Пред неколку дена г-динот Апасиев, пратеник во Собранието од политичката партија Левица, од собраниската говорница ми залепи етикета на „десничарски јастреб“, поради мојата улога во минатото при вршење одговорни јавни функции во креирањето на некои системски решенија во системот за исплата на плати и пресметка на придонеси за социјално осигурување (пензиско-инвалидско, здравствено и осигурување во случај на невработеност).

Својот став го темели на две премиси, од кои едната е ноторна лага, а другата можеби се темели на незнаење, што претставува помал грев.

Лага е обвинувањето дека со преминот кон системот „бруто плата“ од почетокот на 2009 година биле укинати хранарината и патните трошоци. Факт е дека износот на овие бенефиции за вработените беше вклучен во платата. Доволно е да се погледне статистичкиот податок за раст на реалната плата во 2009 година и да се спореди со податоците за годините пред и по реформата. Разликата изразена во проценти е огромна, токму поради тоа што од 2009 година во износот на исплатената бруто-плата се вклучени и бенефициите кои пред тоа се искажуваа одвоено.

Не сакам повторно да објаснувам кои беа придобивките од оваа реформа. Само ќе потсетам дека платите почнаа да се исплаќаат редовно, најдоцна до 15-ти во месецот, заедно со придонесите. Ако процентот на вработени што не беа добиле плата за претходниот месец во периодот пред реформата изнесуваше околу 14%, со реформата тој се намали под 1%. За разлика од претходниот период кога на голем број вработени нередовно или воопшто не им се уплаќаа придонеси, од тогаш наваму придонесите, со ретки исклучоци, редовно се уплатуваат.

Втората причина за спомнатата квалификација г-динот Апасиев ја поврза со постоењето на горна граница за уплата на придонесите од социјално осигурување во износ од 16 (шеснаесет) просечни бруто плати во Република Македонија (12 за самовработени лица). Г-динот Апасиев смета дека ваквото ограничување не треба воопшто да постои. Верувам дека неговото мислење, од различни причини, го споделуваат и други.

Кажав претходно дека за ова не му замерувам поради незнаењето, а воедно и признавам дел од „вината“, која, како што ќе следи во продолжение, не се темели на некаква идеолошка определба, туку на практиката во околните земји и пошироко.

Спротивно на барањето за укинување на горната граница, сметам дека постои потреба од НАМАЛУВАЊЕ на максималниот износ за пресметка на придонеси за социјално осигурување во Република Македонија. Во моментов нашата земја е можеби светски рекордер со максимален износ од 16 (шеснаесет) просечни бруто плати за пресметка и уплата на придонесите. Не случајно, како што дознаваме од медиумите, Комората за информатички технологии постојано испорачува слично барање до Владата.

Ова особено ги погодува лицата кои заработуваат релативно високи месечни доходи и ги тера да ги сокриваат своите приходи преку сметководствени еквилибристики, или пак воопшто да не се пријавуваат во системот. Илјадници наши сограѓани (се надевам дека секој од нас познава по неколку од нив) работат за странски нарачатели, резиденти се во земјата, а доходите го добиваат на сметки во странство. Од таму влечат готовина за своите потреби и не плаќаат ниту персонален данок, ниту придонеси.

До 2008 година кај нас не постоеше максимален износ за пресметка и уплата на придонеси за социјално осигурување. Како сопствена иницијатива поддржана од тогашната влада, со законска измена се изборив за горна граница од 4 (четири) месечни бруто плати. Во парламентот мерката ја бранев со фактот дека прво, кај пензиите постои максимален износ на пензија, без разлика на износот уплатени придонеси, а кај здравственото осигурување постои ограничен пакет на здравствени услуги во јавното здравство. Солидарноста, како и насекаде во светот, треба да има граници!

Ова траеше 3-4 години, кога моите наследници во Министерството за финансии почнаа да попуштаат пред левичарските притисоци во јавноста и првично го зголемија лимитот на шест, а потоа на 12 просечни бруто плати. Сега, како што кажав претходно, горниот лимит изнесува 16 просечни бруто плати, односно de facto нема горна граница!

За споредба, ќе презентирам податоци за неколку држави од регионот кои имаат значително пониска горна граница од нашата за пресметка на придонесите од социјално осигурување:

Србија – петкратен износ на просечната месечна плата исплатена по вработен.
Бугарија – најниска во регионот – од само 1,6 (една запирка шест) просечни бруто плати. Над овој износ не се плаќаат придонеси!
Албанија: четирикратен износ на МИНИМАЛНАТА месечна плата.
Црна Гора: петкратен износ на просечната бруто плата во земјата.
Хрватска: четирикратен износ на просечната месечна бруто плата.

