Англискиот селектор Томас Тухел останува со целосна поддршка од Фудбалската асоцијација на Англија (ФА) и се очекува да ја предводи репрезентацијата и на Европското првенство во 2028 година, и покрај елиминацијата во полуфиналето на Светското првенство, пренесуваат британските медиуми.

Англија во средата навечер загуби од Аргентина со 2:1 и остана без место во финалето, а Тухел се најде на удар на критиките поради дефанзивните измени што ги направи откако неговата селекција поведе со 1:0 во полуфиналниот натпревар во Атланта.

– Продолжуваме според договорот до Европското првенство, кое ќе се одржи на домашен терен. Со нетрпение го очекувам тоа, иако во моментов е тешко да се размислува толку далеку. Многу големи репрезентации беа елиминирани уште пред полуфиналето, па и ова е успех. Знам дека никој не сака да го слушне тоа во моментов, ниту јас, бидејќи секогаш очекуваме најмногу од себе – изјави Тухел.

Германскиот стратег во февруари потпиша нов двегодишен договор со ФА, откако ја презеде англиската репрезентација во јануари 2025 година со задача да ја одведе до светската титула.

Извршниот директор на ФА, Марк Булингам, порача дека Федерацијата целосно стои зад германскиот селектор.

– Многу е болно кога ќе бидете толку блиску до финалето. Играчите и Томас дадоа сè од себе, а тренерскиот штаб и целиот тим вложија максимален напор во текот на турнирот. Сакам да им се заблагодарам на сите, како и на нашите фантастични навивачи во САД и дома – изјави Булингам.

Англија в сабота ќе игра против Франција во натпреварот за третото место, а евентуалната победа би ѝ го донела првиот бронзен медал во историјата на настапите на светските првенства.

The post ФИФА ДОНЕСЕ ОДЛУКА, ТУХЕЛ ОСТАНУВА Германецот ќе ја води Англија и на ЕП 2028 appeared first on plusinfo.mk.

Англискиот голман Џордан Пикфорд зад голот чувал белешки за аргентинските пеналџии. Откако Аргентина ја порази Англија, шишето заврши во рацете на Лионел Меси и неговите соиграчи.

Шишето го забележал член на стручниот штаб на Аргентина. Набргу завршило кај играчите, а потоа и кај капитенот Лионел Меси.

Според снимките што се проширија на социјалните мрежи, Меси и неговите соиграчи со љубопитност ги разгледувале белешките и барале превод на напишаното.

Детални инструкции за секој пеналџија

Белешките ги подготвил тренерот на голманите на Англија, Португалецот Енрике Хиларио. На списокот имало детали за повеќе аргентински репрезентативци и проценка каде најчесто шутираат од белата точка.

За Меси, на пример, било наведено:

„Лажно гледа лево, шутира десно.“

Монтиел – фрли на лево

Паредес – застани лево, фрли се надесно

Мек Алистер – фрли се надесно

Фернандез – застани во средина

Гонзалез – застани, потоа реагирај

Алварез – фрли се налево

Лаутаро Мартинез – фрли се надесно

Де Пол – застани десно, помести се кон средина, фрли се на лево

Алмада – зависи од чувството тој ден

Отаменди – преправај се дека одиш десно, фрли се  налево

Лопез – фрли се  надесно, остави ја ногата

Паласиос – фрли се надесно, направи го решителниот прв чекор, оди!

Ло Селсо – преправај се дека одиш надесно, фрли се на лево

Паз – фрли се на лево

Медина – застани, фрли се на лево

Барко – застани, фрли се надесно

Лисандро Мартинез – застани, фрли се на лево

Молина – застани десно, фрли се надесно

Талафико – фрли се налево

Симеоне – фрли се надесно

Сенеси – фрли се надесно

Рулџи – фрли се на лево

Пеналите никогаш не дојдоа на ред

Иронијата е што Англија воопшто не стигна до пенал-рулетот. Избраниците на Томас Тухел водеа во второто полувреме и беа на чекор од финале, но Аргентина направи голем пресврт.

Енцо Фернандес и Лаутаро Мартинез со голови во завршницата го свртеа резултатот и ја одведоа актуелната светска шампионка во ново мундијалско финале.

The post 📷 ПИКФОРД ИМАЛ СПИСОК НА ПЕНАЛЏИИ ИСПИШАН НА ШИШЕ! Меси се вчудоневидил кога ја видел белешката appeared first on plusinfo.mk.

