Граѓаните во земјава и натаму активно ја користат мобилната телефонија, но трендот покажува постепено намалување на разговорите. Според најновите податоци од Агенцијата за електронски комуникации, просечен корисник во текот на 2025 година месечно остварувал 104,05 повици и разговарал вкупно 228,03 минути.

Најголем дел од разговорите и натаму се одвиваат во рамки на истата мобилна мрежа – дури 143,27 минути или 62,83 проценти од вкупниот сообраќај. Значително помал е сообраќајот кон други мобилни мрежи во државата, кој изнесува 80,99 минути или 35,52 проценти.

Разговорите кон фиксните линии речиси и да се занемарливи – само неколку минути месечно, додека повиците кон странство се сведени на минимум, со удел од само 0,13 проценти.

Во споредба со претходната година, податоците покажуваат пад на вкупниот обем на разговори кон сите дестинации, што упатува на промена на навиките кај корисниците, најверојатно поради зголемената употреба на интернет апликации.

Истовремено, бројот на корисници продолжува да расте. На крајот на 2025 година, во државата имало 1.954.643 активни претплатници, што е зголемување од 1,82 проценти во однос на 2024 година. Раст е забележан кај приватните пост-пеид корисници, додека деловните претплатници бележат благ пад.

Според уделот на пазарот, лидер е A1 Македонија со 48,08 проценти, веднаш зад него е Македонски Телеком со 45,93 проценти, додека останатите оператори имаат значително помал удел.

Покрај мобилната телефонија, раст бележи и користењето фиксни линии, кои достигнале 457.763 корисници. Зголемен е и бројот на корисници на пакет-услуги, при што најголем дел од нив користат комбинација од фиксна телефонија, интернет и телевизија.

Овие податоци укажуваат дека телекомуникацискиот пазар во Македонија останува стабилен, но со јасен тренд на дигитализација и промена на навиките на корисниците.

The post ПОВИЦИТЕ СЕ НАМАЛУВААТ, КОРИСНИЦИТЕ РАСТАТ Македонскиот телефонски пазар со нови трендови appeared first on plusinfo.mk.

Македонски Телеком воведува нов комуникациски концепт за корисниците со кој ветува поврзување без бариери и неограничен интернет, како и низа дополнителни услуги што треба да донесат поголема слобода и сигурност во секојдневната комуникација.

Компанијата соопшти дека досегашните пакети Magenta 1 и Magenta 1 Business се трансформираат во Magenta 1 Unlimited и Magenta 1 Business Unlimited, кои ќе понудат неограничен интернет, вклучен роаминг во сите пакети, гигабитни оптички брзини и ексклузивни попусти преку програмата Magenta Moments.

Главниот извршен директор на Македонски Телеком, Горан Марковиќ, изјави дека новото портфолио претставува нов пристап кон поврзувањето на корисниците.

– Ова не е само ново портфолио, туку сосема нов начин на поврзување на корисниците. Целта е да понудиме едноставно и безгрижно искуство коешто ќе биде неограничено, непречено и комбинирано со многу поволности и попусти. Верувам дека овој чекор ќе направи промена на пазарот и позитивно ќе влијае на задоволството на корисниците, што е наша примарна цел – рече Марковиќ.

Главниот директор за приватни корисници, Емилија Андоновски, нагласи дека компанијата сака да понуди поголема вредност и подобро корисничко искуство.

– Ние не сме само телекомуникациски оператор, туку партнер којшто сака да им понуди вистинска вредност на корисниците и да им овозможи позитивни искуства. Целта ни е да дадеме повеќе и да го направиме самото искуство на поврзување едноставно, какво што и треба да биде во дигиталното време: со сѐ што треба вклучено и неограничено и многу повеќе од тоа – изјави Андоновски.

Новите пакети Magenta 1 Unlimited и Magenta 1 Business Unlimited се наменети и за приватни и за деловни корисници.

Неограничен интернет за сите – сите тарифи имаат неограничен сообраќај за целосна слобода во комуникацијата (интернет, СМС и разговори) и корисниците не мора да се грижат за тоа колку трошат.

Роаминг како дома – со новото портфолио, веќе нема грижа за роаминг затоа што е вклучен во сите тарифи (15 GB во Extra тарифата), за корисниците да останат поврзани исто како дома кога патуваат во повеќе од 60 земји во светот.

Гигабитни брзини – преку супериорната оптичка мрежа на Телеком, со новата Magenta 1 Unlimited/ Magenta 1 Business Unlimited, гигабитните брзини стануваат достапни за сите корисници коишто можат да уживаат во квалитетот и брзината на најбрзата мрежа во Македонија.

Ексклузивни Magenta Moments попусти – покрај сите редовни понуди од Magenta Moments, корисниците на новата Magenta 1 Unlimited/ Magenta 1 Business Unlimited ќе добиваат ексклузивни попусти само за нив, со кои ќе можат да заштедат над 600 денари месечно по линија.

