Омар Артан, судијата од Сомалија кој деновиве стана светска вест откако беше запрен на аеродромот во Мајами, добил забрана за влез во САД поради сомнежи за врски со членови на терористичка организација.

Така тврдат американските власти, кои првпат ја објаснија причината за инцидентот што предизвика реакции и во фудбалската јавност и во Сомалија.

Артан во понеделникот бил задржан на аеродромот во Мајами и покрај тоа што поседувал дипломатски пасош и еднократна американска виза.

Што соопшти Вашингтон?

Според американската администрација, при дополнителните проверки биле откриени информации што го прават неподобен за влез во земјата.

„По понатамошна проверка беа откриени навредливи информации, вклучително и врски со осомничени членови на терористички организации“, соопштија американските власти.

Во истото соопштение се наведува дека администрацијата на Доналд Трамп нема да дозволи безбедносни закани да влезат во земјата.

Од аеродром во Мајами до херојски пречек

Случајот предизвика големо внимание бидејќи Артан требаше да биде дел од Светското првенство и да стане еден од ретките сомалиски судии на такво натпреварување.

По враќањето во татковината, му бил приреден херојски пречек.

Артан претходно тврдеше дека е само фудбалски судија кој поседува валидна документација за влез во Соединетите Држави.

The post 📽️ ПОЗНАТО ЗОШТО СУДИЈАТА ОД СОМАЛИЈА БЕШЕ ВРАТЕН ОД МУНДИЈАЛОТ Го дочекаа дома како херој appeared first on plusinfo.mk.

Едно од највредните нешта поврзани со ЕУ е секако Шенгенскиот договор, камен-темелник на слободното движење во Европа. Договорот значи дека се укинати постојаните внатрешни гранични контроли меѓу земјите-членки, дозволувајќи им на над 450 милиони луѓе слободно да патуваат, живеат и работат без да мора да ги покажуваат своите пасоши на границите. Но дали тоа се уште функционира баш така?

„Бај, бај Шенген“ (Bye bye Schengen) е фраза која ја користат европските десничарски политичари и медиуми со која ја опишуваат кризата и повторното воведување на гранични контроли меѓу ЕУ-членките. Фразата првично стана вирална во 2015 година, а се до денес ваквите привремени контроли остануваат честа појава поради безбедносни предизвици и миграциски политики. Но, во исто време е тешко да се замисли дека некој од европската бирократија во Брисел би истапил јавно со тврдења што би можеле да бидат протолкувани како извесно оспорување на темелниот принцип на слободно движење и безграничен режим.

Заклучокот кој, всушност, најчесто се слуша е следниов: Шенген зоната функционира, но соработката е под сериозен притисок. Сепак, какво е тоа слободно прекугранично движење кога веќе со години поголоем број ЕУ-членки (вкупно девет земји) не попуштаат за да ги повлечат воведените „привремени“ гранични контроли? Контролите беа воведени по големата бегалска криза во 2015-16 година и терористичките атентати во Париз.

Протокот на бегалци кон ЕУ навистина се намали во значаен обем, но се верува дека тоа се должи токму на граничните контроли. Во секој случај, тешко се отстапува од барањето дека контролитe мора да останат сѐ додека ЕУ на ефикасен начин може да ги заштити и контолира своите надворешни граници.

Тоа, се разбира, веќе подолго време ја става Европската комисија во Брисел пред тешка дилема. Дали треба да направат исклучоци од правилата и да се дозволат продолжувања на граничните контроли и со тоа да се ризикува натамошно еродирање на еден од основните столбови на ЕУ?

Колку подолго се продолжуваат граничните контроли, толку потешко ќе биде враќањето кон целосно слободно движење. Но, ако Европската комисија заземе поцврст став и каже не, ќе ризикува најмоќните и најбогати земја во ЕУ, пред се Германија, отворено да се спротивстават.

Повеќе од десет години, Шведска има „привремени“ гранични контроли со Данска, што е спротивно на правилата на ЕУ. Деновиве Европската комисија соопшти дека таквите мерки се неоправдани и неодржливи во долгорочна смисла, и ја повикува Шведска да ги укине. Данска, Германија, Австрија, Франција, Италија, Холандија и Словенија се повикани да го сторат истото и постепено да ги укинат своите гранични контроли со други земји од ЕУ. „Комисијата ќе одржува близок контакт со сите засегнати земји-членки за да се постигне оваа цел“, беше соопштено неделава во соопштението од Брисел.