Англиската јавност го обвинува селекторот Томас Тухел за неуспехот на Англија во полуфиналето со Аргентина и за пропуштената историска шанса. Повеќе поранешни репрезентативци и аналитичари оценуваат дека селекторот прерано го затворил натпреварот.

Англија беше на прагот на своето прво мундијалско финале од 1966 година. Поведе со голот на Ентони Гордон, но потоа ѝ ја препушти иницијативата на Аргентина.

Тухел по погодокот во 55. минута внесе тројца дефанзивци. Неговата селекција се повлече, а светскиот шампион постепено го стегаше обрачот. На прес-конференција Германецот изјави дека не верува дека ги направил погрешните замени, но дека ќе преземе секаква одговорност за одлуките.

– Одлучивме да го затвориме нашиот простор, бидејќи тие го добиваа речиси секој скок дуел и постојано ја нафрлуваа топката во нашиот шеснаесетник. По нашиот гол дозволивме премногу шанси и се обидовме да реагираме. Одговорноста е кај тренерот и лесно е да се каже по натпреварот дека одлуката беше погрешна – наведе селекторот.

За последните минути од мечот кога, според многумина, Англија требаше да се обиде да постигне втор гол, Тухел вели:

– Секако дека сакавме да постигнеме втор гол, но немав чувство дека офанзивните замени ќе ни помогнат. Останавме во формација 4-4-2, но станувавме сè попасивни. Не можевме да освоиме или задржиме ниту една топка, а играта целосно се промени.

Ширер ја виде грешката на клупата

Вејн Руни, еден од најгласните критичари по натпреварот, директно го посочи селекторот.

– Се распаднавме. Тоа почна од селекторот и од неговите одлуки. Станавме премногу пасивни. Против светски шампион нема да се извлечеш со тоа. Англија потфрли на најголемиот тест – изјави Руни.

Слична оценка даде и Алан Ширер. Поранешниот голгетер смета дека Тухел прерано ги одигра своите најважни карти.

– Тухел ги одигра своите карти прерано и тоа му се врати. Не можеш да очекуваш да се браниш 30 минути против квалитетен тим како Аргентина. Ова е сè до селекторот – изјави Ширер.

Критиките ги поткрепи и статистиката од завршницата. Англија имаше само 12% посед пред вториот гол на Аргентина.

Тухел внесе двајца напаѓачи дури во судиското продолжение. Тогаш Аргентина веќе го комплетираше пресвртот.

Меси ја казни англиската пасивност

Аргентина не испаничи по водството на противникот. Според поранешниот англиски голман Џо Харт, светскиот шампион продолжи да верува во својот план. Лионел Меси потоа ја презеде главната улога. Со 2 асистенции им подготви голови на Енцо Фернандес и на Лаутаро Мартинес.

Аргентина победи со 2-1 и обезбеди финале против Шпанија. Англија остана без можноста да го повтори успехот од 1966 година.

Селекторот на Аргентина, Лионел Скалони, го издвои карактерот на своите фудбалери.

– Искрено, мислам дека овој тим игра најдобар фудбал кога е под притисок. Кога се мачиме, а противникот малку се двоуми, чувствуваме крв и се обидуваме со сè што имаме – изјави Скалони.

Тој оцени дека Аргентина ја покажа својата најсилна страна токму по примениот гол.

– По нивниот гол покажавме сè што сакаме да претставува фудбалот. Фудбалот не е само тактика, стратегија или атрактивна игра. Сè во што веруваме се одрази во последните 40 минути – рече Скалони.

Тухел ќе ја води Англија и на следниот Мундијал

Сепак, англиската фудбалска федерација веднаш по натпреварот му даде поддршка на селекторот. Оттаму соопштија дека Тухел ќе ја води репрезентацијата и на Европското првенство во 2028 година.

Домаќини на турнирот ќе бидат Англија, Шкотска, Велс и Ирска.

The post КРИТИКИТЕ КОН ТУХЕЛ ЗА ПОРАЗОТ НА АНГЛИЈА НЕ СТИВНУВААТ Еве што одговори тој за „дефанзивната игра“ на Островјаните appeared first on plusinfo.mk.

