Градоначалникот на Битола Тони Коњановски присуствуваше на конференцијата со која официјално почна проектот „Отпорни и ефикасни комунални претпријатија“, чија главна цел е да се зголеми отпорноста и ефикасноста на претпријатијата во услови на климатски промени, енергетски кризи и иселување на населението.

– Јавната вредност на едно водоводно претпријатие не треба да се гледа единствено преку обезбедување вода до секој граѓанин. Водоснабдителниот систем има многу поширока и позначајна улога, бидејќи водата претставува основен ресурс за живот, јавно здравје, економски развој и одржливо функционирање на заедницата – рече Коњаносвки.

Затоа, додаде, успешноста на едно претпријатие треба да се мери преку јасно дефинирани и мерливи показатели.

– Тоа се финансиската стабилност, степенот на модернизација на системот, намалувањето на загубите на вода, ефикасноста во мерењето и наплатата, квалитетот и сигурноста на услугата, како и брзината на реакција при дефекти и интервенции. Дополнително, современите водоводни претпријатија мора да се насочат кон дигитализација, енергетска ефикасност и долгорочно управување со водните ресурси. Само преку ваков системски и одржлив пристап може да се обезбеди ефикасно и одговорно извршување на улогата на јавните претпријатија и создавање реална јавна вредност за граѓаните – рече градоначалникот на Битола.

За предизвиците на водоводните претпријатија говореше и директорот на ЈП „Водовод“ Битола, Андреј Гинов.

– Дигиталните алатки и податоците денес имаат клучна улога во управувањето со јавните претпријатија. Современиот мониторинг и дигиталното управување со водоснабдителните системи повеќе не се избор, туку основен предуслов за ефикасно, одржливо и професионално работење. Традиционалниот начин на управување со водоснабдителните системи е одамна надминат. Современите системи мора да се темелат на дигитализација, стручност, континуирана анализа на податоци и навремено донесување одлуки – рече тој.

Дигитализацијата, додаде, овозможува прецизно следење, анализа и контрола на водните ресурси – од влезните количини до испорачаната и фактурирана вода.

– Со примена на современи дигитални системи и управување базирано на податоци, јавните претпријатија можат побрзо да реагираат при дефекти, да ги намалуваат загубите на вода и поефикасно да управуваат со ресурсите и инфраструктурата. Доколку во минатото водоснабдувањето било дел од националните стратешки приоритети, денес тоа мора да добие уште поголемо значење и институционална поддршка, на исто ниво како електричната енергија и другите стратешки ресурси – истакна Гинов.

Поздравни обраќања на конференцијата имаа и заменик министерката за животна средина и просторно планирање, Ане Лашкоска и амбасадорот на Швајцарија Кристоф Зомер.

Проектот е финансиран од Владата на Швајцарската Конфедерација, претставувана од Државниот секретаријат за економски прашања, со придонес на Министерството за животна средина и просторно планирање на Македонија и седум општини и комунални претпријатија корисници: Битола, Берово, Кочани, Куманово, Радовиш, Струмица и Виница.

За реализација на проектот се обезбедени 6,5 милиони швајцарски франци грант, а Министерството за животна средина учествува со половина милион швајцарски франци.

На ЈКП „Водовод“ – Битола му е доделен грант во вредност од 100.000 швајцарски франци, наменет за модернизација на системите и за подобрување на следливоста и управувањето со водоснабдувањето во руралните средини.

The post ВОДАТА МОРА ДА Е НАЦИОНАЛЕН СТРАТЕШКИ ПРИОРИТЕТ КАКО ШТО Е СТРУЈАТА Почна проектот за отпорни и ефикасни комунални претпријатија appeared first on plusinfo.mk.

Територијалната противпожарна единица на Битола од денеска е модернизирана со теренско противпожарно возило-џип со специјална надградба и со противпожарно возило-цистерна. Оваа опрема ќе овозможи побрза реакција, подобра мобилност на непристапни терени и поефикасно справување со пожари во шумски и во рурални средини, соопшти локалната самоуправа.

Обезбедени се во рамките на проектот „FIREFLY-заедничка прекугранична иновативна заштита и превенција од шумски пожари“, проект кој носи конкретни придобивки за граѓаните на Битола, Пелагонискиот регион и за прекуграничната област.

