меѓународната федерација за човекови права (FIDH), организацијата „Truth Hounds“ и Казахстанското меѓународно биро за човекови права и владеење на правото (KIBHR) покажува дека Русија воспоставила глобална мрежа насочена кон регрутирање странски државјани.

– Регрутацијата е насочена кон луѓе кои се наоѓаат во економски, социјално и правно несигурна положба. Методите што се користат се движат од примамливи понуди и измами до директна принуда – објаснува за Дојче Веле, Илја Нусов, еден од авторите на студијата.

„Ве молам, извлечете ме одовде“

За многу луѓе од најсиромашните делови на светот, платата што ја нуди руската армија претставува главен мотив. Тие во тоа гледаат можност да избегаат од сиромаштијата и да им помогнат на своите семејства.

Токму затоа кубанскиот државјанин Јоан Вионди Мендоза прифатил работа во Русија. Му била ветена месечна плата од 2.000 американски долари. За Куба, каде што просечната месечна плата изнесува околу 20 долари, тоа претставува огромна сума.

Во Дојче Веле за неговата приказна дознале од неговиот брат Мајкл Дуро, кој живее во САД и се лекува од рак.

Јоан сакал да емигрира и да му се придружи на братот, но финансиските и административните пречки го спречиле во тоа. Набргу потоа пронашол понуда за работа во Русија.

– Јоан ми се јави и ми рече дека нашол излез. Ми раскажа за еден „проект“ во Русија – се присетува Мајкл Дуро.

Тој безуспешно се обидувал да го разубеди.

Во септември 2023 година, агенцијата Ројтерс снимила група млади Кубанци кои планирале да заминат во Русија. Меѓу нив бил и Јоан Мендоза.

– Сите велеа: „Го правам ова за да не гладувам на Куба“. Тие точно знаат каде одат, а знам и јас – изјавил тогаш 23-годишниот Мендоза.

Тој им ја покажал преписката со регрутерот, кој му напишал:

„Ова е договор со руската армија. Ќе добиете руско државјанство“.

Мајкл Дуро раскажува дека неговиот брат бил испратен на фронтот во Украина, од каде што се обидел да избега.

– Ме молеше: „Згрешив. Простете ми. Ве молам, извлечете ме што побрзо одовде“ – раскажува Мајкл.

Но, контактот со Јоан бил изгубен. Подоцна неговото име се појавило на списокот на загинати странски државјани што го објавила Украина.

„Нè користеа како жив штит“

Јоан Мендоза и Оскар Мутока веројатно знаеле дека одат во Русија за да учествуваат во војната во Украина.

Но, многу други странци биле измамени.

Ним им биле ветувани работни места во градежништвото, обезбедувањето, логистиката или земјоделството.

Тоа му се случило на Арман Мондол од Бангладеш.

Младиот човек се надевал дека со работа во странство ќе го извлече своето семејство од сиромаштија. Неговиот татко, земјоделец, ја продал земјата и зел кредит за да му плати на посредникот.

На Мондол му било кажано дека ќе работи во магацин за пакување стока.

Во Русија пристигнал преку Саудиска Арабија со туристичка виза.

Таму, како што тврди, бил принуден да потпише договор на руски јазик, кој воопшто не го разбирал.

Мондол раскажува дека тој и другите странци биле многу лошо третирани во руската армија.

– Секогаш кога одевме на задача, нас нè испраќаа напред, а тие остануваа зад нас. Нè користеа како жив штит и први нè туркаа во борба – сведочи тој.

За време на една таква мисија, возилото во кое се наоѓал Арман налетало на мина.

Преживеале само двајца, а Арман бил еден од нив.

Тој бил префрлен во воена болница, од каде што успеал да избега.

Амбасадата на Бангладеш во Москва подоцна му помогнала да се врати дома.

Но, ужасите од војната и денес го прогонуваат.

– Сè уште ми се пред очи тие сцени, луѓе што умираат, нивните очи, нивните обезличени лица. Како мините ги разнесуваа. Како еден по друг налетуваа дронови. Луѓе со откорнати екстремитети. Беше ужасно – вели Мондол.

Тој и денес има шрапнели во едната нога и тешко се движи.

Поради повредите уште потешко наоѓа работа во родното село во Бангладеш.