Шведска ги продолжува граничните контроли со Данска на секои шест месеци во текот на единаесет години. Најновата одлука важи до ноември 2026 година. Од самиот почеток, Шведска ја наведуваше неконтролираната миграција како причина. Сега се повикува на сериозна безбедносна ситуација, вклучително и поради „сериозен прекуграничен криминал поврзан со државни актери и тероризам“.

Сепак, Комисијата на ЕУ смета дека шведската полиција веќе има доволно алатки и без контрола на внатрешните граници. „Со оглед на алтернативните мерки што ги воведоа шведските власти, земјата треба да се стреми постепено да ги укине контролите на внатрешните граници“. Соопштението од Брисел е првиот чекор во долг процес што на крајот би можел да значи дека Европската комисија ќе ги однесе земјите-членки со продолжени меѓугранични контроли пред Европскиот суд на правдата.

Но треба да се има предвид дека причините поради кои Европската комисија чекаше десет години се пред сѐ поврзани со миграцијата, што и понатаму се смета за мошне чувствително прашање. Во моментов, ЕУ воведува нови правила за азил и миграција, напоредно со инсталирање на „најсовремен систем во светски рамки за управување со границите.“

Во тек е и нов обид Европскиот парламент и земјите-членки да се договорат за регулативата за враќање на мигрантите кои се одбиени од ЕУ. Но, група земји не чекаат на исходот на дебатата, туку веќе водат разговори за воспоставување таканаречени собирни центри за враќање надвор од ЕУ.

Наскоро, големиот пакт на ЕУ за миграција и азил стапува на сила на 12 јуни. Десет законски акти – за сè, од гранични контроли до процедури за азил – се усвоени. Еден сè уште недостасува: регулативата за враќање, која ќе воспостави заеднички правила за тоа како треба да се одбиваат мигрантите без право на престој во ЕУ. Комесарот за миграција Магнус Брунер го опиша како „последното парче од сложувалката“ во пактот.

Сепак, преговорите меѓу земјите-членки и Европскиот парламентг за правилата за враќање заглавија во мај. Преостанатото несогласување не се однесува на содржината на правилата, туку кога тие треба да стапат во сила. Европскиот парламент сака законот да стапи во сила веднаш по усвојувањето, за разлика од Советот на министри, кој се залага за двегодишен преоден период за повеќето мерки. Но за одбележување е секако дека Советот на министри е подготвен веднаш, без непотребни одложувања, да ги примени само одредбите за центрите за враќање, кои би можеле да се наречат и „центри за притвор“ надвор од ЕУ, каде што ќе можат да бидат испратени мигранти со конечни одлуки за протерување.

Без оглед на тоа што ќе се случи во следната рунда преговори, Холандија, Австрија, Данска, Германија и Грција ги здружија силите за да воспостават заеднички центри за враќање надвор од Унијата. Групата сега преговара со осум до десет потенцијални земји-партнери, вклучувајќи ги Казахстан и Узбекистан, за воспоставување вакви објекти, објави „Политико“. Моделот би бил базиран на меѓусебни договори. Во замена за прифаќање мигранти со наредби за депортација, на земјите-партнери ќе им се понуди финансиска помош или олеснети визни правила за нивните граѓани.

Моментно многу нешта, очигледно, се случуваат кога се во прашање граничните контроли и слободното (мигрантско) движење во ЕУ. Но, историски гледано, европскиот проект за безграничен режим им беше продаден на граѓаните во различни ЕУ-членки, меѓу другото, преку атрактивноста на слободното движење. Доколку меѓуграничните рампи останат спуштени, поддршката за ЕУ уште повеќе ќе ризикува да се намали.

Можеби ќе потрае долго време, најмногу поради стравот од неконтролирани текови на бегалци, за да се обнови Шенгенскиот договор, и да се рестартира според изворната замисла. Доколку тоа воопшто ќе може да се направи во догледна иднина.

