Градоначалникот на Општина Центар, Горан Герасимовски, денеска изврши увид на терен на булеварот Теодосиј Гологанов, во близина на Католичката црква, заедно со деканот на Градежниот факултет, инспекциските служби на Општина Центар и стручни лица, каде се спроведуваат итни мерки за обезбедување и стабилизација на просторот по евидентираното свлечиште на земјиштето во непосредна близина на градежен зафат.

Според стручните насоки од Градежниот факултет, започнато е затрупување и зацврстување на земјиштето на градилиштето со цел да се спречат дополнителни оштетувања и да се обезбеди безбедноста на граѓаните и околните објекти, информираат од Општина Центар.

Герасимовски упати благодарност до деканот и стручниот тим на Градежниот факултет, кои веднаш излегоа на терен и дадоа конкретни насоки за надминување на состојбата.

– Безбедноста на граѓаните нема цена. Од првиот момент реагиравме веднаш, а денеска на терен заедно со стручните лица ги следиме активностите за стабилизација на просторот. Голема благодарност до деканот и тимот на Градежниот факултет за експертската помош и професионалниот пристап. Ќе постапуваме строго и без компромис кога се работи за неодговорно и несовесно градење – изјави Герасимовски.

Инспекциските служби на Општина Центар и натаму се на терен и продолжуваат со надзорот и постапувањето. Досега се изречени повеќе санкции, а постапките против инвеститорот и изведувачот продолжуваат, откако е утврдено дека дел од градежните активности не биле изведувани согласно одобрението за градење издадено од Општина Центар.

Општина Центар останува целосно посветена на надминување на состојбата, обезбедување на просторот и утврдување одговорност за сите констатирани неправилности. 

The post СЕ ЗАТРУПУВА И САНИРА ГРАДЕЖНАТА ЈАМА ВО ЦЕНТАР Герасимовски и деканот на Градежен факултет се на увид appeared first on plusinfo.mk.

Градоначалникот на Општина Центар, Горан Герасимовски, вечерва во Дневникот на Сител телевизија информираше за состојбата по инцидентот на булеварот Теодосиј Гологанов, во близина на Католичката црква, каде беше регистрирано свлечиште и оштетување на јавна површина и инфраструктура во близина на градежен зафат.

Герасимовски изјави дека веднаш по инцидентот бил свикан итен кризен состанок, на кој присуствувале деканот на Градежниот факултет, претставници од Државниот инспекторат за труд, инвеститорите, инспекциските служби на Општина Центар и стручни лица од надлежните институции, со цел брза координација и преземање мерки за заштита на граѓаните.

Тој упати благодарност до деканот и стручниот тим на Градежниот факултет, кои веднаш излегле на терен и дале стручно мислење, експертска анализа и конкретни насоки за надминување на состојбата и спречување дополнителни ризици.

– Сакам јавно да упатам благодарност до деканот и стручниот тим на Градежниот факултет, кои веднаш ни излегоа во пресрет и излегоа на терен. Во вакви ситуации, експертското мислење е клучно за носење брзи и одговорни одлуки и токму затоа веднаш постапивме по нивните насоки – истакна Герасимовски.

Тој информираше дека во текот на денот до Општина Центар бил доставен официјалниот извештај и стручните насоки од Градежниот факултет, по што веднаш било постапено.

Согласно препораките, Општина Центар донела решение за итно затрупување и обезбедување на градилиштето, со цел стабилизација на теренот, намалување на ризиците и заштита на околните објекти и граѓаните.

При инспекцискиот надзор, како што посочи Герасимовски, биле утврдени сериозни неправилности во изведбата на градежните активности, при што дел од работите не биле изведувани согласно одобрението за градење издадено од Општина Центар.

– Нашите инспектори веќе изрекоа повеќе санкции, а постапките против инвеститорот и изведувачот продолжуваат. Нема да дозволиме несовесно, неодговорно и небезбедно градење во Центар. Најстрого ќе бидат санкционирани сите што не постапуваат согласно законите и ја загрозуваат безбедноста на граѓаните – нагласи Герасимовски.

Тој додаде дека Општина Центар ќе продолжи со сите законски механизми за утврдување одговорност, оценувајќи дека е недозволиво да се гради спротивно на одобрението за градење и притоа да се доведуваат во ризик јавната безбедност и инфраструктурата.

Од Општината најавуваат дека и понатаму ќе бидат на терен и ќе ја следат состојбата сè до целосна санација на штетите и отстранување на ризиците.