Во САД, за системот Social Security, максималниот износ на годишно ниво за 2024 година за исплата на Payroll Tax e утврден на $168.600, додека просечната годишна плата изнесува $63.795, односно 2,6 годишни бруто плати.

Постојат бројни прашања во областа на социјалното осигурување во земјава од аспект на ефикасноста и правичноста на системите, во кои во оваа прилика не сакам да навлегувам. Нека со нив се занимаваат надлежните институции и експертите. Сакам само да порачам дека потребата е ургентна!

The post Јастреби малку, гулапчиња на секој чекор appeared first on plusinfo.mk.

По повод денот на монетарната самостојност, Народната банка традиционално ја додели Годишната награда за млади истражувачи за најдобар труд од областа на макроекономијата и банките и банкарските системи.

Добитник на првата награда за 2026 година е авторот Стефан Таневски, за трудот со наслов „Дали може институционалната интеграција на берзите од Западен Балкан да ја зајакне монетарната трансмисија?” (Can Institutional Integration of Western Balkans’ Stock Exchanges Strengthen Monetary Transmission?).

Трудот се фокусира на каналот на цените на средствата, како механизам преку кој се пренесуваат сигналите на монетарната политика во економијата.

Во него се посочува дека интеграцијата на берзите од Западниот Балкан може значително да ја подобри оваа трансмисија, преку побрза и поефикасна реакција на цените на акциите на промените во каматните стапки и монетарните сигнали, при што се укажува дека структурата на финансискиот систем е директно поврзана со ефективноста на монетарната политика.

Според традицијата, наградениот труд ќе биде презентиран на некоја од следните сесии на Клубот на истражувачите на Народната банка, којшто функционира како платформа за развој на истражувачката мисла и мрежа за поврзување на експертите од овие области.

Доделувањето на наградата е дел од одбележувањето на 34-годишнината од монетарното осамостојување и формирањето на Народната банка, а истовремено во година кога Народната банка слави и 80 години централнобанкарско работење во земјава.

The post СТЕФАН ТАНЕВСКИ Е ДОБИТНИК НА НАГРАДАТА ЗА ИСТРАЖУВАЧИ НА НАРОДНА БАНКА Неговиот труд дава одговор како интеграцијата на берзите влијае на монетарната политика appeared first on plusinfo.mk.

Секој совесен и одговорен возач, покрај грижата за сопствената безбедност, безбедноста на своите сопатници и другите учесници во сообраќајот, се труди при возењето да ја зголеми и ефикасноста во потрошувачката на гориво.

Така, знаеме дека возењето со помала брзина, оптимален број на вртежи на моторот, избегнување нагло сопирање и стартирање на автомобилот, негово редовно сервисорање, оптимален притисок на пневматиците, дури и во зависност од надворешната температура и сл., ни заштедува гориво.

Очекувам деновиве некој надлежен орган, вклучително и здруженијата на возачи, да нè потсетат на можностите за штедење гориво при управувањето со возилата, во услови на високите и растечки цени на горивата.

Подолго време размислував јавно да споделам една хипотеза (претпоставка која треба дополнително да се истражи и да се докаже), дека системот „Безбеден град“ (Safe city), покрај зголемената безбедност на улиците и патиштата (и, нека ми простат некои, финансиска корист за државниот буџет од наплатените санкции за прекршоци во сообраќајот), во вистинско време, токму пред налетот на нафтениот шок, сосема неочекувано, можеби ни носи заштеди од намалената потрошувачка на гориво, како за семејните буџети, така и за трговското салдо на земјата.

Велам можеби затоа што системот „Безбеден град“, функционира само еден цел месец, февруари, но веројатно позитивни ефекти во заштеди на гориво, иако во помал обем, можеби се остварени и во претходните два “подготвителни” месеци, декември во минатата и јануари во оваа година.

Серијата податоци за вкупна потрошувачка на нафтени деривати во замјава во тековниов месец (март) ќе претрпи влијание од значително зголемените малопродажни цени на горивата заради растот на цените на нафтата на светските берзи со почетокот на војната меѓу САД/Израел и Иран, со последици и врз другите земји од Заливот.