The post Бај, бај Шенген appeared first on plusinfo.mk.

Седум лица беа повредени во саботата, кога автомобил со голема брзина се заби во пешаци во италијанскиот град Модена, при што најмалку четворица беа сериозно повредени, јавија италијанските медиуми.

Откако ги прегазил пешаците, возачот, на возраст од 31 година, со нож нападнал минувач кој се обидел да го запре. Минувачот бил раскрвавен во главата, но не е посериозно прободен.

Откако група минувачи успеале да го совладаат, напаѓачот бил уапсен од полицијата.

Италијанскиот министер за внатрешни работи Матео Пјантедози изјави дека 31-годишниот напаѓач не е осомничен за терористички акт, туку имал психички проблеми.

Градската префектка Фабриција Триоло на прес-конференција изјави дека возачот, дипломиран економист роден во 1995 година и претходно непознат за полицијата, во 2022 година поминувал низ период на „психолошка нестабилност“.

– Во 2022 година беше на лекување во нашите центри за ментално здравје поради проблеми поврзани со шизоидно нарушување. Потоа исчезна од нашиот радар и, за жал, денес повторно се појави на ваков драматичен и трагичен начин – изјави градоначалникот на Модена, Масимо Мецети.

Неговиот дом во близина на Модена бил претресен, но извори цитирани во италијанските медиуми велат дека досегашната истрага не покажала никакви знаци на радикализација.

Меѓу повредените има и двајца странски државјани – германски турист кој бил на одмор во Италија и жена од Полска. Повредените биле пренесени во повеќе болници низ регионот Емилија-Ромања.

55-годишна жена, која била згмечена во излог на продавница, е хоспитализирана во болницата Оспедале Маџоре во Болоња. Нејзиниот живот е во опасност, а лекарите морале да ѝ ги ампутираат нозете.

Во истата болница на интензивна нега се наоѓа и 52-годишен маж. И уште еден маж, кој бил прегазен од автомобилот, останал без долните екстремитети.

53-годишна и 69-годишна жена биле примени во болницата Баџовара во Модена. Таму се лекува и 69-годишен маж, чии повреди се оценети како полесни.

27-годишна девојка, 71-годишна жена и 47-годишен маж се хоспитализирани во Поликлинико ди Модена. Тие се здобиле со полесни повреди и не се во животна опасност.

 

View this post on Instagram

 

A post shared by @premiernews.mk

The post 🎥 (ВОЗНЕМИРУВАЧКО) СЕ ПОЈАВИ ВИДЕО ОД ПРЕГАЗУВАЊЕТО ПЕШАЦИ ВО МОДЕНА, ИТАЛИЈА Сигурносните камери го фатија бруталниот момент appeared first on plusinfo.mk.

Министерството за внатрешни работи соопшти дека го расчистило случајот со обидот за опожарување на верскиот објект на Еврејската заедница во Скопје на 12.04.2026 околу 04:50 часот.

„Веднаш по добиената пријава, преземени се соодветни мерки и активности од страна на Секторот за борба против тероризам, насилен екстремизам и радикализам при Одделот за сузбивање на организиран и сериозен криминал во координација со СВР Скопје и Агенцијата за национална безбедност, при што во изминатиот период беа преземени повеќе оперативно- тактички мерки на подрачје на град Скопје.

На 30.04.2026, по претходно обезбедени наредби за вршење претрес на дом и други простории, извршени се претреси на 13 локации на територија на Скопје, при што приведени се седум лица и одземени се предмети и електронски уреди поврзани со кривичното дело.

По наредба на јавен обвинител, лицата се задржани за понатамошна постапка, по што од страна на Секторот за борба против тероризам, насилен екстремизам и радикализам при Одделот за сузбивање на организиран и сериозен криминал е поднесена кривична пријава против А.Љ (21) од Скопје поради основи на сомневање за сторено кривично дело „тероризам” по член 394-б и А.Р. (38) од Скопје поради основи на сомневање за сторено кривично дело „тероризам” по член 394-б од КЗ во врска со член 24 од КЗ, а од страна на судија на претходна постапка одредена им е мерка притвор“ – соопшти МВР.

