Престолонаследникот на Мароко, 22-годишниот Мулеј Ел Хасан, станува централна фигура на дебата за модернизацијата на една од најстарите монархии во светот, откако на социјалните мрежи се појавија вирални видеа кои прикажуваат необично однесување за кралскиот протокол – одбивање на традиционалното бакнување на рака и инсистирање на директен контакт и ракување.

Според објавите што масовно се споделуваат на платформи како „X“ и „TikTok“, идниот крал на Мароко не дозволува соговорниците да му ја бакнуваат раката, туку во последен момент ја повлекува и преферира цврсто ракување, проследено со разговор „очи во очи“.

Иако дел од овие описи се проширени во вирален контекст и добиваат драматична интерпретација, снимките кои кружат во јавноста навистина покажуваат поинаков стил на кралско однесување од оној што со децении е дел од мароканската традиција.

لا ينظر ولي عهد المغرب البالغ من العمر 22 عاماً حتى إلى أولئك الذين يحاولون تقبيل يده، بل ينخرط في محادثات طويلة مع أولئك الذين يكتفون بمصافحته. pic.twitter.com/qtp90H5kWS

— نواف (@ah___74) June 1, 2026

Во Мароко, бакнувањето на рака на кралот и престолонаследникот претставува длабоко вкоренет ритуал на почит и лојалност. Но младиот Ел Хасан, кој е образуван по современи стандарди и често се појавува на официјални настани, очигледно промовира поинаков пристап.

Аналитичарите на кралските протоколи ваквото однесување го толкуваат низ неколку аспекти. Според нив, станува збор за обид за приближување до јавноста и намалување на дистанцата меѓу власта и граѓаните, како и за генерациска промена во стилот на дипломатски бонтон. Дел од експертите сметаат дека ваквиот гест испраќа порака за скромност и еднаквост во комуникацијата, додека други го гледаат како јасно влијание на западниот модел на однесување.

Иако официјална реакција од кралската палата нема, видеата предизвикаа бурни реакции на социјалните мрежи, каде јавноста е поделена.

Еден дел од коментаторите го поздравуваат потегот, оценувајќи го како знак на модерност и уривање на „старите бариери“.

„Ова е вистинска понизност, наместо дистанца, добиваме човек што разговара со тебе како рамноправен“, гласи еден од коментарите.

Други, пак, сметаат дека станува збор за непочитување на традицијата и симболиката на кралскиот протокол.

„Бакнувањето на рака е највисок чин на почит. Со неговото избегнување, се губи суштината на културата“, пишуваат критичарите.

Скептиците одат и чекор понатаму, тврдејќи дека целиот „вирален феномен“ можеби е дел од внимателно изграден јавен имиџ и современа ПР-стратегија, а не вистинска револуција во кралското однесување.

Без разлика на толкувањата, едно е јасно – престолонаследникот на Мароко веќе го привлекува глобалното внимание и отвора прашање дали традицијата и модерноста можат да коегзистираат во највисоките симболи на власта.

The post 📽️ РАКУВАЊЕ И ГЛЕДАЊЕ ВО ОЧИ НАМЕСТО БАКНУВАЊЕ РАКА Принцот на Мароко ја менува вековната традиција appeared first on plusinfo.mk.

Зетот и невестата, ѓаволите, Глупавите Августи, па дури и „Шареното племе“ од Африка – сите оживеаја на улиците на Вевчани. Под зимското сонце, меѓу звуците на зурлите и тапаните, вевчанци ја испишаа новата страница од својата вековна традиција.

Оваа година, нивната сатира ја погледна стварноста право во очи. Меѓу маските се појавија мигрантската криза, судството, домашната политика, војната во Украина, па дури и односите меѓу Доналд Трамп и Куба. Голема смеа предизвика и групната маска со алузија на кампањата на кумановскиот градоначалник Максим Димитриевски, како и движењето ЗНАМ.