За очекување е дека високите цени барем донекаде ќе влијаат да се намали потрошувачката на нафтени деривати.

Првичен поглед на податоците за увоз на нафтени деривати во првите два месеци од годинава не нуди можност за сигурен заклучок дека се остварени заштеди како резултат на повнимателното управување со возилата по воведување на системот „Безбеден град“.

Но, од она што го слушам од луѓето околу мене, сепак се чувствува ефектот од смалена потрошувачка на гориво како резултат на поревносното почитување на сообраќајните прописи.

Ќе се обидеме со користење на филтри во статистичката анализа да ја тестираме мојата препоставка за дополнителната, непредвидена и правовремена корист со заштеда на гориво од системот „Безбеден град“.

Но, до тогаш ќе бидам благодарен на секој што ќе го прочита овој текст и доколу во коментарите го сподели сопственото искуство.

The post Ни заштедува ли гориво системот „Безбеден град“ – во вистинско време? appeared first on plusinfo.mk.

Монетарната политика успешно ја исполнува својата основна цел – одржувањето на ценовната и финансиската стабилност во земјата, изјави гувернерот на Народната банка, Трајко Славески, во гостување на телевизија „Телма”.

Тој посочи дека стабилноста на девизниот курс на денарот и натаму е цврсто закотвена. Стабилниот курс на денарот во однос на еврото претставува важен фактор за зачувувањето на довербата во економијата, финансиската стабилност и конкурентноста на домашната економија.

Во однос на инфлацијата, Славески нагласи дека се бележи стабилизирање на ценовните движења, а во одредени месеци во текот на минатата година има и намалување на ценовното ниво на месечно ниво.

Народната банка очекува дека во текот на оваа година инфлацијата и натаму ќе се намалува, што е во согласност со среднорочната цел за ценовна стабилност и приближување кон инфлацијата во еврозоната.

Проекцијата за инфлацијата оваа година се таа да биде меѓу 2,5 и 3%.

– Многу е важно нашата стапка на инфалција да биде во рамки на стапката на инфлација во еврозоната, затоа што ние имаме фиксен девизен курс. На некој начин и нашата ценовна стабилност е увезена од она што се случува во Европската Унија и еврозоната поради фиксниот девизен курс. И секое отстапување на нашата инфлација од инфлацијата во еврозоната може да влијае на постепено намалување на конкурентската способност на нашата економија. Ако цените кај нас раст побрзо одошто надвор, курсот останува, мислам номиналниот девизен курс стабилен, тоа е неминовна, да речам, последица – рече Славески.

Гувернерот зборуваше и за новата оперативна монетарна рамка, која овозможува банките  да пласираат средства кај Народната банка на 7 дена со каматна стапка од 4%, со дефиниран каматен коридор за краткорочните операции. Со ваквата поставеност се овозможува појасна насока за движењето на каматните стапки и се придонесува за одржување на стабилноста на финансискиот систем.

Славески нагласи банкарскиот систем располага со значителен вишок ликвидност, како и дека бележи постојан раст на штедењето кај населението. Во последните години се забележува и позитивен тренд на денаризација, односно раст на штедењето во домашна валута, што уште повеќе ја зајакнува стабилноста на денарот и довербата во домашниот финансиски систем.

Во однос на девизните резерви рече дека тие се одржуваат на високо и сигурно ниво од околу 4,9 милијарди евра, што претставува силна гаранција за стабилноста на девизниот курс и за отпорноста на економијата на надворешни шокови.

Славески истакна и дека постои широк општествен и економски консензус за придобивките од фиксниот девизен курс, што со децении успешно придонесува за стабилноста на македонската економија и претставува важен столб во процесот на европска интеграција и идното воведување на заедничката европска валута.

The post ДЕНAРОТ Е СТАБИЛЕН Славески вели дека мора да ја следиме инфлацијата во ЕУ appeared first on plusinfo.mk.

Сојузот на синдикати на Македонија (ССМ) организира протест за зголемување на минималната (со закон утврдена) плата за цели 50% и на сите други плати за по 6.000 денари. Не им одговара системското решение од Законот за минимална плата, според кое износот на оваа категорија во март ќе се зголеми во согласнот со законски утврдена формула и праг од 57% во однос на просечната плата.

Да се потсетиме, препорака на Меѓународната организација на трудот е минималната плата да се утврди на 40% од просечната плата, а ЕУ пред неколку години им сугерираше на земјите-членки праг од 50% минимална во однос на просечната плата.