The post ПРИВЕДЕНИ 7 ЛИЦА ЗА ПАЛЕЊЕ ОБЈЕКТ НА ЕВРЕЈСКАТА ЗАЕДНИЦА Двајца од уапсените се гонат за тероризам appeared first on plusinfo.mk.

Двајца мажи се избодени со нож во северен Лондон во напад што британската полиција го третира како можен терористички инцидент.

Нападот се случил во населбата Голдерс Грин околу 11:16 часот по локално време, кога 45-годишен маж нападнал двајца минувачи. Повредени се маж на 76 и маж на 34 години, кои веднаш биле пренесени во болница. Лекарите потврдуваат дека нивната состојба е стабилна.

Според полициски извори и снимки од надзорни камери, напаѓачот прво оттурнал една од жртвите во сообраќаен знак, по што неколку пати го избодел. Вториот маж успеал да се одбрани и да побегне.

WILD TAKEDOWN: British Police arrest a terrorist who stabbed two Jews in the Golders Green neighborhood of London. One victim is in serious condition. pic.twitter.com/ZLi58XUA91

— Breaking911 (@Breaking911) April 29, 2026

Од полицијата велат дека осомничениот има историја на насилно однесување и проблеми со менталното здравје, а антитерористичката единица истражува дали нападот бил насочен кон еврејската заедница во областа.

Напаѓачот бил совладан со електрошокер откако се обидел да им се приближи на полицајците, а пред нивното доаѓање бил задржан од локална волонтерска група.

Инцидентот доаѓа во период на зголемени тензии и серија напади врз еврејски објекти во Лондон, меѓу кои палење возила и вандализирање синагоги.

Британскиот премиер Кир Стармер го осуди нападот, оценувајќи го како „ужасен антисемитски чин“, додека израелските власти повикаа на посилни мерки против антисемитизмот во Велика Британија.

The post 📽️ КРВАВ НАПАД ВО ЛОНДОН Двајца мажи избодени на улица, полицијата претпоставува дека е тероризам appeared first on plusinfo.mk.

Рускиот претседател Владимир Путин изјави дека Киев секој ден губи одредена територија „во зоната на специјална воена операција“ во Украина и „затоа се фокусираше на тероризмот“.

Руските медиуми пренесуваат дека на синоќешната седница на Советот за безбедност на Русија, која беше посветена на обезбедувањето на изборите за Думата, Путин рече дека режимот во Киев и неговите спонзори се префрлиле на отворени терористички методи и дека расте ризикот од терористички закани во Русија.

– Знаеме дека и режимот во Киев и неговите спонзори се префрлиле на отворени терористички методи. Причините се очигледни, тие се јасни за сите, непријателот не е во состојба да го запре напредувањето на нашите сили, нашите момчиња по линијата на контакт – нагласи Путин.

Рускиот претседател истакна дека Киев сè повеќе извршува напади со беспилотни летала врз цивилната инфраструктура.

По повод претстојните есенски избори за Думата, тој нареди да се спречат сите видови провокации, вклучително и оние од странство.

– Украина не одржува избори и ќе се обиде да ги спречи во Донбас. Оние кои им го негираат на Донбас и Новоросија нивното историско право да бидат дел од Русија, ќе се обидат да го спречат гласањето таму – рече Путин.

Како што додаде, граѓаните на Донбас, за кои рече дека се нови руски региони, за првпат годинава ќе избираат пратеници на федерално ниво.

Се очекува денот за гласање да биде 20 септември.

The post РАСТЕ РИЗИКОТ ОД ТЕРОРИСТИЧКИ НАПАДИ ВО РУСИЈА Путин смета дека тоа станува главна тактика на Украина appeared first on plusinfo.mk.

Министерот за внатрешни работи Панче Тошковски, придружуван од директорот на Бирото за јавна безбедност Александар Јанев, од Атина испрати порака за засилена регионална соработка и заедничка борба против криминалот и тероризмот.

Тошковски учествуваше на министерскиот состанок на Акаба процес, посветен на справување со организираниот криминал и тероризмот на Балканот, каде говореше за новите безбедносни предизвици со кои се соочува регионот.

Во своето обраќање, тој нагласи дека денешната безбедносна реалност е значително променета и дека криминалот и тероризмот сè почесто се поврзуваат.