Карневалот започна околу 15 часот, кога дефилето со стотици маски одекна по тесните вевчански улички. Мешавината од дим, мирис на вино и народен хумор ја претвори селската улица во сцена на која сатирата стана народна уметност. Вевчанци не заборавија никого. Ниту Владимир Путин, ниту Доналд Трамп, ниту виртуелната министерка од Албанија, ниту инвеститорите во Дубаи.

Европско признание за македонската уникатност

Меѓу гостите од земјата и странство беше и премиерот Христијан Мицкоски, а свеченото отворање го направи министерот за култура и туризам Зоран Љутков.

– Нешто што има традиција илјадници години не може да нема посебно место во македонската култура. Карневалот ги третира слободната мисла, хуморот, сатирата и критиката кон општеството, не само кај нас, туку и во целиот свет – изјави Љутков.

Министерството, како што нагласи, продолжи да го финансира настанот со еден ипол милион денари годишно – симболичен облог дека традицијата ќе живее уште илјадници години.

Традицијата повторно ја следеше и претседателот на Федерацијата на европски карневалски градови, Ларс Алгел.

– Вевчанскиот карневал е нешто уникатно. Мислам дека е најстар во Европа. Со оваа традиција е единствен и неверојатен – рече Алгел.

Оро, василичари и кашаник со паричка

Градоначалникот Спасе Кочовски очекуваше уште едно успешно издание што ќе ја испрати старата и ќе ја дочека новата година со нова енергија.

По василичарското оро во центарот, групите продолжија од куќа до куќа со благослови за здравје и бериќет. Домаќините ги даруваа со леб, луканци, пари и други ситни дарови.

Ноќта, василичарите, придружени од селаните, заминаа кон изворите каде што наполнија вода за „кашаникот“ – зелник во кој се стави паричка. На оној што ја најде, се верува дека ќе му оди од рака цела година.

Следниот ден, на празникот Свети Василиј Велики, селото оживеа со имендени, ора и – традиционално – палење на маските за да се избрка злото и да се отвори патот за нов почеток.

Нова година по стар календар

Дочекот на Новата година според Јулијанскиот календар се одржа во центарот на Вевчани. Свиреа Благоја Грујовски, Влатко Миладиновски со оркестарот на Златко Миладиновски, оркестарот со зурли и тапани „Вевчани“ и Перо Бели со групата „Вип“.

Манифестацијата, што започна со настапите на Влатко Лозаноски, „Пука козметика“ и „Брас брадрс“, уште еднаш покажа дека Вевчани не е само село — тоа е сцена каде што хуморот ја чува слободата, а традицијата ја оживува годината што замина.

The post 📷 📽️ ТРАМП, ПУТИН И „ИНВЕСТИТОРИТЕ ОД ДУБАИ“ ВО ВЕВЧАНИ Илјадалетната традиција на џоломарите не остава никого рамнодушен appeared first on plusinfo.mk.

Сè е подготвено за годинашното издание на Вевчанскиот карневал, кој утре и в среда ќе се одржува низ улиците на Вевчани, потврди за МИА градоначалникот на Општина Вевчани, Спасе Кочовски.

Забавниот дел од манифестацијата започнува вечерва со настапи на Влатко Лозаноски, рап-дуото „Пука козметика“ и „Брас брадерс“. Традиционално, забавата ќе продолжи и утревечер со фолк-музика, за која годинава се задолжени Благоја Грујовски, Влатко Миладиновски со оркестарот на Златко Миладиновски, како и Оркестарот со зурли и тапани „Вевчани“, а вечерта треба да заврши со настап на Перо Бели и групата „Вип“.

Временските услови, како што истакна градоначалникот, не треба да бидат пречка за сите што сакаат да го посетат Вевчани и да уживаат во карневалската магија.

– Снег има, но улиците се исчистени и проодни. Континуирано се одржуваат со сол и песок и нема најава за нови врнежи. Добредојдени се сите што сакаат да бидат дел од вековната традиција – изјави Кочовски.

