Во рамките на законската постапка, денеска се одржа јавна расправа за продолжување на А-интегрираната еколошка дозвола на ТИТАН Усје, на која цементарницата ги презентираше информациите за своето работење, примената на најдобрите достапни практики и активностите што ги презема за заштита на животната средина, соопшти компанијата.

„Јавната расправа претставува важен дел од законската процедура и можност сите заинтересирани страни да ги изнесат своите ставови, прашања и забелешки. ТИТАН Усје го поздравува учеството на јавноста и верува дека аргументиран дијалог и размената на информации се најдобар начин за градење доверба. Во март годинава ТИТАН Усје до Министерството за животна средина и просторно планирање ја поднесе апликацијата за продолжување на А-интегрираната еколошка дозвола, која е во согласност со важечките законските и подзаконските акти. Компанијата доследно, навремено и транспарентно ги спроведе сите постапки и активности предвидени со процедурата за продолжување на А-интегрираната еколошка дозвола. Апликацијата е јавно достапна и ставена на увид на сите заинтересирани страни“, соопшти ТИТАН Усје.

Како дополнителен чекор кон поголема транспарентност, се додава во соопштението, компанијата го стави во функција новиот Усје портал за животна средина, преку кој јавноста ќе има пристап до дневните податоци од независниот 24-часовен мониторинг на емисиите, информации за еколошките активности, инвестициите и другите релевантни документи. Порталот овозможува и директна комуникација со компанијата, преку можност за поставување прашања и добивање дополнителни информации.

„Како прва компанија во Скопје што доби А-интегрирана еколошка дозвола и една од првите во државата, ТИТАН Усје уште тогаш ја потврди својата определба за примена на највисоки стандарди во индустријата. Компанијата е во постојан инвестициски циклус за модернизација и унапредување на процесите. ТИТАН Усје е посветена на работење согласно законските прописи, европските стандарди и принципите на одржлив развој. Компанијата и во иднина ќе продолжи со континуирани инвестиции во модернизација, намалување на влијанијата врз животната средина и отворена комуникација со сите засегнати страни“, соопшти цементарницата.

The post ЈАВНА РАСПРАВА ЗА ЕКОЛОШКАТА ДОЗВОЛА НА ТИТАН УСЈЕ Ќе бидат достапни дневни информации за емисиите од цементарницата appeared first on plusinfo.mk.

Заради зајакување на транспаретноста и градење на црвсти релации со јавноста и со сите засегнати страни, од денес е достапен новиот портал за животна средина на ТИТАН Усје https://envi-platform.usje.mk/mk/.

Компанијата објави дека на платформата ќе бидат достапни податоците од работењето на компанијата, информации за активности поврзани со животната средина и други релевантни материјали.

„Дополнително, за да се овозможи подетален увид во работењето на компанијата, на порталот ќе бидат објавени дневни податоци од независниот систем за мониторинг. Компанијата има 24-часовен мониторинг, 365 дена во годината, а досега редовно ги објавуваше неделните извештаи и ги испраќаше до медиумите еднаш неделно“, велат од ТИТАН Усје.

Покрај тоа, на новиот порталот за животна средина ќе можат да се најдат информации за активностите на компанијата во различни области од животната средина, како континуирани инвестиции и примена на иновации во процесот на работа, мерки за поголема декарбонизација, управување со отпад, регулатива и информации поврзани со алтернативните горива.

„Оваа платформа е дополнителен канал за отворена и транспарентна комуникација со јавноста“, порачува компанијата.

На новиот портал за животна средина на ТИТАН Усје ќе има можности и за директно поставување прашања или да се побараат дополнителни информации од различни области поврзани со работењето на компанијата. Ќе бидат објавени и студиите што компанијата ги спровела во различни области и други материјали и корисни линкови од областа на животната средина.

Порталот за животна средина постојано ќе се надоградува со нови информации, а на него ќе биде поставена и новата А интегрирана дозвола, се вели во соопштението.

„Како одговорен член на заедницата ТИТАН Усје останува посветена на креирање на одржлив развој во интерес на сите засегнати страни“, истакнува компанијата.

