Гувернерот на Народната банка Трајко Славески денеска повторно го актуелизираше прашањетo за воведување закон за личен банкрот на јавната работна средба во Стопанската комора. Тој смета дека не може до бесконечност да се толерираат луѓе кои не во состојба да ги подмируваат своите обврски.

Сите развиени земји, потсети Славески, имаат регулатива за личен банкрот.

– Тоа можеби е повеќе прашање за Министерството за финансии, но заедно може да размислиме дали е моментот да одиме со ваква регулатива – закон за личен банкрот. Според моите информации, имаме околу 120.000 блокирани сметки, граѓани без пристап до финансиските институции. Тие се жртви на некои други даватели на кредити со високи камати, лихварски. Треба да се актуелизира прашањето, јас одамна го поставував и како министер за финансии, дали не е време да донесеме закон за личен банкрот кој би решил некои прашања. Не може до бесконечност да се толерира таква ситуација – луѓе кои не можат да ги подмируваат своите обврски, а тие се зголемуваат со каматите на долгот – истакна гувернерот.

Тој не се согласи со една од членките на Комората дека периодов е добро да се воведе мерка како во време на пандемијата со ковид, одлагање на плаќање на кредитите. Претставничката од бизнис секторот укажа дека преработувачкиот сектор се соочува со поголема криза и дека продажбата е намалена. Притоа праша дали можеби таква мерка би била поволна за да им се помогне на луѓето кои, како што рече, ќе ги изгубат своите работните места.

– Не е периодот за оваа мерка, но секако ќе го проучиме ова, а можеме да разговараме и со банките. Тие, согласно нивниот интерес, најмалку сакаат да се претворат во институции за продажба на недвижнини. Не им одговара тоа зашто повлекува низа трошоци, но може во рамки на деловната политика да пристапуваат случај по случај. Јас не би препорачал нешто во ваква насока како што велите вие – рече Славески.

На новинарско прашање зошто растат цените на становите, гувернерот одговори дека Народната банка може да делува само во рамки на нивното кредитирање.

Во рамки на јавната дебата, професорката Ирена Кикеркова од Економскиот факултет – Скопје укажа дека Народната банка не нуди потемелна анализа на вистинската структура на производството и на проблемите во македонската економија, туку излегува со релативно слаби анализи и податоци за само неколку категории производи од слободните зони и од најголемите компании во нив. Таа го замоли гувернерот да направат реконструкција на тимовите кои прават аналитика „зашто времето што доаѓа ќе биде многу важно и за креаторите на економските политики“.

Славески во излагањето пред стопанствениците уште еднаш повтори дека ниската стапка на инфлација и финансиска стабилност остануваат клучни приоритети на Централната банка.

The post СЛАВЕСКИ ПРЕДЛАГА ЗАКОН ЗА ЛИЧЕН БАНКРОТ Не може до бесконечност да се толерираат луѓе кои не плаќаат appeared first on plusinfo.mk.

Посакувајќи ви среќен Ден на независноста, би сакал да бидете сигурни за следново:

Во Македонија не постои руска пропаганда. Никогаш немало. Во никој случај овде не процутело некое значајно просоветско или проруско расположение. Македонија никогаш не била плодна почва за такво нешто, а Русите тоа секогаш го знаеле. До неодамна!

Има нешто позагрижувачко – непобитен пораст на антизападните, вклучително и антиамериканските чувства кај етничкото македонско население во последните неколку години. Оставам социјалните психолози да го објаснат овој интересен и шокантен феномен.

Јас имам свое разбирање за овој несреќен пресврт.

Верувам дека секој родител може да признае дека развива негативни чувства дури и кон своите деца, во одреден момент и под одредени околности.

Поминувајќи низ бројни понижувања на нивниот измачувачки пат кон ЕУ и кон НАТО, повеќето етнички Македонци се чувствуваат измамени од Западот, па дури и принудени да се одречат од сопствената историја и идентитет. Чувствуваат дека го губат тлото под своите нозе, во сопствената земја.

Овде дома, гестовите како официјалната честитка за новоименуваниот привремен премиер пред неколку месеци, само на албански јазик, од страна на Амбасадата на САД, не помогнаа луѓето да се убедат во спротивното.

Попустливоста, барем досега, кон очигледните криминални зделки и кон корупцијата на голем број функционери етнички Албанци на високи позиции во власта, со исклучок на градоначалникот на Струга, во голема мера го нарушија авторитетот на вашите официјални претставници во Македонија.

За среќа, прифаќањето и охрабрувањето на новоизбраната влада, предводена од ВМРО-ДПМНЕ, од американските претставници во нашата земја, се примени со големо олеснување. Ова се случи по убедливата победа, и покрај предизборното обесхрабрување на гласачите од страна на некои високи американски функционери и од претставници на државите членки на ЕУ, кои застанаа на страната на поразените партии што ја предводеа претходната влада.

Со малку труд од нивна страна и со фер и праведен третман на сите етникуми во нашата земја, нашите стратешки партнери повторно можат да ги освојат срцата и умовите на етничките Македонци. Се надевам дека знаат како да го направат тоа. Не е потребно многу!

И сите грижи за какво било „руско влијание“ и пропаганда секако ќе исчезнат.

Среќен Ден на независноста, Среќен 4 Јули!

The post Писмо до моите американски пријатели  appeared first on plusinfo.mk.