Поради екстремно топлото време кое го зафати целата држава, Министерството за здравство излезе со сериозни препораки за заштита на граѓаните. Според најновата прогноза од Управата за хидрометеоролошки работи (УХМР), температурите во наредниот период ќе бидат исклучително високи, што го зголемува ризикот од здравствени проблеми, особено кај најранливите категории на население.

Надлежните апелираат граѓаните да престојуваат во затворени и разладени простории, особено во критичниот период од денот – од 11 до 17 часот, кога сонцето е најсилно. Се препорачува внесување доволно течности, пред сè вода, избегнување алкохол и засладени пијалаци кои го дехидрираат телото.

Граѓаните треба да носат лесна, светла и проветлива облека, да користат заштита за глава и очи, а физичките активности треба да се избегнуваат во најжешките часови. Посебно внимание треба да се посвети на децата, старите лица, хронично болните и бремените жени, кои се најосетливи на топлотни бранови.

Дополнително, се препорачува одложување на активности на отворено и обезбедување микроклиматски услови – разладени простории со температура до 25 степени Целзиусови, како во домовите, така и на работните места.

Во случај на симптоми како вртоглавица, главоболка, гадење или забрзан пулс, се советува веднаш да се побара медицинска помош.

Министерството за здравство информира дека ситуацијата се следи на дневна основа и дека институцијата ќе постапува соодветно на проценките и новите околности. Апелот е јасен, сериозно да се сфатат овие препораки, бидејќи игнорирањето на жештините може да има сериозни последици.

The post ЖЕШТИНАТА МОЖЕ ДА УБИЕ Еве што препорачуваат докторите, не ја игнорирајте оваа листа appeared first on plusinfo.mk.

Под влијание на топол бран, до сабота (26 јули) Македонија ќе биде зафатена од исклучително високи температури и сончево време со слаба до умерена локална облачност.

Како што информираат од Управата за хидрометеоролошки работи (УХМР), утре ќе дува умерен, а во западните делови повремено и засилен југозападен ветер, што дополнително ќе ја зголеми чувствителноста на високите температури.

Температурите значително ќе го надминат просекот за месец јули, а во некои региони ќе достигнат и до 42 степени Целзиусови. Според прогнозите:

– Во југозападниот, источниот и североисточниот регион се очекува температура меѓу 34 и 38°C,

– Во Полошкиот регион температурите ќе се движат од 32 до 38°C,

– Во Пелагонија се најавуваат екстремни температури од 38 до 40°C,

– Во Скопскиот, Вардарскиот и југоисточниот регион температурите ќе достигнат и до 42°C

Граѓаните се повикуваат да избегнуваат престој на отворено во најжешкиот дел од денот, да пијат повеќе течности и да се заштитат од директна сончева изложеност. Очекувањата се дека топлотниот бран ќе трае до сабота, по што е можно благо освежување.

The post ТОПЛИОТ БРАН ЌЕ РУШИ РЕКОРДИ Скопје, Гевгелија и Битола под најголем удар, температури до 42 степени appeared first on plusinfo.mk.

Од сабота, Македонија влегува во нов топлотен бран кој, според најавите на Управата за хидрометеоролошки работи (УХМР), ќе трае во текот на целата идна недела. Очекувањата се за стабилно, сончево и исклучително топло време, со само слаба до умерена локална облачност.

Во сабота, утринските температури ќе бидат релативно пријатни – најниските ќе се движат околу 10 степени во Маврово и Берово, додека најтопло ќе биде во Гевгелија со 19 степени. Но, веќе преку денот температурите ќе пораснат драматично: во Маврово се очекуваат 26 степени, а во Гевгелија речиси тропски 39°C. Во главниот град, Скопје, ќе преовладува сончево време со мала до умерена облачност и слаб до умерен северен ветер. Температурите таму ќе се движат од утрински 17 до попладневни 37 степени Целзиусови.

„Од утре следува период на сончево и многу топло време со мала до умерена облачност. Особено топло време се очекува во текот на следната работна седмица, кога дневната температура насекаде ќе биде над 30°C, на повеќе места ќе надминува 35°C, а наместа ќе биде и над 40°C“, се наведува во соопштението на УХМР.

Во недела се продолжува со слична временска слика. Утринските температури ќе бидат нешто повисоки – од 11 степени во најпланинските предели до 20°C во југоисточниот дел на земјава. Максималните дневни температури ќе се движат од околу 31 степен во северозападниот дел, па сè до 39°C во најтоплите региони. Ќе биде сончево и многу топло со умерена облачност, а ветерот ќе се засили и ќе дува од западен правец. Попладне се очекува зголемување на облачноста, но без најавени врнежи.

УХМР апелира граѓаните да бидат внимателни, особено во периодот од 11 до 17 часот, да избегнуваат директна изложеност на сонце и да внесуваат доволно течности. Исто така, се препорачува заштита на постарите лица, хронично болните и малите деца, кои се најранливи на ваквите температурни екстреми.

The post НЕ ВЕРУВАВТЕ ДЕКА МОЖЕ ДА СТАНЕ ПОЖЕШКО? Погледнете што не’ чека од сабота, нов пеколен бран appeared first on plusinfo.mk.