Во последниот квартал лани е забележан пораст на цените на услугите, објави Државниот завод за статистика.

Споредбата на последниот квартал од 2025 година со истиот квартал од 2024 година покажуваат дека цените на услуги за телекомуникации забележале раст од 2,3%, на услугите за транспорт и складирање пораснале за 0,7%, додека, пак, цените на копнениот и цевководниот транспорт бележат пораст од 0,7 %. Непроменети останале цените на поштенските и курирските услуги.

Во истиот период, цените на услугите во секторот „информации и комуникации“ бележат пораст од  2,3 % во одделот Телекомуникации.

Опфатени се секторите „услуги за транспорт и складирање“ и „Услуги за информации и комуникации“ според Класификацијата на производите по дејности (КПД).

The post ЦЕНИТЕ НА УСЛУГИТЕ ВО ТЕЛЕКОМУНИКАЦИСКИОТ СЕКТОР ВО ЧЕТВРТИОТ КВАРТАЛ ЛАНИ ПОВИСОКИ ЗА 2,3% Поскапеа и услугите во транспортот и складирањето appeared first on plusinfo.mk.

Во „Тема на денот“ на ТВ Сител гостуваше вицепремиерот и министер за транспорт Александар Николоски, кој зборуваше на повеќе теми од кои и за влезот на трет мобилен оператор. Тој ги образложи очекувањата од компанијата “4iG”, кога се очекува да започне со работа и кои ќе биде бенефитите за граѓаните.

– Ова е нешто што го ветивме само што беше избрана Владата некаде октомври месец по изборот на Владата го потпишавме Меморандумот за разбирање со “4iG” и драго ми е дека стигнавме до финале. Процесот можеше да заврши пред три, четири месеци но зaради локалните избори, целиот процес се одложи и еве конечно завршува, вчера беше донесена одлуката во рок од 10 дена 4iG да го плати надоместокот кон државата и после тоа да почнат да работат, секако тие си имаат свои бизнис планови на кој начин тоа ќе го реализираат – истакна Николоски.

Тој потенцираше дека најважно е што со влезот на третиот мобилен оператор конечно ќе се сруши дуополот што постои меѓу двата мобилни оператори.

– Но, она што е најважно за мене е дека конечно ќе се сруши дуополот којшто беше создаден помеѓу двата мобилни оператори и дека конечно и граѓаните и бизнисот ќе имаат понуда ќе имаат избор, ќе има натпревар за подобри услуги и пониски цени – рече Николоски.

The post ТРЕТИОТ МОБИЛЕН ОПЕРАТОР ВЛЕГУВА НА СЦЕНА, НАЈАВИ НИКОЛОСКИ Поголем избор и натпревар за подобри услуги appeared first on plusinfo.mk.

Mакедонија до февруари ќе ги заврши домашните задачи за „роаминг како дома“ во ЕУ, а останатото ќе биде лобирање и договор, рече вечерва министерот за дигитална трансформација Стефан Андоновски.

Тој не смета дека Црна Гора и Албанија пред Македонија ќе ја добијат оваа поволност зашто, како што истакна, сиот ангажман зависи од секоја држава поединечно.

– И тогаш кога првпат ја спомнав оваа замисла и идеја, беше дека ние мораме да си ги завршиме нашите домашни обврски и тие ќе ги завршиме до февруари. Останатото ќе биде лобирање и договор на ниво Македонија – ЕУ и Западен Балкан – ЕУ – нагласи министерот во интервју за емисијата „360 степени“ на МРТ 1.

Според него, она што Македонија треба да го заврши се четири регулативи пренесени во Законот за електронски комуникации, во една измена, и дополнително еден или два подзаконски акти.

– Ова прашање е едно од најважните кои нè засегаат и сметам, барем според мое мислење, е на ниво на визната либерализација, затоа што навистина се чувствува придобивката да бидете дел од поширокиот европски простор и во рамки на телекомуникацискиот свет. За нас беше топ-приоритет, но во ниту еден момент не бевме поставени во групата на Украина и Молдавија, кои први го започнаа процесот што беше инициран и од војната во Украина и од напливот на бегалци од Украина кон Полска и кон останатите држави на Европската Унија – напомена Андоновски.