The post TИТАН УСЈЕ ЌЕ ГИ ОБЈАВУВА ДНЕВНИТЕ МЕРЕЊА НА НОВА ПЛАТФОРМА Компанијата ја јакне транспарентноста за животната средина appeared first on plusinfo.mk.

Еколошките активисти од иницијативата „Стоп за Усје“ и граѓани вечерва протестираа пред Министерството за животна средина и просторно планирање (МЖСПП) со барање да се почитуваат европски еколошки стандарди кога ќе се одлучува по барањето од Цемантарницата „Усје“ (Титан групација) за обнова на А-интегрираната дозвола.

Активистите, кои и во минатите месеци организираа протести за да искажат незадоволство од загадувањето на воздухот од „Усје“, денеска пред МЖСПП порачаа: „Не за нова дозвола по стари правила“, „Здравје пред профит“, „Скопје на народот, не на индустријата“.

Барањето за обнова на дозволата е поднесено и објавено на 22 мај на веб-страницата на Министерството и доставено до Општина Кисела Вода и Град Скопје, по што течеше еден месец рок за увид во барањето и поднесување забелешки на постапката за обновување на дозволата.

Министерот за животна средина и просторно планирање Муамет Хоџа во петокот во телевизиско интервју посочи дека законскиот рок за поднесување забелешки трае до 22 јуни и дека во првата недела од јули ќе се одржи јавна расправа.

Како што рече, барањето е поднесено уредно и според актуелниот закон, дека постапката тече и треба да заврши во март, но дозволата ќе биде обновена според новиот закон за контрола на индустриските емисии, кој треба да стапи во сила во септември идната година. Новиот закон предвидува построги еколошки стандарди и тие ќе важат и за сите оператори со А-дозволи.

Со оглед на тоа што по 2027 година сите дозволи ќе мора да се ревидираат, според министерот, логично е секое тековно обновување да се врши според идните, повисоки критериуми за заштита на амбиенталниот воздух и околината.

Министерот Хоџа соопшти и дека се подготвува регистар на индустриски капацитети кои поседуваат А-интрегрирана дозвола и оти тие се обврзани да го информираат МЖСПП кое ќе ги објавува мерењата на својата веб-страница.

The post ПРОТЕСТ ПРЕД МИНИСТЕРСТВОТО ЗА ЖИВОТНА СРЕДИНА „Стоп за Усје“ бара европски стандарди при обновата на дозволата appeared first on plusinfo.mk.

Компанијата ТИТАН Усје соопшти дека останува посветена на примена на највисоките еколошки стандарди и целосно почитување на законската регулатива, откако во март годинава до Министерството за животна средина и просторно планирање поднесе апликација за продолжување на А-интегрираната еколошка дозвола.

Од компанијата посочуваат дека постапката е спроведена согласно важечките законски и подзаконски акти и дека целокупната документација е јавно достапна за увид на сите заинтересирани страни.

„Како прва компанија во Скопје што доби А-интегрирана еколошка дозвола и една од првите во државата, ТИТАН Усје уште тогаш ја потврди својата определба за примена на највисоки стандарди во индустријата. Компанијата е во постојан инвестициски циклус за модернизација и унапредување на процесите“, наведуваат од ТИТАН Усје.

Оттаму истакнуваат дека строго ги почитуваат сите обврски што произлегуваат од важечката регулатива и дека внимателно ги следат сите законски измени, како во домашното така и во меѓународното законодавство.

„ТИТАН Усје строго ги почитува сите обврски што произлегуваат од важечката регулатива и останува целосно посветена на усогласување со сите идни законски решенија што ќе стапат во сила. Компанијата со големо внимание ги следи сите законски промени и континуирано инвестира во нова технологија за да може да се усогласи со регулаторните барања“, соопштија од компанијата.

Во соопштението се наведува дека во изминатите 15 години се инвестирани 29 милиони евра во модернизација на производството и мерки за заштита на животната средина.

Од ТИТАН Усје нагласуваат дека јавноста има право да биде информирана за сите прашања поврзани со животната средина и дека компанијата останува отворена за дијалог заснован на факти и стручни аргументи.