Платеници или жртви на трговија со луѓе?

Странците кои се борат на страната на Русија често се нарекуваат платеници.

Но, Илја Нусов објаснува дека, според меѓународното право, тие формално не можат секогаш да се сметаат за платеници, бидејќи многумина добиваат руско државјанство пред да ѝ се приклучат на армијата.

Други, пак, воопшто немале намера да учествуваат во борбени операции.

Таквите случаи можат да се квалификуваат како трговија со луѓе, доколку се докаже дека биле измамени, принудени и пренесени со цел експлоатација.

Тоа претставува прекршување на Конвенцијата на Обединетите нации против транснационалниот организиран криминал, како и на Протоколот од Палермо, кој ја забранува трговијата со луѓе, а кој го има ратификувано и Русија.

Руските власти, пак, тврдат дека сите странски државјани доброволно учествуваат во војната во Украина.

Во март рускиот министер за надворешни работи Сергеј Лавров, на заедничка прес-конференција со својот кениски колега, изјави дека Русија никого не регрутира присилно.

– Доброволците учествуваат во оваа специјална воена операција целосно во согласност со руските закони – рече Лавров.

Од Дојче веле побарале коментар и од руското Министерство за надворешни работи, но до објавувањето на текстот не добиле одговор.

Сè повеќе странски регрути

Во меѓувреме, регрутирањето странски државјани привлекува сè поголемо внимание.

Семејствата на мажите кои заминале во Русија протестираат во повеќе земји – од Непал до Перу.

Политичари, меѓу кои и индискиот премиер Нарендра Моди, го отвораат ова прашање и на средбите со рускиот претседател Владимир Путин.

Според медиумските извештаи, Русија во февруари 2026 година го ограничила регрутирањето граѓани од повеќе „пријателски“ држави, но списокот никогаш не бил објавен.

– Во одредени случаи тоа помогна привремено да се намали или дури да се запре приливот на борци од одделни земји. Но, претпоставуваме дека Русија има механизми со кои го надоместува тоа, префрлајќи го фокусот кон други држави – вели Илја Нусов.

Според проценките на украинскиот Координативен штаб за третман на воени заробеници, Русија во текот на 2026 година би можела да регрутира до 18.500 странски државјани за војната.

– Наместо бројот да се намалува, регрутирањето странци продолжува да расте – заклучува Нусов.

The post 📽️ РУСИЈА ГИ КОРИСТИ СТРАНЦИТЕ КАКО ЖИВ ШТИТ ВО ВОЈНАТА Илјадници луѓе од сиромашни земји привлечени со лажни ветувања и високи плати appeared first on plusinfo.mk.

Повеќе од 300 мигранти, кои минатото лето се упатиле кон Велика Британија, биле киднапирани, мачени и добивале закани дека присилно ќе им бидат одземени органи – дознава Би-би-си.

Минатото лето групи мигранти од ирачки Курдистан летале за Либија, каде што биле однесени во комплекс, а подоцна затворени по наводен спор во врска со плаќањето помеѓу либанската милиција и ирачкиот шверцер Ноа Арон.

Според информациите, милицијата барала 5.000 долари за секој заложник, а семејствата биле предупредени дека „исплатата ќе се изврши со бубрег“ ако парите не бидат платени за кратко време.

Во јануари 110 заложници биле вратени дома со авион организиран од ирачката влада и не е познато колкумина сè уште се во притвор.

Поранешни затвореници рекле дека биле држени „во тесни простории, со речиси 180 лица со кои ја делеле ќелијата“, а се знае дека најмалку еден заложник починал.

Таткото на еден од заложниците изјави за Би-би-си дека групата на Арон му наплатила на неговото семејство илјадници долари за да организира патување до Велика Британија, кое вклучувало патување низ Северна Африка и преку Медитеранот до Европа.

Тој исто така покажа фотографија од својот син, на која се гледа лузна за која се стравува дека е од присилно отстранување органи.

Поранешните затвореници исто така споделија вознемирувачки и насилни видеа, од кои едно прикажува млад човек кому му е кажано дека го носат на лекар за да му го отстранат бубрегот.