Како што потенцира министерот, има две страни во договарањето за „роаминг како дома“ – едната е политичка, а другата е завршувањето на домашната задача.

– Политичкиот аспект потекна како проект од Украина и поради тоа тие беа ставени на брза лента и нивниот процес е завршен, а тие можат да ги користат услугите од оваа година. За нас, како и за Црна Гора и Албанија, беше најавено дека процесот ќе се одвива во текот на 2026 година, доколку ние ги имаме исполнето домашните обврски – рече министерот.

На прашањето дали станува збор за нефер и непринципиелен однос на ЕУ или за отсуство на иницијативност од земјите од регионот, вклучувајќи ја и Македонија, тој е дециден дека воопшто не се работи за отсуство на иницијативност.

– Не, не би се согласил дека е отсуство на иницијативност, зашто првпат се повика Европската Унија да обезбеди еднакви роаминг-услови за Македонија и за регионот уште на почетокот на Берлинскиот процес, кога тоа беше овозможено за државите од Западен Балкан, што значи дека и моите претходници и претходните влади се обидувале на некој начин да дискутираат, но ќе дојдам до тоа дека, за жал, не беше завршена домашната задача. Вториот аспект, политичкиот, сметам дека потекна од Украина поради кризата и беше вграден во договорите со Украина и со Молдавија во моментот кога тие беа потпишани. Кај нас и кај Црна Гора и Албанија нема потпишано таков вид договор, што значи ќе треба билатерално да се договараме. Во нашите договори за стабилизација и асоцијација не стојат прашањата на роаминг како можност за ослободување. Околу домашната задача – ние требало уште од 2018 година да го приспособиме европскиот комуникациски код. Тоа е еден голем законик на Европската Унија, во нашиот Закон за електронски комуникации, и уште четири други регулативи – две од 2016 година, една од 2018-2019 и една од 2022 година. За жал, ниту една од овие регулативи не биле пренесени во македонското законодавство. Ние направивме голем чекор со донесувањето на Законот за електронски комуникации во текот на 2025 година и на крајот на 2025 дополнително го доусогласивме – објасни министерот.

The post ДО ФЕВРУАРИ ЌЕ ГИ ЗАВРШИМЕ ОБВРСКИТЕ ЗА РОАМИНГ КАКО ДОМА ВО ЕУ Потоа следи лобирање до договор со Брисел appeared first on plusinfo.mk.

Најчудната зграда во Њујорк изгледа како парче постапокалиптичен филм, масивен бетонски блок од 29 ката без ниту еден прозорец. Таа е позната само по бројот на улицата: 33 Thomas Street. Изгледа како архитектонска грешка, но со децении го пали љубопитниот оган на минувачите, новинарите и љубителите на заговори.

Во 2017 година, актерот Том Хенкс на платформата Икс (тогашен Твитер) напиша збунето:

„Ова е најстрашната зграда која некогаш сум ја видел! Што, по ѓаволите, прават внатре?“

Нема потреба од прозорци, ниту од луѓе?

Мистеријата има и прагматична страна. Според Ерик Гидри, познат тик-токер кој истражува урбани легенди, зградата била дел од мрежата „AT&T Long Lines“, систем за пренос на телефонски повици низ САД.

Изградена во 1970-тите, таа била целосно автоматизиран центар за поврзување на повици – без потреба од човечки оператори. Затоа, велат инженерите, прозорците биле непотребни: на машините не им е потребна светлина, туку на кабли и сигнали.

Built in 1974 during the Cold War, 33 Thomas Street was designed to withstand a nuclear blast and to be self-sufficient with its own gas and water supplies
pic.twitter.com/YzwcQN1Q4T

— Fascinating World Media (@fworldmedia) November 8, 2025

Тврдина отпорна на нуклеарен удар

Објектот бил дизајниран да издржи и нуклеарна експлозија. Располага со сопствени резерви на гориво, вода и струја, доволни за две недели изолација. Според архитектонскиот план од 1974 година, зградата можела да функционира дури и ако целиот град стане радиоактивна зона.