„Транспарентноста, почитувањето на законите, процедурите и конструктивната комуникација се најдобриот начин за градење доверба и заеднички придонес кон подобра животна средина“, велат од компанијата.

Според ТИТАН Усје, во изминатите години биле реализирани значителни инвестиции во современи технологии и опрема за заштита на животната средина, вклучително и најсовремени системи за филтрација и независен систем за континуирано следење на емисиите.

„Резултатите од редовните и контролните мерења потврдуваат дека сите параметри се во рамки на законски пропишаните вредности, при што дел од нив континуирано се повеќекратно пониски од максимално дозволените лимити“, наведуваат од компанијата.

Оттаму додаваат дека преку континуирани инвестиции во технологија и управување со процесите се применуваат најдобрите достапни техники и стандарди во индустријата, со цел дополнително намалување на влијанието врз животната средина.

Компанијата истакнува дека се придржува и до меѓународно признатите „ESG“ стандарди, со што, како што велат, ја потврдува долгорочната посветеност кон заштитата на животната средина, вклучувањето на заедницата и современото корпоративно управување.

The post ТИТАН УСЈЕ ПОБАРА ПРОДОЛЖУВАЊЕ НА ЕКОЛОШКАТА ДОЗВОЛА Инвестирани 29 милиони евра во заштита на животната средина appeared first on plusinfo.mk.

Независната студија изработена од консултантската куќа „Ernst & Yong“ покажува дека со придонес од 1,4% во бруто националниот производ, ТИТАН Усје има значајна улога во развојот на националната економија. Вкупното влијание на компанијата во економските активности, преку деловни активности, плати и даноци, минатата година изнесувале повеќе од 10,3 милијарди денари. Директните фискални приходи во државниот буџет изнесувале 515 милиони денари, а дополнителни даночни приливи се остварени преку добавувачи, дистрибутери и градежни компании низ целата држава. Компанијата обезбедува 249 директни работни места и околу 6.700 индиректни работни места преку добавувачите, клиентите и пошироката економска активност, што претставува приближно 1% од вкупната вработеност во државата.

Ова се клучните наоди од анализата за социо-економското влијание на ТИТАН Усје врз националната економија и развојот на заедницата што беше презентирана вчера во Стопанската комора на Македонија. Студијата нуди сеопфатна анализа на директните, индиректните и индуцираните економски ефекти од работењето на компанијата и ја истакнува улогата на ТИТАН Усје како еден од најзначајните економски чинители во земјата.

ТИТАН Усје е нераскинлив дел од македонската економија веќе 70 години. Компанијата игра стратешка улога во сите развојни процеси во земјата, а производи на ТИТАН Усје се вградени во мостови, патишта, училишта, болници, домови и инфраструктурни проекти кои секојдневно го обликуваат животот и развојот на земјата. Како дел од интернационаланата групација ТИТАН, компанијата ги следи најновите трендови во секторот и ги применува во земјата.

– Грижата за луѓето и заедницата е основен код на нашата визија. Луѓето и заедницата се база за економски раст и одржливост. Ние во нашето работење се водиме од овие вредности, бидејќи економскиот раст има смисла само доколку носи придобивки за луѓето и за заедницата во целина. Горди сме што оваа студија потврдува дека нашето влијание се протега многу пошироко од нашето директно работење, поддржувајќи компании, работни места и заедницата во поширока смисла. Остануваме посветени на создавање долгорочна вредност преку одговорно работење, инвестиции, иновации и одржлив развој – изјави Константинос Николаоу, главен извршен директор на ТИТАН Усје.

– Стопанската комора и јас лично како претседател, секогаш се залагаме за поддршка на компаниите кои делуваат во функција на општествено економски развој. Особено кога станува збор за компании со повеќедецениска традиција како Титан Усје кој веќе одбележа 70 години постоење во државата и има значителен придонес за одржлив развој. Студијата која е презентирана во куќата на бизнисот дава јасен сигнал дека компанијата има интерес да делува, притоа почитувајќи ги општествените норми и одржливиот развој, а Комората е секогаш тука да помогне во отворање конструктивен дијалог за фактите и аргументите – рече претседателот на Комората, Бранко Азески, во воведното излагање.