„Не видовме сонце шест месеци. Беше толку тесно што сите мораа да спијат седејќи. Сите затвореници делеа еден тоалет, а кој ќе останеше предолго, ќе беше претепан“, рече 16-годишно момче.

На заложниците им се даваше парче леб дневно само ако нивните семејства им исплатеа на киднаперите дополнителни суми пари, објави Би-би-си.

Висок функционер на Министерството за внатрешни работи на регионалната влада на Курдистан, Хемин Мерани, рече дека и покрај ризиците, протокот на нелегални мигранти од ирачки Курдистан кон Европа не запре повикувајќи ги заложниците да ги споделат своите искуства со своите роднини за да ги одвратат од истото патување.

Ноа Арон моментно издржува 10-годишна затворска казна во Франција за други кривични дела поврзани со перење пари и шверц.

Деталите за овие киднапирања се појавија за време на истрагата на Би-би-си за Кард Џафа, за кој се верува дека работел со Арон во минатото.

Џафа и Арон се од истиот град Ранџа, во Курдистан, регион познат по „преполните активни мрежи за шверц“, се наведува во извештајот на Чатам Хаус.

The post АКО НЕМАШ ПАРИ, ЌЕ ПЛАТИШ СО БУБРЕГ! Повеќе од 300 мигранти киднапирани и малтретирани на пат кон Британија appeared first on plusinfo.mk.

Тврдење спроти тврдење ја разгоре расправата во американската политика. Поранешниот државен секретар и екс прва дама Хилари Клинтон изјави дека не се сеќава оти некогаш се сретнала со сексуалниот претстапник Џефри Епстин.

Клинтон сведочеше пред Надзорниот комитет на Претставничкиот дом. По излегувањето, таа кусо им се обрати на новинарите.

„Не се сеќавам“

– Не се сеќавам дека некогаш сум се сретнала со г-дин Епстин. Никогаш не летав со неговиот авион, ниту ги посетив неговиот остров, домови или канцеларии – рече Клинтон во седумчасовното испрашување.

Во писмена изјава додаде дека нема информации за неговите криминални активности.

Од друга страна, Жилејн Максвел, главната соработничка на Епстин, во 2025 година изјави дека таа ги поврзала сопругот на Хилари, екс претседателот Бил Клинтон и Епстин. Според осудената Максвел кој одлежува затворска казна, Епстин присуствувал на настан во Белата куќа во раните 1990-ти.

Сенката на Пицагејт

Во седумчасовното сведочење Хилари Клинтон рече дека во доцната фаза од сослушувањето прашањата станале необични.

– Почнаа да ме прашуваат за НЛО и за Пицагејт, една од најодвратните лажни теории на заговор – изјави таа.

Теоријата „Пицагејт“ кружеше во 2016 година. Се тврдеше дека пицерија во Вашингтон била центар на мрежа за злоупотреба на деца. Ниту една официјална истрага не ја потврди таа приказна.

„Трамп кажа доволно“

Во подготвеното сведочење, Клинтон ја обвини комисијата дека го пренасочува фокусот од врските на Доналд Трамп со Епстин. Епстин почина во 2019 година во затвор, додека чекаше судење за федерални обвиненија за трговија со луѓе. Смртта беше прогласена за самоубиство.

Претседателот на комитетот, Џејмс Комер, ја отфрли идејата Трамп да сведочи.

– Претседателот Трамп одговори на стотици прашања за Епстин и беше транспарентен во објавувањето документи – рече Комер.

„Тие што го запознаа пред 2008 не знаеја“

За денеска, 27 февруари, се очекува сведочењето на сопругот на Хилари, Бил Клинтон. Хилари рече дека тој ќе истакне оти мнозинството луѓе кои имале контакт со Епстин пред 2008 година не знаеле за неговите злосторства.

– Токму за тоа ќе сведочи мојот сопруг утре – изјави таа.

Во јавноста кружат неколку фотографии од Бил Клинтон. Една го прикажува како плива ноќе со соработничката на Епстин, Жилејн. Друга ги прикажува Бил со Епстин зад сцената на концерт на Ролинг Стоунс во Хонг Конг. Трета фотографија, без датум, го прикажува во џакузи покрај човек со заматено лице.