Понатаму, иако денес не е клучна за телефонските линии, таа е дел од интернет-инфраструктурата. – Ако гледате ова видео од Америка, голема е шансата сигналот да минал токму низ ваква зграда – додава Гидри.

Шпионски центар или само ладен технолошки храм?

Во светот на конспирациите, каде што секој бетон крие приказна, многумина веруваат дека „33 Thomas Street“ е центар на Националната агенција за безбедност (НСА). Според документите кои ги објави The Intercept со помош на свиркачот Едвард Сноуден, токму таму се собирале меѓународни комуникации и интернет-пакети од странство.

Поранешен инженер на „AT&T“ изјавил дека внатре постои „главен пристапен прекинувач“ кој ги поврзува повиците од Америка со остатокот од светот.

The post МИСТЕРИЈАТА НА ЗГРАДАТА БЕЗ ПРОЗОРЦИ ВО ЊУЈОРК Нема потреба од луѓе во ладниот бруталистички бункер appeared first on plusinfo.mk.

Бројот на активни претплатници во мобилната телефонија во Македонија во првиот квартал од 2025 година изнесува 1.941.996, што претставува намалување од 1,72 проценти во однос на последниот квартал од 2024 година, но зголемување од 0,62 проценти во споредба со истиот период лани.

Според најновите податоци на Агенцијата за електронски комуникации (АЕК), 1.588.395 претплатници имале пристап до интернет преку мобилна мрежа (2G/3G/4G) заклучно со март годинава.

А1 и Македонски Телеком со најголем пазарен удел

Во структурата на пазарот според бројот на активни претплатници, А1 Македонија учествува со 47,69 проценти, додека Македонски Телеком има удел од 46,66 проценти.

Зад нив следуваат МТЕЛ со 3,83 проценти, Телекабел со 1,34 проценти, Мтелмобајл со 0,38 проценти и Греен Мобиле со 0,10 проценти.

Во период од една година, Македонски Телеком бележи благ раст од 0,09 процентуални поени, додека А1 Македонија има пад од 0,21 поен. Најголем раст има МТЕЛ со 2,75 процентуални поени.

Кога се гледа пазарот според остварени приходи, Македонски Телеком доминира со 49,77 проценти, а А1 Македонија следи со 47,71 проценти.

Корисниците зборуваат помалку и испраќаат помалку пораки

Во првиот квартал од годинава, претплатниците во просек зборувале 226,57 минути месечно и иницирале 101,55 повици.

Вкупниот сообраќај во минути бележи пад од 5,57 проценти во однос на претходниот квартал и пад од 3,13 проценти во споредба со првиот квартал од 2024 година.

Испратените СМС-пораки се намалени за 12,56 проценти, додека ММС-пораките бележат раст од 1,99 проценти во однос на претходниот квартал.

Фиксната телефонија во континуиран пад

Во фиксната телефонија, во првиот квартал од 2025 година, претплатниците во просек иницирале 4,9 повици месечно и зборувале 11,18 минути.

Бројот на фиксни линии е намален за 0,04 проценти во однос на последниот квартал од 2024 година, но зголемен за 1,69 проценти во споредба со истиот квартал лани.

Вкупниот сообраќај преку фиксни линии бележи пад од 17,63 проценти на годишно ниво и пад од 6,67 проценти квартално, што потврдува дека интересот за фиксна телефонија продолжува да опаѓа.

Раст на интернет претплатниците и оптичките врски

Бројот на претплатници со пристап до интернет со широк опсег во првите три месеци од 2025 година изнесува 547.513, што е раст од 0,17 проценти во однос на претходниот квартал и раст од 2,27 проценти споредено со истиот квартал минатата година.

Најголем дел од претплатниците, 38,15 проценти, користат оптичка мрежа, додека 22 проценти се приклучени преку кабелски оператори (CaTV). Следуваат xDSL корисници со 17,82 проценти, LAN мрежи со 4,02 проценти, радио врски со 1,29 проценти и изнајмени линии со 0,36 проценти.

Помал број претплатници на кабелска телевизија

Податоците на АЕК покажуваат дека заклучно со првиот квартал од 2025 година, во земјава имало 183.133 претплатници на кабелска телевизија, што претставува пад од 1,73 проценти во однос на претходниот квартал и намалување од 7,07 проценти во споредба со истиот квартал лани.