Покрај економските индикатори и фискалните ефекти, студијата јасно ја нотира посветеноста на ТИТАН Усје кон луѓето и заедницата. Вкупните инвестиции во заедницата во периодот од 2021 до 2025 година надминаа 103 милиони денари. Само во 2025 година компанијата инвестирала приближно 30 милиони денари во општествено одговорни иницијативи. Со овие активности биле опфатени 37.000 луѓе, преку иницијативи за заштита на животна средина, за развој на образованието, и во други општествени области.

ТИТАН Усје пред две години го отвори едукативниот центар „Иноваториум – Клуб на напредни знаења и вештини“, преку кој учениците од основните училишта стекнуваат практични знаења и вештини од областа на 3Д моделирањето, 3Д печатењето, роботиката и инженерството. За две години над 500 ученици беа дел од едукативните програми на овој проект. Преку програмата „Партнерство со училиштата и детските градинки“ во општините Кисела Вода и Аеродром, од 2010 година наваму, компанијата инвестираше повеќе од еден милион евра во унапредување на образовната инфраструктура, енергетската ефикасност и безбедносните услови, овозможувајќи подобри услови за над 8.000 ученици.

Студијата ги нагласува и резултатите на компанијата во областа на одржливоста. Компанијата е носител на највисока потврда за имплементација на одржлив систем за управување со отпад – Нула отпад на депонија (Zero Waste to Landfill Platinum Certificate) и е прва компанија со Платинуим признание во земјата.

Социо-економската студија е изработена според меѓународно призната методологија за економско моделирање на влезно-излезни односи (input-output analysis), базирана на податоци од Државниот завод за статистика и меѓународни економски стандарди.

The post УЧЕСТВУВА СО 1,4% ВО БДП И ПРИДОНЕСУВА ЗА ОКОЛУ 7.000 РАБОТНИ МЕСТА Компанијата ТИТАН Усје e важен чинител во македонската економија appeared first on plusinfo.mk.

ТИТАН Усје денес го одбележа двегодишниот јубилеј на едукативниот центар „Иноваториум – Клуб на напредни знаења и вештини“, преку кој учениците од основните училишта стекнуваат практични знаења и вештини од областа на 3Д моделирањето, 3Д печатењето, роботиката и инженерството.

На завршниот настан од втората година од програмата за 3Д печатење присуствуваа повеќе од 500 ученици од осум основни училишта од Општина Аеродром, директорите на училиштата, професорите, претставници од Општина Аеродром, Технолошко Металуршкиот Факултет и партнери на проектот.

Обраќајќи се пред присутните, главниот извршен директор Константинос Николаоу истакна дека програмата претставува значајна инвестиција во знаењето, љубопитноста и потенцијалот на младите генерации.

На настанот пред присутните се обрати техничкиот директор Љупчо Дончев, коj истакна дека преку обуките за 3Д печатење во „Иноваториум“ , учениците имаа можност да се запознаат со 3Д печатење, роботика и основи на инженерство, но уште поважно – да учат преку истражување, експериментирање и создавање.

– Во ера на дигитализација, многу е важно на младите да им понудиме и можности за стекнување на дополнителни вештини и навики, покрај оние што ги добиваат во училиштата. Кога го формиравме „Иноваториумот“ нашата цел беше да креираме простор преку кој ќе поттикнеме поголема мотивација и градење на интерес кон СТЕМ науките кај учениците и основните училишта од овој дел на градот. Особено ни е драго што оваа година обуките ги проширивме и во Општина Аеродром, каде беа вклучени 524  ученици. Со програмата минатата година беа опфатени основните училишта од Општина Кисела Вода со учество на повеќе од 200 ученици. Ова е силна потврда дека младите имаат голема желба да учат, да истражуваат и да се запознаваат со современи технологии – истакна Љупчо Дончев.

Во реализацијата на програмата, партнери на ТИТАН Усје се Технолошко-металуршки факултет, локалната самоуправа и училиштата, а од компанијата посочуваат дека токму ваквите партнерства се клучни за создавање подобри можности за младите.