Тој најави ново и неповторливо карневалско издание, исполнето со препознатливиот хумор, забава и дружење. Сместувачките капацитети, иако ограничени, според него се исполнети до последното место.

Василичарскиот дел од карневалот започнува утре попладне со дефиле под маски низ вевчанските улици. Преку маските, вевчанци на сатиричен начин ќе ја прикажат изминатата година. Василичарите велат дека секоја маска е одраз на настаните, појавите и проблемите што ја одбележале годината зад нас.

– Маските се централниот елемент на Вевчанскиот карневал и неговиот најпрепознатлив симбол. Тие не се изработуваат случајно, ниту се користат само за визуелен ефект. Секоја маска носи порака, став или критика кон општеството, политиката или секојдневниот живот. Инспирирани се од актуелните случувања, поради што карневалот има улога на жив хроничар на времето – посочуваат вевчанските василичари.

Според традицијата, Вевчанскиот карневал, стар околу 15 века, започнува на 13 јануари напладне со дефиле на маски на двете василичарски друштва – Горна и Долна маала. Неизоставен дел од карневалот се зетот, невестата, двата ѓавола, Глупавиот Август и бројни други маски инспирирани од актуелните политички и општествени случувања.

Секое карневалско издание за вевчанци е посебно доживување. Тие велат дека ќе кажат сè, но до самиот почеток на дефилето не откриваат во што ќе се маскираат. Изработката на маските, според нив, е сложен и креативен процес кој вклучува рачна работа и оригинални идеи, што ја прави секоја маска уникатна.

Манифестацијата ќе заврши на 14 јануари со традиционалното василичарско оро и палење на маските во центарот на Вевчани.

The post СÈ Е ПОДГОТВЕНО ВО ВЕВЧАНИ Карневалот почнува со музика, утре ќе ги видиме маските appeared first on plusinfo.mk.

Градоначалникот на Општина Центар, Горан Герасимовски, денеска им се приклучи на скопските бадникари на јужните падини на Водно, продолжувајќи ја традицијата на собирање дабови гранчиња во пресрет на Бадник.

Првите гранчиња симболично ги пресекоа бадникарскиот кум Зоран Кондратенко и здравичарот Јаков Дренковски, со што беше означен почетокот на бадникарските активности.

– Секоја година се собираме овде на Водно за да ги зачуваме и одбележиме македонските вековни обичаи. Општина Центар секогаш ќе биде покровител на настани што ја негуваат традицијата и духовните вредности – порача Герасимовски.

На настанот, во организација на здружението „Одбор за традиционална прослава на Бадник“, граѓаните се почестија со посна трпеза и во добро расположение испратија пораки за здравје, среќа и благосостојба за празниците.

Собраните бадникови гранчиња, како симбол на сила, здравје и среќа, на 6 јануари ќе бидат поделени на верниците на централната прослава во Соборниот храм.

The post НАБРАНИ БАДНИКОВИ ГРАНЧИЊА НА ВОДНО Продолжува традицијата на скопските бадникари appeared first on plusinfo.mk.

Париските улици светат, но без зборот „Божик“. Француските медиуми пренесуваат дека властите избрале нова, „инклузивна“ форма на празнично украсување. Наместо традиционалните натписи „Joyeux Noël“, на осветлените портали и транспаренти сè почесто стои „Joyeuses Fêtes“ – „Среќни празници“.

Дали натписите со зборот Божик ќе ги снема до крајот на годината во Франција, прашува весникот „Ле Фигаро“, во свој напис. Повеќе француски портали објавија дека промената се поврзува со европските препораки за „инклузивен јазик“, идеја која треба да ги опфати сите, без оглед на верата.

Реакции и поделби

Веста предизвика бура од реакции на социјалните мрежи. Критичарите велат дека ваквиот потег не е гест на почит кон различностите, туку „бавно бришење на христијанските симболи“.

– Не можете да создадете инклузивност ако ги избришете корените – изјавил еден од колумнистите на „ Ле Фигаро“.

Од другата страна, поддржувачите тврдат дека Франција останува земја со секуларен карактер, а државните институции немаат обврска да промовираат религиозен контекст.