Вкупниот број на претплатници на ТВ-услуги изнесува 439.061, од кои 181.915 користат IPTV, 38.465 користат DVB-T, а 35.548 сателитска телевизија.

The post МАКЕДОНЦИТЕ МЕНУВААТ НАВИКИ Помалку зборуваат, но повеќе сурфаат на интернет appeared first on plusinfo.mk.

Оне Македонија, подружница на групацијата 4iG, потпиша првичен договор со Ериксон Телекомуникации Македонија, каде се наведува стратешка соработка за планирање, дизајнирање, снабдување со опрема и распоредување на една од првите самостојни (SA) 5G мобилни мрежи во Западен Балкан.

Овој договор сигнализира цврст чекор напред во намерите на Оне Македонија да стане водечки телекомуникациски оператор во Северна Македонија и ја нагласува долгорочната посветеност на 4iG за инвестирање во напредна дигитална инфраструктура којашто е целосно усогласена со европските стандарди. Партнерството со Ериксон, кој е еден од најдоверливите европски добавувачи на телекомуникациски услуги, ја одразува заедничката визија за градење безбедна, иновативна и напредна мрежа што ја поддржува и националната конкурентност и пошироката дигитална агенда на ЕУ.

5G SA мрежата е замислена како целосен проект, дизајниран од темел со најнапредна технолошка архитектура, вклучувајќи ја мрежата за радио пристап (RAN) и основните мрежни компоненти кои се целосно во согласност со домашните и безбедносните барања на ЕУ. Ова ќе ѝ овозможи на Оне Македонија да им обезбеди искуство за напредно мрежно поврзување на корисниците низ целата земја, од индивидуални потрошувачи до претпријатија и јавни институции.

– Ова партнерство со Ериксон не е само за изградба на мобилна мрежа. Станува збор за градење доверба, транспарентност и дигитална иднина на Северна Македонија. Со овој договор, ние сме еден чекор поблиску до испорака на 5G мрежа од светска класа, создадена во согласност со европските безбедносни стандарди и со потребите на македонските граѓани и институции. Горди сме што соработуваме со глобално почитуван европски партнер додека го правиме овој следен смел чекор – изјави Брано Ѓуровиќ, извршен директор на Оне Македонија.

Писмото за намера потврдува дека новата 5G мрежа ќе има за цел да лансира услуги во најмалку еден град до крајот на 2026 година, да се прошири по транспортните коридори до 2028 година, да ги достигне сите урбани области до 2030 година и да обезбеди секој граѓанин да има пристап до интернет со брзина од најмалку 100 Mbps до 2032 година.

– Со комбинирање на нашата глобална експертиза во 5G самостојна технологија со амбицијата на Оне Македонија да изгради инфраструктура подготвена за иднината, поставуваме темели за безбеден, иновативен и одржлив дигитален екосистем во земјата. Заедно, се стремиме да испорачаме сигурна поврзаност со високи перформанси, зајакнувајќи ја конкурентноста на Северна Македонија и усогласувајќи се со дигиталната агенда на Европа – изјави Антонио Пасарела, раководител на одделот за Централна Европа и Северен Балкан во Ериксон.

Планираната соработка со Ериксон доаѓа во стратешки важно време, бидејќи Оне Македонија ја чека конечната одлука за националниот тендер за спектар, што се очекува на почетокот на ноември.

Како дел од групацијата 4iG, јавно котирана компанија на берзата во Будимпешта со операции низ Унгарија, Албанија и Црна Гора, Оне Македонија ќе ја користи стабилноста, искуството и европската ориентација на една од најбрзо растечките телекомуникациски групации во регионот. 4iG е широко призната по својата лидерска улога во развојот на безбедна инфраструктура и нејзината посветеност на дигиталната трансформација на Западен Балкан.

The post ВО 2026 ГОДИНА ВО НАЈМАЛКУ 1 ГРАД ЌЕ ИМА НОВА 5G МРЕЖА Оне Македонија и Ериксон ќе креираат самостојна 5G мрежа appeared first on plusinfo.mk.