The post НЕМА КОМПРОМИС СО БЕЗБЕДНОСТА НА ЦЕНТАРЦИ Герасимовски со остра порака по инцидентот кај Католичка appeared first on plusinfo.mk.

12-годишно момче се здобило со тешки повреди откако паднало во автобус на ЈСП во Скопје, откако возачот ненадејно закочил додека возилото се движело по улицата „Митрополит Теодосиј Гологанов“.

Инцидентот се случил на 1 ноември околу 16:45 часот, а детето веднаш било пренесено во Градската општа болница „Св. Наум Охридски“, каде лекарите констатирале тешки телесни повреди.

Маjката на детето, 41-годишната М.С. од село Кондово, го пријавила случајот во полиција два дена подоцна, на 3 ноември.

„Случајот е пријавен и се работи на целосно расчистување на околностите под кои дошло до повредата на малолетното лице“, соопштија од Министерството за внатрешни работи.

The post ТЕШКО ПОВРЕДЕНО ДЕТЕ ПО НАГЛО КОЧЕЊЕ НА АВТОБУС Мајката го пријави возачот на ЈСП, полицијата истражува appeared first on plusinfo.mk.

Не, не улицата, онаа што се реконструираше со месеци и се уште не е комплетно завршена, туку лично Теодосиј Гологанов – Митрополитот што уште во деведесетите години од 19. век се борел за посебноста на македонската нација, за човекови права и за возобновување на Охридската архиепископија. Македонецот, кого малку си го припомнуваме, а кој уште пред 120-130 години со благослов на римскиот Папа се обидел да ја возобнови автономната македонска црква. Ете тој ми напиша писмо, лут за односот кон улицата во Скопје, што го носи неговото име.

„Вие ме славите или ме навредувате, ми правите чест или ме срамотите“, вака го започна писмото до мене. „Ај што со месеци чекам улицата да биде готова, ај што трпам секој возач низ центар да ме пцуе, ама што направивте и со тротоарите, со дрворедите… Има ли некој во таа ваша сегашна градската управа што си ја разбира работата?“

Ретко поминувам по таа улица, оти знам дека со месеци е раскопана, ама синоќа решив да ја посетам, да видам зошто се налутил Митролопитот. Конечно, пред два-три дена ја отвориле за возила, ама сè уште е недовршена. Погледот кон тротоарот ме згрози – го асвалтирале бе! Поедноставно им било така – тури асвалт и пушти ја машината да го израмни. Кој ќе се тупи сега да мести плочки, како што треба да изгледа пешачка зона. А дрворедот „посебна песна“ – како ептен лоша копија на слика од Пикасо – дрвце ваму, дрвце таму, никаков ред. Јак уметник бил тој што го планирал дрворедот. А да не пишувам оти синоќа и врнеше во Скопје, а улицата како да си во Венеција – под вода. Аман, па вчера ја завршивте реконструкцијата, не можевте ли да предвидете дека во Скопје некогаш има и дожд, па да се направеше соодветен систем за собирање на атмосферската вода.

„Не сакам веќе улицата да го носи моето име, одберете друго“, категоричен беше Митрополитот на крајот од писмото.

Ај сеа беља си земав, треба и друго име на улицата да смислам. Еве на пример може да го носи името Булевар „Македонска реформа“. Оти и така реформите во Македонија се како и реконструкциите на улици – траат премногу долго, а некогаш и не завршуваат или веднаш се потребни нови реформи на реформираното. Тоа е проблемот на нашите власти – многу ветуваат, ама ништо не завршуваат. Македонија си пати од министри и градоначалници кои се јаки на зборови во кампања, ама слаби на дела кога ќе ја добијат функцијата.

Тука, секако не мислам на оние 1.300 км патишта и автопатишта од ТВ спотовите, што ги изгради владата на СДСМ во последните 5 години. Нивните автопатишта експресно се завршуваат, не се како овие градските. Еве го примерот со патот од Кичево до Охрид, или оној кај Катланово или оној кон Косово, се се тоа примери за успешност.

Така, размислувајќи од Булеварот Гологанов, свртив десно накај Ленинова. И таа раскопана. А јас, во паника: полукружно и бегај. Ниту на ретровизорот не сакав да погледам. Оти што ако и оваа улица се реконструира како и другите во Скопје. Ленин ли да ми се јавува?

The post Теодосиј Гологанов сака да се откаже од својата улица во Скопје appeared first on plusinfo.mk.