Што велат фактите?

Француската влада не донела никаков закон или наредба за забрана на зборот „Божик“. Станува збор за комуникациски избор на поединечни општини или маркетинг агенции.

Европската комисија, пак, во 2021 година навистина имаше документ со препорака за инклузивен јазик, но истиот беше повлечен по јавните реакции и никогаш не стана обврзувачки акт.

The post „СРЕЌНИ ПРАЗНИЦИ“ НАМЕСТО ЗБОРОТ „БОЖИК“ ВО ФРАНЦИЈА? Инклузивноста предизвика нова културна бура appeared first on plusinfo.mk.

Норвешкиот министер за надворешни работи Еспен Барт Ејде се најде во центарот на вниманието поради, на прв поглед, едноставен подарок,  новогодишната елка што Норвешка традиционално ја испраќа во Лондон.

Оваа година, елката на плоштадот Трафалгар предизвика лавина коментари во британската јавност. Многумина ја опишаа како „разочарувачка“, „тажен кактус“ или „дрво погодено од торнадо“.

Ејде возврати со мирен тон, нагласувајќи дека вредноста на елката е далеку поголема од нејзиниот изглед.

– Многу сме горди на нашата елка и на оваа традиција – рече министерот, потсетувајќи дека дрвото не е обичен украс, туку симбол на длабоко пријателство меѓу Норвешка и Велика Британија.

Oh Lordy. @sophielouisecc you really are a nugget. The Trafalgar Square Christmas tree is a gift from the people of Oslo to the people of London. We have been gifted the tree since 1947. It is decorated in the traditional Oslo way. Look at the tree in Oslo. pic.twitter.com/OkAtxtKv43

— Dr Mariana Claire Marinovic (@DrMarianaClaire) November 17, 2025

Тој ја потсети јавноста дека традицијата започнала во 1947 година, кога Норвешка ѝ подарила елка на Британија како знак на благодарност за поддршката во Втората светска војна.

– Елката е непроценлив подарок и доказ за долгогодишното партнерство меѓу нашите народи – истакна Ејде.

The post 📷 НОРВЕШКАТА ЕЛКА, ТАЖЕН КАКТУС СРЕДЕ ЛОНДОН? Британците коментираат, се јави норвешкиот дипломат во одбрана appeared first on plusinfo.mk.

Претседателот на САД Доналд Трамп танцуваше во ритмот на домородните танцови по пристигнувањето во Куала Лумпур, главниот град на Малезија, започнувајќи ја првата етапа од неговата азиска турнеја.

И покрај 23-часовниот лет од Вашингтон, 79-годишниот Трамп изгледаше свежо додека цупкаше со нозете и мавташе со стиснатите тупаници во ритмот на традиционалните музички точки, кои беа изведувани во негова чест покрај црвениот тепих.

Шарено облечените танчери ги претставувале главните етнички групи во земјата, вклучувајќи ги и домородните народи на Борнео и малајските, кинеските и индиските заедници. Претседателот беше придружуван од малезискиот премиер Анвар Ибрахим, кој исто така го следеше ритамот на музиката. Видеото за кратко време се прошири на социјалните мрежи.

Петдневната турнеја на Трамп во Азија има за цел да го зајакне влијанието на САД и трговските договори во регионот. Планирани се состаноци со новоизбраниот јапонски премиер Санае Такаичи во Токио и со кинескиот претседател Си Ѓинпинг во Јужна Кореја. Во прилог на маршрутата во последен момент, исто така се споменува и можна средба со севернокорејскиот лидер Ким Џонг Ун по должината на демилитаризираната зона.

The post 🎥 ТРАМП ЗАИГРА МАЛЕЗИСКИ ТАНЦ НА ЦРВЕНИОТ ТЕПИХ Го понесоа фолклорните ритми appeared first on plusinfo.mk.

Духовден, познат и како Духови или Задушница по Света Троица, е еден од најпочитуваните празници во македонската православна традиција, кога верниците на посебен начин се сеќаваат на своите починати блиски.