Според овој сооднос, Македонија е светски рекордер во односот минимална/просечна плата.

Интересно е објаснувањето на челниците од ССМ како се дошло до барањето за минималната плата, чие зголемување се очекува да ги „повлече“ и останатите плати (што судејќи според практиката од минатото на административни зголемувања на минималната плата, не мора да се случи).

Имено, тие направиле анкета на „репрезентативен примерок“ приматели на плата и испитаниците се изјасниле за зголемување од 50% од сегашниот износ. Станува збор за несериозен пристап и за уште понесериозно барање.

Како преговараат сериозните синдикати за зголемување на платите со организациите на работодавачи? Се разбира, не преку анкети за откривање на желбите меѓу своето членство, туку врз основа на разумни и стандардни критериуми за утврдување на динамиката за раст на платите.

Кои се тие критериуми?

Прво, работниците сакаат да се зачува куповната моќ на нивните доходи, т.е. зголемувањето на номиналните плати да биде најмалку во рамките на стапката на инфлација според податоците од овластени институции.

Второ, доколку расте економијата и трудот има легитимно право на учество во распределбата на зголемениот колач, односно надомест за стапката на зголемена продуктивност на трудот.

Кај корекцијата на платите со стапката на инфлација има „поглед наназад“ и „поглед кон напред“. Доколку во изминатиот период на важност на колективниот договор, вообичаено две години, растот на платите бил понизок од стапката на инфлација, стапката на пораст на платите треба да обезбеди компензација на разликата, односно на намалената куповна моќ на платите. На ова се додава стапката на очекувана инфлација според прогнозите од релевантни домашни и меѓународни институции. На крај, ваквиот збир евентуално се зголемува за очекуваниот раст на продуктивноста на трудот.

И покрај манипулациите со бројките од страна на ССМ, факт е дека просечната плата во земјава минатава година порасна номинално за 9,2%, а реално за 5,1%. Очекувањата за стапката на инфлација за оваа година се таа да не надмине 3%.

Се поставува прашањето: дали има логика во барањето на ССМ, поддржано од некои политички субјекти заради популистички побуди? Одговорот е повеќе од очигледен – несериозни барања од несериозни субјекти!

(Статус на гувернерот на Народната банка, на социјалната мрежа Икс)

The post Одговорно преговарање за плати appeared first on plusinfo.mk.

Златните резерви на Македонија, вредни околу 800 милиони евра, биле лично проверени од гувернерот на Народната банка Трајко Славески за време на официјалната посета на Банката на Англија. Делегацијата имала работна посета во трезорот каде што се чува монетарното злато на државата.

Народната банка располага со 6,9 тони монетарно злато, кое се чува во алоцирана форма во трезорот на Банката на Англија, во златни прачки што го исполнуваат „London Good Delivery“ стандардот – со чистота од најмалку 99,5% и тежина од околу 12 килограми по прачка.

 

View this post on Instagram

 

A post shared by Plusinfo.mk (@plusinfo.mk)

СЛАВЕСКИ ГИ ПРОВЕРИ МАКЕДОНСКИТЕ ЗЛАТНИ РЕЗЕРВИ ВО БАНКАТА НА АНГЛИЈА Ги разгледа и можностите за пристап до пазарот за злато во Лондон

The post 📽️ ЗЛАТО ОД 800 МИЛИОНИ ЕВРА ПОД ЛУПА Гувернерот Славески лично ги провери резервите во Лондон appeared first on plusinfo.mk.

Регионалната интеграција на платните системи влегува во нова фаза – земјите од Западен Балкан започнаа процес за воспоставување заеднички систем за инстант плаќања, по модел на Европската централна банка. Новиот систем, наречен „клон на ТИПС“, ќе овозможи парите да се префрлаат сигурно и веднаш, во кое било време – преку ден, но и за викенди и празници. Ова претставува чекор кон создавање единствен платежен простор кој ќе ги поврзе балканските земји со европскиот финансиски екосистем.

Инстант плаќањето овозможува парите да се префрлат од една сметка на друга за само неколку секунди, без разлика дали е викенд, празник или полноќ. Системот што го воведуваат земјите од Западен Балкан е направен по европски модел и ќе овозможи трансакциите меѓу земјите во регионот да се извршуваат веднаш, исто како во земјите на Европската Унија.