„Надарен како коњ“

Во досиејата за Епстин кои ги објави американското Министерство за правда се споменува и главниот помошник на Клинтон, Даг Бенд. Нивните е-пораки од периодот 2002-2004 година откриваат интимна и флертувачка врска, испреплетена со ласкање и сексуални алузии.

Бенд ја нарекол своја „љубовница“, додека Максвел им возвратила на комплиментите, нарекувајќи го „одличен човек“ и „надарен како коњ“. Нема докази дека Бенд сторил некаков прекршок, а подоцна изјавил дека немал физичка врска со Максвел и ја опишал како „чудовиште“.

Максвел беше осудена во 2021 година за регрутирање и подведување малолетници за сексуална злоупотреба на Епстин.

The post НЕ ГО ЗАПОЗНАВ ЕПСТИН, ЗОШТО МЕ ПРАШУВАТЕ ЗА НЛО И ПИЦАГЕЈТ? Хилари Клинтон 7 часа сведочеше во Претставничкиот дом appeared first on plusinfo.mk.

Детективите апелираа до поранешните телохранители на Ендрју Маунтбатен-Виндзор да достават какви било информации релевантни за истрагата за осудениот педофил Џефри Епстин и неговите соработници. Лондонската полиција соопшти дека соработува со своите американски колеги за да утврди дали лондонските аеродроми се користат за олеснување на трговијата со луѓе и сексуалната експлоатација, објавува „Гардијан“.

Апелот доаѓа откако Маунтбатен-Виндзор беше уапсен во четврток под сомнение за злоупотреба на службена должност. Поранешниот принц беше задржан во притвор 11 часа пред да биде ослободен додека истрагата продолжува.

Полицијата издаде соопштение во петокот во кое се вели дека ги идентификуваат и контактираат поранешните и сегашните полицајци кои работеле на заштитата на Ендрју Маунтбатен-Виндзор.

„Од нив е побарано внимателно да размислат дали нешто што го виделе или слушнале за време на тој период на служба е релевантно за нашите тековни истраги и да споделат какви било информации што би можеле да ни помогнат“, се вели во соопштението.

Тие додадоа дека не добиле никакви нови извештаи за наводни сексуални злосторства откако Министерството за правда на САД објави милиони страници документи поврзани со Епстин.

„Продолжуваме да ги повикуваме сите што имаат нови или релевантни информации да се јават. Сите обвинувања ќе бидат сфатени сериозно и, како и во секој друг случај, сите добиени информации ќе бидат оценети и истражени каде што е соодветно“, соопшти полицијата.

Полицијата претходно ги истражуваше обвинувањата дека обезбедувањето на Маунтбатен-Виндзор „затворило очи“ пред неговите посети на островот Литл Сент Џејмс на Епстин, но до денес не е пронајдено никакво прекршување во нивните постапки. Неговата главна тужителка, Вирџинија Џуфре, тврдеше дека имала сексуални односи со него за време на оргии со малолетни девојки на карипскиот остров. Поранешниот принц претходно ги негираше сите обвинувања.

The post СЕ БАРААТ ИНФОРМАЦИИ ОД СИТЕ ПОЛИЦАЈЦИ ШТО ГО ОБЕЗБЕДУВАЛЕ ПРИНЦОТ ЕНДРУ Истрагата повикува да се јават и жртвите на Епстин appeared first on plusinfo.mk.

Извршителите на тестаментот на осудениот финансиер Џефри Епстин се согласија од неговиот имот да се исплатат до 35 милиони долари за решавање на колективната тужба во која неговите двајца блиски соработници се обвинети за помагање и поддржување на трговија со млади жени и малолетнички, се наведува во судски поднесок објавен вчера.

Спогодбата ја објави адвокатската фирма „Боис Шилер Флекснер“ (Boies Schiller Flexner), која ги застапува жртвите на Епстин, во документ поднесен до сојузниот суд во Менхетен. Доколку судот го одобри договорот, со тоа ќе заврши тужбата поднесена во 2024 година против долгогодишниот личен адвокат на Епстин, Дарен Индике и сметководителот Ричард Кан, кои воедно се и извршители на неговиот тестамент.

Претходно веќе беше воспостави фонд за отштета од кој на жртвите од тестаментот им беа исплатени вкупно 121 милион долари, со дополнителни 49 милиони долари преку поединечни спогодби.