Џуд Белингем ја извлече Англија од мундијалската бездна и ја остави Норвешка со горчливо прашање. Дали израмнувачкиот гол воопшто смеел да важи? Англичаните славеа со 2:1 по продолженија во жешкиот Мајами. Белингем ги постигна двата гола и закажа историско полуфинале со Аргентина.

Сепак, Норвежаните не можеа да го заборават моментот пред првиот погодок. Тврдеа дека топката го допрела кабелот на воздушната камера. ФИФА потоа објави снимка и податоци од сензорот во топката. Светската фудбалска организација тврди дека немало контакт, па голот правилно бил признат.

Шјелдеруп го разбуди норвешкиот сон

Норвешка прва ја затресе мрежата во 36. минута. Андреас Шјелдеруп ја искористи несигурноста во англиската одбрана и донесе водство од 1:0. Англија изгледаше тешко, бавно и без вистинска идеја.

Избраниците на Томас Тухел имаа повеќе од топката, но малку конкретни решенија. Норвежаните останаа дисциплинирани и опасно излегуваа во напад.

На трибините веќе се чувствуваше дека може да падне уште еден фаворит. Англија изгледаше како тим што повторно ќе мора да се спасува.

Тогаш се појави Белингем.

Кабелот ја запали мундијалската расправа

Спорниот момент се случи пред самиот крај на полувремето. Норвешкиот голман Ерјан Ниланд изведе гол-аут и ја испрати топката високо кон средината. Норвежаните веднаш покажуваа кон кабелот од воздушната камера.

Според нив, топката го допрела кабелот и ја променила патеката. Акцијата продолжи, а Англија стигна до израмнување преку Белингем во 45+2 минута.

Правилата предвидуваат прекин ако топката допре надворешен предмет. Играта потоа треба да продолжи со судиско потфрлање.

Норвешкиот селектор Стале Солбакен тврдеше дека контактот бил видлив. Според него, кабелот ја нарушил поставеноста на неговата одбрана пред голот.  ФИФА, сепак, понуди технолошки одговор.

„Сензорот во топката не регистрираше промена во нејзиното ‘отчукување’ додека беше во воздух“, објави ФИФА во образложението што го пренесоа британските медиуми.

Според организацијата, немало доказ дека топката го допрела кабелот. Затоа немало основа судијата да ја прекине играта.

Before England’s goal in minute 45+2 against Norway, the sensor in the Connected Ball showed no peak in the ‘heartbeat of the ball’ when in the air, and therefore no evidence that the ball touched the overhead wire and changed the movement of the ball. pic.twitter.com/gYf9ukfveT

— FIFA Media (@fifamedia) July 11, 2026

Белингем удри и вторпат

Норвешка не се повлече по израмнувањето. Скандинавската селекција долго ја држеше Англија во неизвесност. Натпреварот заврши 1:1 по регуларните 90 минути, па следуваа продолженија.

Решавачкиот удар дојде во 93. минута. Ниланд не го задржа ударот на Морган Роџерс. Топката се одби пред Белингем, кој реагираше најбрзо и погоди за 2:1.

Тој гол ја претвори англиската нервоза во славје. Норвешка остана без сила за уште едно враќање. Белингем повторно стана човекот за големи мундијалски вечери. Неговите два погодоци ја однесоа Англија во четвртото светско полуфинале во историјата.

Англиските медиуми слават, Тухел кочи

„Гардијан“ оцени дека Англија се протнала низ тешка вечер. Весникот ја нагласи упорноста, ширината на составот и способноста на тимот да преживее под притисок.

Но, оценката не беше без критика. Англија имала среќа и повторно не одиграла на очекуваното техничко ниво, призна и Тухел.

„Сан“ го постави Белингем во средиштето на целата приказна. Пораката на таблоидот беше едноставна, кога го имате него, секогаш имате шанса.

Капитенот Хари Кејн призна дека Англија не го одиграла најубавиот натпревар. Сепак, го издвои Белингем како човекот што повторно ја променил играта.

Следува митското дерби со Аргентина

Англија сега се враќа во Атланта, каде во среда ќе игра против актуелниот светски шампион Аргентина. Аргентинците ја совладаа Швајцарија со 3:1 по продолженија. Така беше потврдено едно од најголемите ривалства во историјата на светските првенства.

Англиските фудбалери стигнаа меѓу четирите најдобри со победа што ќе се памети по Белингем. Норвежаните, пак, ќе ја паметат по кабелот кој, според ФИФА, топката никогаш не го допрела.