ТИТАН Усје повеќе од 70 години е дел од заедницата, а преку програмата „Партнерство со училиштата“, која се реализира од 2009 година, компанијата континуирано инвестира во подобри услови за учење и развој на учениците.

На крајот од настанот, учениците добија признанија за успешно завршените обуки, а од компанијата упатија порака младите да продолжат да истражуваат, да поставуваат прашања и да создаваат, бидејќи токму тие се иднината.

„Иноваториум – клуб на напредни знаења и вештини“ е лоциран во кругот на ТИТАН УСЈЕ, а за учениците е обезбеден и автобуски превоз. Дел од капацитетите на „Иноваториумот“  и научните помагала се ставени на располагање на сите наставници по математика, физика и хемија од општинските училишта, со што ќе можат да го користат и во текот на редовната настава.

The post ТИТАН УСЈЕ ОДБЕЛЕЖА 2 ГОДИНИ „ИНОВАТОРИУМ“ Едукативен центар за развој на дигитални и инженерски вештини кај младите appeared first on plusinfo.mk.

Согласно законските рокови, ТИТАН Усје ја поднесе апликацијата за продолжување на А-интегрираната еколошка дозвола до Министерството за животна средина и просторно планирање. При подготовката на апликацијата за продолжување на дозволата, компанијата во целост ги следи обврските и условите што произлегуваат од законските и подзаконските акти и соработува со сите надлежните институции.

„Грижата за животната средина е основна вредност за ТИТАН Усје. Свесни сме дека заштитата на животната средина и квалитетот на воздухот предизвикуваат загриженост кај граѓаните и во нашето општество, како целина. ТИТАН Усје внимателно ја следи јавната дебата, сериозно ги сфаќа овие проблеми и дава транспарентен придонес кон нивно решавање“, се наведува во соопштението од ТИТАН Усје.

Оттаму додаваат дека како одговорна и транспарента компанија, работат согласно домашната регулатива и во своето работење ги применуваат најдобрите достапни практики во индустријата, кои важат и за компаниите од Европската Унија.

The post ПРОДОЛЖУВАЊЕТО НА А-ИНТЕГРИРАНАТА ДОЗВОЛА СЕ ОДВИВА СПОРЕД ЗАКОН Титан Усје соработува со надлежните институции appeared first on plusinfo.mk.

Емисиите од работата на ТИТАН УСЈЕ постојано се под граничните вредности определени со Закон. Од 2007 година, емисиите на ТИТАН УСЈЕ се мониторираат 24 часа, 365 дена во годината од страна на независен, автоматски систем за мониторинг (вкупна прашина, SO2 и NOx), кои се контролирани од страна на надлежните органи. Од компанијата велат дека не се во можност на каков било начин да влијаат врз резултатите.

Производството запира доколку филтрите не работат. Технолошкиот процес оневозможува работа на погонот без работа на филтрите.

„ТИТАН УСЈЕ не влијае врз зголемување на присуството на PM10 честички во воздухот. Паралелното мерење на амбиенталниот воздух (PM10 честички) во кругот на ТИТАН УСЈЕ не покажува меѓузависност со состојбите со амбиенталниот воздух измерени на други мерни станици, надвор од цементарницата“, се додава во соопштението од компанијата.

Работењето на компанијата е постојано следено од страна на Државниот инспекторат за животна средина.

Кога печките на ТИТАН УСЈЕ работат, тие работат 24 часа. ТИТАН УСЈЕ поради технолошки и деловни причини работи во текот на целото деноноќие. Печките или работат континуирано (24 часа) или не работат.

Производството на цемент е поинтензивно во текот на летните месеци, отколку во зима. Тоа е поради поголемата сезонска побарувачка на цемент во текот на летните месеци, отколку во зима.

ТИТАН УСЈЕ ги поканува сограѓаните, невладините организации, граѓанските групи и медиумите да ја посетат компанијата во кое било време и да добијат одговори на сите прашања од јавен интерес.

