Црноморскиот Басен може да се затопли за дури 4 степени Целзиусови до 2070 година, при што зголемените температури значително ќе ги засилат екстремните временски појави, предупредуваат турски експерти, пренесува Анадолија.

Според Бариш Јонол од Факултетот за аеронаутика при Техничкиот универзитет во Истанбул, повисоките температури веројатно ќе доведат до поинтензивни врнежи, бидејќи топлиот воздух задржува повеќе влага. Истражувањето, спроведено од Јонол заедно со докторандот Мехмет Бариш Келебек и Фулден Батибениз од Универзитетот во Берн, ги анализира климатските проекции во сценарио со високи емисии на јаглерод, споредувајќи ги периодите 2005–2014 и 2061–2070 година.

Двегодишната студија се фокусира на краткорочни прогнози за интензивни врнежи, топлотни бранови, намалување на снежната покривка и сезонски промени на врнежите во земјите од Црноморскиот Басен, регионот на Мраморното Море, делови од Егејското Море, како и во Централна и северниот дел на Источна Анадолија. Според наодите, температурите во басенот може да се зголемат за 2 до 4 степени во зима, околу 2,5 степени во пролет, 3 степени во лето и меѓу 1,5 и 2,5 степени во есен.

Најизразено затоплување се очекува во Источна Анадолија, каде во одредени подрачја максималните температури во март би можеле да се зголемат за до 7 степени. Еден од најзначајните ефекти од затоплувањето е очекуваното продолжување на топлотните бранови. Додека во моментов тие траат меѓу 5 и 10 дена годишно, во иднина нивното времетраење може да достигне 50–55 дена. Снежната покривка, пак, се очекува да се намали за околу 20 проценти во пролет, а нејзината максимална висина во некои предели би можела да се намали од 125 на 80 сантиметри.

Истражувањето укажува на двоен ризик – од суши и од поплави. Летните врнежи во регионот на Мраморното Море и во западниот дел на Црното Море би можеле да се намалат за повеќе од 50 проценти, додека зимските врнежи би можеле да се зголемат за до 20 проценти во одделни региони. Источниот брег на Црното Море, делови од Грузија и Романија, како и Истанбул и околината на Мраморното Море, се посочуваат како потенцијални „жешки точки“. Во Истанбул максималните дневни врнежи може да се зголемат од сегашните 210 на 437 милиметри.

Јонол наведува дека ефектите од затоплувањето ќе се засилат по 2040-тите години, додавајќи дека Црното Море се загрева побрзо од другите мориња поради неговата полузатворена природа. Научникот нагласува дека справувањето со климатските промени бара адаптација на инфраструктурата, урбанистичкото планирање и управувањето со водните ресурси.

The post ТУРЦИЈА ЈА ОЧЕКУВААТ ТОПЛОТНИ БРАНОВИ, СУШИ И ПОПЛАВИ Студија открива загрижувачки климатски трендови appeared first on plusinfo.mk.

Климатските промени предизвикани од човекот го направија јулскиот топлотен бран што ги погоди Норвешка, Шведска и Финска да биде  за 2 степени Целзиусови потопол, според научен извештај објавен денеска.

Во извештајот се наведува дека веројатноста во иднина и овој дел од Европа да го зафаќаат топлотни бранови се зголемува за 10 пати, велат истражувачите од World Weather Attribution, група климатолози кои произведуваат брзи анализи што ја покажуваат улогата на климатските промени во екстремните временски настани.

Наодите, кои користеа рецензирани методи и модели за да го споредат неодамнешниот топлотен бран со светот пред Индустриската револуција, доаѓаат откако нордиските земји поминаа 2 недели во средината на јули борејќи се со невообичаено високи температури за регионот.

Во извештајот се наведува дека здравствените и социјалните услуги беа оптоварени, при што некои болници ги откажаа операциите и се бореа да ги разладат своите згради.

– Овој топлотен бран беше немилосрден. Две недели температури над 30°C во овој регион се невообичаени и, се разбира, многу загрижувачки – изјави Клер Барнс, истражувач во Центарот за политика за животна средина на Империјал колеџ во Лондон и еден од авторите на анализата.

Топлинскиот удар ги наруши екосистемите во регионот. Ирвасите бегаа од руралните средини во градовите, барајќи вода и бегајќи од неочекувани инсекти. Анализата покажа дека ваквите промени во моделите на миграција влијаат врз постоењето на луѓето, како што се одгледувачите на ирваси од Сами.

– Гледав ирвас како останува во иста сенка три дена по ред без да пасе, што беше тивок знак на стрес предизвикан од топлината-  велли Маја Валберг, консултант за клима во Шведскиот Црвен крст.

Сушните услови, исто така, го зголемија ризикот од пожари.

И како што климатските промени се забрзуваат, ситуацијата само ќе се влошува, предупредија истражувачите.

Се проценува дека слични топлотни бранови се двојно поверојатни сега отколку што беа во 2018 година.

-Дефинитивно очекуваме повеќе вакви настани во иднина и очекуваме тие да станат поинтензивни- рече Ерик Кјелстром, професор по климатологија во Шведскиот метеоролошки и хидролошки институт, кој исто така работеше на студијата.

Нордискиот топлотен бран илустрира колку се распространети климатските промени низ Европа.