Групацијата 4iG, преку својата подружница ОНЕ Македонија Телекомуникации, официјално достави писмо за намери до Агенцијата за електронски комуникации (АЕК), каде го изразува својот интерес за обезбедување на достапни радиофреквенции како дел од планот за влез на телекомуникацискиот пазар како нов оператор во Северна Македонија.

Овој чекор преставува значителна пресвртница во плановите на 4iG за да придонесе во модернизација на телекомуникациската инфраструктура во земјата и да внесе засилена конкуренција во секторот. Во текот на следните месеци, компанијата ќе соработува со AEК за достапноста на радиофреквенциите, да се обезбеди усогласување со регулаторните рамки и да се продолжи со долгорочната стратегија за развој во регионот.

– Среќни сме што и официјално го започнавме влезот на телекомуникацискиот пазар во Северна Македонија – рече Пал Заранди, директор за мобилни и 5G стратегии во Групацијата 4iG.

– Го препознавме потенцијалот на пазарот и уверени сме дека нашето искуство во соседните земји, како што се Албанија и Црна Гора, нè позиционира во насока да даваме најсовремени услуги за клиентите и бизнисите овде. Секогаш кога ќе одлучиме да влеземе на нов пазар, од клучно значење е да имаме и поддршка од регулаторната средина и подобро да ги разбереме локалните услови. Ангажиравме домашни и меѓународни експерти за да направат сеопфатна анализа на пазарот во Северна Македонија и сигурни сме дека нашиот пристап ќе донесе додадена вредност во секторот – додаде Заранди.

4iG, една од најистакнатите унгарски ИКТ и телекомуникациски компании, вработува над 8.000 висококвалификувани професионалци и опслужува над 10 милиони конекции во регионите каде што е присутна. Групацијата е позната по својот иновативен пристап и сигурни решенија. Како компанија е посветена на воведување напредни технологии како што се 5G, IoT и инфраструктура управувана од вештачка интелигенција, што ќе го отвори патот Северна Македонија да стане земја со подобра мрежа и поголема компетитивност.

– Нашето истражување на пазарот покажа големи можности поради достапноста на опсегот на фреквенции и секако поради поддршката од регулаторната средина. Достапноста на фреквенцијата е од суштинско значење за градење на мрежата и среќни сме што соработуваме и со локални и со меѓународни експерти за да имплементираме решенија од коишто ќе имаат корист сите во Северна Македонија – додаде Заранди.

Проширувањето на Групацијата 4iG во Северна Македонија е дел од пошироката стратегија на компанијата за подобрување на телекомуникациската инфраструктура во регионот, притоа создавајќи значителна економска и технолошка вредност. Овој чекор е усогласен со посветеноста на Групацијата за поттикнување иновации, следење на локалните регулативи и обезбедување исклучителни услуги.

The post ГРУПАЦИЈАТА 4iG СЕ ПОДГОТВУВА ДА СТАНЕ НОВ ТЕЛЕКОМ ОПЕРАТОР Компанијата достави писмо за намери до АЕК appeared first on plusinfo.mk.

Пристапот до интернет и телефонската мрежа беа целосно прекинати низ Појасот Газа вчера, речиси три недели откако Израел почна да ја бомбардира енклавата по вооружениот напад на милитантите на Хамас во кој израелските власти велат дека загинале најмалку 1.400 луѓе, главно цивили.

Министерството за здравство во Појасот Газа, управуван од Хамас, соопшти дека најмалку 7.326 луѓе се убиени во одмаздничките напади на Израел од нападот на 7 октомври, главно цивили и многу од нив деца.

„На 27 октомври 2023 година во Газа се случија широко распространети прекини на телефонските врски и интернетот, во услови на израелско бомбардирање, речиси целосно отсекувајќи ги 2,2 милиони жители од надворешниот свет“, се вели во соопштението на ХРВ.

Овој прекин, според нив, ризикува да обезбеди покритие за масовни злосторства и да придонесе за неказнивост за кршење на човековите права, нагласи во изјавата Дебора Браун, висок истражувач на групата за технологија и човекови права.

Голем број меѓународни агенции и невладини организации рекоа дека изгубиле контакт со нивниот персонал во Газа вчера, вклучително и хуманитарната агенција на ОН OCNA.