Адвокатот на Индике и Кан, Даниел Х. Вајнер нагласи дека неговите клиенти не признале никаква вина во рамките на постигнатиот договор.

– Бидејќи не направија ништо погрешно, извршителите беа подготвени да се бранат на судење, но се согласија на медијација и спогодба за конечно да се решат сите потенцијални барања против имотот на Епстин – наведе Вајнер во писмена изјава.

Тој додаде дека договорот ќе овозможи „доверлив начин за финансиска компензација“ на жртвите кои претходно не ги решиле своите барања.

Џефри Епстин почина во затвор во Њујорк во август 2019 година, додека чекаше судење по обвиненијата за трговија со малолетнички. Неговата смрт официјално беше прогласена за самоубиство.

Во тужбата од 2024 година се наведува дека Индике и Кан му помогнале на Епстин да воспостави сложена мрежа на компании и банкарски сметки, што му овозможило да го прикрие злоставувањето и да им исплаќа пари на жртвите и посредниците, додека за својата работа биле „богато наградени“.

Адвокатската фирма „Боис Шилер Флекснер“ претходно исто така обезбеди спогодби во вкупна вредност од 365 милиони долари со банките „Џеј-Пи Морган Чејс“ и „Дојче Банк“ кои беа обвинети дека ги игнорирале предупредувачките знаци за активностите на Епстин, иако тој бил нивен профитабилен клиент.

The post 35.000.000 ДОЛАРИ ЗА ЖРТВИ НА МРЕЖАТА НА ЕПСТИН Се спогодија со извршителите на неговиот тестамент appeared first on plusinfo.mk.

Британската полиција проценува дали Џефри Епстин превезувал жени преку два лондонски аеродроми со приватни летови, како дел од сега национално координираниот напор за истрага на врските на починатиот сексуален престапник со Велика Британија.

Две регионални полициски сили изјавија во среда дека ги разгледуваат информациите за приватните летови поврзани со Епстин откако американската влада објави милиони документи кон крајот на јануари.

Полицијата од Есекс соопшти дека испитува летови до и од аеродромот Станстед, североисточно од Лондон, додека полицијата од Бедфордшир соопшти дека ги проценува летовите до и од аеродромот Лутон, северозападно од главниот град.

Нивните проценки, кои не претставуваат целосна истрага, следеа по формирањето на национална координативна група за поддршка на поединечните полициски сили во испитувањето на врските на Епстин со Велика Британија или британски државјани.

„Продолжуваме да работиме заедно за да ги процениме деталите што стануваат јавни, што ќе ни овозможи да разбереме какво било потенцијално влијание што произлегува од милионите објавени документи“, се вели во соопштението на Националниот совет на шефови на полиции.

„Би-би-си“ минатата година објави дека нецелосните дневници на летови и патничките манифестации покажале дека 87 летови поврзани со Епштајн слетале или полетале од британските аеродроми од почетокот на девеесеттите до 2018 година, а меѓу патниците се наведени „неидентификувани жени“.

Документите од досиејата на Епстин содржат повеќекратни референци за Станстед, вклучително и една што разгледува дали руски државјанин со американска виза може да се префрли на аеродромот. Досиејата, исто така, вклучуваат десетици референци за британски визи.

Аеродромот „Станстед“ соопшти дека приватните летови не се управувани од неговиот терминал и дека Граничните сили се одговорни за имиграциските и царинските проверки.

Граничните сили не одговорија на барањето за коментар, но според нивните правила, сите лица што доаѓаат во Велика Британија подлежат на темелни проверки.

Поранешниот премиер Гордон Браун изјави дека досиејата „во детали покажуваат како педофилот-финансиер Епстин можел да го користи аеродромот во Есекс за „довезување девојки од Летонија, Литванија и Русија. Полицијата во Норфолк потврди дека исто така ги разгледува документите на кои им било укажано, но рече дека сè уште не примиле никакви формални обвинувања и моментално не спроведуваат истраги. Полицијата во Бедфордшир наводно ги истражува летовите од Лутон.