Во 2025 година, празникот се одбележува на 8 јуни, во недела, и традиционално носи со себе богатство од обичаи, верувања и семејни ритуали, пренесувани од колено на колено.

„Ниту мртов човек не треба да се заборави“

Во многу македонски села, но и во урбаните средини, верниците рано изутрина на Духовден заминуваат на гробиштата, каде ги чистат и ги украсуваат гробовите со свежо цвеќе, пченица, вино и свеќи.

Се пали кандило, а свештеник чита молитви за покој на душите на починатите. Се верува дека на овој ден, душите на мртвите се присутни меѓу живите и бараат спомен и молитва.

– Мајка ми вели: „Ако не ги посетиш мртвите, ќе те посетат тие тебе“. Затоа секоја година носиме што сме подготвиле – погача, компот, пченица – и ги делиме за спомен – раскажува една средовечна велешанка.

Преливање со вино и делење „за душа“

Еден од највпечатливите обичаи на Духовден е преливањето со црвено вино – ритуал кој симболично ја поврзува крвта на Христос со вечниот живот.

Се преливаат гробовите, а на посетителите им се делат варена пченица, погачи и вино „за душа“. Сè што се дава, се прави во име на некој починат член од семејството.

На гробишта се среќаваат роднини, се пали свеќа, но и се простува за некоја стара кавга. Мртвите не сакаат караници, туку сплотеност.

Задушница не е ден за веселба

Иако доаѓа по празникот на Света Троица, Духовден не е празник на радост. На овој ден не се слуша гласна музика, не се прават веселби, свадби или прослави.

Во народната традиција се верува дека радоста на живите може да ја вознемири тагата на мртвите.

Во некои делови од Македонија, жените не перат, не чистат и не готват на овој ден – сè се приготвува однапред, за да може целото семејство да се посвети на молитвата и споменот.

Сеќавање како дел од идентитетот

Духовден е повеќе од религиозен ритуал – тој е момент на сеќавање, простување и духовно обединување. Токму преку овие обичаи, македонското семејство го одржува чувството за заедништво и почит кон претците, што е длабоко вкоренето во колективната меморија на народот.

Како што велат етнолозите: „Обичаите за Духовден ја покажуваат способноста на македонскиот народ да ги негува врските со оние што не се повеќе тука, но и да го зачува културното ткиво на една заедница“.

Во време на забрзан живот и технолошка отуѓеност, празници како Духовден потсетуваат дека смиреноста, молитвата и сеќавањето се темел на човековата духовност – и дека животот не завршува, туку преминува.

The post ДЕН ЗА СПОМНУВАЊЕ НА МРТВИТЕ Македонски народни обичаи и верувања за Духовден appeared first on plusinfo.mk.

Храната која ја јадеше нашата, како и генерацијата пред нас, кај денешната младина би предизвикала скандал.

Кога растеле генерациите на нашите мајки и татковци, најважно било да има храна на масата. Холестеролот и глутенот не биле тема за муабет, а свеста за адитивите и пестицидите (од кои некои сè уште циркулираат во природата иако се одамна забранети) не постоеше.

Кога ние растевме, храната беше едноставна и скромна, главно, домашна. Никој не помислуваше да бара софистицираност на јадењето или некакви следови, тие се подразбираа па речиси секој ден имавме домашна супа, па главно јадење, па нешто благичко или само кришка леб со шеќер и какао. Сепак, она што беше сосема нормално во тоа време, би предизвикало културен и кулинарски шок кај денешните деца. Ајде да прошетаме по патеката на сеќавањата и да се сетиме што јадевме и преживеавме.

Повеќе за ова прочитајте ТУКА.

The post КОМПИР МАНЏА, МАСТ НА ЛЕБ И ЈАГНЕШКИ МОЗОК Што сè јадевме и преживеавме appeared first on plusinfo.mk.

