На подрачјето на градот Скопје утрово е спроведен нов авионски третман против комарци, 14-ти по ред во текот на оваа сезона, информира градоначалникот на Скопје, Орце Ѓорѓиевски.

Тој најави дека дезинсекцијата ќе продолжи и во наредните денови, а за периодот од 23 до 26 август издал налози и за спроведување терестична дезинсекција на подрачјето на градот.

– Продолжуваме со засилено темпо и во наредните денови. Активностите продолжуваат и утре во раните утрински часови со нов авионски третман, а во периодот од 23 до 26 август ќе се спроведе и терестична дезинсекција на подрачјето на градот – наведува Ѓорѓиевски.

Според него, сите активности се реализираат плански и системски, согласно Годишната програма, законските обврски и Елаборатот изготвен од Центарот за јавно здравје – Скопје, кој е одобрен од надлежните здравствени власти.

Градоначалникот посочува дека во изминатиот период континуирано биле спроведувани третмани и против ларвите и против возрасните комарци.

Според објавените податоци, против ларвите на комарци досега се спроведени седум третмани:

7 мај – авионска дезинсекција;

11 јуни – авионска;

26 јуни – терестична;

10 јули – авионска;

23 јули – терестична;

11 август – терестична;

18 август – терестична.

Против комарците досега се реализирани уште седум третмани:

1 и 2 јуни – авионска дезинсекција;

18 и 20 јуни – терестична;

27 и 28 јуни – авионска;

13 и 15 јули – терестична;

30 и 31 јули – авионска;

4 и 6 август – терестична;

20 август – авионска.

Ѓорѓиевски најавува дека до крајот на сезоната ќе бидат реализирани повеќе од 20 третмани против комарци.

– Овие бројки најдобро покажуваат дека дезинсекцијата е континуиран процес кој го спроведуваме навремено, организирано и согласно однапред утврдена динамика. Продолжуваме одговорно, системски и со засилено темпо да ги преземаме сите неопходни мерки за заштита на јавното здравје и поквалитетно секојдневие за скопјани – порача градоначалникот.

Од објавената динамика произлегува дека мерките опфаќаат и третирање на ларвите, како и авионски и терестични третмани против возрасните комарци, со активности распоредени во текот на целата сезона.

The post ВО СКОПЈЕ УТРОВО ИМАШЕ АВИОНСКО ПРСКАЊЕ ПРОТИВ КОМАРЦИ Ѓорѓиевски најави „напад“ од земја од 23 до 26 август appeared first on plusinfo.mk.