– Денес веќе не можеме да ги третираме криминалот и тероризмот како одвоени појави. Тие се дел од ист механизам кој се потпира на заеднички канали, финансии и логистика и бара координиран, заеднички одговор од сите нас – истакна Тошковски.

Според него, ваквите закани се транснационални и бараат засилена регионална и меѓународна соработка, размена на информации и подобра координација меѓу безбедносните служби.

Министерот се осврна и на конкретните ризици – злоупотреба на транспортните коридори, неформални економски текови, корупција, како и користење нови технологии од страна на криминалните и екстремистичките мрежи.

Во рамки на посетата, Тошковски оствари билатерална средба со министерот за заштита на граѓаните на Грција, Михалис Крисохоидис, на која беа потврдени добрите односи меѓу двете земји и подготвеноста за нивно продлабочување.

Фокусот бил ставен на зајакнување на соработката во борбата против организираниот криминал, трговијата со дрога и нелегалната миграција, како и подобрување на размената на информации и оперативната координација.

Двајцата министри разговарале и за предизвиците поврзани со новиот систем за влез/излез на ЕУ, со акцент на намалување на чекањата на граничните премини пред почетокот на туристичката сезона.

На средбата било отворено и прашањето за усогласување на билатералниот договор за соработка во борбата против криминалот, како и протоколот за реадмисија, кој треба да ги олесни процедурите за враќање на лица кои нелегално престојуваат.

Дополнително, биле разменети информации за состојбата со нелегалната миграција, при што било нагласено дека е потребен координиран пристап на регионално ниво.

– Само преку заеднички, координирани и одржливи активности можеме да обезбедиме поголема сигурност за граѓаните – потенцираше Тошковски.

На покана на македонскиот министер, Крисохоидис во наредниот период ќе ја посети земјава, со цел дополнително зајакнување на соработката.

The post ЗАЕДНИЧКИ УДАР ПРОТИВ КРИМИНАЛОТ И ТЕРОРИЗМОТ Тошковски со јасна порака од Атина appeared first on plusinfo.mk.

Унгарскиот министер за надворешни работи Петер Сијарто вчера изјави дека во последните недели десетици дронови го нападнале гасоводот „Турски тек“, преку кој се снабдува Унгарија, и додаде дека во таа серија напади имало и обид за напад и саботажа што бил спречен од српските власти, пренесе „Вјести“.

– Во последните недели, десетици дронови го нападнаа гасоводот „Турк стрим“, кој ја снабдува Унгарија, во Русија. Во оваа серија напади спаѓа и обид за напад и саботажа што беше спречен од Србите – рече Сијарто во видео на „Фејсбук“ по состанокот на Советот за одбрана што го свика премиерот Виктор Орбан.

Сијарто додаде дека за време на состанокот на Советот за одбрана, унгарскиот премиер наредил унгарскиот дел од гасоводот „Турски тек“ да биде ставен под воена заштита. Според него, Русија, Турција и Србија исто така се договориле да ја засилат физичката заштита на гасоводот.

Сијарто го опиша ова како „обид за терористички напад“, за кој рече дека е „дел од серија активности насочени кон спречување на испораката на руска нафта и гас во Европа“ и дека претставува сериозен напад врз суверенитетот на неговата земја.

Српските власти вчера објавија дека пронашле експлозивни направи во близина на гасната инфраструктура што ги поврзува Србија и Унгарија.

„Турски тек“ е гасоводен систем за транспорт на природен гас од Русија до Турција преку Црното Море, а потоа и кон делови од југоисточна и централна Европа. Системот беше пуштен во работа на почетокот на 2020 година и оттогаш стана еден од важните правци за испорака на руски природен гас во регионот, вклучително и за земји како Унгарија.

The post „ТУРСКИ ТЕК“ Е ЦЕЛ НА НАПАДИ СО ДРОНОВИ И ОБИДИ ЗА САБОТАЖА Целта е да се прекине испораката на руска нафта и гас до Европа appeared first on plusinfo.mk.

Претседателот на Србија, Александар Вучиќ, изјави дека во близина на гасната инфраструктура што ги поврзува Србија и Унгарија, српските безбедносни единици пронашле експлозив со разорна моќ.