На денешното примопредавање присуствуваа заменик министерот за локална самоуправа, Ерџан Селими, градоначалникот на Битола, Тони Коњановски, директорот на Центарот за развој на Пелагонискиот плански регион, Јосиф Балтов и командирот на противпожарната единица на Битола, Христијан Тодоровски.

– Како најголема општина во регионот и основач и финансиер на Територијалната противпожарна единица Битола, Општина Битола добро ги познава предизвиците со кои се соочуваат пожарникарите на терен. Последните години сме сведоци на сè почести екстремни временски услови, долги сушни периоди и зголемен ризик од шумски пожари кои претставуваат сериозна закана за природата, имотот и за човечките животи. Територијалната противпожарна единица Битола не ја штити само територијата на Општина Битола. Таа секојдневно обезбедува заштита и за општините Новаци и Могила, а во многу наврати интервенира и пошироко во регионот, кога тоа е потребно. Токму затоа, вложувањето во нејзините капацитети претставува вложување во безбедноста на целиот Пелагониски регион – рече градоначалникот Коњановски.

Проектот е аплициран во рамките на првиот отворен повик од Програмата за прекугранична соработка со Грција 2021-2027 година, која е дел од Инструментот за претпристапна помош на Европската Унија.

Главна цел на проектот е да се придонесе во превенција и ефективно управување со шумските пожари во прекуграничните региони и дасе даде придонес во заштитата на природната средина и зајакнување на здравите екосистеми на двете области.

Партнери во проектот од македонска страна се Центарот за развој на Пелагонискиот плански регион и Дирекцијата за заштита и спасување.

The post НОВИ ВОЗИЛА ЗА БИТОЛСКАТА ПРОТИВПОЖАРНА ЕДИНИЦА Подобра заштита од пожари за цела Пелагонија appeared first on plusinfo.mk.

Долгите листи на чекање за упис во градинките во Битола наскоро би можеле да станат минато, најави градоначалникот Тони Коњановски, посочувајќи дека новите капацитети веќе даваат резултати.

Тој информираше дека е ставена во функција детска градинка во Домот за доенчиња и мали деца, каде што се згрижуваат 70 деца. Воедно, потенцираше дека биле наследени проблеми со две нови градинки, поради што нивното отворање било одложено.

– Успеавме да ја ставиме во функција градинката во Домот за доенчиња и мали деца, каде што се згрижуваат 70 деца. Жал ми е што другите две градинки, кои ги затекнавме во незавршена состојба, не можеа веднаш да почнат со работа. Ги интензивиравме постапките и работевме на решавање на проблемите – изјави Коњановски.

Според него, градинката во Нова Битола е веќе изградена и во тек е партерното уредување. По завршувањето на сите процедури и добивањето согласност од надлежните институции, ќе следува вработување кадар и нејзино ставање во функција.

– Овој објект има капацитет за 153 деца и значително ќе ја намали листата на чекање. Со овие инвестиции вложуваме во иднината на најмладите – додаде градоначалникот.

Коњановски посочи и дека градежната сезона во Битола е веќе во полн ек, со активна механизација и работа на повеќе локации.

– Во моментов работиме на 21 локација, а вкупно се започнати околу 80 проекти со владина поддршка. Паралелно се реализираат и тековни активности, како и проекти кои се во завршна фаза – рече тој.

Општината во меѓувреме објави и јавен повик за поддршка на младински проекти, за што се издвоени 550.000 денари од буџетот.

The post КРАЈ НА ЧЕКАЊЕТО ЗА ГРАДИНКИ ВО БИТОЛА Коњановски најави решавање на проблемот appeared first on plusinfo.mk.

Почна асфалтирањето на улицата СРУ 5, која е важна сообраќајница во некогашната касарна во Битола, соопшти општината.

Таа ги поврзува улицата Партизанска и улицата Крушевска република.

– За некои ова ќе изгледа како свечен чин, а за нас е секојдневна редовна работа, бидејќи уличната и патната инфраструктура се наш приоритет – рече градоначалникот на Битола, Тони Коњановски.

Претходно се работеше на тротоарите од двете страни кои се со широчина по 2,5 метри и беа поставени коловозните рабници. По асфалтирањето на коловозот ќе се работи на велосипедската патека, а местото и хортикултурно ќе се уреди.

Улицата има комплетна инфраструктура, атмосферска и фекална канализација и водоводна инсталација, како и улично осветление.

Инвестицијата е над 9 милиони денари.