The post ЕМИСИИТЕ ОД РАБОТАТА НА ТИТАН УСЈЕ СЕ ПОД ГРАНИЧНИТЕ ВРЕДНОСТИ Ако филтрите не работат, производството запира appeared first on plusinfo.mk.

Најдоцна до 12.03.2026 цементарница „ТИТАН Усје“ треба да достави барање за обновување на А-Интегрираната дозвола. Постапката ќе опфати одредби од Законот за животна средина кои се однесуваат на издавање А-Интегрирана еколошка дозвола, учество на јавноста, услови, имплементирање на најдобри достапни техники. Новиот Закон за индустриски емисии бр.193/2025 од 18.09.2025 има рок за примена од 26.09.2027, но може да ни даде насоки за имплементација за заклучоците за цементна индустрија, соопшти денеска на прес конференција директорот на Управата за животна средина, Игор Никоски.

Тој објасни дека на крајот од 2018 година, „Усје“ започнало со користење алтернативни горива како замена за фосилни горива, со стапка на замена до 15%.

– Алтернативните горива што се користат се горива од цврст отпад (RDF) и биомаса од земјоделски отпад (оризова лушпа), и одреден отпад од текстилна индустрија. Согласно Годишниот извештај за животна средина во 2024 година не се увезувани алтернативни горива за копроцесирање поради забраната за увоз на отпад за енергетски цели, наведено во Законот за отпад. Како алтернативни горива кои биле користени во 2024 година се посочени биомаса од земјоделски отпад (лушпа од ориз и лушпи од кафе), селектиран отпад од текстилна индустрија, отпад од пакување што не може да се рециклира, како и отпадна пластика што не може повторно да се користи и рециклира – објасни Никоски.

Тој нагласи дека употребата на алтернативните горива освен што е една од препораките за најдобри достапни практики во цементната индустрија, таа е во склоп на концептот на циркуларна економија.

– Придобивки од користењето на алтернативните горива и предности за животната средина се: намалување на употребата на необновливи (фосилни) горива и суровини, намалување на стакленичките гасови и обновување на енергијата наместо отстранување (хиерархија на отпадот) – рече Никоски.

Емисиите во воздух од цементарница „Усје“ кои се емитираат претставуваат отпадни гасови од согорување и прашина. Согласно А-Интегрираната еколошка дозвола на Цементарница „Усје“ АД Скопје бр.11-714/5 од 12.03.2020 година има 12 емисиони точки во воздух (2 емисиони точки од парен котел, 2 емисиони точки од ротациони печки, 2 од ладилник на клинкер, 4 од мелници за клинкер и 2 од мелници за гориво).

– Отпадните гасови поминуваат низ филтер со вреќи па потоа се испуштаат во атмосферата. Цементарница „Усје“, согласно дозволата има 24-часовен континуиран мониторинг, 7 дена во неделата. Податоците, како што кажа и директорката на инспекторатот се обработуваат софтверски – објасни Никоски.

Мерењата на концентрации на цврсти честички во воздухот со големина до 10 микрометри (ПМ10) се вршат два пати годишно од надворешна акредитирана лабараторија.

– Согласно утврдени ризици при планирањето на пример во моментов со актуелната состојба со правен субјект ТИТАН Цементарница УСЈЕ ве известувам, дека во текот на 2025 година се извршени 6 надзори кај овој правен субјект од кои 2 редовни и 4 вонредни инспекциски надзори од различни државни инспектори (последните вонредни беа реализирани во текот на ноември со инспектор за животна средина од Градот Скопје 18.11.2025 во 22:00 дo 00:30 и во декември на 18.12.2025 со инспектор за животна средина од Општината Кисела Вода), при што кај сите надзори не се утврдени неправилности во работењето кај овој правен субјект. Секој месец Цементарница Усје до инспекторатот доставува месечен извештај за емисии во воздухот од сите емисиони точки, исто така доставува двапати годишно извештај од мерења кои ги извршува акредитирана лабораторија, зашто така се задолжени согласно дозволата – рече директорката на Државниот инспекторат за животна средина Ивана Гиновска денеска на истата прес конференција.

