Полска и Европа, сè додека е Русија ваква каква што е, империјална и неокомунистичка, не смеат да се однесуваат неодговорно кон својот сојузник САД и да го навредуваат претседателот Доналд Трамп, вели полскиот претседател Карол Навроцки.

– Никој нема да ме убеди дека создавањето европска армија во контекст на империјална, криминална, неокомунистичка Русија пред Европа ни дава основа да се однесуваме на таков неодговорен начин кон нашиот сојузник САД. Ова не е добро за Полска. Не се согласувам со фактот дека тие го навредуваат шефот на државата на нашиот сојузник – рече Навроцки во полскиот поткаст на Канал Зеро.

Полскиот претседател рече дека новинарите и јавноста реагираат несоодветно и премногу импулсивно на честите контроверзни објави на американскиот претседател на социјалните мрежи. Сепак, Навроцки призна дека Трамп претерал во објавите за папата и особено каде што се претставува како Исус.

– Секако, објавите за Исус не ме прават среќен. Ние не сме богови, ние не сме Исуси, ние сме претседатели. Тој е претседател на најголемата сила, но тој не е Исус. Тој е свесен за тоа. За мене, како активен верник, католик кој сè уште редовно го чита Светото писмо, ова е секако неприфатливо – рече Навроцки.

Полскиот претседател нагласи дека Трамп, бидејќи е најмоќниот човек во светот како претседател на САД, мора да биде сфатен сериозно од сите. Тој верува дека сè е во ред со Трамп и верува и во ветувањата што Трамп ги даде на Полска, бидејќи досега ги исполнил сите и тоа е единственото нешто што треба да го интересира полскиот претседател.

– Истиот Доналд Трамп, како голем пријател на Полска, нè покани на Г20. Истиот Трамп, кога го намалуваше бројот на американски војници во Бугарија и Романија, по средбата со мене, прифати американските војници кои ја гарантираат нашата безбедност да останат во Полска. Истиот Трамп е претседател на моќта што ни е потребна,  економски, технолошки, инвестициски – рече претседателот.

Тој додаде дека САД ќе ѝ бидат потребни на Полска воено најмалку до 2035 година.

Претседателот Навроцки избегна да одговори на прашањето дали Израел врши воени злосторства во Газа бидејќи, како што рече, класификацијата дали нешто е воено злосторство или геноцид е формално правно прашање, а тој е историчар и не е судија или адвокат.

– Секој што гледа што се случува во Палестина е вознемирен. Израел сигурно ја преувеличи воената реакција во Газа. Не сум рамнодушен. Израел е наш сојузник, но она што го гледаме во Газа предизвикува немири во полското општество. Ниту една земја не смее да убива цивили за време на воен конфликт. Не го прифаќам она што се случува на Блискиот Исток, ниту пак третманот на Израел кон цивилите, жените и децата – рече полскиот преттседатекл  Карол Навроцки.

The post ЕВРОПА НЕ СМЕЕ ДА ГО НАВРЕДУВА ТРАМП Неговите објави за Исус не ме прават среќен, вели полскиот претседател Навроцки appeared first on plusinfo.mk.