The post СЕ АСФАЛТИРА УЛИЦА ВО НЕКОГАШНАТА КАСАРНА ВО БИТОЛА Инсфраструктурата е приоритет за општината appeared first on plusinfo.mk.

Јавното комунално претпријатие „Водовод“ во Битола инвестира во паметен и одржлив водоводен систем, соопшти претпријатието.

Градоначалникот  на Битола, Тони Коњановски, заедно со директорот Андреј Гинов, присуствуваше на работен состанок во ЈКП „Водовод“ со претставници од швајцарската амбасада, посветен на реализација на нов проект за модернизација и за дигитализација на системот.

Клучни фактори на проектот се рационализација на водните ресурси, со акцент на регионалните водоводни мрежи.

Првата фаза опфаќа приоритетни регионални системи со најголема потреба.

Како што информираат од претпријатието, проектот е структуриран во 3 фази, кои се јасно дефинирани и според финансиска тежина.

„Се предвидува надградба на постојниот SCADA и дигитална трансформација, aвтоматизирано отчитување, особено во руралните средини, намалување на загубите на вода и зголемување на ефикасноста. Ќе има поддршка од европските фондови и меѓународните партнери“, се додава во соопштението.

Проектот претставува континуитет и надградба на долгогодишните инвестиции и заложби на ЈКП „Водовод“ со јасна цел – целосно дигитализиран и ефикасен систем. Со овие активности, Битола прави значаен чекор кон одржливо, модерно и одговорно управување со водните ресурси, потенцираат од водоснабдителното претпријатие.

The post ПРОЕКТ ЗА ПАМЕТЕН И ОДРЖЛИВ ВОДОВОДЕН СИСТЕМ ВО БИТОЛА Автоматско отчитување на водомерите и намалување на загубите на вода appeared first on plusinfo.mk.

Градоначалникот на општина Битола Тони Коњановски, организираше ифтарска вечера, воочи големиот муслимански празник Рамазан Бајрам.

На вечерата присуствуваа битолскиот муфтија Амит Расими, заедно со дел од членовите на битолското муфтиство, претседателелот на Советот, советници, како и соработници на Општина Битола од невладиниот и бизнис секторот.

– Во месецот кога нашите сограѓани од исламска вероисповед го празнуваат светиот месец Рамазан, сакаме да испратиме порака на заедништво, взаемна почит, добрина и грижа, во духот на битолскиот космополитизам, кој на овие простори опстојувал со векови – рече градоначалникот Тони Коњановски на ифтарската вечера.

Вечери како оваа се потсетник дека преку заеднички напори можеме да изградиме подобро општество за сите нас, порача градоначалникот.

Свое обраќање имаше и битолскиот муфтија Амит Расими кој рече дека месецот Рамазан е време на духовно прочистување, добрина и човечност.

The post ГРАДОНАЧАЛНИКОТ КОЊАНОВСКИ ОРГАНИЗИРАШЕ ИФТАРСКА ВЕЧЕРА Заедништво во духот на битолскиот космополитизам appeared first on plusinfo.mk.

Градежни работи веќе се одвиваат на објектот на подрачното училиште во селото Крклино, кое функционира во рамки на основното училиште ООУ „Александар Турунџев“.

Со проектот е предвидена целосна реконструкција на објектот, кој располага со две училници, канцеларија, ходник и санитарни простории. Ќе се менува кровната конструкција, ќе се обнови фасадата, ќе се постави нова ПВЦ-дограма, ќе се заменат подовите и ќе се извршат молеро-фарбарски работи во внатрешноста.

Градоначалникот на Битола, Тони Коњановски, изврши увид во текот на работите заедно со одговорните лица од проектот.

– Инвестираме во подобри услови за образование и достоинствен престој на учениците и наставниците. Оваа реконструкција е на барање на жителите и претставува уште еден чекор кон модернизација на училиштата во руралните средини – изјави Коњановски.

Проектот се реализира со финансиска поддршка од Министерство за образование и наука на Северна Македонија, а неговата вредност изнесува 3,38 милиони денари.

Со обновата се очекува значително да се подобрат условите за одвивање на наставата и квалитетот на воспитно-образовниот процес за учениците од овој дел на општината.

The post НОВО ЛИЦЕ НА УЧИЛИШТЕТО ВО КРКЛИНО Започна голема реконструкција вредна над 3 милиони денари appeared first on plusinfo.mk.

На денешната седница на Советот на Општина Битола на дневен ред е завршната сметка и годишниот извештај за 2025 година.