Темата е во фокусот на 16. Конференција за плаќањата и пазарната инфраструктура, што на 28 и 29 октомври ќе се одржи во Охрид, во организација на Народната банка и Централната банка на Холандија. Настанот, со мотото „Преповрзување на плаќањата за дигиталната ера“, ќе собере експерти од централни и деловни банки, финтек-компании и меѓународни финансиски институции.

Посебен акцент ќе биде ставен на придобивките од приклучувањето на Северна Македонија кон Единствената област за плаќање во евра – СЕПА, заедно со Албанија, Црна Гора и Молдавија. Гувернерот Трајко Славески ќе дискутира со своите колеги од регионот за тоа како овие нови системи ќе ги олеснат трансакциите за граѓаните и компаниите и ќе го забрзаат патот на регионот кон европскиот пазар.

Банките ќе ги презентираат и првите резултати од почетокот на трансакциите преку СЕПА, кои стартуваа на 7 октомври. Ќе се разгледаат ефектите врз трошоците и конкуренцијата, како и подготвеноста на банкарскиот сектор за дигиталната трансформација што следи.

Конференцијата ќе се одвива на англиски јазик, а јавноста ќе може да ја следи во живо на YouTube-каналот на Народната банка. Според најавите, овие чекори претставуваат значаен исчекор кон модернизација на финансискиот систем и побрзо вклучување на регионот во европскиот пазар.

The post ПАРИТЕ ЌЕ „ЛЕТААТ“ ОД ЕДНА НА ДРУГА СМЕТКА ЗА НЕКОЛКУ СЕКУНДИ Западен Балкан гради „клон“ на европскиот систем за инстант плаќања appeared first on plusinfo.mk.

Гувернерот на Народната банка попладнево соопшти дека се направени првите трансакции преку СЕПА системот.

„Историски ден за нашата држава! Денес се направени првите трансакции преку СЕПА – системот што ја приближува Македонија кон европското платежно подрачје. До 6 пати пониски трошоци за граѓаните. До 8 пати пониски трошоци за компаниите“, објави гувернерот Трајко Славески на платформата Икс.

Од денеска практично во државава почна примената на истите правила за прекугранични плаќања во евра како и во земјите од Европската Унија. Со приклучувањето кон СЕПА, прекуграничните плаќања во евра стануваат поевтини и побрзи како за граѓаните, така и за компаниите.

Историски момент за нашата земја!
Направени се првите трансакции преку СЕПА – до 6⃣ пати пониски трошоци за граѓаните и до 8⃣ пати пониски трошоци за компаниите.#SEPA #НароднаБанка #ФинансискаИнтеграција #ИсторискиДен pic.twitter.com/zR4wtSXDzH

— Народна банка на Република Северна Македонија (@narodna_banka) October 7, 2025

Приклучувањето кон СЕПА денеска го поздрави и министерката за финансии која оцени дека ова е значаен исчекор кон унапредување на условите за работење и живеење во Македонија, прилагодувајќи ги стандардите на земјата кон европските.

The post ДО 6 ПАТИ ПОНИСКИ ТРОШОЦИ ЗА ГРАЃАНИТЕ СО СЕПА СИСТЕМОТ Славески ги оцени првите трансакции како историски appeared first on plusinfo.mk.

Народна банка не ги утврдува каматите и стапките на кредитите но како централна банка укажуваат на една практика во светот која се заснова на процената на ризикот дека семејствата коишто за прв пат купуваат стан и живеат во него или куќа се помал ризик од аспект на сервисирање на обврските и тие добиваат поповолни услови – камати од банките, изјави денеска гувернерот на Народна банка Трајко Славески запрашан кога може да се очекува намалување на каматните стапки на кредитите за купување прв стан и намалување на процентот на учество за овие кредити.

Славески рече дека очекува светската практика да се види и во земјава со тоа што ќе ја применат комерцијалните банки.

-Банките имаат два и пол месеца за подготовка и очекуваме да се придржуваат на одлуката  од аспект на тоа што е во надлежност на Народна банка во регулирањето на учеството во однос на месечната рата на кредитот и она ограничување што се однесува на висината на сопственото учество и вредноста на имотот којшто станува залог – рече Славески.

Славески информира дека досега нема никаква официјални ниту неофицијална реакција од банките во врска со новите услови за намалување на учеството за кредитите за прв стан ниту за препораката за намалување на каматните стапки.