„Тукушто завршив телефонски разговор со унгарскиот премиер Виктор Орбан, во кој го информирав за првите резултати од истрагата на нашите воени и полициски власти, во врска со загрозувањето на критичната гасна инфраструктура што ги поврзува Србија и Унгарија“, напиша Вучиќ на Инстаграм.

„Нашите единици пронашле експлозиви со разорна моќ и детонациски штапини потребни за активирање. Му кажав на премиерот Орбан дека ќе го информираме за понатамошниот тек на истрагата“ – напиша Вучиќ.

The post ОТКРИЕН ПОДМЕТНАТ ЕКСПЛОЗИВ НА ГАСОВОДОТ СРБИЈА-УКРАИНА!? Вучиќ го алармирал Орбан appeared first on plusinfo.mk.

На денешната седница на Собранието посветена на пратенички прашања, претседателот на Владата Христијан Мицкоски говореше за очекувањата од работата на новиот Јавен обвинител.

– Очекувањата од новиот јавен обвинител се големи, во смисла дека имаме чувство, а до некаде и информации, дека голем дел од предметите и претставките кои дел од институциите како резултат на внатрешната ревизија, ги имаат доставено до канцеларијата на Јавниот обвинител, стојат или во фиока или на дното од приоритетите. Често пати на седница на Влада имаме точка на која што ја анализираме работата на институциите врз основа на извештаи кои што ДЗР ги доставува до Владата и до сега јас лично, може стотина пати, имам прашано ако ова го констатирал Државниот завод за ревизија, дали ова е некаде процесуирано? Одговорот без исклучок е „да, процесуирано е до Јавниот обвинител“. Очекувам сите овие предмети да бидат извадени и да се работат и да се види дали таму има основано сомнение за сторен криминал од луѓето кои ги воделе тие институции или нема, посочи премиерот Мицкоски.

Тој истакна дека очекува од новиот јавен обвинител да направи детална анализа и да се постапи по овие веќе доставени предмети

– Лично очекувам најмалку уште две работи кои се многу важни во историска смисла на зборот за иднината на оваа држава. Ако не ја откриеме вистината за тие две работи, тогаш цело време ќе живееме во илузија. Првата работа е како магично тогаш затвореникот Катица Јанева, предметите кои беа дел од СЈО ги достави повторно во судската пракса? На ова прашање мора да најдеме одговор. Тоа е важно за иднината на оваа држава и за правосудниот систем и владеењето на правото. И второ, исто така според мене многу важно, ако сакаме вистинска иднина, а ова ќе го поделиме на две подгрупи, како се судеше група на луѓе за тероризам и врз основа на кои докази и како се изнудуваа изјави од тогаш таканаречени заштитени сведоци и втората подгрупа прашања за колкави дополнителни примања и бонуси станува збор за таканаречени специјални јавни обвинители и зошто се плашат овој предмет да влезе во фаза на истрага и во судовите – рече Мицкоски.

Тој порача дека, ако тоа не се направи, тогаш ќе имаме ситуација кога една група луѓе во државата ќе биде повластена, а најголемиот дел од нашите граѓани ќе бидат тие кои што ќе живеат во разочарување дека правдата не владее за сите.

– Јавно упатувам апел до јавниот обвинител, без разлика за кого и да постои основано сомнение дека сторил криминал, вклучително и за актуелната влада, да отвори истрага и да ја истурка до крај, не смее да има повластени.

Не постои поголема ахилова пета за една нација и држава, од луѓе кои носат одлуки во името на таа нација и држава, а се корумпирани. Затоа што тие веќе не се свои и стравувам дека одлуките што ги носат можат да бидат на штета на целата нација и држава. Затоа е подобро да се спречи, отколку потоа да се лечи – рече Мицкоски.

The post ЌЕ СЕ РЕШИ МИСТЕРИЈАТА КАКО КАТИЦА ЈАНЕВА ПРОЦЕСИРАШЕ ПРЕДМЕТИ ОД ЗАТВОР Мицкоски очекува новиот јавен обвинител да ги извади сите предмети од фиоки appeared first on plusinfo.mk.