Вапсањето црвени јајца за Велигден е најраспространетата традиција во сиот христијански свет. Вапсањето започнува денеска на Велики Четврток. Домаќините, рано наутро, пред изгревањето на Сонцето ги бојадисуваат првите три црвени Велигденски јајца.

– Оваа црковна традиција потекнува од првиот век по Христа, односно тоа се практикувало уште во времето на светите апостоли – христовите ученици и нивните наследници. За тоа ни сведочи Светото Предание. Велигденското јајце е старо колку и Христијанството – вели за МИА професорот на Богословскиот факултет во Скопје, Ратомир Грозданоски.

Објаснувајќи го значењето на црвеното јајце и зошто е земено за традиција, Грозданоски појаснува дека велигденското јајце црквата го прифатила во својата традиција и практика како симбол на Христовото воскресение. Првите Христијани и современици на апостолите почнале да вапcуваат јајца и да ги подаруваат на Велигден, поздравувaјќи се со радосниот поздрав Христос Воскресе! На тоа отпоздравувале: Вистина воскресе!

Така поздравувајќи се, првиот ја соопштува веста за Христовото воскресение, додека вториот ја потврдува, а всушност и двајцата ја исповедуваат својата вера во Воскресението. Оваа практика и до ден -денес е запазена во Светото Православие, па верниците со овој поздрав се поздравуваат се до Вознесението Христово, Спасовден.

Црвената боја има симболика на победа. Нејзиното значење на овој голем Христијански празник е дека Господ Исус Христос со своето воскресение ја победил смртта. Црвената боја ја претставува божјата сила и моќ, а воедно ја симболизира и Христовата крв, која Исус ја пролеал на крстот за спасение на сите луѓе на земјава. Бојата на јајцето не потсетува и на крвта Христова и на спасението.

Според хронологијата на Христовите настани забележани во Евангелието се знае дека на Велики Четврток, Господ Исус Христос на Тајната вечера ја востановил Светата тајна Причест (Евхаристија), земајќи ги за основа лебот и црвеното вино, кои се претвораат во Христовото тело и крв. Оваа света тајна – Евхаристијата е дадена за спасение на луѓето, а за основа ја има Христовата крв. Затоа црвената боја, симболизирајќи ја Христовата крв од светата причесна ги украсува и Велигденските јајца.

Како што бојадисаните црвени јајца од Велики Четврток се јасна најава на блискоста до Велигден, така и тогаш, на Велики Четврток на Тајната вечера, Христос јасно најавил и кажал дека наскоро ќе биде предаден, ќе пострада и ќе воскресне.

– Според Светото Предание, се смета дека Марија Магдалена, една од жените мироносици прва го започнала овој обичај за Велигденските црвени јајца – вели Грозданоски, говорејќи за почетокот на традицијата на вапсување велигденски јајца.

Се вели дека Марија Магдалена наскоро по Христовото вознесение (Спасовден) го напуштила Ерусалим и тргнала по светот да го проповеда Евангелието. Во Рим таа побарала да појде и кај римскиот император Тивериј, со цел да му раскаже на царот за Господа Исуса Христа. На средбата, таа на царот најнапред му подарила едно црвено јајце и го поздравила со зборовите: Христос Воскресе. Потоа му раскажала за се што ги учел Христос, за неговите добри дела и чуда што ги правел на луѓето.

Следејќи го нејзиниот пример, првите христијани започнале да си подаруваат црвени јајца на празникот Велигден и притоа да се поздравуваат: Христос Воскресе – Вистина Воскресе!

Православните христијани на Велигден подарувајќи си црвено јајце еден на друг или кршејќи се со него, всушност го симболизираат Христовото Воскресение и нашето спасение: победата над смртта – смрт на смртта. Затоа, овој обичај е израз на вера во Христовото Воскресение и вера во воскресение на мртвите. Тоа е надежта во спасението и идниот живот.

The post ВЕЛИГДЕНСКО ЈАЈЦЕ Што симболизира и каква е традицијата на бојадисување? appeared first on plusinfo.mk.