На почетокот на седницата се обрати градоначалникот на Битола Тони Коњановски, кој се осврна на проектите спроведени во 2025 година за кои рече дека се 100% реализирани. Тој рече дека е направена градежна офанзива и заклучно со четвртиот квартал реализирани се капитални расходи во износ од 411.187.922 денари.

– Фокусирани бевме на многу проекти, имаше кочења, имаше избори, но успеавме да бидеме подобри од било кога и од едно време кога локалната самоуправа ја водеше сегашната опозиција – рече Коњановски.

Меѓу сработените проекти, тој ги наведе изградба на градинка во АРМ, реконструкција на уличното осветлување на Никола Тесла, реконструкција на водоводна мрежа на улицата Нико Фундали, реконструкцијата на коловоз на улицата 8 Септември, односно булеварскиот влез на Битола, изградба на коловоз на патот до црквата во село Крклино, изградба на коловоз на улица кај Дулие, реконструкција на улицата Солунска, изградба на атмосферска и фекална канализација на улицата СТУ 3 во АРМ четврт 1, изградба на велосипедска патека, реконструкција на фудбалскиот стадион под Тумбе кафе, реализација на објектот на противпожарната единица во старата касарна, како и голем процент на реализација во програмата за енергетска ефикасност – освен сончеви панели во неколку училишта, ОУ „Стив Наумов“ доби енергетски ефикасна фасада.

– Во капиталните расходи имаме значително зголемен процент на реализација во споредба со периодот од 2018 до 2021 година кога реализацијата била од 38,17 до максимум 64,21 процент, а во последните години од нашиот прв мандат се движеше од 71,52 до максимум 77,38 проценти. За 2024 процентот на реализација беше 72,75 проценти. Не е оправдување, но е факт дека и 2024 и 2025 година беа изборни години, а тоа значи намалена активност согласно Изборниот законик. Но, и во таква ситуација бројките кажуваат дека сме биле подобри од една друга локална самоуправа што ја водеше Битола – рече Коњановски.

Тој додаде дека планираните даночни приходи се остварени со над 100 проценти, планираните неданочни приходи се остварени со 76,55 проценти, кај планираните капитални приходи остварувањето е 82,72 проценти, планираните трансфери и донации се со 49,69 проценти или вкупните приходи на општина Битола во 2025 година се реализирани со 73,16 проценти.

Извршувањето од буџетската сметка за сите програми е 73,16 проценти и е во рамки на процентот во кој се движи Општината во годините на ова раководство со локалната самоуправа.

Согласно програмската класификација во буџетот се опфатени 34 програми.

Вкупните расходи бил планирани на 1.464.825.712 денари, а реализирани се 1.071.722.119 денари.

– Позитивните резултати во 2025 година се и благодарение на соработка со јавните претпријатија, а постигнатото го реализиравме со општинската администрација, за што ја искажувам својата благодарност за посветеноста кон работата – рече Коњановски.

Во тек се 10-ина нови проекти (реконструкција на улици и патишта, изградба на нови, комунална инфраструктура, спортски игралишта). Коњановски најави дека со почнувањето на градежната сезона ќе има многу работа во оваа календарска година, во која благодарение и на соработката со Владата веќе се склучени договори.

The post ПОВЕЌЕ ОД 400 МИЛИОНИ ДЕНАРИ ВЛОЖЕНИ ВО ИНФРАСТРУКТУРНИ ПРОЕКТИ ЛАНИ ВО БИТОЛА Градоначалникот Коњановски е горд што 100% од проектите се реализирани appeared first on plusinfo.mk.

Градоначалникот на Битола, Тони Коњановски одржа координативен состанок со директорите на јавните претпријатија кои синоќа работеа на решавање на проблемите предизвикани од обилните врнежи од дожд. Дел од активностите продолжуваат и денеска.

Според податоците од мерната станица на хидросистемот „Стрежево“, која се наоѓа на браната, во текот на изминатиот ден за само 12 часа паднале 42 литри дожд на метар квадратен, што е енормно голема количина на врнежи кои предизвикаа водотеците да донесат големи количини на вода, информира Општина Битола.

Во стрежевската акумулација во моментов има 67,2 милиони метри кубни вода, а само во текот на вчерашниот ден се прибрани 3 милиони метри кубни вода, што е голема количина вода за кусо време.