The post ПОРАДИ ЕПСТИН ПОД ИСТРАГА СЕ НАЈДОА И ДВА ЛОНДОНСКИ АЕРОДРОМA!? Се проверува дали замижувале пред трговијата со жени со приватни летови appeared first on plusinfo.mk.

Милијардерот Илон Маск се огласи на социјалните мрежи откако неговото име се појави во новиот пакет објавени документи поврзани со осудениот сексуален престапник Џефри Епштајн, кои вклучуваат е-мејл преписка од 2013 година.

Според објавените мејлови, Маск во декември 2013 година разменувал пораки со Епштајн за можна посета на неговиот карипски остров, додека посебна преписка покажува дека Епштајн во февруари истата година се обидувал да договори ручек со Маск.

Маск на Х наведе дека имал многу ограничена комуникација со Епштајн и дека одбил повеќекратни покани да го посети неговиот остров или да патува со неговиот авион.

Тој истакна дека е свесен дека дел од преписката може погрешно да биде протолкувана, но оти тоа не го загрижува. Маск додаде дека силно се залагал за објавување на документите за Епштајн и нагласи дека е важно кривично да се гонат оние кои сториле тешки кривични дела, особено во случаите на сексуално искористување малолетнички.

– Свесен сум дека дел од мојата преписка со Епштајн може погрешно да се протолкува. Ниту едно лице не се залагало посилно од мене за објава на документите за Епштајн и мило ми е што тоа конечно се случи, наведе Маск на Х.

The post ВО ПРЕПИСКИТЕ НА ЕПШТАЈН ГО ИМА И ИЛОН МАСК Тој се огласи со објаснување appeared first on plusinfo.mk.

Министерството за правда на САД синоќа објави огромна количина документи поврзани со осудениот финансиер и сексуален престапник Џефри Епштајн, вклучувајќи повеќе од три милиони документи и фотографии, како и нова, помала транша записи.

Најновата објава, означена како „Сет податоци 12“, содржи нешто повеќе од 150 документи, главно повеќестранични, од кои голем дел се преписки преку мејлови, пренесува Си-Би-Ес.

Објавувањето следи откако претходно истиот ден Министерството за правда на САД ја направи достапна големата архива материјали во согласност со Законот за транспарентност на досиејата за Епштајн.

Меѓу објавените документи се наоѓа и нацрт-обвинение од 56 страници кои сојузните обвинители на Флорида го подготвиле во средината на 2000-тите, а со кои Епштајн требало да биде обвинет по вкупно 30 кривични точки, вклучувајќи трговија со луѓе со цел сексуална експлоатација, подведување малолетници, завера и други кривични дела.

Во документите се наведува дека во поединечни случаи жртвите биле плаќани, како и дека биле поттикнувани да регрутираат други малолетнички. Обвинението никогаш не беше подигнато, а случајот заврши со контроверзен договор од 2007 година, кој на Епштајн му овозможи да избегне сојузно гонење.

Документите, исто така, содржат мејлови кои укажуваат на контакти на Епштајн со бројни влијателни поединци. Објавената преписка покажува дека американскиот министер за трговија Хауард Лутник и неговото семејство престојувале на приватниот остров на Епштајн во 2012 година, иако Лутник претходно тврдеше дека ги прекинал односите со Епштајн уште во 2005 година. Неговиот портпарол наведе дека Лутник никогаш не бил обвинет за незаконско однесување.

Мејлови од 2018 и 2019 година покажуваат дека Епштајн им подарил „Хермес“ и Епл часовници на поранешниот советник на Трамп, Стив Бенон и на неговиот син, како и дека Бенон учествувал во неуспешниот обид на Епштајн да го поправи својот јавен имиџ преку планиран документарен филм.

Посебна преписка открива дека Епштајн поврзувал жени со косопственикот на американскиот фудбалски тим Њујорк Џајантс, Стив Тиш, со детални и експлицитни коментари за нив. Тиш во изјавата наведе дека жали поради контактот со Епстин и дека никогаш не го посетил неговиот остров.

Меѓу објавените имејлови е и пораката од 2015 година во која тогашната советничка на Белата куќа, Кетрин Румлер напишала дека го „обожава“ Епстин. Румлер подоцна јавно изјави дека жали што некогаш го запознала.