Супер Wi-Fi секаде – со WiFi booster, корисниците добиваат беспрекорен интернет насекаде во домот. Уредот овозможува силен и стабилен сигнал во секое ќоше од домот и го прави интернет-искуството беспрекорно и безгрижно.

Од компанијата велат дека новата Magenta 1 Unlimited / Magenta 1 Business Unlimited е креирана според потребите на корисниците во дигиталното време, кои бараат едноставно поврзување, стабилна мрежа, големи брзини и дополнителна вредност.

Според Македонски Телеком, станува збор за комуникациски концепт кој првпат се воведува на домашниот пазар.

The post ТЕЛЕКОМ СО НОВА „UNLIMITED“ ПОНУДА Неограничен интернет и роаминг во сите пакети appeared first on plusinfo.mk.

One Macedonia Telecommunications ДООЕЛ, членка на 4iG Групацијата, на Светскиот мобилен конгрес во Барселона (Mobile World Congress 2026) потпиша договор за испорака и услуги со Ericsson за развој на најнапредната гринфилд 5G самостојна (SA) мобилна мрежа во Северна Македонија.

Договорот ја опфаќа испораката на опрема за Радио-пристапна мрежа (RAN) и за Основната мрежа (Core), вклучувајќи го и целиот релевантен софтвер, услуги за имплементација и долгорочна техничка поддршка. Во рамки на четиригодишниот договорен период, од 2026 до 2029 година, Ericsson ќе биде ексклузивен технолошки партнер за воведувањето на новата 5G SA мрежа на One Macedonia, која ќе вклучи повеќе од 500 5G базни станици во период од четири години. По инвестицијата во фреквенцискиот спектар во јануари, овој договор ја забрзува реализацијата на инвестициската стратегија на 4iG во висина од 100 милиони евра за Северна Македонија.

Церемонијата на потпишување се одржа на MWC 2026, најголемиот светски настан за телекомуникациската индустрија, што ја истакнува меѓународната важност на проектот и улогата на Северна Македонија во регионалната стратегија за проширување на 4iG Групацијата.

Овој договор претставува важна пресвртница по минатогодишното Писмо за намери и формално го иницира распоредувањето на комплетната мрежа во Северна Македонија.

One Macedonia ќе има една од најмодерните 5G Standalone мрежи изградени во регионот. Како гринфилд проект, инфраструктурата може да се дизајнира без ограничувања кои ги наметнуваат наследени системи, овозможувајќи високобрзинска поврзаност, ултраниска латентност, напредна стабилност на мрежата и енергетска ефикасност. Архитектурата на мрежата за корисниците, компаниите и јавните институции ќе обезбеди дигитална платформа подготвена за иднината.

Имплементацијата ќе биде целосно усогласена со обврските дефинирани во лиценцата за фреквенциски спектар која на 23 јануари 2026 година беше доделена на One Macedonia. Лиценцата предвидува 5G покриеност во најмалку еден град до март 2027 година, покриеност на главните транспортни правци до март 2029 година, целосна покриеност на сите градови до март 2031 година, како и национална покриеност до март 2033 година.

– Денес преминуваме од стратегија кон реализација. Наместо надградба на стара мрежа, градиме целосно нова, безбедна дигитална основа, која е отпорна на идните предизвици за Северна Македонија. Со партнерството со Ericsson можеме да обезбедиме нашата инфраструктура да ги исполнува највисоките европски стандарди за перформанси, доверливост и безбедност. Потпишувањето на овој договор на Светскиот мобилен конгрес ја одразува нашата амбиција да ја позиционираме Северна Македонија цврсто во рамки на глобалниот дигитален екосистем – изјави Брано Ѓуровиќ, извршен директор на One Macedonia.

Ericsson, исто така, ја нагласи стратешката важност на партнерството.

– Изградбата на гринфилд 5G Standalone мрежа нуди единствена можност од првиот ден да се обликува отпорна, безбедна и високо скалабилна 5G инфраструктура. Горди сме што го поддржуваме One Macedonia и 4iG Групацијата во воведувањето инфраструктура, која е подготвена за иднината, базирана на најновата технологија на Ericsson и глобалните најдобри практики. Оваа мрежа ќе ја обезбеди основата за напредни дигитални услуги, овозможувајќи иновации, деловен раст и подобрена поврзаност низ Македонија – изјави Антонио Пасарела, раководител за Централна Европа и Северен Балкан, Ericsson.

Договорот опфаќа договор за испорака со Ericsson AB во Шведска и договор за услуги со Ericsson Македонија во Скопје. Оваа комбинација на глобална технолошка експертиза и силни локални капацитети за имплементација обезбедува исклучителна ефикасност во текот на целиот процес на реализација.

Овој чекор го означува почетокот на фазата на извршување на планот за развој на мрежата на One Macedonia, зацврстувајќи ја нејзината посветеност на долгорочни инвестиции, транспарентност и регионална дигитална интеграција.

The post МАКЕДОНИЈА ДОБИВА ЕДНА ОД НАЈМОДЕРНИТЕ 5G МРЕЖИ One Macedonia и Ericsson потпишаа договор за изградба на над 500 базни станици appeared first on plusinfo.mk.