Нејзиниот хуманитарен координатор Лин Хестингс рече во изјавата дека болниците и хуманитарните операции на ОН „не можат да продолжат без комуникации“, заедно со енергија, храна, вода и лекови.

Невладината организација Амнести интернешенел соопшти дека изгубила контакт и со колегите во Газа.

Овoj прекин на комуникациите значи дека ќе биде уште потешко да се добијат критични информации и докази за кршење на човековите права и воени злосторства извршени врз палестинските цивили во Газа, се додава во соопштението на ХРВ.

– Светската здравствена организација повеќе не е во контакт со својот персонал, здравствените установи и другите партнери во опколениот Појас Газа – изјави генералниот директор на СЗО, Тедрос Аданом Гебрејесус.

The post ПРЕКИНОТ НА ТЕЛЕКОМУНИКАЦИИТЕ ВО ГАЗА НЕ Е СЛУЧАЕН? Некој сака да обезбеди покритие за масовни злосторства, реагираше ХРВ appeared first on plusinfo.mk.

Aвтори на монографијата се: доц. д-р Кухар Андријана и вон. проф. д-р Раковиќ Валентин од Факултет за електротехника и информациски технологии при Универзитет Св. Кирил и Методиј, Скопје, доц. д-р Гајшек Петер и д-р Валиќ Блаж од Институт за нејонизирачко зрачење (ИНЗ) Љубљана, како и м-р. Черне Томаж, Игеа, Словенија.

„Темелното испитување на сите релевантни, неодамнешни податоци од експертски членови на меѓународни тела за стандардизација не донесе никакви убедливи докази за тоа дека РФ ЕМП се опасни. Официјалната гледна точка на Светската здравствена организација е дека со оглед на многу ниските нивоа на изложеност и резултатите од истражувањата собрани до денес, нема убедливи научни докази дека слабите РФ сигнали од базните станици и безжичните мрежи предизвикуваат негативни здравствени ефекти. Сепак, од страна на мнозинството релевантни организации се препорачува понатамошно истражување, особено во областа на долгорочна изложеност на РФ ЕМП и потенцијалните ризици од изложеност на повеќе извори на ЕМП“, се наведува во монографијата.

Стравот од нови технологии (како технологијата 5G) е присутна во јавноста со векови. Научниците и креаторите на нови откритија и технологии, посочуваат авторите, отсекогаш се соочувале со отпор при нивното докажување и реализација.

Иако речиси сите луѓе секојдневно користат мобилни телефони, постојат активистички групи и значително медиумско внимание е посветено на ризикот од РФ ЕМП. Загриженоста на јавноста за наводните штетни ефекти од новата 5G технологија се зголемува заедно со научните несогласувања.

„5G технологијата е едноставно петта генерација на технологија за мобилна телекомуникациска мрежа. 5G е само име на новата фаза во развојот на мобилната мрежа, со главни технички барања: обезбедување многу поголема брзина на комуникација, екстремно мали доцнења во комуникацијата и значително зголемена ефикасност во користењето на спектарот и другите мрежни ресурси. Северна Македонија отсекогаш имала огромен потенцијал и капацитет за имплементација на проекти поврзани со ИКТ полето, секако вклучително и 5G технологијата“, наведуваат авторите на монографијата.

Авторите на монографијата ги посочуваат и поголемиот број предизвици кои треба да се решат или регулираат во државава во насока на поддршка на 5G имплементацијата во тест фазата, но и комерцијалната фаза која треба да следува. Се очекува операторите да инвестираат во две клучни области, односно во инфраструктурата и во иновации на услугите.

Неопходни се инвестиции во инфраструктурата, како што појаснуваат, главно за да се изгради густа оптичка мрежна инфраструктура за да се осигура поврзување на 5G базните станици, како и да се финансира нивното инсталирање. Следната генерација на 5G безжични мрежи ќе поддржува апликации кои побаруваат големи брзини. Еднo од решенијата во тој случај е да се овозможи поголема густина на базните станици со поставување на мали ќелии.