The post 📽️ БЕЛИНГЕМ ЈА ПРЕВЕСЛА НОРВЕШКА Голот од полувреме е важечки, топката не го погодила кабелот appeared first on plusinfo.mk.

Фудбалската еуфорија пред четвртфиналниот дуел на Светското првенство меѓу Англија и Норвешка достигнува врв, а социјалните мрежи ги преплави спектакуларно видео создадено со помош на вештачка интелигенција, во кое модерните Викинзи симболично го освојуваат Британскиот Остров.

Во видеото, норвешките фудбалски ѕвезди предводени од Ерлинг Халанд и Мартин Одегард се прикажани како викиншка војска која пристигнува на англиските брегови, додека Англија ја бранат Хари Кејн, Џордан Пикфорд, Џуд Белингем, легендарниот Дејвид Бекам, па дури и селекторот Томас Тухел, кој е претставен како крал.

Креативната најава за вечерашниот спектакл, кој започнува во 23 часот, за кратко време стана вистински хит на интернет. Видеото собра милионски прегледи, десетици илјади споделувања и бројни позитивни реакции од љубителите на фудбалот ширум светот.

 

View this post on Instagram

 

A post shared by SCENLYX (@scenlyx)

Причината за огромниот интерес е и одличната форма на Норвешка на шампионатот, особено настапите на Ерлинг Халанд, кој е меѓу најголемите фаворити за најдобар стрелец на турнирот.

Без разлика дали ќе триумфираат „трите лава“ или „викинзите“, едно е сигурно – навивачите веќе добија спектакуларна увертира за натпреварот што го чека целиот фудбалски свет.

Покрај ова видео на социјалните мрежи се појавија и други слични видеа, кои ќе ги споделиме со вас.

 

View this post on Instagram

 

A post shared by AGON HISTORY (@agonhistory)

 

View this post on Instagram

 

A post shared by God Ares A.I (@godaresai)

 

View this post on Instagram

 

A post shared by İsmail Seval (@yapayzekaserisi)

The post 📽️ ХАЛАНД ТРГНА ВО ОСВОЈУВАЊЕ НА АНГЛИЈА Интернетот „гори“ поради филмската најава за четвртфиналето appeared first on plusinfo.mk.

Англија со убедлива победа од 4-2 над Хрватска го започна настапот на Светското првенство, освојувајќи важни три бода во првото коло од групата Л на мечот одигран во Далас.

Избраниците на селекторот Томас Тухел уште на стартот покажаа дека располагаат со еден од најмоќните напади на турнирот, а во натпревар исполнет со пресврти и шест погодоци успеаја да ја скршат отпорната хрватска селекција.

Англичаните поведоа уште во деветтата минута откако Лука Модриќ направи пенал над Нони Мадуеке. Хари Кејн првично не успеа да го совлада Доминик Ливаковиќ, но поради прерано излегување на голманот од гол-линијата ударот беше повторен. Во вториот обид капитенот на Англија не погреши за 1-0.

Хрватска се врати во игра во 36. минута кога Мартин Батурина ја заврши одличната акција што ја започна Петар Сучиќ и израмни на 1-1.

Сепак, радоста на „коцкестите“ траеше кратко. Во 42. минута, по корнер на Деклан Рајс, Кејн остана осамен во шеснаесетникот и со вториот гол повторно ја донесе Англија во водство.

Но, драмата не заврши тука. Непосредно пред паузата Иван Перишиќ му асистираше на Петар Муса, кој погоди за 2-2 и најави неизвесно второ полувреме.

Клучниот момент се случи во продолжението кога Џуд Белингам со фантастична индивидуална акција ја затресе мрежата на Ливаковиќ и повторно ја врати предноста на Англија.

По тој погодок Англичаните целосно ја презедоа контролата врз натпреварот, создавајќи серија опасни шанси пред голот на Хрватска.

Конечниот удар го зададе Маркус Рашфорд, кој по брза контраакција ги постави конечните 4-2 и ја потврди заслужената победа на својот тим.

Со ваков офанзивен потенцијал Англија уште на стартот испрати силна порака до конкурентите дека сериозно ја напаѓа светската титула.