Цементарница „Усје“ АД Скопје претставува инсталација за производство на цементен клинкер во ротациони печки со производен капацитет над 500 тони на ден. Инсталацијата има доставено барање за А-Дозвола за усогласување со оперативен план на 27.06.2007 бр.11-3950/1 и по спроведување на постапката на 07.03.2011 е издадена А-Дозвола за усогласување со оперативен план бр.11-2402/1.

На 22.05.2013 год. издадена е Измена на А-Дозвола за усогласување со оперативен план бр. 11-1227/3 во која дозвола е одобрено користење на алтернативни горива.

Пред почетокот на користењето на алтернативни горива, „Усје“ подготвило детална студија за оцена на влијанието врз животната средина и добило решение за издавање согласност на Студија за оценка на влијание врз животната средина за проект „Воведување на алтернативни горива во Цементарница Усје“ (бр.11-1782/5 од 13.06.2012 год.).

По спроведување на целосната постапка на 12.03.2020 издадена е А-Интегрирана еколошка дозвола 11-714/5.

А-интегрираната еколошка дозвола има важност од 7 години. Најдоцна една година пред истекот на важноста, операторот е должен да поднесе барање за обновување на дозволата.

The post ОД 2018 ГОДИНА „ТИТАН УСЈЕ“ КОРИСТИ АЛТЕРНАТИВНИ ГОРИВА Тоа е една од препораките за најдобри достапни практики во цементната индустрија appeared first on plusinfo.mk.

До 20 декември 2025 година се реализирани 1.700 инспекциски надзори за амбиентален воздух, од кои 839 редовни, 532 вонредни и 329 контролни инспекциски надзори. Утврдени се 398 неправилности и издадени се исто толку решенија во инспекциската постапка. Покренати се повеќе од 30 прекршочни и 4 кривични постапки, соопшти на денешната прес-конференција во Владата директорката на Државниот инспекторат за животна средина Ивана Гиновска.

Таа информира дека Државниот инспекторат за животна средина работи согласно годишен план за работа одобрен од министетот за животна средина и просторно планирање.

Гиновска соопшти дека од 1 ноември до денеска се спроведени повеќе од 55 инспекциски надзори на територија на целата држава во инсталации кои имаат влијание врз животната средина преку емисии во воздухот. Издадени се 20 решенија и 3 забрани за работа.

Во однос на правниот субјект Цементарница Титан Усје, Гиновска информира дека во 2025 година биле извршени шест надзори, од кои два редовни и четири вонредни инспекциски надзори од различни државни инспектори. Последните вонредни биле извршени на 18 ноември 2025 во 22 часот со инспектор за животна средина од Град Скопје и на 18 декември 2025 со инспектор за животна средина од општина Кисела Вода. Притоа, како што рече, кај сите надзори не се утврдени неправилности во работата на овој правен субјект.

– Секој месец Цементарница Усје до Инспекторатот доставува месечен извештај за емисии во воздухот од сите емисиони точки. Исто така доставува двапати годишно извештај од мерења кои ги извршува акредитирана лабораторија, зашто така се задолжени согласно дозволата – додаде Гиновска.

Гиновска потенцира дека надзорите продолжуваат континуирано и на секои 15 дена Државниот инспекторат доставува извештај до работната група која е формирана од Министерството за животна средина и просторно планирање и го следи спроведувањето на Акциксиот план.

Во моментов има околу 120 правни субјекти со активна А-интегрирани дозвола, согласно Регистарот што го води Управата за животна средина, а на територија на Град Скопје се околу 40.

На заедничката прес-конференција, портпаролката на Владата Марија Митева потенцира дека целта е транспарентно да ја информираат јавноста за тоа како институциите постапуваат и какви мерки се преземаат за унапредување на заштитата на здравјето на граѓаните.

The post ИНСПЕКТОРИТЕ УТВРДИЛЕ 398 НЕПРАВИЛНОСТИ ВО ФАБРИКИ НИЗ ЦЕЛАТА ЗЕМЈА Во „Титан Усје“ не се утврдени неправилности во работата appeared first on plusinfo.mk.