Во однос на инвестициите во иновациите на услугите се препорачува да се стимулира воведувањето
на новите 5G услуги. Ова вклучува и финансирање на пилот-проекти преку кои што ќе се демонстрираат и тестираат потенцијалните 5G карактеристики и ќе се овозможи развивање на новите услуги. Имплементацијата на 5G архитектурата главно зависи од можностите за инсталација на малите ќелии и нивно поврзување со јадрениот систем со користење на мрежна инфраструктура со голем пропусен опсег која се базира на оптичката технологија. Овој процес, стои во студијата, тековно е макотрпен поради различни компликации кои се јавуваат при пронаоѓање на локација за нова базна станица и добивање на дозвола за поставување, како и поради процедурите кои треба да се следат при инсталација на кабелската мрежна инфраструктура.

АЕК во јуни годинава ја стартуваше постапката за објава на тендер со којшто ќе додели одобренија за користење на радиофрекфенции за петтатата мобилна генерација 5Г.

Во Националната стратегија за широкопојасен пристап до интернет е предвидено до крајот на 2023 година, најмалку еден поголем град треба да биде покриен со 5G сигнал, а до крајот на 2025 година автопатите и магистралните патишта/главнитe коридори на основната и сеопфатна патна мрежа во државата утврдени од Агенцијата да бидат покриени со непрекинат 5G сигнал. Со стратегијата е предвидено и до крајот на 2027 година, пак, сите градови во државата треба да бидат покриени со непрекинат 5G сигнал, а до крајот на 2029 година, секој да има можност за пристап до интернет преку 5G со минимална брзина на пристап до интернет од најмалку 100 Mbps.

The post 5Г НЕ ГО ЗАГРОЗУВА ЗДРАВЈЕТО Објавена студија за влијанието на зрачењето на телекомуникациските уред врз здравјето appeared first on plusinfo.mk.

Националниот центар за одговор на компјутерски инциденти MKD-CIRT со поддршка на DCAF – Geneva Centre for Security Sector Governance, организира низа од бесплатни вебинари, кои имаат за цел да информираат за потенцијалните ризици и да ја зголемат сајбер-безбедноста. Вебинарите ќе опфаќаат теми како „Безбедна комуникација по е-пошта“, „Безбедносни ризици за работа од дома“, „Фишинг напади и заштита“, „Добра пракса за сајбер-безбедност“, поканувајќи докажани експерти од областа, кои ќе го споделат своето знаење од областа на сајбер-безбедноста. Сите заинтересирани за учество на вебинарите можат да се регистрираат на страницата на Националниот центар за одговор на компјутерски инциденти MKD-CIRT. Вебинарите ќе се одвиваат во периодот по 01.12.2020, а детална агенда може да видите подолу:

Вебинар 1: Безбедна комуникација по е-пошта
– Генерално за безбедност на комуникација преку е-пошта
– Како да овозможите DMARC, SPF и DKIM
– Вообичаени грешки во конфигурацијата
– Како најдобро да ги конфигурирате DMARC и другите механизми за одбрана во борба против фишинг

Вебинар 2: Безбедносни ризици за работа од дома
– Влијание врз организациите/деловните субјекти
– Преглед на безбедносните контроли за да се овозможи пристап до корпоративните ресурси од оддалечени локации со употреба на корпоративни средства и од дома со употреба на приватни уреди

Вебинар 3: Фишинг напади и заштита
– Еволуција на фишинг нападите и насочување кон деловниот сектор
– Знаци и препознавање на напади на фишинг
– Безбедносни контроли и најдобри практики за заштита
– Алатки за пријавување на сомнителна е-пошта

Вебинар 4: Добра пракса за сајбер-безбедност
– Сајбер хигиена
– Споделување лични и чувствителни податоци
– Претставување на интерактивни тренинзи

Националниот центар за одговор на компјутерски инциденти MKD-CIRT ги поканува сите заинтересини за гореневедените теми, поврзани со сајбер-безбедноста и нејзиното управување, да ја посетуваат страницата https://mkd-cirt.mk за повеќе информации.

The post Сајбер-безбедност, ризици и заштита – низа бесплатни вебинари, организирани од Националниот центар за одговор на компјутерски инциденти MKD-CIRT appeared first on plusinfo.mk.