Во текот на вчерашниот ден екипи на јавните претпријатија „Нискоградба“, „Водовод“, АД Водостопанство, хидро-системот „Стрежево“ и „Комуналец“ излегоа на терен после 15 часот, откако се зголемија врнежите.

Локалната власт соопшти дека „Нискоградба“ интервенираше со 4 тешки машини во Боримечка, во делот на населбата Стрчин, Лавчански пат.

– Единствен застој во градот беше излевањето на реката Курдерес, која не можеше да ги прибере обилните количини на вода кај стариот „Прогрес“. Тој застој на улиците Крушевска и Македонска фаланга експресно брзо беше саниран и отстранет, за еден час беше решена ситуацијата, а до доцна во ноќта екипите го чистеа потегот на раскрсницата. „Нискоградба“ исто така делуваше и во селото Канино, Кажани, Ѓавато, Жабени и дел на каналот Сива вода и улицата Скоевска.
Денеска „Нискоградба“ со оператива интервенира во Кравари, Канино, Барешани и дел од Буковски ливади. „Водовод“ со две машини и екипи учествуваше во интеренцијата во Кравари, а денеска на потегот на Логоварди – соопшти Општина Битола.

Се чистат каналите каде што има застоени води.

АД Водостопанство „Битолско поле“ вчера делуваше со една машина, а денеска ќе делува и со гасеничар.  Вчера беше интервенирано на Велушка Река, кон селото Породин, кај Новачки пат кај фармите во Логоварди и во Кравари. Денеса се интервенира на потегот од Жебени кон Петтиот канал.

Во врска со каналскиот систем, Коњановски вели дека во текот на изминатата година благодарение на јавните претпријатија на Битола, а особено на АД Водостопанство „Битолско поле“ беа исчистени најголемите собирни канали на територијата на Општина Битола и пошироко, особено Петтиот канал, кој доколку не беше исчистен ќе имавме многу полоша ситуација.

– Во текот на вчерашниот ден ние немавме поплавени улици во градот, на толку обилни дождови, освен излевањето на Курделес, што направи краткотраен застој во одвивањето на сообракајот – истакнува Коњановски, упатувајќи благодарност во екипите кои во празничната ноќ се справуваа со проблемите предизвикани од обилните врнежи од дожд.

The post ДО ДОЦНА ВО НОЌТА СЕ САНИРАА ПРОБЛЕМИТЕ ОД ОБИЛНИТЕ ВРНЕЖИ ВО БИТОЛСКО Јавните претпријатија продолжуваат со чистење appeared first on plusinfo.mk.

„Една од најголемите иницијативи на граѓаните е Хотелот Битола и негово адаптирање во Дом за стари лица. Така ќе овозможиме достоинствен живот за нашите највозрасни сограѓани, со топол дом, грижа и внимание што го заслужуваат“.

Вака вели актуелниот градоначалник на Битола Тони Коњановски во промотивно видео од изборната програма. Барајќи ја поддшрката за нов мандат од битолчани, Коњановски вели дека секој голем проект почнува од гласот на граѓаните.

– Токму затоа, заедно размислуваме, пишуваме и работиме на идеи што го прават секојдневието подобро. Граѓаните предлагаат секое дете од 1 до 3 одделение да добие бесплатен оброк. Исто така, како приоритетни барања, нашите сограѓани сметаат дека треба да се обезбедат ученички униформи за учениците од 1 до 5 одделение, да се организираат летни кампови за децата од социјално загрозени семејства, да се зголемат капацитетите на градинките, за да има место и грижа за секое дете, да продолжи акцијата за отстранување на дивите објекти и гаражи, особено во Нова Битола, и многу други – вели актуелниот градоначалник и кандидат на ВМРО-ДПМНЕ за градоначалник на претстојните избори на 19 октомври.

Според Коњановски вистински избор се проекти создадени од граѓаните, за граѓаните, заеднички труд и идеи што стануваат реални проекти.

– Вистински избор е заедничкиот труд – кога гласот на граѓаните станува проект што го менува секојдневието – заклучува градоначалникот на Битола.

The post 📽️ ПОСТОИ ИНИЦИЈАТИВА ХОТЕЛОТ БИТОЛА ДА СТАНЕ ДОМ ЗА СТАРИ ЛИЦА, ВЕЛИ КОЊАНОВСКИ Градоначалникот и кандидат откри дел од програмата, како што вели, направена со граѓаните appeared first on plusinfo.mk.