The post 📽️ АНГЛИЈА ЈА СКРШИ ХРВАТСКА ВО СПЕКТАКЛ СО ШЕСТ ГОЛА Кејн блескаше, а Рашфорд ја завери победата appeared first on plusinfo.mk.

Англија и Хрватска вечерва ќе го одиграат еден од најпривлечните натпревари од првото коло на Светското првенство 2026. Дуелот во Групата Л привлекува огромно внимание не само поради квалитетот на двете селекции, туку и поради богатата историја на меѓусебни пресметки кои во изминатата деценија донесоа неколку незаборавни натпревари.

Според речиси сите анализи и прогнози, Англија влегува во натпреварот како фаворит. Тимот на Томас Тухел располага со еден од најскапите и најквалитетни состави на турнирот, а многу фудбалски аналитичари ги вбројуваат Англичаните меѓу главните кандидати за освојување на светската титула. Победата на стартот би била важен чекор кон освојување на првото место во групата.

Најголемата англиска надеж повторно е капитенот Хари Кејн, кој и натаму е еден од најопасните напаѓачи во светот. Голема улога ќе има и Џуд Белингем, играчот кој веќе е препознаен како лидер на новата генерација англиски фудбалери. Во составот на Англија има и други ѕвезди од европските гиганти, што дополнително ја засилува улогата на фаворит.

Од другата страна стои Хрватска, селекција која со години ги надминува прогнозите. Иако генерацијата што играше финале на Светското првенство во 2018 година полека заминува од сцената, Лука Модриќ и понатаму е срцето на тимот. На свои 40 години, легендарниот играч од средниот ред останува симбол на хрватската репрезентација и човекот од кого навивачите очекуваат уште една магична вечер.

Хрватскиот селектор Златко Далиќ е свесен дека Англија има поголем индивидуален квалитет, но неговата репрезентација никогаш не се чувствувала удобно во улогата на фаворит. Напротив, најголемите успеси ги остваруваше токму кога противниците ја потценуваа. Хрватите веруваат дека искуството, дисциплината и препознатливиот борбен дух можат повторно да направат разлика.

Посебна тежина на натпреварот му дава и историјата на ривалството. За хрватските навивачи сè уште е свеж споменот на полуфиналето на Светското првенство во Русија во 2018 година, кога нивната репрезентација ја елиминира Англија и стигна до историско финале.

Англичаните, пак, со задоволство се сеќаваат на победата на Европското првенство во 2021 година, кога успеаја да им се реваншираат на Хрватите. Атмосферата меѓу навивачите е сосема различна. Во Англија преовладува уверување дека оваа генерација конечно може да ја донесе толку посакуваната светска титула, прва по далечната 1966 година. Во Хрватска, пак, доминира емоцијата дека можеби се следат последните големи настапи на Лука Модриќ, па поддршката кон репрезентацијата е уште посилна.

Фудбалските експерти најчесто предвидуваат тесен натпревар со мал број голови. Англија има повеќе квалитет и подолга клупа, но Хрватска има искуство и карактер кои повеќепати ја носеа далеку на големите турнири. Затоа вечерва е реално да се очекува неизвесен дуел во кој еден потег на Кејн или една магија на Модриќ може да го реши победникот.

ХРВАТИТЕ ГО ОКУПИРАА ДАЛАС Хрватски кочии, најголемото знаме и море од навивачи

The post ФУРИОЗНИОТ КЕЈН ПРОТИВ МАГИЈАТА НА ЛУКА МОДРИЌ Хрватите вечерва ќе се обидат да го совладаат фаворитот Англија appeared first on plusinfo.mk.

Непријатен инцидент ја потресе англиската фудбалска репрезентација непосредно пред стартот на настапот на Светското првенство 2026, откако дел од опремата на селекцијата била украдена за време на транспортот кон Канзас Сити.

Според британските медиуми, возилата кои ја превезувале опремата кон тренинг-центарот на „Гордиот Албион“ биле ограбени пред пристигнувањето на тимот на селекторот Томас Тухел. Меѓу украдените предмети, според првичните информации, има топки, копачки и друга тренинг-опрема, додека Фудбалската асоцијација на Англија (ФА) сè уште утврдува што точно недостасува и колкава е причинетата штета.

На местото на настанот во петокот вечер интервенирала полицијата, која веднаш започнала истрага. Според првичните информации, две лица се уапсени под сомнение дека се поврзани со кражбата.