-Немаме, треба да ги слушнеме, најверојатно прават проценки и пресметки. Немам ниту официјална, ниту неофицијална најава од страна на банките. Мислам дека се уште е рано –  рече Славески.

Тој рече дека е релативно тоа дали се поповолни кредитите за учество од 10 или од 20 % во услови кога граѓанинот која сака да земе кредит нема доволно пари.

-Ако можете сега вие да земете кредит со 10.000 евра во денарска противредност за помал стан кој не мора да биде во центарот на Скопје, влегувате во решавање на своето сопствено станбено прашање. Ако ви се потребни наместо 10, 20.000 евра вие ќе треба да ги позајмите од некаде за што ќе плаќате камата или да речеме од своите најблиски, роднини, пријатели или потрошувачки кредит, што се има трошок. Сакам да кажам дека нема ниту еден аргумент дека ова не е поповолно или не би било поволно за некој што го нема решено станбеното прашање -рече Славевски.

The post БАНКИТЕ ИМААТ УШТЕ ДВА МЕСЕЦА ДА ГИ ПРОМЕНАТ УСЛОВИТЕ ЗА КРЕДИТИТЕ ЗА ПРВ СТАН Славески очекува при утврдување на каматите тие да ја применат светската практика appeared first on plusinfo.mk.

Од 1 декември банките ќе можат да даваат станбени кредити за прв стан или за изградба на куќа со учество од 10% од вредноста на станот, но под одредени услови.

– Очекувам дека нашите банки, во согласност со практиката присутна во голем број земји во светот, на кредитобарателите коишто за првпат купуваат стан како примарно живеалиште, ќе им понудат кредити по каматни стапки пониски за 0,5 до 0,75 процентни поени, што би придонесло за заштеди изразени во илјадници евра – изјави гувернерот на Народната банка, Трајко Славески.

Тој денеска ги соопшти измените на правилата на Народната банка во однос на утврдување на кредитоспособноста на граѓаните кои земаат станбен кредит. При тоа рече дека со новите правила се одвојуваат кредитите за прв стан кои стануваат поповолни, од кредитите за купување стан кој се смета за инвестиција односно станови кои не се наменети за живеење на сопствениците. За нив условите стануваат построги.

– За корисниците на станбени кредити наменети за купување или градење прво живеалиште, ќе останат во важност досегашните лимити на показателот ДСТИ, коишто изнесуваат 55% за изложеноста во денари и 50% за изложеноста со валутна компонента – рече Славески.

Тој објасни дека граѓаните кои ќе купуваат стан или ќе градат куќа во кои нема да живеат – инвестиции ќе треба да дадат повисоко учество за добивање станбен кредит, а ќе плаќаат повисоки каматни стапки.

– Минималното сопствено учество за овие кредити се зголемува од постојните 15% на 25% од вредноста на станот. За овие баратели на кредити се предвидуваат пониски лимити на показателот ДСТИ и тоа од 50% за изложеноста во денари и 45% за изложеноста со валутна компонента – рече Славески.

Новите правила, како што рече Славески, ќе важат од 1 декември.

Гувернерот рече дека граѓаните кои ќе бараат станбен кредит под поволни услови за прв стан или за изградба на куќа ќе треба да исполнат неколку услови со кои ќе докажат дека кредитот е за стан или куќа во кои ќе се живеат.

Давањето на ваквите кредити ќе подлежи на контрола, а измамата, односно давањето неточни податоци се смета за кривично дело. Ако Банката утврди ваква измама, ќе може да ја смени каматната стапка на кредитот.

Славески појасни дека последните промени имаат превентивен карактер.

– Нивната цел е да нѐ заштитат сите нас од прекумерна задолженост, што може да се одрази понатаму на способноста за редовно отплаќање на обврските, како и на вкупната стабилност на финансискиот систем. Истовремено, со овие промени внимаваме да не ги погодиме оние лица кои имаат потреба да го решат своето животно, станбено прашање, овозможувајќи им поповолни критериуми и полесен пристап до кредити, во однос на останатите корисници на кредити – рече Славески.

Тој додаде дека со ваквиот пристап, Народната банка се усогласува со практиката на голем број други централни банки во светот.

The post КРЕДИТ ЗА ПРВ СТАН ЌЕ СЕ ЗЕМА СО УЧЕСТВО ОД 10% Славески очекува и пониски камати кои би им заштедиле илјадници евра на младите брачни двојки appeared first on plusinfo.mk.