– Овој топлотен бран беше силен потсетник за заканата од климатските промени во земјите со ладна клима кои обично не се сметаат за ранливи.Нашата инфраструктура не е изградена да издржи овие екстремни температури, а нашето постаро население е сè поранливо на опасна топлина -рече Волберг.

Додека ситуацијата во нордиските земји малку се олади, јужна Европа продолжува да се затоплува.

– И со сигурност можеме да кажеме дека климатските промени ги интензивираа тие временски услови – рече Барнс.

Жежок бран моментално ги зафаќа Франција и Шпанија, со температури што достигнуваат до средината на 40-тите степени. Предупредувања за топлина се издадени и во Германија, Италија, Велика Британија, Албанија и Црна Гора оваа недела.

Прогнозата за опасност од пожари во ЕУ за наредните денови е мрачна.

Се предвидуваат „екстремни до многу екстремни услови низ целиот континент“, наведувајќи голем број јужни, централни и источни земји.

Како знак за промена на моделите, исто така се вели дека може да се очекуваат „големи аномалии“ „во Шведска, делови од Норвешка и источна Финска“.

The post ТОПЛОТНИТЕ БРАНОВИ ЈА ЗГОЛЕМИЈА ТЕМПЕРАТУРАТА ЗА 2 СТЕПЕНИ ВО СКАНДИНАВИЈА Ирвасите со денови не излегуваат од сенка и бараат вода во градовите appeared first on plusinfo.mk.

Министерството за здравство ја информира јавноста дека согласно прогнозите од УХМР и врз основа на акцискиот план за превенирање на последиците од топлотни бранови врз здравјето на населението 2025–2030 година, почнувајќи од денеска (петок, 4 јули) се активира фаза 3, што ќе трае до 08.07.2025 година.

На предлог на Министерството, Владата ги донесе следните препораки:

• Ослободување од работни обврски за бремени жени и лица постари од 60 години. Оваа препорака не се однесува на вработени во критичната инфраструктура (здравство, полиција, армија, транспорт, енергетика, јавни комунални претпријатија).
• Одложување на работниот процес во критичните часови (11:00–17:00) за работници изложени на директна топлина;
• Работа од далечина, флексибилно или двократно работно време, каде што е изводливо;
• Работодавачите да обезбедат микроклиматски услови за работа согласно акцискиот план: простории со температура до 25°C, освен таму каде што природата на работниот процес налага поинаку;

○ Активирање на планови за вонредни услови, сите здравствени установи, установи за згрижување на стари лица и образовни институции да постапат согласно интерните протоколи за кризна состојба.

„Мерките имаат за цел да обезбедат континуирана и ефикасна заштита на здравјето на населението преку превентивно дејствување и соодветна институционална подготвеност. Министерството за здравство, заедно со сите надлежни институции, ќе продолжи со редовно информирање и спроведување на мерките, со цел заштита на здравјето на граѓаните“, се вели во соопштението.

The post БРЕМЕНИТЕ ЖЕНИ И ПОСТАРИТЕ ОД 60 ГОДИНИ ДА СИ СЕДАТ ДОМА Активирана е фаза 3 од Акцискиот план за топлотни бранови, ова се препораките appeared first on plusinfo.mk.

– Од почетокот на месецот бевме под влијание на топлотен бран, што се манифестираше со период од околу 15 дена невообичаено високи температури на воздухот (согласно 1961-1990 година). Средната месечна температура варираше од 17,7 степени во Лазарополе до 28,6 во Гевгелија. Споредено со многугодишните (1981-2010) августовски средномесечни температури, годинашните беа натпросечни на ниво на држава – информира Управата.

Највисоката максимална температура беше 44,1 степен измерена на втори август во Гевгелија. Средната максимална температура варираше од 26,4 во Маврово до 37,6 во Гевгелија и е надмината во споредба со периодот 1981/2010.

Најниската минимална температура од пет степени на 31-ви август беше измерена во Берово. Средната минимална температура варираше од 10,4 во Берово до 20,5 во Гевгелија.

Во август 2021, месечната сума на врнежи варираше од 0,2 милиметра во Охрид до 41,4 милиметри во Крива Паланка, а биле од дожд и локална појава на град, проследени со грмежи. Максималната дневна сума на врнежи од 20 милиметри беше регистрирана во Берово на 27-ми во месецот. Споредено со августовската многугодишна просечна вредност (1981-2010), измерената августовска (2021) месечна сума на врнежи беше 18 милиметри или 50 отсто помала од просечната на ниво на држава.

„Во август имаше денови со појава на нестабилна облачност и услови за појава на град. Управата за хидрометеоролошки работи, преку радарските центри Тополчани и Ѓуриште во соработка со Аероклуб Скопје во деновите 11, 17, 25, 28 и 29-ти август дејствуваше со авионско засејување врз градоносни облаци во земјава, претежно во регионите со поголема застапеност на земјоделски култури и превентивно во нивна непосредна близина. Употребени се 77 палки. Со тоа е спречена појавата на град и катастрофални последици“, наведува УХМР.

The post НАЈТОПОЛ АВГУСТ ВО ПОСЛЕДНИТЕ 40 ГОДИНИ Гевгелија горела на 44,1 степен appeared first on plusinfo.mk.