– Спроведуваме истрага за можна кражба на опрема од возило на една репрезентација која пристигна во Канзас Сити. Утврдено е дека недостасуваат одредени предмети. Истрагата е во тек – соопшти портпарол на полицијата во Канзас Сити.

Англиската репрезентација треба да пристигне во градот денеска попладне, додека опремата била испратена неколку дена порано за да биде подготвено сè за почетокот на подготовките.

Инцидентот може да предизвика дополнителни главоболки за селекторот Томас Тухел пред првиот натпревар на Мундијалот. Англичаните турнирот го отвораат в среда против Хрватска, а првиот комплетен тренинг е закажан за утре.

Иако засега нема информации дека се украдени предмети од поголема вредност или дека подготовките ќе бидат сериозно нарушени, инцидентот фрли сенка врз атмосферата во англискиот табор во пресрет на еден од најважните спортски настани во светот.

The post АНГЛИЧАНИТЕ ОСТАНАА БЕЗ КОПАЧКИ, ТОПКИ И ОПРЕМА Крадци му создадоа главоболки на Тухел пред дуелот со Хрватска appeared first on plusinfo.mk.

Португалија и Англија со победи ги заокружија последните проверки пред почетокот на Светското првенство и покажаа дека во добро расположение го чекаат најголемиот фудбалски спектакл.

Португалците ја совладаа Нигерија со 2-1 во натпревар во кој имаа повеќе од играта и создадоа поголем број шанси. Педро Нето го отвори резултатот во 23. минута и донесе предност за европската селекција. Нигерија возврати преку Акор Адамс во 37. минута и на одмор се замина со израмнет резултат.

Продолжението донесе нов притисок од Португалија. Тимот создаваше шанси пред противничкиот гол, а наградата пристигна во 75. минута. Франциско Консеисао ја затресе мрежата и ги постави конечните 2-1.

Кристијано Роналдо беше стартер и играше до 65. минута. Искусниот капитен неколкупати се најде во добра позиција, но не успеа да го совлада нигерискиот голман.

„Трите лава“ напаѓаа и доминираа

Англија, пак, остави уште посилен впечаток на последниот тест пред Мундијалот. Избраниците на Томас Тухел ја совладаа Костарика со убедливи 3-0 и во текот на целиот натпревар ја контролираа играта.

Средбата во Орландо почна со едночасовно задоцнување поради невреме, но тоа не го наруши ритамот на Англичаните. Деклан Рајс погоди уште во 10. минута по добро проигрување од Ентони Гордон и ја најави доминацијата на својот тим.

До крајот на првиот дел Хари Кејн, Џуд Белингам и Нони Мадуеке создадоа неколку опасни ситуации, но резултатот остана непроменет.

Свежите сили влегоа и удрија силно

Во второто полувреме Англија продолжи со истото темпо. По еден час игра Еберечи Езе изнуди пенал, а Гордон сигурно реализираше за 2-0.

Конечниот резултат беше поставен во 87. минута. Морган Роџерс учествуваше во акцијата, а по одбраната на резервниот голман на Костарика, Оли Воткинс најдобро се снајде и со удар со глава ја испрати топката во мрежата.

За Англија ова беше најефикасниот настап во 2026 година. Тимот на Тухел така доби дополнителна самодоверба пред премиерниот мундијалски дуел против Хрватска, додека Португалија покажа дека и без гол од Роналдо има доволно оружја за висок дострел на турнирот.

The post 📽️ РОНАЛДО ПРОМАШУВАШЕ, КОНСЕИСАО ПРЕСУДИ Португалија со победа ја затвори генералната проба пред Мундијалот appeared first on plusinfo.mk.

Германскиот стручњак Томас Тухел се согласил да стане селектор на англиската репрезентација, објавија англиските медиуми.

Според информациите, 51-годишниот Германец веќе потпишал договор со Англиската фудбалска асоцијација и се очекува утре попладне и официјално да биде претставен на прес-конференција на „Вембли“.

Последната работа на Тухел беше во Баерн Минхен, кој го напушти на 30 јуни годинава. Под негово водство, Баварците станаа шампиони на Германија во сезоната 2022/23.

The post АНГЛИЈА ДОБИ НОВ СЕЛЕКТОР Германецот Томас Тухел седнува на клупата на „Гордиот Албион“ appeared first on plusinfo.mk.