Новообјавените судски документи покажаа и дека американскиот милијардер Илон Маск имал пообемна и поблиска комуникација со Епстин отколку што е познато и дека тие разменувале пријателски мејлови.

Документите покажуваат и дека поранешниот британски принц Ендрју Маунтбатен-Виндзор присуствувал, заедно со други познати личности, на интимна вечера со Епстин, неколку месеци откако тој бил пуштен од затвор.

Министерството за правда на САД соопшти дека при објавувањето на документите поврзани со Епстин не оштетило ниту едно лице, вклучувајќи го и американскиот претседател Доналд Трамп. Министерството наведе дека објавувањето на документите ќе продолжи во согласност со законот, со затемнување на чувствителните податоци, посебно оние кои се однесуваат на жртвите.

Новиот материјал е објавен откако Министерството за правда го проби рокот за доставување на сите документи предвидени со Законот за транспарентност на досиејата на Епстин, кој е потпишан на 19 ноември и со кој на државната обвинителка на САД, Пем Бонди ѝ е даден рок од 30 дена да ја објави комплетната архива на тоа министерство во врска со Епстин.

The post НОВИ ДОКУМЕНТИ НА ЕПШТАЈН ОТКРИВААТ ЗАБОШОТЕНА ИСТРАГА ОД 2000 ГОДИНА Со обвинителите на Флорида била постигната контроверзна вонсудска спогодба appeared first on plusinfo.mk.

Координирана глобална акција, водена од Интерпол, резултирала со апсење на над 3.700 осомничени и со обезбедување помош и заштита за 4.400 потенцијални жртви на трговија со луѓе и со мигранти.

Акцијата, симболично наречена „Либертера III“, се спроведувала од 10 до 21 ноември. Во неа учествувале околу 14.000 полициски службеници од 119 држави, распоредени на клучни точки низ светот, информираше Интерпол на својот сајт и во објава на Икс.

Во рамките на операцијата биле извршени 3.744 апсења. Идентификувани биле 12.992 лица вмешани во шеми за нелегална миграција.
Заштитени биле 4.414 потенцијални жртви на трговија со луѓе.

Криминал што мутира

Надлежните служби покренале и најмалку 720 нови истраги. Целта била јасна – целосно разбивање на мрежите што постојано ја менуваат тактиката.

Генералниот секретар на Интерпол, Валдеси Уркиса, предупредил дека криминалните групи постојано еволуираат.

– Криминалните мрежи се развиваат користејќи нови рути, дигитални платформи и ранливи групи од населението – рекол Уркиса.

– Идентификувањето на овие модели им овозможува на органите на прогонот навремено да ги предвидат заканите, порано да ги разбијат мрежите и подобро да ги заштитат жртвите – додал тој.

Global operation safeguards 4,400 potential trafficking victims, detects 13,000 irregular migrants

Operation Liberterra III saw the arrest of 3,744 suspects, including more than 1,800 for human trafficking and migrant smuggling offences, based on initial reporting from… pic.twitter.com/Fe5LISK2l1

— INTERPOL (@INTERPOL_HQ) January 26, 2026

Нови правци на злоупотреба

Интерпол посочил дека се забележува значајна промена во моделите на трговија со луѓе. Сѐ почесто се регистрирале случаи со јужноамерикански и азиски државјани во Африка, што претставува отстапување од досегашните практики.

Паралелно, измамите поврзани со трговијата со мигранти остануваат сериозен проблем.

Мигрантите често биле транспортирани по исклучително опасни маршрути, долж бреговите на Сенегал, Гвинеја Бисао, Мароко и Алжир, како и преку копнени мрежи во Перу, Бразил и други земји.

Западна Африка под лупа

Властите во Бенин, Буркина Фасо, Брегот на Слоновата Коска, Гана, Сенегал и Сиера Леоне информирале за заеднички акции во кои биле спасени повеќе од 200 жртви.

Истовремено биле разбиени бројни центри за регрутација и експлоатација, јадра на криминалниот ланец што со години функционирал во сенка.

The post УДАР ВРЗ КРИМИНАЛОТ СО ТРГУВАЊЕ ЛУЃЕ ВО 119 ДРЖАВИ Над 3.700 уапсени во глобална операција, спасени 4.400 потенцијални жртви appeared first on plusinfo.mk.